Mbrɛ Ibesi Bɛkyɛ Dasegye ma Ɔayɛ dɛ Nkɔmbɔdzi ara

Onnhia dɛ wɔbɛkã kasasin yi ahyɛ dasegye ase, “Mepɛ dɛ megye me dase,” nna onnhia so dɛ wɔbɛkã, “Wɔ Jesus Christ dzin mu, amen,” dze ewie. Dasegye nye yɛrekã dza yɛgye dzi na yenyim dɛ ɔyɛ nokwar. Ntsi sɛ enye wo fipamnyi ridzi nkɔmbɔ wɔ stiitsi mu a ɔfa nsɛnhia bi a ɔwɔ mu na ekã dɛ “Minyim dɛ Nyankopɔn yɛ mpaabɔ tsiefo na Ɔbɛma ho mbuae a,” ɔno botum ayɛ dasegye a ɔyɛ ndam tse dɛ ma wɔakyɛ no wɔ asɛnkãdaka no do wɔ asɔr. No tum no mmfi kasa no a ɔakyew ho akã no, mbom ofi Sunsum Krɔnkrɔn no a osi nokwar ho pi no (hwɛ Nkyerɛkyerɛ na Ahyɛmudzi 100:7–8).

Sɛ yɛpɛ dɛ yɛkyɛ a, yebenya akwan pii a woetwa hɛn ho ehyia a yɛdze hɛn dasegye no bɛhyɛ daa daa nkɔmbɔdzi mu ma ɔnye no asaa. Mfatoho:

• Sɛ obi bisa fa wo dapɛn ewiei ho nsɛm a. Wo mbuae “Ɔyɛɛ enyigye ara yie,” “Nna Asɔr no nye dze mihia ara.”

• “Sɛ obi kã dɛ due, “Ɔyɛ me yaw dodow,” ber a ɔatse w’abrabɔ mu ɔhaw bi a. Wo mbuae: “Meda wo ase dɛ edwen mo ho. Minyim dɛ Nyankopɔn bɔhwɛ me ma medua mu. Ɔayɛ bi ama me pɛn.”

• Obi kã dɛ: “Mowɔ enyidado dɛ wimu a ayɛ kusuu yi ɔnnkɛkyɛr na ɔadan,” anaa “Bɔɔs no akyɛr dodow,” anaa “Hwɛ ma traffic yi esi akyerdo.” Bia ibobua dɛ “Mowɔ enyidado dɛ Nyame bɛma biribiara ewie yie.”

Yɛtaa nye hɛnho dzi hɛn haw ho nkɔmbɔ. Sɛ obi kã dza worihyia ho nsɛm kyerɛ wo a, bia ibotum akyɛ ber bi a Nyankopɔn boaa wo wɔ wo nsɔhwɛ horow mu na agye dase dɛ Obotum aboa hɔn so. Ewuradze ase dɛ Ɔhyɛ hɛn dzen wɔ hɛn nsɔhwɛ ber mu “ama hom egyina ayɛ adasefo ama me ndaamba, na ama hom ehu nokwar no dɛ Emi, Ewuradze Nyankopɔn, mesera mo nkorɔfo wɔ hɔn amandzehu mu” (Mosiah 24:14). Yebotum egyina ayɛ adasefo ama No ber a yɛgye dase wɔ mbrɛ Osii boaa hɛn wɔ hɛn nsɔhwɛ horow ber mu ho.

Naaso yɛrekyɛ hɛn dasegye mpofirmu ara no botum ayɛ akomatudze ama hɛn mu binom. Akwan wɔ hɔ a yebotum edzi kan ayɛ ho nhyehyɛɛ na “Hom nsiesie homho daa dɛ [ye]beyi ano akyerɛ obiara a obisa [hɛn] enyidado a ɔwɔ hom mu no ase” (1 Peter 3:15).

Odzi kan, yɛreyɛ ahoboa botum akyerɛ mbrɛ yesi abɔ hɛn bra. Ana yeroto nsa afrɛ Sunsum Krɔnkrɔn no aba hɛn abrabɔ mu na yerudua daa daa tsenenee abrabɔ do ahyɛ hɛnankasa hɛn dasegye dzen? Ana yerudua mpaabɔ na kyerɛwsɛm nsũae do yɛama Sunsum no kwan ma Ɔnye hɛn akasa na Ɔama hɛn nsɛmfua a yehia a? Tse dɛ ma Ewuradze tuu Hyrum Smith fo no, “Mma mmper nnhwehwɛ dɛ ebɛkã m’asɛm no, na mbom dzi kan per hwehwɛ dɛ ibenya m’asɛm no, na nkyii wobesian wo tɛkyerɛma (Nkyerɛkyerɛ na Ahyɛmudzi 11:21).

Otsĩa ebien, ereyɛ ahoboa botum ayɛ dɛ erohwɛ kan na esusu akwan horow a ibotum enya no da no anaa dapɛn no mu dze akyɛ wo dasegye. Ibotum adwendwen akwan horow ho a bia wobotum ama wo kwan ma akyɛ dza egye dzi ho dze ayɛ ahoboa.

President Ballard kyerɛkyerɛɛ dɛ, “Yebotum enya ndzɛmba pii ho dasegye dɛ Asɔrmba dze, naaso nokwar fapem binom na ohia dɛ ber biara yɛkyerɛkyerɛ hɛnho nkorkor na yɛkyɛ.” Dɛ mfatoho horow no, ɔbobɔɔ dza odzi do yinom no: “Nyankopɔn nye hɛn Egya na Jesus nye Christ no. Nkwagye ho nhyehyɛɛ no tsim Agyenkwa no No Werdambɔ no do. Joseph Smith na ɔdze Jesus Christ daapem asɛmpa nsanananmu no bɔbɔɔ adze, na Mormon Nwoma no yɛ adansedze dɛ hɛn dasegye no yɛ nokwar.” Ber a yɛkã nokwar yinom a yɛtse no akoma mu no, yɛto nsa frɛ Sunsum no ma Ɔgye dase dɛ dza yɛakã no yɛ nokwar. President Ballard tsĩi mu kãa dɛ “wonnkotum esianka Sunsum no ber a wɔagye Christ ho dasegye krɔngyenn no.”²

Agyenkwa a nna Ɔaberɛ wɔ Ne Samaria akwantu mu no, gyinae dɛ Ɔrohom wɔ bura bi ho na Ohyiaa ɔbaa bi wɔ hɔ. Ɔhyɛɛ nkɔmbɔdzi ase a ɔfa erotow nsu efi bura mu ho. Ɔdze dwumadzi yi a ɔbaa no yɛ no daa daa no, maa Jesus kwan ma Ɔgyee dase faa nkwa nsu na onnyiewiei nkwa a ɔwɔ hɔ ma hɔn nyinara a wɔgye No dzi no ho (hwɛ John 4:13–15, 25–26).

President Russell M. Nelson akã nɛɛs bi ho asɛm a wowiee ɔperehian bi a no mu yɛɛ dzen yɛ no, obisaa aber no Dr. Nelson asɛmbisa. “Dɛn ntsi na nntse dɛ adatserfo nkaa no?” Adatserfo binom a onyim hɔn no tum nya ebufuhyew na wɔkã efĩfĩsɛm ber a wɔreyɛ ɔperehian a ɔyɛ dzen tse dɛm no.

Nkyɛ Dr. Nelson botum ama mbuae wɔ akwan horow mu. Naaso ɔkã no sin ara dɛ, “Osiandɛ minyim dɛ Mormon Nwoma no yɛ nokwar.”

No mbuae no kenyaan nɛɛs no nye no kun ma wosũaa Mormon Nwoma no. Ekyir no President Nelson numaa nɛɛs no. Mfe-du pii ekyir no, ber a President Nelson a ɔahyɛ no Ɔsomafo fofor na ɔrohwɛ stake ehyiadzi do wɔ Tennessee, USA no, ohyiaa nɛɛs yi ara bio enyigye mu a nna enyi nnda. Ɔkãa ne nsakyeree ho asɛm a, oduaa ne dasegye sin ara no do na Mormon Nwoma ne nhyɛdo do, a wɔaboa asakyer nkorɔfo 80 binom so no.³

Mma nnsuro dɛ ibɛkyɛ wo dasegye. Obotum aboa hɔn a esom hɔn no. Ibesi dɛn dze adwenkyerɛ yinom anaa ɔwoara wo dze edzi dwuma dze akyɛ dasegye ndɛ?