Rogon nib Moem ni Ngan Weliy e Tin nibe Michuwaen’uy

Mich rodaed e dani tu’uf ni nge tabab mag ga’ar, “Guba ‘adag ni ngu weliy e tin nibe michuwaen’ug ngay,” ma dani tu’uf ni ngam mu’ nag e noen rom ko fare bugi sbathin ni woed, “U dakan fithngan ku Yesus Kristus, amen.” Tin nib michuwaen’uy ngay e woed ni gabe yoeg e tin ni gamnang nib riyul’. Ere fa’an ngaman ngam guy e gubuliyiror rom ni be gafgow ko ban’en mag ga’ar ngak, “Gumnang ni Got e ma fulweg taban e meybil rodaed,” ab alamrin gelngin ni ku woed ni gabe yoeg e tin nib michuwaen’um ngay u Galasia. Fare gelngin e darma yib u fithik e sbathin nib fel’ ya’an; ya ma yib u dakan fare Kan ni Thothup nibe micheg e riyul’ (muguy ko Doctrine and Covenants 100:7–8).

Fa’an gadaed ba’adag ni ngad weliyed, ma bo’or kanawo’en u chrendaed nrayag ni ngad weliy e tin nib michuwaen’daed ngay ni gubin e rran. Ya sasun:

• Woed ni fthem bee’ ko rogon e biyarnis rom. “Rib mangil,” ni kam fulweg. “Rib mangil ma kugwaen nga Galasia.”

• Bay bee’ nike weliy mornga’agen e tu’ufeg nge tin ni’um mgagawon riy ulan e yafos rom: “Oh siro’.” Mag fulweg: “Kamagar ni gabe lemnigeg. Gumnang ni Got e be giyeg. Ma bay rog ni ku woed somm’on.”

• Ke ga’ar bee’: “Gube athpeg ni ngaygi thil e yifang ta’aboch,” fa “fare Bus ab sasaga’al,” fa “Am sap ko fare kanawo’.” Rayag ni ngam ga’ar: “Gumnang ni ra pi’ Got e ayuw ma gubin mara fel’ rogon.”

Bo’or ngiyal’ ni gadaed ma weliy e tin nibe buchbuch ulan e yafos rodaed. Nap’an nra yoeg bee’ ngom e tin nibe buchbuch rok, ma rayag ni ngam weliy bangiyal’ nike ayuwegnem Got ko tin ni um man u fithik nge michaen’ rom ni gamnang ni ra ayuwegred. Fare Someol e yoeg nra pii’ gelngindaed u fithik fapi mo’owear rodaed “ma nge yog ni ngam nanged nib dugil ni gag, fare Somoel ni Got, e guma ayuweg e gidiiʼ rog u fithikʼ e pi gafgow roraed” (Mosiah 24:14). Rayag ni ngad minged e gidii’ nib michuwaen’daed Ngak’ nap’an gadaed ra yoeg fapi ayuw nike pii’ ngodaed nap’an ni gadaed be gafgow.

Boechi gadaed, weliy e tin nib michuwaen’daed ngay ab momaw’. Bo’or kanawo’en nrayag ni ngaed rin’ed e biney “Mu fal’eged rogmed ni gubin ngiyal ni ngam pi’ed e fulweg ko n’en nra fith be’ [ngomed] ni ngam weliyed u murung’agen e ren’en ni ir e ke l’agan’med [ngay]” (1 Peter 3:15).

Bin Somm’on, ngan fal’eg rogoy ab tu’uf ni ngaed sapgaed ko rogon ni gadaed be par. Gadaed be pining fare Kan ni Thothup ngalan e yafos rodaed nibe gel nag e mich rodaed ni gubin e ngiyal’ ni gadaed be par nib yul’yul’? Gadead be pag fare Thothup ni nge noen ngodaed ma be pi’ e ngodaed e thin nib tu’uf rodaed ko meybil nge be’eg e scriptures? Ni woed ni noen Somoel ngak Hyrum Smith, “Dam gay ni ngam mog e thin rog, machane sum’on mu fil e thin rog, fin ni ngan pithig e blowthem ni ngam mog” (Doctrine and Covenants 11:21).

Bin l’agruw, fal’eg rogoy e krayag ni woed ni gabe sap nga m’on ko re rran ney fa reb e wik nga m’on nrayag ni ngam weliy e tin nib michuwaen’um ngay. Rayag ni ngam fal’eg rogom ko pin’ey ni fa’an garam lamnag rogon nrayag ni ngam weliy e tin nib michuwaen’um ngay.

I fil President Ballard, “Mangil nibay e mich rodaed nib bo’or rogon gathon e Galasia, machane bay e tin sususn ni’ir e def nib tu’uf ni ngad ul’ul’ gaed ngal filed ngodaed. Ni pi’ kanawo’en, ni yoloy: “Got e ir e Chitmangdaed nge Yesus e ir Kristus. Fare tonom ko thapeg e bay ni’ir e ba lukngun ko fare Tonom rok’ fare Tathapeg. Joseph Smith e ir e fulweg ga’ngin fare gospel rok Yesus Kristus, ma fare Babyor ku Mormon e pow riy ni mich rodaed ab riyul’.” Nap’an ni gadaed ra weliy e tiney nib riyul’, ma kad pininged fare Thothup ni nge micheg e tin ni kdogned ab riyul’. President Ballard e ul’ul nge yoeg “fare Thothup e dabiyag ni nge pag ir ni fa’an ba michuwaen’um Kristus.”²

Nike magaf ko malekag u Samaria, fare Tathapeg e yibi tofan nga chren ba luwech me mda’ nag banib ppin. Me tabab nag e thib rorow ni mornga’agen e rran ko fare luwech. Biney e yag rogon ni nge machib Yesus ngak fare ppin ni mornga’agen fare ran nra unum ma dabki sul e belel ngak bayay nma pi’ e yafos n’umngin nap’an ngak’ e pi cha’en nra michuwaen’raed Ngak’ (muguy ko John 4:13–15, 25–26).

President Ruseel M. Nelson ni weliy mornga’agen ba nurse ni fith ngak Dr. Nelson ba duwer nap’an ni mu’ i taflaynag be’. “Mangfan ni gab thil ko tin ba’aray e togta?” Boech e togta ni mnang e pay e dmomow ngorad ma ba yaba’ lugunraed ni fa’an ba alamrin e murwel ko taflay niyed be rinn’.

Rayag ni nge fulweg Dr. Nelson e biney nib thilthil rogon. Ma kemus ni ga’ar, “Ni bachan e gum nang ni fare Babyor ku Mormon ab riyul’.”

Thin nike yoeg e ayuweg fare nurse nge pumo’on rok ngar be’egew farke Babyor ku Mormon. President Nelson e tawfe nag fare nurse. Boech e duw nga tomren, nibay ko mo’olung ko stake conference u Tennessee, USA, ni fanngi mang reb e Apostle, President Nelson e ki mda’ nag fare nurse. Ma ki yoeg ni bachan nikan tawfe nag, ni bachan fare mich rok ni fan fare Babyor ku Mormon, e ke ayuweg 80 e gidii’ kar tawfe gaed.³

Dam rus ni ngam weliy fare mich rom. Rayag ni nge tawa’ath nag e pi gidii’ ni gama pigpig ngoraed. Uw rogon nrayag ni ngam fek e biney fa birom e mich ngam weliy e mich rom ngak’ bee’ e dbay?