Yɛrema Erosom Ayɛ Enyigyedze

Wɔakyerɛ enyigye mu ase dɛ ɔyɛ “dɛwdzi na ahomka atsenkã mapã bi.”¹ Nda a odzi ekyir nkɔnhyɛfo ama enyigye ne farbaa na mbrɛ wosi nya no ho nkyerɛkyerɛ pefee. President Russell M. Nelson akã dɛ, “enyigye a yɛtse no mmfa hɛn abrabɔ gyinabew ho kɛse, mbom ofi fapem a hɛn abrabɔ no tsim do. … Ofi [Jesus Christ] na osian Ɔno ntsi na enyigye ba. Ɔno nye enyigye nyina ne farbaa.”²

Ber a Lehi dzii nkwadua n’aba no bi no, “enyigye kɛse bi” hyɛɛ ne kra mã” (1 Nephi 8:12). Dza odzii kan pɛɛ dɛ ɔyɛ nye dɛ ɔnye hɔn a ɔdɔ hɔn no bedzi aba no bi.

Hɛn pɛ dɛ yɛbɔsom binom no botum dze dɛm enyigye yi bi abrɛ hɛn na hɔn so. Agyenkwa no kyerɛkyerɛɛ N’esuafo no dɛ aba a yɛsow no ber a yɛfam Noho no boa ma hɛn dɛw hyɛ mã (hwɛ John 15:1–11). Yɛreyɛ N’edwuma ber a yɛrosom na yɛrohwehwɛ dze binom aba No hɔ no botum ayɛ enyigyedze sũahu (hwɛ Luke 15:7; Alma 29:9; Nkyerɛkyerɛ na Ahyɛmudzi 18:16; 50:22). Yebotum enya enyigye sũahu yi mpo ber a wɔkõ tsia hɛn na yehyia atsetsee (hwɛ 2 Corinthfo 7:4; Colossaefo 1:11).

Agyenkwa no kyerɛɛ hɛn fasusu a odzi mu dɛ enyigye mapã a ɔwɔ ɔnnkyebo abrabɔ yi mu no, wodua ɔsom mu dze nya. Ber a yɛdze ayamuyie na ɔdɔ a ɔwɔ hɛn akoma mu som hɛn enuanom na nkyerɛbaa no, yebotum enya enyigye sũahu a ɔtra yeenya ahomkã ara.

Akyerɛbaa Jean B. Bingham, Wiadze Mfɛndzanan Relief Society President kyerɛkyerɛɛ dɛ, “Ber a yɛdze akoma mu pɛ fua [erosom] no, yɛbɛbɛn … abɛyɛ Zionfo na yɛnye hɔn a yɛaboa hɔn wɔ osuanyiyɛ anamɔn kwan do no, ebenya ɔdɔ mbordo ho atsenkã.³

Akwan ahorow pii wɔ hɔ a ɔdze enyigye kɛse bɛba hɛn som mu. Adwenkyerɛ kakra ara nye yi:

1. Erosom no, tse wo botae no ase. Siantsir pii wɔ hɔ a yɛdze som. Ewiei no, hɛn mbɔdzembɔ wɔdɛ ɔnye Nyankopɔn no botae “dɛ [Ɔ]dze nyimpa ne bɛkyebo na onnyiewiei nkwa bɔbɔ adze” no asaa. Ber a yɛgye President Russell M. Nelson ne nsato no dɛ yɛboa binom wɔ ahyɛmudzi anamɔn kwan no do no, to mu no, yebotum enya enyigye dɛ yɛkã ho ma wɔreyɛ Nyankopɔn N’edwuma no.⁴ (Ama enya erosom ho botae mbordo no, hwɛ “Ministering Principles: The Purpose That Will Change Our Ministering,” ɔwɔ Sanda 2018 Liahona mu.)

2. Erosom no ma ɔmfa nyimpa ho na ɔnnyɛ edwumayɛ. President Thomas S. Monson taa kaa hɛn dɛ “Mma [hom] mma nsɛnhia a ohia anoyi no nsom bo nnkyɛn nyimpa no a ɔsɛ dɛ wɔdɔ no no.”⁵ Erosom no fa erodɔ nkorɔfo ho, ɔmmfa ndzɛmba a ɔsɛ dɛ eyɛ ho. Sɛ yenyin wɔ ɔdɔ mu tse dɛ mbrɛ Agyenkwa no yɛɛ no a, yebobue hɛn mu yie enya enyigye no a ofi erosom binom mu ba no.

3. Mma mma erosom nnyɛ adze kyinkyinɛnn. President M. Russell Ballard, Asomafo Duebien no hɔn Quorum President Ananmusinyi no, se hɛn dɛ: “Ndzɛmba akɛse dua akwan nketsenketse do ba. … Hɛn ayamuyie na som nketsenketse no bɔboa ano abɛyɛ abrabɔ a Ɔsor Egya ho dɔ ahyɛ mu mã, Ewuradze Jesus Christ edwuma ho etuhoakyɛsom na asomdwee na enyigye atsenkã a yenya ber biara a yɛtsen hɛnho boa hɛnho nkorkor no.”⁶

4. Yi ɔhaw fi erosom mu. Ɔnnyɛ w’asodzi dɛ ebɛyɛ obi no nkwagye ho edwuma ama no. Ɔno yɛ ankorankor no na Ewuradze ntamu asɛm. Hɛn asodzi nye dɛ yɛbɔdɔ hɔn na yɛaboa hɔn ma wɔadan akɔ Jesus Christ a, ɔyɛ hɔn Agyenkwa, no hɔ.

Ɔtɔfabi a nkorɔfo nnya pɛ dɛ wobebisa hɛn mboa a wohia, ntsi yɛrosom etuhoakyɛ mu no botum abɛyɛ dza wohia. Naaso yɛdze hɛnho rehyɛ nkorɔfo do no so nnyɛ kwan pa. Yeribisa kwan ana yɛasom no yɛ adwenkyerɛ pa.

Elder Dieter F. Uchtdorf a ɔkã Asomafo Duebien no hɔn Quorum ho no akã asɛm afa enã ɔhokwafo bi a onyaa ntoburo—na nkyii ne mba no so nyaa yarba no bi ho. Nkyɛ fie a no mu tsew wansann no mu bɛyɛɛ basabasa. Nkyɛnse na ntar fĩ buu do.

Ber noara mu a ɔtsee dɛ wɔakyerdo abor no do no, Relief Society nkyerɛbaa bɔɔ n’abow no mu. Wɔannse dɛ, “Ma yenhu sɛ yebotum aboa a.” Wohun gyinabew no, na wɔsoɛree gyinae yɛɛ dza ɔsɛ.

“Wosiesiee bea a ayɛ basabasa no, dze kan nye nsiesie baa fie no mu, na wɔfrɛɛ nyɛnko bi dɛ ondzi gua a wohia no kɛse no mfa mbra. Ber a wɔdze edwuma no baa ewiei no na wɔkraa no no, wogyaa enã kumabaa no a nna enyisuwa egura no ekyir—enyisɔ nye ɔdɔ enyisuwa a.”⁷

Hɔn a wɔma nye hɔn a wɔgye beenu no nyina nya enyigye ho dɛw atsenkã.

Enyigye, asomdwee, na abodwee a dodow ara yɛdze hyɛ hɛn abrabɔ mu no, ɔno ara no na yetum nye binom kyɛ ber a yɛrosom hɔn no. Dɛwdzi fi Sunsum Krɔnkrɔn no mu ba (hwɛ Galatiafo 5:22 na Nkyerɛkyerɛ na Ahyɛmudzi 11:13). Ɔyɛ dza yebotum abɔ ho mpaa ebisa (hwɛ Nkyerɛyerɛ na Ahyɛmudzi 136:29) na yɛato nsa afrɛ no aba hɛn abrabɔ mu. Adwenkyerɛ kakra ara ɔbɛma yɛdze enyigye ahyɛ hɛnankasa hɛn abrabɔ mu:

1. Kan wo nhyira horow. Ber a eyɛ w’abrabɔ mu nhwehwɛmu no, kyerɛw dza Nyankopɔn dze ehyira wo no wɔ wo journal mu.⁸ Hyɛ ndzɛmba pa a ɔbɔ woho aporɔw no nyina nsew.⁹ Hwehwɛ dza orisiw wo kwan ma nnya enyigye ho atsenkã na kyerɛw akwan horow a edze besiesie no anaa ibɛtse ase yie no to hɔ. Easter ber yi mu no, fa mber hwehwɛ enye Agyenkwa No nya nkitahodzi kɛse (hwɛ Nkyerɛkyerɛ na Ahyɛmudzi 101:36).

2. Yɛ adwendahɔ Ɔyɛ mberɛw dɛ yebenya enyigye mber komm mu a yɛdze hɛn adwen esi biribi pa bi do.¹⁰ Yɛ aso tsie dza ɔdze enyigye brɛ wo (1 Mbermunsɛm 16:15). Obehia dɛ yɛtwe hɛnho fi dawurbɔ mu nsɛm ho ber kakra a, ber a yɛreyɛ adwendahɔ no.¹¹

3. Kwetsir dɛ edze woho bosusu binom ho. Wɔakã no dɛ ahosusui mma enyigye. Paul bɔɔ kɔkɔ dɛ hɔn a “wɔdze hɔnho bu hɔnho, na wɔdze hɔnho to hɔnankasa hɔnho ntsi, wonnyim adze” (2 Corinthfo 10:12).

4. Hwehwɛ ankorankor dasegye. Agyenkwa no kyerɛkyerɛɛ dɛ: “Sɛ hom bisa a, hom benya nyikyerɛ mu nyikyerɛ, nyimdzee mu nyimdzee, ama hom eehu esumadze nye asomdwee ndzɛmba—dza ɔdze enyigye ba, dza ɔdze onnyiewiei nkwa ba” (Nkyerɛkyerɛ na Ahyɛmudzi 42:61).

Ibesi dɛn botum edua wo som do ama wɔ w’abrabɔ mu enyigye no adɔɔ sõ ara yie?.