Mengetmokl ra Odingel loba Deureng

A deureng a mla beketakl el “dolchesiu er a klou lungil reng ma diul a reng.¹ A re profet er chelechal taem a mla meketeklii el kmo a deureng a ngar ker el mei e mekerang a de betik er ngii. “A deureng el dolchesuar er ngii a kekerei a le relii ra blekerdelel a klengar er kid ma bek el tekoi el kirel a moktek ra klengar er kid,” ng melekoi a President Russel M. Nelson. “…a Deureng a mei e leng [Jesus Kristo] a uchul. Ngii a uchul a rokui el deureng.”²

A Lehi er a le kelii sel rodech e ra klengar, e a rengul a mlo mui ra “klou el deureng”(1 Nephi 8:12). Sel kot luluureng er ngii a merous er tial rodech el mo tirkel betik ra rengul.

Sel soad e loldingel ra rebebil eng sebeched el nguu tiakid el teletelel a deureng el merkid e dirrek el mo kirir. A Osobel a ulsisechakl ra re mesiungel el kmo a rodech el de bekdebechii sel de kaudengei kid me Ngii a ngosukid el meskid sel mui el deureng (mesa John 15:1–11). A dongetmokl a urerelel el mesiou e osiik el melai ra rebebil el mo re Ngii a sebechel mo blekeradel ra deureng (mesa Luke 15:7; Alma 29:9; Doctrine and Covenants 18:16; 50:22). Kid a sebeched el melchesuar er tial deureng el molmuut ra dechelbangel ongarem ma ringel (mesa 2 Corinthians 7:4; Colossians 1:11).

A Osobel a ulechotii er kid sel melmalt lokesiu el kmo a tara kot el klou luchul a meral deureng er tial klengar a de betik er ngii e lokiu omesiou. Sel doldingel ra rodam ma rodos er kid el ua Osobel, loba dmolech el beltik el reng e ou beltik el reng el ngara rengud, eng sebeched el melchesuar a deureng lengelakl e ra kuk di duil a rengud.

“Sel domsau [loldingel] el ngara rengud, e kede …mengai el mo chad ra Sion e mo melchesuar ra mesisiich el deureng el obengterir tirkel bla dolngeseu er tir lokiu sel rael ra re kongei el mesiou,” ngolsisechakl a Sister Jean B. Bingham, Relief Society General President.³

Ngarngii a betok el rolel a dengai a meklou el deureng sel doldingel. A ikakid a bebil ra uldasu:

1. Bo modengelii a moktek e ra odingel. Ngarngii a betok el luchul e kede oldingel. Sel ulbengelel, e a urered a kirel tabesul ngii ma moktek e ra Dios “el olengeseu me dil ngar el loba diak a ulebengelel klengar a chad” (Moses 1:39). Sel de kengei ra President Russel M. Neslon el mengemedaol me bo dolngeseu ra rebebil lokiu sel rael ra telbiil, e kede metik ra deureng sel dongetmokl a urelel a Dios.⁴ (A lmuut el betok el moktek ra odingel, e mesa “Llechul Odingel: Sel Moktek El mo Melodech Sel Doldingel.” El ngara Kot el buil 2018 Liahona.)

2. Moruul ra odngeliu el moktek a rechad el lak el lureor. A President Thomas S. Monson a blechoel lomeklatk er kid: “Ke le becherei a mondai el kirel mesmechokl el lmuut el lorechudel er a chad el kired e lou beltik el reng el morngii.”⁵ A odingel a kirel dou beltik el reng el mora rechad, ngdiak el kirel a tekoi el bo doruul. Mesel de mengai elmo ou beltik el reng el ua Osobel, e kede lmuut el mengai el mo semeriar er sel deureng lokiu sel dosiou ra rebebil.

3. Moruul ra odingel el di beot. A President M. Russell Ballard, Lomtechei ra Chelechad er a re Teruich ma terung el Apostol, a dilu er kid: “A meklou el tekoi a mo rengii e loeak a beot e mekekerei el tekoi. … A ikel mekekerei e beot lomeruul ra klechubechub ma omesiou el doruul a toketekii a klengar el mui ra beltik el reng el mora Demad ra Babeluades, blak el reng el kirel a urerel a Rubak el Jesus Kristo, e melchesuar ra budech ma deureng sel bek el taem el de kaingeseu ra odngeled.⁶

4. Mcheridii sel lomeksaik el reng sel moldingel. Ng diak el ngerchelem el loureor er a osobelel a tara chad. Sei e a kuk dolengelel ngikel chad ma Rubak. A ngercheled a ou beltik el reng el mo er tir e olngeseu er tir el mo chemau a Jesus Kristo, el ngii a Osebelir.

A bebil ra taem e a rechad a kmes loker a usbechall el ngesou, me kede bai di odars a ngesou el ngii a locha bai lousbech. Eng di bocha morrimel e ra rechad a diak e lungil el dirrek. A dolengit mel kengei ruchei ra bo doldingel a ungil luldasu.

A Elder Dieter F. Uchtdorf ra Chelechad er a re Teruich ma terung el Apostol a uluchais e ra mesobil el chedil el mlo smecher e ra chicken pox- ma rengelekel me te dirrek el mlo smecher. Tial di blecheol el beches el blai a mlo cherrad e kikiongel. Blatong ma selokel a mlo kedidai.

Sera taem melsal mla mo meringel er ngii, e a rodos ra Relief Society a millengod ra esmerel. Ngdi mlak el dul kmo, “Kedi subedemam alsekum ke mousbech a ngeseu.” Sera lesang a teletael, e tedi mle mereched el mouedikel.

“Te milngetmokl, el meklemelsii e sumecheklii a chelsel tial blai, e mekedongii a sechelirir mel ngai a bebil ra kall lusbechall el mong. Me sera bol merek el mengetmokl e lolmesumech, me te merolang e ngikal ngeasek el chedil a lmangel- el iuosech e ra omereng el saul ma beltik el reng.”⁷

Ma re milesiou me ngkel lousbech a ngeseu el diul mlo melchesuar ra mekekeald el deureng.

Sel dongelou a deureng, budech, uldelalem el reng ra klengar er kid, eng mengai el mo sebeched el kaketmokl ra delongeled sel doldingel. A deureng a mei lokiu a Chedoal el Reng (mesa Galatians 5:22 and Doctrine and Covenants 11:13). Ng tara tekoi el sebeched el meluluuch el kirel (mesa Doctrine and Covenants 136:29) e mengemedaol mel bera klengar er kid. A ikakid a bebil ra uldasu sel dongelou e ra deureng ra chelsel a klengar er kid:

1. Momtab Omngeltengat er Ngii Sel momes ra klengar er kau, e moluches e ra babilngem a ikel tekoi el Dios a mla omekngeltengat er kau er ngii. ⁸ Momtab a ike lungil el meleliuekl er kau.⁹ Bo mungil lomes a ikel luchul eng merers er kau meng diak ke molchesuar ra deureng e mluches a rolel e ke chudechuul malechub e ke moungil el mtab. Chelechal temel a Baskua, e bom sikii a taem e losiik e ra lmuut el mesisiich el deliongel lobengkel a Osobel (mesa Doctrine and Covenants 101:36).

2. Molasem el mengellakl ra uldesuem. A deureng a sebechel beot er ngii el metik er kau sel lak a cherrodech e dil kau e mongellakl er a uldesuem.¹⁰ Bo mungil el lorrenges e ra ikel ngii a meskau a deureng (mesa {1 Chronicles 16:15). Sel kuk lak ke mngara melidiul sel bebil ra taem a ungil mousbech er ngii el melasem el mengellakl e ra uldesuem.¹¹

3. Lak momekesiu er kau er a rebebil. Ng mla medung el kmo sel domekesiu a oridii a deureng. A Paulus a milngelechel el kmo tirkel “di tir el lomekesiu er tir, e di tir el mesaod er tir, a diak el mellomes”(2 Corinthians 10:12).

4. Mosiik a ocholt e lekor er kau. A Osobel a ulsisechakl: “Alsekum kolengit, e ke nguu ocholt ma ongingil, llomes ma ongingil, me kemo medengei a berrotel ma budech el tekoi-el ngii a meskid a deureng, el ngii e a meskid a diak a ulebengelel el klengar”(Doctrine and Covenants 42:61).

Ke mekera e oisisii a deureng el kau a metik er ngii er a klengar kau e lokiu odingel?