Erosom nye Iruhu Binom dɛ ma Agyenkwa no Hu Hɔn no

Bible no kã asɛm a ɔayɛ atsenkã a ɔfa aberantsɛ ɔhonyanyi bi a obisaa mbrɛ obesi benya onnyiewiei nkwa ho asɛm: “Na Jesus hwɛɛ no no, ɔdɔɔ no, na ɔsee no dɛ, Aka wo adze kor: kɔ, kɔtɔn dza ewɔ nyina fa kyɛ ehiafo, na ibenya akoradze wɔ sor, na bra, [bɛfa mbeamudua no], na bɛka mo do” (Mark 10:21).

Ber a Elder S. Mark Palmer a ɔkã Eduosuon ho no sũaa kyerɛwsɛm yi mfe kakra abɛsen no, amonmu ara onyaa asɛm yi n’afã bi ho ntseasee fofor.

“’Na Jesus hwɛɛ no no, ɔdɔɔ no.’

“Ber a mitsee nsɛm yinom no, Ewuradze a Oegyina kakra na [ɔ]hwɛɛ aberantsɛba no, no ho mfonyin bɛhyɛɛ m’adwen mu. Ɔhwɛɛ—tse dɛ Ɔrohwɛ akɔ bun mu na Oehwirow akɔ ne kra mu, dze ehu ne papayɛ na ne ndaamba nkrabea, na oruhu dza ohia no kɛse no so.

“Nkyii nsɛm sin yi ara—Jesus dɔɔ no. Onyaa ɔdɔ mbordo na ayamuhyehye maa aberantsɛba nyimpa papa yi, na osian ɔdɔ yi ntsi na Ɔdze ɔdɔ yi, Jesus bisaa dodow fii no hɔ. Mususu wɔ m’enyi do mbrɛ otwar dɛ aberantsɛ yi a ɔdɔ a ɔtse dɛm efua noho ber a woribisa no ma ɔayɛ biribi a ɔyɛ dzen paapaapa no, tse dɛ ɔntɔn dza ɔwɔ nyina na ɔmfa mma ehiafo. …

“[Mibisaa moho dɛ] ‘Christ no dɔ besi dɛm abɛhyɛ mo mu mã ama [binom] eetum edua mo mu aatse Nyankopɔn no dɔ nkã na woenya pɛ dɛ wɔbɛsesã?’ [Ankorankor a woetwa ehyia moho no], mibesi dɛn botum ahwɛ hɔn wɔ kwan kor noara a Ewuadze dze hwɛɛ aberantsɛ ɔhonyanyi no, a morohwɛ osian hɔn nyimpa ban na nyimpa kor a wobotum abɛyɛ, akyɛn dɛ dza wɔreyɛ nye dza wɔrennyɛ ara? Mibesi dɛn botum abɛyɛ tse dɛ Agyenkwa no ara yie?”¹

Yerusũa ehu mbrɛ binom tse dɛ mbrɛ Agyenkwa no yɛ no dze nhyira kɛse ba. Esusudze binom a obotum aboa hɛn ber a yɛyɛ botae yi ho edwuma nye iyinom.

• Dua Mbɔdzembɔ do Hu Hɔn Yie
  Bɔ mbɔdzen dɛ ebohu nkorɔfo atra dza ɔda edzi wɔ enyido ara. Hu dɛ erekyekyer nkitahodzi no ɔgye mber na mbɔdzembɔ enyimpi mu. (Hwɛ Dzifuu 2018 Erosom ho Fapem nkyerɛwee “Building Meaningful Relationships” ma ɔnyɛ mboa.)

• Hwehwɛ Wankasa Wo Mu
  Yɛ ahwɛyie wɔ atsɛmbu a ereyɛ no enyidahɔ mu anaa ma enyi nnda ho no. Hyɛ adwen nsusui a ereyɛ wɔ binom ho na bɔ mbɔdzen dɛ ebɛtse w’atsenkã a ewɔ ma hɔn no ase.

• Kwetsir Atsɛmbu
  Hu dɛ nnyɛ nyimpa ne gyinabew na ɔkyerɛ no bo a ɔsom. Fa woho dɛ egyina n’ananmu na susu mbrɛ ibesi bɛpɛ dɛ obi bohu wo sɛ ɔwo na ewɔ gyinabew noara mu a. Yɛdze obi ne nsanmuyi na no suban rotɔ nkyɛn efi ne nkrabea krɔnkrɔn ho no botum aboa hɛn ma yehu hɔn dɛ mbrɛ Agyenkwa no bohu hɔn no.

• Bɔ Mpaa dɛ Ebɔdɔ Hɔn
  Taa bɔ hɔn dzin fa bɔ mpaa ma hɔn na serɛ abotar a edze botu anyɛnkoyɛ mapã mpon. Mpaabɔ mu ara hwɛ mbrɛ wo som tse. Ana ɔson dza ereyɛ na dza wohia ankasa a?

Jesus nye nkorɔfo pii a wɔwɔ abrabɔ gyinabew horow mu hweer Ne mber, ahonyafo, ehiafo, ahwɛdofo, na ɔmamfo. Nna binom taa bu No atsɛnkyew ber a wɔhwɛ No dɛ ɔyɛ ɔbrɛfo anaa onnyi gyinabew nwanwa biara a. “Na sɛ yehu no a, onnyi ahoɔfɛw biara a ɔbɛma no ho ayɛ hɛn akɔndɔ. … Adasa buu no enyimtsia, na wɔpoow no” (Isaiah 53:2–3).

Akyerɛbaa bi kyɛɛ asɛm yi a ɔfa mbrɛ yebesi bosũa ahwɛ fipamfo bi tse dɛ mbrɛ Christ bɛyɛ.

“Nna Julia (wɔasesã dzin no) tse bɛn me na ɔyɛ dɛ mbrɛ onnyi anyɛnkofo biara. Dabiara na ɔayɛ basaa a no bo efuw. Naaso, mobɔɔ adwen pɔw dɛ mebɛyɛ ne nyɛnko. Nnyɛ enyido nyɛnko ara, mbom nyɛnko brɛbo. Ber biara a muhun no no, menye no kasae na mekyerɛɛ m’enyigye wɔ dza ɔreyɛ mu. Nkakrankakra, menye no benyaa anyɛnkoyɛ ho atsenkã, a ɔdze enyigye hyɛɛ m’akoma mu.

“Da kor bi, meyɛɛ m’adwen dɛ mebɛsera Julia na mebisa no ne siantsir a ɔnnkɔ asɔr.

“Musũaa dɛ onnyi ebusua anaa ebusuafo a wɔtse bɛn. No nuabanyin kor a, ɔtse ekyir ekyir no, nye no nya nkitahodzi da kor wɔ afe mu no mu, wɔ foon do. Ber a mitsiei no a oruhue n’ayawdzi, ebufuw na abagura a ɔfa n’ebusua na Asɔr no ho no, ayamuhyehye na ɔdɔ atsenkã ma akyerɛbaa yi bɛhyɛɛ mo mu dzendzenndzen ampa ara. Metsee ne yaw na abagura horow no. Muhun mbrɛ n’abrabɔ esi ayɛ ankonam ara yie. Nna ɔyɛ dɛ mbrɛ metse kasasin bi wɔ m’ekyir kommyɛ mu dɛ: ---’Mo so Modɔ no. Dɔ no na bu no.’

“Metsenaa hɔ na mitsiei no kɛpeem dɛ onnyi biribiara bio kã. Metsee ɔdɔ na ayamuhyehye atsenkã maa no. Iyi yɛ akyerɛbaa a onnyim dabiarada mbrɛ ɔtse dɛ obi bɔdɔ no no. Mpofirmu ara metsee no ase ara yie. Medaa no ase dɛ ɔmaa me kwan ma meseraa no, na medze dɔ na obu fuaa no dze gyaa no hɔ. Onnkohu mbrɛ dɛm nsera no sii kenyaan me no dabiarada. Ɔsor Egya ebue m’enyiwa na Ɔakyerɛkyerɛ me dɛ mubotum dze ayamuhyehye mbordo etum adɔ binom. Mesi nketse wɔ me pisi mu dɛ merennyɛ ne nyɛnko nko, mbom mebɛyɛ ebusua so ama no.

Ɔyɛ adze krɔnkrɔn dɛ obi bue wo kwan dze ba n’abrabɔ mu. Yɛdze mpaabɔ, abotar, na Sunsum no mboa no, yebotum esũa dze Christ su enyido-adzehu ayɛ dɛm.