Te Mwakuri n Ibuobuoki Bon Tarakiia Tabeman n ai aron are e Karaoia te Tia Kamaiu

Iai te karaki man te Baibara are rongorongon te rorobuaka ae kaubwai are e titiraki bwa e na kanga ni karekea te maiu are akea tokina: “Ao E taraia Iesu, ao E tangiria, ao E taku nakoina, Ai ti teuana te bwai are ko tuai ni koro raoi iai, nako kabo am bwai nako, ao angania akana aki kaubwai, ao e na reke am bwai i karawa iai: ao nako mai irirai” (Mareko 10:21).

Ngke e kamatebwaia te koroboki ae tabu aei Unimwaane S. Mark Palmer man te Kooram n te Itingaun tabeua te ririki n nako, iai mwakoron te karaki ae e aki iangoia mai imwaina ao n te tai ae waekoa e taraa n rangi ni kakaawaki.

“‘E taraia Iesu ao E tangiria.’

“Ngkana I ongo taeka aikai, te tamnei ae maiureirei ae kaona au iango iroun ara Uea e toki ao n taraa te rorobuaka aei. Taraia—n aron taraakina n te aro ae nano ao n ninianako nanona, ni kinaa tamaroana ao ana konabwai naba, n ai aron naba ataakin kainnanona ae rangi n rootaki iai.

“Ngkanne taeka aika a bebete—Iesu e tangiria. Iai namakinan te tangira ni mwamwannano ao n nanoanga ibukin te rorobuaka aei, ao ibukin te tangira aei ao ma te tangira aei, e mwaiti ae titiraki Iesu ibukina. I katamneia te bwai ae riai n namakinaki ibukin te rorobuaka aei bwa e namakina rababan te tangira e ngae ngke e butiaki bwa e na karaoa te bwai ae kaangaanga bwa e na kabooinako ana bwai nakoia ake a kainnano. …

“[I bon titirakinai] ‘N na kanga ni kaonaki n ana tangira Kristo bwa e aonga [tabeman] ni kona n namakina ana tangira te Atua rinanou ao tangiran te kan bitaki?’ N na kanga ni kona n taraia [aomata nako ake irarikiu] n aron naba te kawai are te Uea e taraa te rorobuaka, n taraia bwa antai ngaiia ao a na riki n aekakira, nakon ae tii ibukin te bwai are a karaoia ke are a aki karaoia? N na kanga n riki n aron te Tia Kamaiu?”¹

N reiakinaki n taraia tabeman n aron are e karaoia te Tia Kamaiu ni uoti kakabwaia. Aikai tabeua iango ake a kona n ibuobuoki ngkai ti kaai ni mwakuriia te kouru aei.

• Kataia ni Kinaia
  Mwakuri korakora ni kinaia aomata riaon riki kawai aika onoti man koaua. Ataia bwa katean te reitaki e bon anaa te tai ao te mwakuri korakora ni koaua. (Taraa rongorongon Reirein te Mwakuri n Ibuobuoki Aokati 2018 “Katean Reitaki aika iai Bukiia” ibukin te ibuobuoki.)

• Tirotiroa Arom
  Kakauongo nakon motikitaeka ake ko karaoi ma bwaninin ataakina raoi ke n akea te ataibwai iai. Atai mwiin taeka aika koaua ake ko karaoi ibukiia tabeman ao kataia n ota bwa bukin tera iai am namakin ibukiia n te kawai are ko karaoia.

• Katoka te Motikitaeka
  Ataia bwa kaangaanga aki bairea aron kakawakin tamnein te aomata. Iangoia bwa ngkana ko mena n aia kaangaanga ao iangoia bwa aekakira aron ae e na taraiko iai temanna. Kaokoron ana rinerine ao anuan temanna man kakawakin bonganana ma ana konabwai ae mairoun te Atua e kona ni buokiira n taraia n aron are e na karaoia te Tia Kamaiu.

• Tataro bwa ko na Tangiriia
  Tataro ni katoa tai ibukiia n araia ao ibukin te taotaonaki n nano ni katea te reitaki ae koaua. Taratara ma te nano n tataro bwa ko na kanga ni buokiia. Iai te kaokoro imarenan te bwai ae ko karaoia ma te bwai ae a rangi ni kainnanoia?

E kabanea Ana tai Iesu ma aomata n anua ni maiu aika a kakaokoro, ake a kaubwai, ake a kainnano, taan motikitaeka, ao aomata aika boni kaangai naba. N taainako boni Ngaia te aomata ae bure motikan taekana irouia aomata ngke a taraia ao aron kaotan Maiuna ae kainnano ke e aki kakawaki arona. “Ngkana ti taraia ao akea naba raoiroin matana ae ti na tangiria iai. … E riribaki, ao ti aki mutiakinna” (Itaia 53:2–3).

Te aine ae tibwaua te karaki ibukin reiakinan taraakiia kaain rarikina n aron Kristo:

“Julia (e bitaki te ara) e maeka irarikiu ao n taraa n ae akea raoraona. E taraa n nanokawaki n tainako ao n unun. N aki tabe ma anne, I baireia bwa N na riki bwa raoraona. Tiaki n ae tii te ikikina, ma te rao ni koaua. I taetae nakoia ngkana I nooria ao ni kaota kukureiu n te bwai are e karaoia. Ni karaurau, I karaoa te namakin ni iraorao ma ngaia, e uota te kimwareirei inanou.

“N te bong teuana, I baireia bwa N na kawara Julia ao n titirakinna aron ana babaire n aki roroko n te taromauri.

“I reiakinna bwa akea ana utu ke ana utu ni kaan. Tii mwaanena ma tarina, bon mwaanena are e maeka n te tabo ae raroa, e rereitaki ma ngaia n te tareboon tii te taina n te ririki. Ngke I ongora ngke e bwaebwaeta nanona ni korakaina, unna, ao rawawatan nanona ibukin ana utu ao te Ekaretia, te namakin ae akea kaairuana n te nanoanga ao te tangira ibukin te aine aei e kaoti nakoiu n ae korakora. I namakina marakina ao rawawatan nanona. I ataia ae e maroaa inanon maiuna. Taraan ae kanga I ongo te kibuntaeka ae rau mai ibukiu: ‘I tangiria naba. Tangiria ao karinea.’

“I tekateka ao n ongoraa ni karokoa are akea te bwai ae e na taekinna. I namakina te tangira ao te nanoanga ibukina. Aei te aine ae e aki ataia bwa aekakira te namakin n aron ae ko na tangiraki iroun temanna mai mwaina. N te tai ae waekoa I oota raoi irouna. I karabwa ngkai e kariaia bwa N na kawaria, ao imwaain ae I kitanna I rabwatia ma au tangira ao au karinerine nakoina. E na bon aki ataia bwa mwaitira rootakiu ibukin rokou irouna. E a tia Tamau are i Karawa ni kabwanina ataakina ao n reireinai bwa iai au atatai n tangira ma te nanoanga ae rikirake. I tokanikai ngke I baireia n aki tii riki bwa raoraona ma n riki naba bwa ana utu.”

Bon te bwai ae tabu n riki bwa mwakoron temanna nako nanon maiun temanna. Ma te tataro, te taotanaki n nano, ao ana ibuobuoki te Tamnei, ti kona n reiakinna ni karaoia n aron ana kantaninga Kristo.