Pigpig Ni Yibe Guy e Gidii’ Ni Woed Rogon fare Tathapeg nibe Guy Raed

Fare Bible e weliy mornga’agen ba mo’on nib fla’ab ni fith ko uw rogon nrayag ni nge thapeg e yafos ni manemus ngak: “Me changar Yesus ngak nike runguy, me ga’ar ngak, Ka ba’ ta’a ban’en ndawori yag rom: Mman ngam, pi’ ni chuway’ urngin ban’en ni ba’ rom, ma ga fek e salpiy riy ngam pi’ ngak e pi’in yad ba gafgow, ma aram e ke yag e fla’ab ngom u tharmiy: ma ga yib, ngam un ngog” (Mark 10:21).

Nap’an Elder S. Mark Palmer ko fare Medlip i Ragag ni fil e biney e scriptures boech e duw kafram, guy ban’en ko re yat ney nib thil.

“‘Me changer Yesus ngak nike runguy.’

“Nap’an kug rung’ag e pi thin ney, me yib ya’an ko tafney rog fare Somol nibe soen me changar pumo’on ney. Changar—ni woed nri be sap nge yin’ e ya’al rok, ni be guy fal’ngin nge tin nrayag rok, ni woed ni be sap ko tin nib tu’uf rok’.

“Woed fare bugi thin—Yesus nike runguy. Ke thamiy e tu’ufeg nge murnguy ni fan ngak ere mo’on ney, ma bachan fare tu’ufeg rok nge ko biney e tu’ufeg, Yesus e fith ngak ni nge rrin’ boech. Gube sap ngay ko rogon ni thamiy ere mo’on ney nike yeleg e tu’ufeg nap’an ni yibe fith ngak ni nge rrin’ ban’en ni rib momaw ni nge chuway urngin e chugum rok me pi’ ngak e pi’in yad ba gafgow. …

“[Mug fith ngog] ‘Uw rogon nrayag ni nggu suguyeg ko fare tu’ufeg rok Kristus ere reb e [gidii’] rayog ni ngar thameyed fare tu’ufeg rok Got udakaen’ nigeg mi yaed a’dag ni ngar thil gaed?’ Uw rogon ni nggu changar [ko gidii’ nibay u chereg] ni woed rogon ni sap fare Somol ngak fare mo’on nib fla’ab, ni be guy raed nge tin nrayag ni ngar mangad, ma gathi kemus ni tin ni yaed be rrin’ fa tin ndar rrin’ed? Uw rogon nrayag ni nggu woed fare Tathapeg?”¹

Fil rogon i guy e gidii’ ni woed rogon nibe guy raed fare Tathapeg ra fal’eg wa’athan daed. Ba’aray boech ban’en nrayag ni nge ayuweg daed ngad rrin’ed e biney.

• Mu Nang Salpan Raed
  Mu gay rogon ngam nang salpen e gidii’ ni gathi kemus ni tin ba’aray ban’en nib mom i weliy. Tafnayem riy ni ra ngan gelnag e tha’ e bagel e murwel riy. (Mu guy ko fare August 2018 Ministering Principles article “Building Meaningful Relationships” nge ayuwegnem.)

• Mu Sap Ngom
  Mu sap ko pin’en ningam pufthin nag e gidii’ riy ko tin ni be yib ko tafney rom nge tin nde mnang. Mag tafnayem ko pin’en ni gabe tafney nag ngak facha’ mag gay rogon ngam nangfan ni gabe thamiy e tiney ngoraed.

• Dab mu Judge
  Mag tafnayem riy ni n’en ni be buch e darma dugliy fal’ngin facha’. Mu tayem ulan e magawon roraed nge mag tafney nag ko uw rogon ni garam a’dag bee’ ni nge guyem ni fa’an gabay ko giney. Mel’eg u but e n’en nima rrin’ facha’ nge tin kar dugliyed ni ngar rrin’ed ko tin ni yaed manang nib mangil nge fal’ngin raed e rayag ni nge ayuweg daed ngad guyed raed ni woed rogon ni be guy raed fare Tathapeg.

• Meybil ni ngar Tu’uf Gaed Rom
  Mog fithngraed ufithik e meybil ni gubin ngiyil’ nge gumaen’ ni ngam thapegned e tha’ nib mangil. Magsap ko pi pigpig rom ufithik e meybil. Bay thilin e tin ni gabe rrin’ nge tin nibay nib tu’uf roraed?

Yesus e paer u fithik e gidii’ nib thilthil rogon e yafos roraed: tin nib fla’ab, tin nib gafgow, tin ni ma gagiyeg, nge gidii’ ni t’ab thal. Ma baga’ ni’i judge nag e gidii’ nap’an ni yadra sap Ngak nge rogon fna ba gafgow e par rok. “Ra ni guy ma dabi unan’uy ngak, dariy ban’en nib tolang ara bfel’ ya’an ni ngad adaged ni ngad chagnargad ngak… Kad darifan niged, ma kad dabuyed” (Isaiah 53:2–3).

Reb e ppin e weliy mornga’agen rogon ni guy e buguliyiror rok ni woed rogon ni be guy raed Kristus:

“Julia (kan thiliyeg fithngan) i paer nib chuchgur ngog ma woed ndary e bitir rok. Gubin ngiyal’ ma woed nib damomow fa puwan’. Dariy fan e biney, kug dugliy u wun’ug ni nggu mang e fagar rok. Ni gathi kemus ni yug reb e tafagar, machane reb e fagar nib mangil. Kug non ngak ko ngiyal’ ni kug guy ma guma ayuweg ko tin nibe rrin’ ni ba a’dag. Buchuw ni buchuw, fare tha’ romow e ke gga’, nib falfalan’ug ngay.

“Reb e rran ngay, mug wan ni ngu nang salpen Julia mug fith ngak’ ko mangfan ni dakri ma un ko missa.

“Kug nang ni dariy gidii’en e tabinaew rok fa bee’ nib manang nib chuchgur ngak. Kari mus ni ta’areb walagen, nib pagal e ma paer nib palog, nike mus ni ma non ngak ta’abiyay ulan ta’areb e duw. Nap’an ni gube motoyil ngak ko tin ni be yog nike dubuy, tin nike pawn’ ngay, nge tin ni dabin ni mornga’agen e tabinaew rok’ nge fare Galasia, me yib ba thamtham ko murnguy nge tu’ufeg ngak ere ppin ney ni rib almarin. Kug thamiy e amith nge tin nibe dabuy ban’en. Ma kug nangfan gelngin e kirbaen’ ulan e yafos rok. Ma woed ni kug rung’ag be ni ke non ngog: ’ma kagab tu’uf rog. Mu tu’ufeg mag tay fan.’

“Kug motoyil ngak nge mada’ ko ngiyal’ ni dakriy ban’en ni nge yog. Kug thamiy e tu’ufeg nge murnguy nifan ngak. Irraray reb e ppin ni dani nang ko mang rogon ni nge thamiy nike tu’ufeg bee’. Ma woed ni kug nangfan salpen nib gel. Kug pining e magar ngak ni ke pii’eg kug nangfan salpen, mag mow gamuchmuch mu gog ngak nib tu’uf rog ma gube tayfan. Dariy bi’ed nrayag ni nge nangfan gelngin ni ke ayuwegeg ni bachan ni kug wan kug nang salpen. Ke bing e Chitamangig nibay u Tharmiy owcheg me fil ngog nrayag rog ni ngu tu’ufeg min gga’nag e murnguy rog. Mug dugliy u wun’ug ni gathi kemus ni ngu mang tafagar rok machane ngu mang reb gathon e tabinaew rok.

Ba thothup ni ngan mang bang ko yafos rok bee’. Ufithik e meybil, gumaen’, nge ayuw rok fare Thothup, rayag ni ngad filed rogon ni ngaed rrin’ed ni woed rogon ni rrin Kristus.