Ng Mekerang a De Cherengelii Mel Imol Beluu el Ngara Ikelesia?

Sel domes el meliuekl er a ikal ikelesia er kid, e kede mesterir a rechad el beot eldi me teloi er kid. Sel diak kede dolchesuar er ngii sel molmuut er tirkel kora sebecherir teloi er kid, e te betok el lomelchesiu er tir el lileakl. A okesiultiang e lulekiu a mle omesuub, a kmo te kmeed el tedobech er a re meklou el chad ra Beluu ra Merikel a melekoi el kmo te di tiltang, eloit, malechub e te ileakl ra re telengdelokl.¹

Ng klou a belkul el domelchesiu er ngii sel de ngara ulecherangel. Tiang e a uchetemel a usbeched a rechad, e sel lak kede ngara ulecherangel, eng meringel. Sel de ngara kemikl a sebechel mechelii a reng er a klengit el reng malechub eng ngasech el reng.² Sel dolchesuar me lak kede ngara belsachel, e kede kora mosiik er a basio el lungil er kid. Ng kired e lolngeseu ra re bekl el chad elmo melechesiu el kmo te chedal a ikelesia.

Luldimukl el ua Osobel.

A Osobel a mle ungil klebechel el lokesiul el mengeluoleu e mengesuseu ra re bebil. Sera lolilt er a re Apostol er Ngii, Ngii a dimlak el lomtab a deruchal, te merau, malechub eng ngurelir. Ngii a ulebeltik el reng elmo re ngikel redil ra Samaria el mla ersel ido, lulechais er ngii el kirel a kmong chedaol el diak el ior ra kmo a re Udea a ulemtelub er a rechad ra Samaria. (mesa Johanes 4). Ngii a ulemes er a rengul a chad e diak e lolilt el ua chad a lolilt (mesa 1 Samuel 16:7; Doctrine and Covenants 38:16, 26).

A Osobel a dilung:

“A beches el llach ak nguu el meskemiu, El kemiu a mo kau beltik el reng; eldi uai ngak el betik a renguk er kemiu, me ko mo kau beltik el reng.

“Me tiaikid ea rokui el chad a mo medengei el kmo kom chedak, alsekum eke oubeltik el reng el mora tang me a tang”(Johanes 13:34–35).

Me ngerang sebeched el meruul?

A bebil ra taem eng meringel el domes alsekum a chad a melchesuar el kmong ngara kemikl. Ngomesind ra rechad a diak a ngarang el lolekoi—el diak el kora bleketakl. Engdi sel lokiu a beltik el reng, ma Chedaol Reng el lomekrael, e douedikel elmo omtab, eng sebeched el mesa el kmo ngarngii a kmung techang el melchesuar el diak el belsachal el ngara mitings ma tekoi ra Ikelesia.

A ikel Lolangch el Chad a Melchesuar El Diak el Ngara Belsachal:

Ng dil lmuuk, e a imal a elimetemt malechub eng diomes el bedul iou.
Ng dengchokl er a uriul ra ruum malechub eng di ngiltang el dengchokl.
Ngdiak el ngara ikelesia malechub eng dertang el bong.
Ngdi mereched el merael sel ngarngii a miting malechub eng bebil ra tekoi.
Ngdiak el ngara cheldecheduch malechub eng osisechakl.

A ikang a locha bebil ra olechotel a blekeradel el dirrek, el ua le sekemerur, ng bekikl, malechub eng metacherbesul. A rechedal a ikelesia a melechesiu el ngodech sel le beches el chedal a Ikelesia, te chad er a ngodech el beluu malechub eng siukang er tir, malechub e te mla melechesuar ra direke beches el meringel longarm er a klechad, el ua dertel a chebechiil, kodall ra elsel a telungalk, malechub eng mle mereched el mlo luut el missionarii.

Meng diak el moktek aikang, mel terebengid el loldars a beltik el reng. A ikel de dung ma ikel sebeched el kutmokl a sumechokl a reng el kmo a re bekl el chad a tokubets e usbechal.

A Bebil Rael elmo Uldimukl e Tokubets:

Lak di blechoel el dengchokl e lobengterir a re di osisiu el chad om ngara ikelesia.
Momes el lengelakl er a ikrel a chad el mesa sel elsel a rengul. (A lmuut el komakai el kirel tial tekoi, e mesa “Ministering Is Seeing Others as the Savior Does,” Liahona, June 2019, 8–11.)
Momsau er tir mel ngara cheldecheduch.
Msiotai ra rebebil me bol ta er kau. Ng sebechem el melai er tir me bo ngara ikel tekoi el molatk elmo meruul.
Momes e mdak el meruul a ikel mosisiu er ngii el tekoi.
Lak ke morers er a klausechelei leng ngii el diak el sebechel el kutmokl a ikel sebechem.
Sel mesa tekoi el klungiolel a chad, e bol soam ra bai mo mesaod er ngii malechub e ke mengeroid er kau er ngii.
Mochoti a beltik el reng e meral otengii.
Bol ngarngii a temem el lomdasu el kirel a kmo ngera meral belkul sel de dul kmo a Ikelesia a mora re bekl el chad, el diak ior ra kmo te reua techang. Ng mekerang a de ketmeklii tiang me bol tekoi?

Ngdiak el beot sel dolchesuar el ngera betang ra rechad el ngodech er kid. Ngdi bode blechoel el meruul er ngii, eng sebeched elmo meduch el losiik a klungiol ra klekakerous e soad a ikel lungil el loldars a derta el chad. El ua Elder Dieter F. Uchtdorf er a Cheldebechel er a re Teruich ma terung el Apostol ra lolsisechkl, ra klekakerous er kid a sebechel ngosukid elmo ungil, e dmeu a rengud el chad: “ Mei, mngosukemam el lomekedechor e smisichii a siukang el momekungir, bekururau, e chubechub el mora rkoui el ngelekel a Dios.”³

Klengeltengat e Luldimukl

A Christl Fechter a milukl el mora tara beluu ra uriul er a mekemad ra le temelii a belual. Ngdi mlak el lolekoi a tekoi er ngil beluu e dimlak e lodengelii a ngidil chad er a basio e le bla rengii, meng di mle uchelel eng eroid e di ngiltang.

E mle chad er a Ikelesia, meng tilbir ra rengul e mocha muchel el mora sel beches el ward er ngii. Ng mle bekikl el kmo a bol longedecheduch e a rechad mo diak el sorir el mengedecheduch er ngii malechub e te mesang el mesobil el redil.

Engdi ng mlo kebtech ngii ma rebebil el dimlak el lesang el ngodech e uletkeu er ngii elmo teloi er a cheldebechel ra re sechelirir. Te luldars e lokiu a beltik el reng, e dimlak el meketeket eng mlo mechesang el lolsisechakl er a klas ra Primary. Tirkel ngalk a mle klou el lokesiul a mededais el reng, esel reng el kmo ke sorir e usbechal a silsichii a klaumerang er ngii e ngilsuir e lmuut el mekereklii sel cheloit el klengar er ngii el mesiou el mora Rubak.

Mengetmokl er Ngii ra Bekl el Taem

Sister Linda K. Burton, former Relief Society General President, taught, “First observe, then serve” (Liahona, Nov. 2012, 78). Sel doltirakl er tial losisechakl a sebechel ngosukid el mekdubech a re ua ward ma branch el rokui el chad a ngarngii e usbechal. A ikakid a lmuut el bebil er a uldasu el domes:

Sel de siseb er a elsel a ikelesia, el sebechel e domes el meliuekl e domtab el kmo a Rubak ng soal a bo domsau ra techang el mersel cheldebechel er a re sechelid ersel sils.
A bebil ra taem e kede mengeroid er kid er tirkel ngodech er kid malechub e tulsiseb er a etiteuokel el taem leng metacherbesul er kid a de dung a oberaod el tekoi. Tiang a ua de kora doleakl er tir, me te momdasu el kmo ngerang meng diak a chad el mengedecheduch er tir. SMdengchokl er bita er tir, mou beltik el reng, el ngara rengmiu el loker a ker. Moker er tir el kirel a lomelchesiu er a ikel le chelbangel el longarm e mekerang a bo molngeseu er tir.
A ikel bo dolekoi el tekoi ma ikel losisechekled sel Sandei, eng sebeched el melilt el mousbech a okesiu el lolecholt el kmo a dertal chad ma telungalk el kiei ra kakerous el teletael a sebecherir el ngar er a ebangkelio e oldeu a rengrir eng ngmai a klengeltengat.
A re ngara klas a sebecherir el mukngeltengat sel sekum a re sensei a moldak er a rechad el kakerous a rekrir, belurir, ma teletael ra re telungalk. Kede suub a betok er a rudois el mekedung el chad er a Ikelesia el likel lodengei el tekoi a ngodech er a dodengei.
A rulsisechakl a sebecherir el kutmeklii a selbechakl el basio el mora re bekl el chad me te odars a ikel lodengei sel loltirakl er a ebangkelio. Sel sekum eng ngarngii a mildung, e a sensei a sebechel lungil el henzi el kirel sel tekoi el mlodars. Ma re rechad el ngara klas a mo meklou a rengrir e beot er tir el loldars a lomdasu el tekoi.