Urogon ni Rayog ni ngad ngongliyed e Yilen ko ta’arebnag ulan fare Galasia?

Napan ni gadaed ra sapsap ko ward nge branch rodaed, ma gadaed be guy e gidii’ ni boed nibe un nga fithik e ma’athuk nib moem. N’en ni darni guyed e fithik e pi’in nike un nga fithik e ma’athuk, ma ba’ e pi’in ni yaed ba thay nga wuru’. Boed, ko reb e n’en nikan fil, ni kafin ni pir’eg ma chugur ni gubin e pilal’ u Mariken nike yoeg nike thamiy ni go’ir rok, yaed ba thay nga wuru’, fa kan palog nag raed ko boech e gidii’.¹

Baga’ fan ni ngan un nga fithik e ma’athuk. Ba tu’uf ko gidii’, ma napan ni gadaed ra thay nga wuru’, ma ba amith. Gur ni kam thay nga orel e rayog ni nge sunmeg e kirbaen’ nge domomow.² Napan ni gadaedd be thamiy ni gadaed ba thay nga wuru’, ma baga’ ni gadaed ma gay bang ni rayog ni nge pufpuf rogdaed riy. Ba tu’uf ni ngad ayuweged gubin e gidii’ ngar thamiyed ni yaed mang ko galasia.

Mu’un nigey Ngay ni Boed fare Tathapeg

Fare Tathapeg e ke fil rogon ni ngan tay fan e gidii’ man uneg reb gidii’. Napan ni mel’eg e Apostle Rok, ma darma sap ko rogon raed, salpiy, fa murwel roraed. I tay fan fare ppin nib Samaritan ko fare luweth, nibe micheg ngak Ir nib thothup ni demtrug rogon nima sap e Jews nga but ngak piyu Samaritan (muguy ko John 4. Ke sap nga gumircha’ey ma darma sap nga but ko gidii’ (muguy ko 1 Samuel 16:7; Doctrine and Covenants 38:16, 26).

Fare Tathapeg e ga’ar:

“Nggu pi’ reb e motochiyel nib be’ech ngomed, nge bigimed me t’uf bigimed rok“.

“Fa’anra um pired nib t’uf bigimed rok bigimed, ma aram e urngin e gidii’ ni yad ra nang ni gimed pi gachalpeg” John 13:34–35).

Mang e Rayog ni Ngad Rin’ed?

Boech ngiyal’ ma ba momaw’ ni ngan nang ko mang e be thamiy bee’. Oren e gidii’ e darma yoeg—nib tamilang rogon. Machane u fithik e tu’ufeg, ma fare Kan ni Thothup ni nge gagyeg nigey, nge man na’ab nga’, ma rayog ni ngad nanged napan ni dar pufpuf bee’ u lane mo’olung nge gosgos ko Galasia.

Pow Nib Thay bee’ Nga Wuru’:

Dowef nike chich’iy ir, ni boed pa’ey nikan uchmiy nib mache’che fa owchey nib sap nga buut.
Be paer u tomur ko senggil fa i go’ir nibe paer rok.
Gathi ban’en nibe un nga galasia.
Dabi pared ko gubin e mu’ulung fa gosgos.
Darma un ko sabathin fa n’en ni yibe fil.

Tiney e rayog ni kuboech e pow, ni boech e tamra’, leam nib gel, fa dani pifpuf Chonngin e rayog ni thamiy nib “thil“ rogon napan ni kaffin ra manged chonggin e Galasia nib biech, bee’ ko reb e naam fa yilen, fa kaffini buch e magawon u lane yafas rok, ni boed e mabgol nike dar, bee’ nike yim’ u lane tabinaew, fa kan sul ko mission ni dawori taw ko ngiyal’ ni ngan sul.

Demtrug rogon fan, ma dabin loerloer gaed ni ngad noned u fithik e tu’ufeg. N’en ni gadaed be yoeg nge n’en ni gadaed be rrin’ e rayog ni nge ayuweg e gidii’ nge pufpuf rogon ma yaed ba tu’uf.

Boech e Wo’ ni ngan Pufpuf man Non:

Gathi gubin ngiyal’ ma gabe paer u chiren ta’ab gidii’ u galasia.
Dam kun sap ko rogon ya’an bee’ ngeyog ni ngan gu’ e bin riyul’ ni ir. (Boech mornga’agen e biney, muguy ko “Ministering Is Seeing Others as the Savior Does,” Liahona, June 2019, 8–11.)
Mu’uneg boech e gidii’ ko sabathin.
Pining e gidii’ nge mang bang u lane yafas rom. Mu uneg raed ko gosgos ni ngam ta’.
Gay mag pir’eg e n’en ni ta’abrogon romew.
Dam talegem ni dam cheg ngak bee’ ni bachane dar rrin’ e tin ni ga ba adag.
Napan ni gara guy ban’en nib thil rok bee’, mag adag ni ngam nang ko bin ni ngam siyeg.
Dag e tu’ufeg rom mag yoeg e thin nib mangil.
Mu leam nib fal’ rogon ko mang e yaed be yup’ fan nga’ napan gadaed ma yoeg ni Galasia e fan ngak gubin e gidii’, demtrug rogon ni yaed be athil. Urogon ni ngad n’anggiined e biney nge riyul’?

Gathi gubin ngiyal’ ma ba moem ni ngan pufpuf ko gidii’ nib liyeg daed nib thil ngodaed. Machane ra gay rogon, ma rayog ni ngad cheag gaed i tay fan e tin nib thil man agad e n’en nibe feek bee’ iyib. Rogon nike fil ni Elder Dieter F. Uchtdorf ko fare Ulung ko fare Ragag nge L’agruwi Apostle, ni tin nib thilthil rodaed e rayog ni nge mangil nag daed, ma gadaed falfalen’: “Moey, ngam ayuweg maed ngan toey man pi’ gelngin e gol, nge gol ngak e gidii’, nge runguy ngak gubin pifaak Got.“³

Tawa’ath nima yib ko Gaak

Christl Fechter e yan ko reb e naam ko tomuren e mael nike wagay nag e naam rok. Dani nang e thin roraed nib fal’ rogon ma dani nang bee’ ko gin nima paer riy, ere somm’on ma i kirbaen’ ni go’ir.

Ir nib chonggin e Galasia, e gel nag e tafney rok me tabab i yan ko bin bi’ech e ward rok. I magar nag ni thin rok e ra n’anggin e gidii’ nge dubu’ i non ngak ma rani pufthin nag ni dariy e pumo’on rok.

Machane ke mada’ nag boech e gidii’ ni darni sap gaed ko tin nib thilthil rok mar fagar gaed. Kar daed ngak u fithik e tu’ufeg, me paer ni i ayuw nge sensey nag e class ko Bitir. Bitir e ba mangil ngan sap ngoraed ya dar yaed ma sap ko gidii’ nib thilthil, ma tu’ufeg nike thamiy nge mich rok e gel nag nag ma ke pi’ ir ngak Somoel.

© 2019 ko Intellectual Reserve, Inc. All rights reserved. Kan yoloey u Meriken. Kan micheg nag ko thin nu Ngalis: 6/18. Kan micheg nag i Pilyeg: 6/18. Pilyeg ko Ministering Principles, July 2019. Yapese. 15768 905

Mu Murwel Ngay

Sister Linda K. Burton, Relief Society General President kafram, e ga’ar, “First observe, then serve” (Liahona, Nov. 2012, 78). Biney e thin ni ngan fol riy e rayog ni nge ayuweg daed ngad fal’eged e ward nge branch nge mang e gin nib pufpuf e gidii’ riy. Ba’aray boech reb e gonop ni ngan leam nag:

Napan ni gadaed ra yan nga lang e galasia, rayog ni ngad sap gaed ko mini’ e ra pi’ Somoel ngodaed nge mange fagar rodaed ko re naam nem.
Boech ngiyal’ ma gadaed ma pulo’ ko gidii’ nib thil ngodaed fa pi’in nike magawon ni bachane gadaed be rus ni ngad yoeged ban’en nib tagan. Biney e rayog ni ngar thamiyed ni kar thayed nga orel, ni yaed be leam nag ko mongfan ni dariy bee’ nibe non ngoraed. Sroraed, dag e tu’ufeg, fith e duwer nib yul’yul’. Fith raed ko mornga’agen e n’en nibe buch roraed nge rogon ni rayog ni ngam ayuw.
Lane unom rodaed nge tin ni gadaed be fil ko Madnom, ma rayog ni ngad mele’eged ni ngadrrin’ed e pin’en ni ra dag ni gidii’ nge tabinaew nike magawone rayog ni nge fol ko fare gospel me falfalen’ ko tawa’ath riy.
Chonggin e class e rayog ni nge fal’ wa’athan napan ni ra uneg e senseygubin e gidii’ ko gubin e yangar, naam, nge tabinaew nib thilthil rogon. Bo’or ban’en ni rayog ni ngad filed ko chonggin e Galasia nib yul’yul’ nib thilthil e n’en ni yan u fithik.
Sensey e rayog ni nge fal’eg e gin nib mangil ni fan ko gubin e gidii’ ni nge weliy e n’en nike buch roraed ni yaed be fol ko fare gospel. Gubin ngiyal’ ni yira yoeg ban’en, ma rayog ni nge fulweg thin fare senseynib mangil rogon ko n’en nikan noeg. Ma arame rayog ninge pufpuf e gidii’ u clas ni ngar weliyed e tafney roraed.