Ana Mubotum Aboa Obi ma Ɔasesã?

Wɔbɔɔ hɛn dɛ yebotum asesã. Hɛn ɔnnkyebo asetsena no botae nye dɛ yebenyin akɔ hɛn nkrabea krɔnkrɔn no. Yɛrosom no botae tsitsir kor nye dɛ yɛbɔboa binom ma wɔaba Christ hɔ na wɔayɛ nsesã a ohia ma wɔasan akɔ Ne nkyɛn. Naaso osian hɔn pɛ ntsi, hɛn asɛdze a yɛdze boa hɔn ma wɔabɛyɛ tse dɛ Christ no, ɔtɔ sin.

Adzesũadze esuon a ɔyɛ ndam nye yinom, a ofi Agyenkwa no hɔ a ɔfa mbrɛ yebesi botum aboa binom wɔ hɔn mbɔdzembɔ mu dɛ wɔbɛsesã na wɔabɛyɛ tse dɛ Ɔno ara yie.

1. Mma Nnsuro dɛ Ibɛse hɔn ma Wɔasesã

   Agyenkwa no nna Onnsuro dɛ Ɔbɛse binom dɛ wongyaa hɔn akwan dadaw no ekyir na womfuaa Ne nkyerɛkyerɛ. Ɔsee Peter na James dɛ wongyaa hɔn edwumadze ekyir na wɔmbɛyɛ “nyimpa enufo” (Mark 1:17). Ɔsee ɔbaa no a wɔkyer no wɔ awartõ mu no dɛ “kɔ na mma nnkɛyɛ bɔn bio” (John 8:11). Ɔsee aberantsɛ a ɔwɔ ahonyadze pii no dɛ onngyaa wiadze ndzɛmba ekyir dzi na ɔmbɛka No do (hwɛ Mark 10:17–22). Hɛn so yebotum enya akokodur na ɔdɔ mu ara yɛato nsa afrɛ binom ma wɔayɛ nsesã na wɔabɛka Agyenkwa no do.

2. Hom Nkaa dɛ Hɔnara na Wɔsan Mu Yi dɛ Wɔbɛsesã

   Nsesã kor a Agyenkwa no rohwehwɛ no wonnkotum ahyɛ obi. Agyenkwa no kyerɛkyerɛe na Ɔtoo nsa frɛe, mbom Ɔannhyɛ obiara. Aberantsɛ a ɔwɔ ahonyadze pii no “dze yaw kɔree” (Matthew 19:22). Capernaum hɔ no, N’esuafo no mu pii dze hɔn pɛ “ saan ekyir,” na Obisaa Duebien no dɛ sɛ wɔpɛ dɛ hɔn so wɔkɔ a (hwɛ John 6:66–67). John Onumanyi no n’esuafo mu binom saan mu yii dɛ wɔbɛka Agyenkwa no do, binom so annyɛ (hwɛ John 1:35–37; 10:40–42). Yebotum ato nsa afrɛ binom ma wɔabɛyɛ tse dɛ Ɔno ara yie, mbom yennkotum abɔ nsesã no ho adwenpɔw no ama hɔn. Na sɛ wɔnnyɛɛ adwen dɛ wɔbɛsesã sesei a, onnyi dɛ yɛpa abɔw—anaa yenya atsenkã dɛ yeedzi nkõgu.

3. Bɔ Mpaa dɛ Binom Botum Asesã

   No Ntotɔserɛ Mpaabɔ mu no, Jesus serɛɛ Nyankopɔn dɛ Ɔmfa N’esuafo no nsie mfi bɔn ho, ma wɔabɛyɛ tse dɛ Ɔno na Egya no yie, na Nyankopɔn no dɔ ahyɛ hɔn mã (hwɛ John 17:11, 21–23, 26). Na onyim dɛ Peter behia ahoɔdzen wɔ no mbɔdzembɔ dɛ obenyin wɔ n’asɛdze mu no, Agyenkwa no bɔɔ mpaa maa no (hwɛ Luke 22:32). Hɛn mpaabɔ ma binom botum edzi nyim (hwɛ James 5:16).

4. Kyerɛkyerɛ Hɔn ma Wɔntwer No Tum

   Ɔnam Agyenkwa no nko do na yebotum asesã nokwar mu ara na yenyin akɔ nkrabea krɔnkrɔn no a hɛn nyina wɔ no. Ɔno nye “ɔkwan no, nye nokwar no, nye nkwa no; obi mmba Egya no hɔ, gyedɛ ɔnam [No] do” (John 14:6). Ɔyɛ No tum na obotum ama “ndzɛmba a ɔyɛ mberɛw no ahyɛ dzen” (Ether 12:27). Ɔnam gyedzi wɔ No werdam tum no mu na ɔmaa Alma Kakraba tumii sesãe (hwɛ Alma 36:16–23). Yebotum akyerɛkyerɛ binom ma wɔatwer Agyenkwa no ama hɔn so woeenya N’ahotsew tum no wɔ hɔn abrabɔ mu.

5. Yɛ Hɔn dɛ Nyimpa Ban a Wobotum Abɛyɛ

   Ɔdɔ na ngye ntomu botum enya nsesã ho nhyɛdo tum kɛse. Nna ɔbaa no a ɔwɔ bura ho no nye banyin bi tse a ɔnnyɛ no kun. Ɔyɛɛ Jesus n’esuafo no “ahobow dɛ ɔnye ɔbaa no rekasa” (John 4:27), mbom Jesus dween nyimpa ban a obotum abɛyɛ ho. Ɔkyerɛkyerɛɛ no na Ɔmaa no kwan dɛ ɔnsesã, a ɔyɛe. (Hwɛ John 4:4-42.)

   Sɛ yɛyɛ nkorɔfo dɛ nna mbrɛ wɔtse kyɛn dɛ nyimpa ban a wobotum abɛyɛ a, yɛtwe hɔn ekyir. Mbom, yebotum yɛdze bɔn akyɛ na hɛn werɛ efir mfomdo a apa ho no. Yebotum agye edzi dɛ binom botum asesã. Yebotum ebu enyi egu mberɛwyɛ do na yɛakamfo su pa bia hɔnankasa wonntum nnhu wɔ hɔn mu no “Yɛwɔ asodzi dɛ yebohu ankorankor dɛ mbrɛ wobotum abɛyɛ kyɛn dɛ mbrɛ wɔtse sesei.”¹

6. Ma Wontu Anamɔn a Hɔnara Wobotum Etu

   Nsesã gye mber. Otwar dɛ hɛn nyina “[yɛ]kɔ do nnya abotar kesi dɛ [ye]bedzi mu” (Nkyerɛkyerɛ na Ahyɛmudzi 67:13). Ɔregye dzibew a N’Egya dze ama No ho dase na Oriyiyi hɔn nsɛmbisa horow ano no, Jesus nyaa nkorɔfo ho abotar na Ɔkɔr do kyerɛkyerɛɛ hɔn a wotsia no mpo adze, (hwɛ Matthew 12:1–13; John 7:28–29). Yebotum enya nkaafo ho abotar na yɛahyɛ hɔn nkuran ma woenya hɔnankasa hɔnho abotar.

7. Mma Mmpa Abaw Sɛ Wɔsan kɔ Hɔn Dadaw Mu a

   Christ wui ekyir no, Peter na Asomafo no mu binom mpo sanee kɔr dza nna wɔyɛ no dadaw no (hwɛ John 21:3). Christ kaa Peter dɛ ohia dɛ “ ɔnyɛn [No] nguan” (hwɛ John 21:15–17), na Peter sanee kɔr ɔsom edwuma no mu. Obotum ayɛ mberɛw koraa dɛ yɛbɛsan akɔ akwan dadaw no mu. Yebotum akɔ do dze nkuranhyɛ botooyɛ mu ara ama abamba na nkenyan nsato mu ara yɛakɔ do aka Agyenkwa no do na yɛabɔ mbɔdzen ayɛ tse dɛ Ɔno ara yie.