Ndingamnceda Omnye Umntu Aguquke?

Thina sidalwe sinamandla okuguquka. Ukukhulela kwizinga lethu lobuthixo kuyinjongo yokuphila kwethu kobu bumagad’ ahlabayo. Enye yeembono zethu ekugqibeleni zokulungiselela kukunceda abanye ukuba baze kuKrestu kwaye benze iinguqu ezifanelekileyo zokubuyela kubukho baKhe. Kodwa ngenxa yenkululeko yabo yokukhetha, indima yethu yokubanceda ukuba bafane ngakumbi noKrestu iqingqiwe.

Nazi izifundo ezisixhenxe ezinamandla eziphuma kuMsindisi ezimalunga nokuba singabanceda kanjani abanye kwiinzame zabo zokuguquka nokuba bafane naYe ngakumbi.

1. Musa Ukoyika Ukumema Inguqu

   UMsindisi wayengoyiki ukumema abanye ukuba bashiye iindlela zabo zakudala kwaye bamkele iimfundiso zaKhe. Yena wamema uPetros noYakobi ukuba bashiye imisebenzi yabo kwaye “nibe ngababambisi babantu” (Marko 1:17). Yena wamema umfazi owayebanjwe ekukrexezeni ukuba “hamba, angabuyi wone” (Yohane 8:11). Yena wamema indodana esisityebi ukuba inikezele ngoqhagamshelwano lwayo kwizinto zasemhlabeni kwaye ilandele Yena (bona Marko 10:17-22). Nathi singabanobukroti kwaye sibenothando njengoko simema abanye ukuba benze iinguqu kwaye balandele uMsindisi.

2. Khumbula Ukuba Kulukhetho Lwabo Ukuguquka

   Uhlobo lwenguqu uMsindisi alumemayo alunakuze lunyanzeliswe. UMsindisi wafundisa kwaye mamema, kodwa Yena wayenganyanzelisi. Indodana esisityebi “yemka ibuhlungu” (Mateyu 19:22). KwelaseKapernahm, uninzi lwabafundi baKhe lwakhetha “ukubuya umva,” waze wabuza abalishumi elinambini ukuba bayakuhamba na (bona Yohane 6:66-67). Abanye babalandeli bakaYohane uMbhapatizi bakhetha ukulandela uMsindisi, abanye abazange (Yohane 1:35-37; 10:40-42). Nathi singabamema abanye ukuba bafane njengaye ngakumbi, kodwa asinakubenzela isigqibo sokuba baguquke. Kwaye ukuba bona abakakhethi ukuguquka, akumelanga ukuba sinikezele— kwaye singazivi ngathi sihlulakele.

3. Thandazela Abanye Ukuba Bakwazi Ukuguquka

   Ngelixa lomthandazo wakhe wokulamlela, uYesu wacela uThixo ukuba abafundi baKhe balondolozwe ekungcoleni, bafane naYe noBawo ngakumbi, kwaye bazaliswe ngothando lukaThixo (bona Yohane 17:11,21-23, 26). Kwaye esazi ukuba uPetros wayeyakudinga amandla kwiinzame zakhe zokukhula kwindima yakhe, uMsindisi wamthandazela (bona Luka 22:32). Imithandazo yethu kwabanye ingenza umahluko (bona Yakobi 5:16).

4. Bafundise Ukuba Bathembele Emandleni Akhe

   KungoMsindisi qha apho singaguquka khona ngokwenene kwaye sikhulele emandleni obuthixo esinawo sonke. Yena “uyindlela, inyaniso, ubomi: akukho namnye uzayo kuBawo, engezi [ngaYe] (Yohane 14:6). Ngamandla aKhe “angenza izinto ezibuthathaka zisuke zomelele (Etere 12:27). Yayilukholo olo emandleni eNtlawulelo yaKhe olwathi lwenza u-Alma Omncinane ukuba aguquke (bona Alma 36:16-23). Nathi singafundisa abanye ukuba bathembele kuMsindisi khon’ ukuze nabo babenamandla aKhe acokisayo ebomini babo.

5. Baphathe Ngendlela Abangaba Yiyo

   Uthando nolwamkelo zingaba zezona mpembelelo zinamandla zoguquko. Intokazi eyayisequleni yayihlala nendoda eyayingengomyeni wayo.” Abafundi bakaYesu “bamangaliswa kukuba athethe nomntu oyinkazana” (Yohane 4:27), kodwa uYesu wayekhathala kakhulu malunga nento eyayi ngabayiyo. Yena wayifundisa kwaye wayinika nethuba lokuba iguquke, kwaye yenjenjalo. (Bona Yohane 4:4-42.)

   Xa siphatha abanye ngendlela ebebe yiyo kunokuba ngendlela abangaba yiyo, singababambezela ngasemva. Endaweni yoko, singaxolela kwaye silibale iimpazamo ezidlulileyo. Singakholelwa ukuba abanye bangaguquka. Singabubetha ngoyaba ubuthathaka kwaye sibone iimpawu ezintle ekusenokwenzeka ukuba bona abaziboni kubo. “Sinoxanduva lokubona abantu hayi ngendlela abayiyo kodwa gxebe ngento abangaba yiyo.”¹

6. Bavumele Bahambe Ngesantya Sabo

   Inguqu ithatha ixesha. Sonke kufuneka “siqhubekeni sikumonde side [thina] sigqityeleliswe” (Iimfundiso Neminqophiso 67:13). UYesu wayenomonde kwabanye kwaye waqhubeka wafundisa nabo babemchasa, engqina ngendima yaKhe awayeyinikwe nguYe nguTata waKhe kwaye wayephendula imibuzo yabo (bona Mateyu 12:1-13; Yohane 7:28-29). Nathi singabanomonde nabanye kwaye sibakhuthaze ukuba babenomonde ngabo.

7. Unganikezeli Ukuba Babuyela Kwiindlela Zakudala

   Emveni kokuba uKrestu eswelekile, nkqu uPetros nabanye babaPostile babuyela kwizinto ababeziqhelile (bona Yohane 21:3). UKrestu wakhumbuza uPetros ukuba wayedinga “ukondla izimvu [zaKhe]” (bona Yohane 21:15-17), kwaye uPetros wabuyela ekulungiseleleni. Kungabalula kakhulu ukubuyela kwiindlela zakudala. Singaqhubeka sixhase ngenkuthazo enobunono kwakunye nangezimemo eziphenjelelweyo zokuqhubeka ukulandela uMsindisi kwakunye nokuzama ngokuzimisela ukufana naYe ngakumbi.