Mbrɛ Sunsum Krɔnkrɔn no Besi Botum (na Ɔaboa) Wo ma Asom

Bisa Kwankyerɛ. Ɔsor Egya pɛ dɛ yedua mpaabɔ do nye No nya nkitahodzi. Mpaabɔ nntwe hɛn mbɛn No nko, mbom otsim “nhyira a Nyame pɛ dɛ Ɔdze ma hɛn naaso ogyina dɛ yebebisa do.”² Akyerɛbaa Cordon kãa dɛ, “Ber a yɛbɔ mpaa na yɛhwehwɛ tse hɔn akoma ase no, megye dase dɛ Ɔsor Egya bɛkyerɛ hɛn kwan na No Sunsum nye hɛn bɔkɔ.”³

Mma Nntweɔn Nkenyan bi. Tu Anamɔn. Fa “enyimpi yɛ” adze (Nkyerɛkyerɛ na Ahyɛmudzi 58:27), na ibohu dɛ wo mbɔdzembɔ botum enya kwankyerɛ na wɔakrɔn. President Dallin H. Oaks, Ɔpamfo a Odzi Kan wɔ President Odzi Kan na n ’Apamfo mu kãa dɛ, “Yɛrokɔ kan asom na yɛayɛ hɛn edwuma no yɛ kwan a yɛdze fata nyikyerɛ ne nyae.” “Me kyerɛwsɛm adzesũa mu no, mahyɛ no nsew dɛ nyikyerɛ dodowara a ɔba Nyame ne mba hɔ no, ɔba ber a woetu ananɔm, nnyɛ ber a wɔtsena ase wɔ hɔn efiefi mu rotweɔn Ewuradze ma Ɔakã anamɔn a wondzi kan ntu no.”⁴

Fa Mormon n’afotu no. Onnhia dɛ yɛtwentweɔn na yɛhaw hɛnho dɛ adwen bi a yenya no yɛ nkenyan anaa ɔnnyɛ. Nnyɛ ber a yɛwɔ Mormon no kwan tsiabaa a wɔdze hu no: Sɛ adwen bi kenyan wo dɛ yɛ papa na gye Christ dzi anaa boa binom ma wɔaagye Christ edzi a, ibotum ehu dɛ ofi Nyankopɔn (hwɛ Moroni 7:16)

Mma Nnhaw woho wɔ ho. Elder Jeffrey R. Holland a ɔkã Duebien no hɔn Quorum ho no kãa dɛ, “Huruw tɔ nsutae no mu na bor. Bor nkɔ hɔn a wɔwɔ ehiadze no hɔ. Mma nketsenketse nnkyir hom nndwendwen dɛ hom mfa hom ekyir mbor anaa hom ndɔ esukɔ. Sɛ yedzi fapem nhyehyɛɛ no a wɔakyerɛ hɛn no do, yɛfa asɔfodzi nsaafee n’akwan, na yɛhwehwɛ Sunsum Krɔnkrɔn no kwankyerɛ a, yennkedzi nkogu.”⁵

Ntsɛmara. Akyerɛbaa Susan Bednar (Elder David A Bednar a ɔkã Asomafo Duebien no hɔn Quorum ho ne yer) yɛ fasusu mapã wɔ nkenyan ndzido do. Elder Bednar kyɛɛ dɛ, “Ɔabɔ mpaa “ebisa sunsum enyiwa a ɔdze bohu hɔn a wɔwɔ ehiadze no,” ɔhwɛ mboanofo no mu na ɔtaa dɛ “onya sunsum mu atsenkã a onunu no dɛ ɔnkɛsera anaa ɔmfrɛ nyimpa bi pɔkyee wɔ foon do.” “Na sɛ Akyerɛbaa Bednar nya nkenyan a ɔtse dɛm a, ntsɛmara odzi do na ɔyɛ aso. Ɔtaa dɛ onyia no ase ‘amen’ wɔ ne mpaabɔ ekyir noara no, ɔnye abasirba no bɛkasa anaa oefua akyerɛbaa bi, anaa sɛ okodu fie a, ntsɛmara ɔfa foon na ɔfrɛ.”⁶

Akokodur mu ara. Suro dɛ wɔbɔpow hɛn anaa fɛr, yɛnnsɛ bi anaa yɛrehaw binom ho nkã-tse botum esiw hɛn kwan ma yɛnnkɔsom ntsɛmara. Elder Gerrit W. Gong a ɔkã Asomafo Duebien no hɔn Quorum ho no kãa dɛ, “Mber na akwan ahorow mu no, yenya nkã-tse dɛ yɛtɔ sin, yennyim, annhwɛ a yɛmmfata.” “Naaso wɔ hɛn nokwar mbɔdzembɔ mu dɛ yɛbɔdɔ Nyankopɔn na yɛasom hɛn nyɛnko no, yebotum atse Nyame no dɔ na nkenyan a yehia ma hɔn na hɛnara hɛn abrabɔ no wɔ akwan fofor krɔnkrɔn mu.”⁷

Onuabanyin bi kyɛɛ mbrɛ nna ɔrotwentweɔn dɛ ɔbɔkɔ akɛsera ɔbaa bi a nkyɛ oruku noho no no kun. Naaso ewiei no, ɔnye kun no puei kedzidzii. “Ber a mekãa dɛ, ‘Nna wo yer pɛ dɛ oku no ho no. Ɔno bɔbor wo do. Ibɛpɛ dɛ ikã ho asɛm a?’ ɔkyɛɛ dɛ osũii ara yie. “Mber tsiabaa no a yedzii kokoa na akoma mu nkɔmbɔ na yenyaa nkitahodzi nwanwa.’’⁸