Ana Ereyew Erosom n’Afã Tsitsir Yi a?

Bonnie H. Cordon, Wiadze Mfɛndzanan Young Women President no, boa hɛn ma yɛtse ase dɛ ohia dɛ yehu hɔn a yɛsom hɔn no—nnyɛ dɛ yebohu hɔn adzesoadze na aperdzi horow nko mbom hɔn ahoɔdzen, talent horow na hɔn konyimdzi. Ɔkãa dɛ yehia dɛ yɛyɛ “ɔkatakyi na kokoamu nkɔmbɔdzifo—obi a onyim hɔn gyinabew na ɔbɔ hɔn abamba wɔ hɔn enyidado na ahwehwɛdze horow mu.”¹

Nguan na mpɔnkye abɛbusɛm mu no, Agyenkwa no kãa dɛ hɔn a wobohu hɔn wɔ Ne nsa nyimfa no bebisa dɛ: “Ewuradze, dabɛn na yehun wo dɛ ɔkɔm dze wo, na yɛmaa wo edziban, anaa nsukɔm dze wo, na yɛmaa wo anondze?

“Dabɛn na yehun wo dɛ eyɛ hɔho na yɛfaa wo kɔr fie?’’ (Matthew 25:37–38).

Akyerɛbaa Cordon kãa dɛ “Enuanom na nkyerɛbaa, asɛntsitsir no nye yehun.” “Atseneneefo no hun hɔn a wohia no osiandɛ nna wɔroweɔn na wɔrohwɛ. Hɛn so yebotum ayɛ ɔweɔmfo enyiwa dze aboa na yɛama awerɛkyekye, yɛahyɛ fã na yɛahwɛ hɔn ndaamba mpo.”²

Hyɛ konyimdzi akɛse na nkumabaa ho fã. Obotum ayɛ yɛrudua kokoram yarba anaa awargyaa mu, yɛrohwehwɛ edwuma fofor anaa yeruhu asopatsee a ɔayew, bosoom kor rutwa hɛn tsir do fi ber a dɔfo bi fii mu anaa yerutwa dapɛn kor a yenndzi esikyire.

Frɛ ma nkamfo, fa krataasin a akyerɛw do kɛma, anaa wompue nkedzidzi. Ber a yɛbɔmu kyɛ hɛn nhyira, yɛtsena ase wɔ enyisɔ mu, na yɛhyɛ fã wɔ binom hɔn nhyira na konyimdzi ho no, yedzi “dɛw wɔ hɛn nuanom hɔn enyigye ho” (Alma 30:34).

Ɔtɔfabi a yɛnye binom ridzi dɛw no kyerɛ dɛ yɛroboa hɔn ma woehu siantsir horow a ɔsɛ dɛ wodzi dɛw—a nkõdzen anaa enyigyedze biara a ɔba hɛn abrabɔ mu mmfa ho. Nokwar no ara dɛ Ɔsor Egya nyim hɛn na Ɔayɛ krado dɛ Obepegya hɛn no botum ayɛ enyigye kɛse ne farbaa.

Ibotum aboa binom ma woehu Ewuradze ne nsa wɔ hɔn abrabɔ mu ber a erekyɛ mbrɛ esi ehu no woara w’abrabɔ mu. Ahobrɛadze mu ara kyɛ mbrɛ Ɔsor Egya esi aboa wo ma edua wo haw horow mu. Dase yi botum aboa binom ma woehu na wɔada mbrɛ Oesi aboa hɔn no edzi (hwɛ Mosiah 24:14).

Ɔyɛ yaw dɛ, ɔtɔfabi a yetwa dɛwdzi a hɛnankasa yebotum nye binom edzi do, nkankara ber a yɛnngye dza yɛwɔ dze ma no anaa hɛn gyinabew a yɛwɔ mu wɔ abrabɔ mu no nndzi yie. Nkyɛ yɛbedzi dɛw wɔ obi n’enyigye mu no, mbom yɛyɛ ntõtõho. Na dɛ mbrɛ Elder Quentin L. Cook a ɔkã Asomafo Duebien no hɔn Quorum ho kyerɛkyerɛɛ no: “Yɛdze nhyira horow tõtõho a, mbrɛ ɔtse biara obepia enyigye akyen. Yennkotum enya enyisɔ na enyitan wɔ ber kor noara mu.”³

Elder Jeffrey R. Holland a ɔkã Asomafo Duebien no hɔn Quorum ho no bisaa dɛ: “Yebesi dɛn botum edzi dɛm su a ɔwɔ hɛn nyina mu yi do no konyim?” “… Yebotum akan hɛn nhyira pii no na yebotum yɛakamfo binom hɔn ndzeyɛɛ pa no. Dza oye koraa no, yebotum asom binom, dwumadzi a ɔkrɔn ma akoma no ara yie a wɔakyerɛ pɛn no.”⁴ Nkyɛ yɛbɛyɛ ntõtõho no, yebotum akamfo hɔn a yɛsom hɔn no. Yɛnkyɛ dza ɔyɛ hɛn enyisɔ mbordo wɔ hɔn anaa hɔn ebusua ho.