Dza Borɔnya Asɛm no Kyerɛkyerɛ Hɛn fa Erosom ho

Ahohɔdan ɔhwɛdofo no fomee dɛ oenngya kwan amma Agyenkwa no, naaso onnyi dɛ yɛyɛ dɛm mfomdo no! Yebotum egya kwan wɔ hɛn akoma mu ama Agyenkwa no ber a yɛrema hɛn nuambanyin na nkyerɛbaa kwan wɔ hɛn edzidzi pon ho, hɛn efiefi mu na hɛn afrenhyiadzi nhyehyɛɛ mu. Ebusua afrenhyiadzi nhyehyɛɛ horow dodowara botum ayɛ dɛw yie na wɔayɛ nkaadze mpo yie ber a yɛnye binom kã ho dzi. Daiana na n’ebusua wɔ afrenhyiadzi nhyehyɛɛ bi a wɔto nsa frɛ obi ma ɔnye hɔn bedzi Borɔnya. Mumu bosoom biara mu no, wɔpɛnsampɛnsam na wosi gyinae wɔ nyimpa a wɔbɛpɛ dɛ wɔbɔto nsa afrɛ no ho.² Bia w’ebusua botum ahyɛ afrenhyiadzi nhyehyɛɛ a ɔtse dɛm yi ase. Bia obi a esom no no bɔdɔ apɛ dɛ ɔbɛkã w’ebusua ho ma wɔabɔ mu atow Borɔnya ndwom a hom pɛ. Bi so a ibotum ama kwan ma obi a n’ebusua nnyi apaamu hɔ no ma ɔaba wo Borɔnya edzidzi pon ho.

Ebɛn kwan pa na yɛdze bɛhyɛ Agyenkwa no ho fã a ɔkyɛn yeridzi Ne fasusu a yɛnye binom kã ho yɛ adze do? Hom nkaa dɛ “Ɔto nsa frɛ hɔn nyinara dɛ wɔmbra ne nkyɛn mbenya ne papayɛ; na ɔmmpow obiara a ɔba ne nkyɛn, bibinyi na borɔnyi, akowa na fahodzinyi, ɔbarimba na ɔbaa; na ɔkaa abosonsɔrfo; na hɔn nyinara yɛ adze kor ma Nyame, Jewfo na Amanamamfo no mu biara.” (2 Nephi 26:33). Ma kwan na nye binom nkã ho nyɛ adze.

Ɔyɛ dɛ ɔsɛ fata dɛ nguanhwɛfo na wɔkã hɔn a wobedzi kan ekekyia Agyenkwa abɔdomaba no. Tsetse nkɔnhyɛfo no frɛɛ Jesus Christ “Israel Guanhwɛfo” (Ndwom 80:1) na “Oguanhwɛfo a ɔbɔ asaase nyinara do” (1 Nephi 13:41). Na Christ Nankasa see dɛ “Emi nye oguanhwɛfo pa no: minyim medze” (John 10:14). Yenyim hɛn dze na yɛroweɔn hɔn no nye nguan-nhwɛdo na erosom dɛ mbrɛ Agyenkwa no som no ne fã tsitsir.

Borɔnyaber no ndzɛmba pii wɔ hɔ a ɔgye nhwɛ, nkandzea hyɛnhyɛn nye esiesiedze afɛɛfɛw. Naaso bia dza ɔyɛ fɛw papaapa wɔ afe no mu no nye yɛkaa dɛ yebetsim hɔn a yɛsom hɔn no do na yɛaweɔn hɛnara hɛn nguankuw. Yɛroweɔn no botum ayɛ erehyɛ obi apɛdze nsew anaa iribisa obi n’akwanma ho nhyehyɛɛ. Yɛwɛɔn ber a yehu binom hɔn ehiadze na yɛboa ma wonya—dza ɔda edzi ara yie nye dza ɔnnda edzi no.

Ber a Cheryl no kun Mick kãa beebi awerɛfir mu no, obubuu no korakora. Na ne Borɔnya a odzi kan a kun no nnkã noho rebɛn no, ankonamyɛ dwuruuw no. Ndaase mu ara, nna n’akyɛrɛbaa Shauna a ɔrosom no no, wɔ hɔ. Shauna nye no kun, Jim, too nsa frɛɛ no mpɛn pii wɔ akwanma mpue ho. Wɔhyɛɛ no nsew dɛ Cheryl no sor atar ayɛ dadaw na wosii adwen ngyinae dɛ wɔbɛyɛ ho biribi. Aka nda kakra ma Borɔnya aso no, Shauna na Jim tɔɔ sor atar fofor fɛɛfɛw akyɛdze bi dze maa Cheryl. Nna wonyim dɛ Cheryl wɔ sor atar ho honandua mu ehiadze a ɔbɛma no hyew na n’awerɛkyekye na anyɛnkoyɛ ho nkã-tse ehyiadze so. Wɔbɔɔ mbɔdzen hyɛɛ dɛm ehiadze yinom no mã dɛ mbrɛ wobotum na wɔkyerɛɛ fasusu fɛɛfɛw a ɔfa mbrɛ hɛn so yebotum aweɔn hɛn nguankuw.³

“Hom mma yɛnkɔ” yɛ enyigye mu nsato! Nguanhwɛfo no anndwen ho dɛ ɔbɛyɛ ɔbrɛ ama hɔn anyɛnkofo no dɛ wobotu dɛm kwan no. Wenntu kwan annkɔ Bethlehem kommyɛ mu. Enyigye mu ara wɔsesee hɔnho dɛ, “Hom mma yɛnkɔ!”

Yennkotum ato nsa afrɛ hɛn anyɛnkofo dɛ wɔmbra ma yɛnkɔhwɛ Agyenkwa abɔdomaba no dze, naaso yebotum ato nsa afrɛ hɔn ma wɔatse Borɔnya sunsum no (anaa Christ sunsum no) ber a wɔnye hɛn rosom no. Bonnie L Oscarson, a nkyɛ ɔyɛ Wiadze Mfɛndzanan Young Women President no see dɛ, “Kwan a wɔfa do ma Borɔnya sunsum no yɛ kɛse nye yɛtsen hɛn nsamu ma hɔn a woetwa hɛn ho ehyia no na yɛdze hɛnho ma.”⁴ Susu dɛ ikitsa kyɛnɛl. Nokwar ara binom botum ehu adze na woenya wo kyɛnɛl no mu mfaso, naaso susu hyewbɔ a wɔbɛtse sɛ edze wo kyɛnɛl no sosɔ hɔn kyɛnɛl na ema hɔn kwan ma wosuo kan no mu ma hɔnankasa hɔnho a.

Christ Nankasa kyerɛkyerɛɛ dɛ hɔn a wɔkã No do no benya nkwa kan no (hwɛ John 8:12). Yɛrosom dɛ mbrɛ Ɔyɛe no nye kwan kor a yebotum akã No do na yeenya dɛm anohoba kan no. Ntsi to nsa frɛ binom ma wɔnye wo nsom na dua do kyɛ kan no! Ibesi dɛn na ɔwo na hɔn a esom hɔn no botum abɔmu asom? Hom botum abɔmu ayɛ hom edziban a wɔpɛ anaa hom botum dze adzekyɛdze kumabaa anaa nsɛnsin bi ama obi a n’enyi nnda. Hom botum abɔmu enya kan a ofi woridzi Christ som fasusu do.

Ɔyɛ mberɛw dɛ ebosusu ehurusi a nguanhwɛfo no nyae ber a wɔnye nkorɔfo dodowara a wɔbɛkãa nsa no kyɛɛ Christ N’awoo nwanwa ho asɛm no. Sor abɔfo bɔɔ ho dawur dɛ, Messiah no a wɔhyɛɛ ho nkɔm no aba! Ɔwɔ ha! Nokwar, erekyɛ Agyenkwa ho nsɛmpa no no yɛ Awoe asɛm no n’asɛntsir mapã no. Abɔfo toow ndwom. Nworaba kyerɛɛ kwan. Na nguanhwɛfo daa no edzi kɔr ekyir ekyir.

Yebotum dze hɛn ndze akã Borɔnya asɛm no ber a yɛrekyɛ asɛmpa no na yɛregye Agyenkwa no ho dase no. Akyerɛbaa Jean B. Bingham, Wiadze Mfɛndzanan Relief Society President kyerɛkyerɛɛ dɛ, “Sɛ inya kwan dɛ ibegyina hɔ ama Agyenkwa no wɔ wo som mbɔdzembɔ mu a, bisa woho dɛ, “Mibesi dɛn botum nye ankorankor anaa ebusua yi akyɛ asɛmpa no ne kan no? “Ebɛnadze na Sunsum no rekenyan me dɛ menyɛ?”⁵

Adwenkyerɛ kakra a ibotum esusu ho ber a ehwehwɛ ehu mbrɛ ibotum akyɛ wo dasegye wɔ Agyenkwa na N’asɛmpa no nye yinom:

• Hwehwɛ kyerɛwsɛm bi a ɔkyerɛ w’atsenkã wɔ Agyenkwa no ho anaa ma ɔkã siantsir a ewɔ ndaase ma No no. Enye hɔn a isom hɔn no nkyɛ.

• Kyerɛw text anaa social media nkaabɔ a Borɔnya video kã ho. Ma ɔyɛ ahomka ara yie binom wɔ ChurchofJesusChrist.org!

• Kã nkaadze soronko bi anaa afrenhyiadzi nhyeyɛɛ bi a ɔkaa wo Christ, kyerɛ wo nyɛnko.

Nya gyedzi dɛ Sunsum Krɔnkrɔn no bɛgye wo dasegye ho nokwar no dase, tse dɛ ma Ɔgyee dase kyerɛɛ Simon na Anna dɛ abɔdomaba Jesus nye Agyenkwa no (hwɛ Luke 2:26, 38).

President Dieter F. Uchtdorf a ɔkã Asomafo Duebien no hɔn Quorum no ho no kãa dɛ: “Ama yɛdze enyidzi nokwar mu ama [Jesus Christ] ne wiadze yi mu mbae no, otwar dɛ yɛyɛ dza Ɔyɛe no na yɛtsen hɛnho wɔ tsema na ehumbɔbɔr mu ma hɛn mfɛfo.” Iyi yebotum ayɛ no daa daa, wɔ nsɛnkã na nyɛe mu. Hom mma yɛma iyi mbɛyɛ hɛn Borɔnya afrenhyiadzi nhyehyɛɛ, a bea a yɛwɔ mmfa ho—dɛ yɛbɛyɛ ayamuyie ara yie, yɛdze bɔn bɛkyɛ ara yie, yebokwetsir atsɛmbu, na yɛnye hɔn a wohia no akyɛ dza yɛwɔ a ebu do no.”⁶