Reirein te Mwakuri n Ibuobuoki, Ritembwa 2019

Tera ae Reireiniira Karakinan te Kiritimati iaon te Mwakuri n Ibuobuoki

“Aio te bong ae tatangiraki n te ririki. Anenei anene aika titebo tangiia; E a kaan roko tain te Kiritimati. Karakina rongorongon bungiakin Iesu, ngke, te merimeri, e roko nakon te aonaaba” (“The Nativity Song,” Aia Boki n Anene Ataei, 52).

Tamnei

ministering

Kabwarabwarakina man Ana Tiibu te Teei te Atua, iroun Walter Rane

Te tai ni Kiritimati bon te bong ae e tamaroa ngkai tiibu, taan kawakin tiibu, nen aia tabo n amwarake maan, ao taian itoi a manga karekei nanoia aika boou. A riki ni kakawaki inanon manga karakinan te bwai ae moan te kakawaki ae e riki inanon rongorongon te botanaomata: bungiakin Iesu Kristo. A mwaiti utu aika a karaoa tamnein aron bungiakin Iesu ni mweengaia. Tabeman a katuruturua ni wareka te karaki ibukin Bungiakina ke n ira buakon karaoan te kamataku iaona. N aron karakin ni kabane Kristo, te rongorongo ibukin Bungiakina a onrake n reirei aika ti kona n reiakin iaon te mwakuri n ibuobuoki, iaon tibwaan Otana ni kaotaa te aonaaba. “Karakinan te Kiritimati bon karakinan te tangira,” e taku Beretitenti Henry B. Eyring, Te Kauoman ni Kauntira n te Moan Beretitentii.

“… Ni karakinan bungiakin Kristo, ti kona n noria ao n namakinna bwa antai Ngaia ngkoa ao antai Ngaia ngkai. Anne e kabebetei uotara inanon kawaira. Ao e na kairiira bwa ti na aki tabeakiniira ibon iroura ma ti na kabebetei uotaia ake tabeman.”¹

“Bwa akea neia n te auti n iruwa” (Ruka 2:7)

E aki tauraoi te tia kawakina te auti ni karekea nen te Tia Kamaiu, ma ti na aki karaoa ae aekakin anne! Ti kona ni katauraoa te ruu ibukin te Tia Kamaiu i nanora man katauraoan te tabo ibukiia tarira ao mwanera n ara taibora, ni mweengara, ao n ara katei. Angiin taian katei n te utu a kona n riki ni kakukurei ao n rangi n tiku n ururingaki ngkana ti kairiia tabeman aomata. Daiana ao ana utu iai aia katei ae a kakaoiia tabeman bwa a na kaai ni Kakiritimati ma ngaiia. Ni katoa Ritembwa, a marooro ao ni iangoia bwa antai ae a tangiria ni kaoa.² Tao a na kona am utu ni moana karaoan te katei ae aekakin anne. Tao temana are ko buokia e na bae n tangiria ni kan botaki ma am utu n uaia n anenei kuna ni Kiritimati. Tao ko kona naba ni karaoa te tabo n tain ami katairiki n amwarake n te Kiritimati ibukin are akea ana utu irarikina n te aono anne.

Tera riki te kawai ae tamaroa ni bukamarua te Tia Kamaiu nakon iriiran Ana banna ni katooto ni mwannanoia tabeman? Uringa bwa E kaoiia “ni kabane bwa a na nakoina ao ni katoonga ana raoiroi; ao akea ae totokoia ngkana e nakoina, ae bwatabwata ke ae mainaina, te toro ke ae inaomata, te mwaane ke te aine; ao e uringia aika a beekan; ao titebo aroia ni kabane imatan te Atua, Iutaia ma Tientaire” (2 Nibwaaii 26:33). Katauraoa te ruu ao karika aron te mwamwannano.

“Ao a mena n te aba arei tani kawakin-tibu aika maeka n te tawana aika tan tantani e bong i rarikin aia nanai” (Ruka 2:8)

E taraa n rangi n eti bwa taan kawakin tiibu bon moan aomata ibuakoia aika mwaiti ni kamaura te merimeri ae te Tia Kamaiu. Burabeti rimoa a taekina Iesu Kristo ae te “Tia Kawakinia Iteraera” (Taian Areru 80:1) ao te “Tia Kaawakin Tiibu i aon te aonaba ni kabuta” (1 Nibwaai 13:41). Ao bon Kristo ae kangai, “Boni ngai te tia kawakin tiibu ae raoiroi, ao I ataia au tiibu” (Ioane 10:14). Ataakiia ara tiibu ao tararuakiia bon mwakoron te king n tararua ao te mwakuri n ibuobuoki n aron te Tia Kamaiu.

Ma taian taura aika kiakia ao bwaai ni katamaroa, e bati bwaai aika a na taraaki n tain te Kiritimati. Ma tao te kabanea ni kakanikan inanon te tai aei e na kona ni kuneaki ngkana ti uringa ni bita ara taratara nakoia ake ti buokiia ao n tararuaia oin ara nanai. Te tararua e kona n ae ataakin te bwai ae e tatangiria temanna ke n titirakina temanna aron ana iango ibukin te motirawa. Ti kateimatoa te tararua ngkana ti nora ao ni buoka kainnanoia tabeman—ake a noraki ao ake aki kona naba n noraki.

Ngke e bua kainnaban nei Cheryl, ae Mick, e rangi n rotaki n te rawawata. Ngke e a uakaan te moan Kiritimati n akea ngaia, e a rikirake te maroaa. Te karabwarabwa, bwa te titita n te mwakuri n ibuobuoki ae Shauna e mena ikekei. Shauna ao kainnabana, Jim, a kaoa Cheryl ni mwaitin taian motirawa ni kamaangang. A nora ana kooti Cheryl ae e raeuaki ao a iangoia bwa tera te bwai ae a na karaoia nakoiai. Tabeua te bong imwaain te Kiritimati, Shauna ao Jim a kabooa ana bwai n tangira Cheryl n te Kiritimati: te kooti ae boou ao n tikiraoi. A ataa kainnanon Cheryl n te maiu n rabwata ibukin te kooti ma a ataa naba kainnanona n ana namakin ibukin te karaunano ao raonakina. A riki ngaiia bwa taan bonotii kainano akanne n aia kabanea ni kona ao a katea te katooto ae tamaroa bwa ti na kanga n tararuaia ara nanai.³

“Ao a i taetae tani kawakin tibu i rouia ni kangai, Ti na nako Betereem ngkai” (Ruka 2:15)

“Ti na nako ngkai” bon te kakao ae kakukurei! A aki iangoia taan kawakin tiibu bwa a rangi ni kainnano raraoia ni karaoa te mwananga. A aki n ae a tii nako naba Betereem n ti ngaiia. Ma nanoia ni kukurei a taraiia i bon imarenaia ao a taku, “Ti a nako ngkai!”

Ma ngkai ti a aki kona ni kaoiia raraora n roko n nora te merimeri ae te Tia Kamaiu, ti kona ni kaoiia bwa a na namakina te nano ni Kiritimati (ke tamnein Kristo) ni beku ma ngaira. “Te kawai ni karikirakea te nano ni Kiritimati bon mwannanoakiia ma te nano n tangira te koraki ake irarikira ao n anga ngaira ni buokiia,” e taku Bonnie L. Oscarson, te Beretitenti ni Kabuta ngkoa n te Bootaki n Ataeinaine.⁴ Iangoia ae ko taua te taura te nenea. Tabeman a kona n noria ao ni buokaki n te oota man am taura te nenea, ma iangoa te aabuee are a namakina ngkana ko kabongana am taura te nenea ni kaura aia taura te nenea ao ni kataua bwa ana bon taua aia taura.

Bon Kirsto ae e reirei bwa naake a Iriiria a na karekea te ota ni kamaiu (taraa Ioane 8:12). Ni beku n ai aron are E karaoia bon teuana te kawai ae ti kona ni Iriiria ao ni kukurei n te ota are e a tia n taekinaki n te berita. Ngaia are tibwaua te ota ni kaoiia tabeman ni beku ma ngkoe! Ko na kanga ngkoe ma naake ko buokiia n uaia ni beku? Kam kona n uaia ni karaoa kanamii ae e mamate nanomi iai ke kakubanakoa temanna ma te bwai n tangira ae e uarereke ke te moti n reta. Kam bane ni kona n uaia n namakina te ota are e roko man irirakin ana banna ni katooto Kristo n te mwakuri n ibuobuoki.

“Ao a kaota taekan te tei n taabo nako n aron are a tuangaki” (Ruka 2:17)

E bebete iangoakin kimwareireia ni kukurei taan kawakin tiibu ngke a tibwaua te rongorongo ae kamimi ni bungiakin te Kristo ma aomata aika a rawata. E taekinaki irouia anera, te Mesia are e a kaman taetae ni burabetiaki e a roko! E mena ikai! Ni koauana, tibwauan te rongorongo ae boou iaon te Tia Kamaiu bon te boto ni iango ae bubura ni karakinan Bungiakina. A anene anera. E kaota te kawai te itoi. Ao taan kawakin tiibu a taekinna n taabo nako.

Ti kona ni boota bwanara nakon karakinan te Kiritimati n tibwaua te rongorongo ae boou ao n taekina koauan te Tia Kamaiu. Ngkai e reke tibwangam n tei ibukin te Tia Kamaiu n am kekeiaki n te mwakuri n ibuobuoki, titirakiniko ibon iroum, ‘N na kanga n tibwaua otan te euangkerio ma te aomata aei ke te utu?’” e reirei Titita Jean B. Bingham, te Beretitenti ni Kabuta n te Bootaki n Aine. “Tera ae wirikirikinai te Tamnei bwa N na karaoia?”⁵

Aikai tabeua iango ibukim bwa ko na tarai ngkai ko ukora aron ataakina bwa ko na kanga n tibwaua am koaua iaon te Tia Kamaiu ao Ana euangkerio:

Kakaea te kibu are e kaota am namakin iaon te Tia Kamaiu ke kaota nanom bwa e aera ngkai ko kakaitau Ibukina. Tibwaia ma naake ko karaoa te ibuobuoki nakoia.
Kanakoa te tekiti ke te rongorongo iaon bwai ni kaongora ma te witeo iaon te Kiritimati. Iai aika a rangi n tamaroa iaon ChurchofJesusChrist.org!
Tuanga raraom aron am ururing ae e onoti ke te katei ae e kakaraoaki are e kauringko aron Kristo.

Karekea te onimaki bwa te Tamnei ae Raoiroi e na kaotiota koauan am kkoaua, n aron are E kaota koauana nakon Timeon ao Nei Ana bwa te tei ae Iesu bon te Tia Kamaiu (taraa Ruka 2:26, 38).

“Karinean raoi rokon [Iesu Kristo] nakon te aonaaba, ti riai ni karaoa ae E karaoia ao ni kawariia raoraora ma te tangira ao te nanoanga,”e taku Unimwaane Dieter F. Uchtdorf man te Kooram n Abotoro n te Tengaun ma Uoman. “Ti kona ni karaoia ni katoabong, n te taeka ao te mwakuri. Karika te bwai aei bwa katein ara Kiritimati, n aki tabe bwa ti mena ia—n riki n akoi riki, ni kakabwarabure, ni kauarerekea te momotikitaeka, ni kakaitau, ao ni mwamwannano n tibwauai rakan ara bwai ma naake a kainnano.”⁶

© 2019 by Intellectual Reserve, Inc. All rights reserved. Boretiaki i USA. Kariaiakaki n te Ingiriti: 6/18. Kariaiakaki rairana: 6/18. Rairan te Ministering Principles, December 2019. Kiribati. 15773 859