Tej Ntsiab Cai txog Kev Txhawb Pab, Kaum Ob Hlis Ntuj 2019
Tej Yam uas zaj Dab Neeg Christmas Qhia Peb txog Kev Txhawb Pab
“Nov yog lub caij nyoog txhua leej txhua tus nyiam. Hu ib zaj; caij Christmas tsis ntev los tiag. Hais zaj txog Yexus Nws txoj kev yug los, thaum nws ua mos liab, hauv lub ntiaj teb nyob” (“The Nativity Song,” Children’s Songbook, 52).
Pom qhov meej ntawm Saib Vajtswv tus Me Nyuam Yaj, los ntawm Walter Rane
Lub caij Christmas yog ib lub sij hawm zoo kawg nkaus thaum cov yaj, cov tswv yug yaj, dab nyuj, thiab cov hnub qub muaj lub ntsiab tshiab. Tej no yeej yog tej yam tseem ceeb thaum peb hais zaj dab neeg txog ib qho xwm txheej tseem ceeb tshaj plaws hauv tib neeg zaj keeb kwm: Yexus Khetos txoj kev yug los. Tsev neeg feem ntau tsa cov mlom txog Yexus txoj kev yug los hauv lawv lub tsev. Lwm tus nyeem zaj dab neeg txog Nws txoj kev yug los los sis ua yeeb yam. Ib yam li txhua zaj txog Khetos, zaj dab neeg txog Nws txoj kev yug los yeej muaj tej yam uas peb kawm tau txog kev txhawb pab, txog kev muab Nws txoj kev kaj ci rau neeg ntiaj teb. Thawj Tswj Hwm Henry B. Eyring, tus Pab Cuam thib Ob hauv Thawj Pawg Thawj Tswj Hwm hais tias, “Zaj dab neeg txog Christmas yog ib zaj txog kev hlub.
… Nyob hauv tej zaj txog Khetos txoj kev yug los, peb pom tau thiab paub tias Nws yog leej twg. Ua rau peb tej nra sib zog. Thiab yuav ua rau peb tsis xav txog peb tus kheej thiab xav pab ris nra rau lwm tus.”1
“Tej tsev so, neeg twb so puv tas lawm” (Lukas 2:7).
Tus tswv tsev so tsis tau kho ib qho chaw rau tus Cawm Seej, tiam sis peb tsis tas ua yuam kev li ntawd! Peb yeej kho tau ib qho chaw rau tus Cawm Seej nyob hauv peb lub siab thaum peb npaj chaw rau peb cov kwv tij thiab cov muam nyob rau ntawm peb tej rooj, nyob hauv peb tej tsev, thiab thaum peb ua kab lig kev cai. Tej tsev neeg tej kab lig kev cai yeej yuav zoo dua thiab yuav haj yam nco txog thaum yus nrog lwm tus neeg koom siab. Daiana thiab nws tsev muaj kab lig kev cai caw ib tug neeg nrog lawv nyob thaum hnub Christmas. Txhua lub Kaum Ob Hlis Ntuj, lawv sib tham thiab txiav txim siab tias lawv xav caw leej twg tuaj.2 Tej zaum koj tsev neeg yuav xav ua kab lig kev cai li no. Tej zaum ib tug uas koj mus txhawb pab yuav nyiam koom nrog koj tsev neeg hu tej zaj nkauj Christmas ua ke. Tej zaum koj yuav xav npaj chaw rau ib tug nrog koj noj hmo Christmas, ib tug uas tej zaum tsis muaj tsev neeg nyob hauv koj cheeb tsam.
Yeej tsis muaj lwm txoj kev kom ua koob tsheej txog tus Cawm Seej uas zoo npaum li kev coj raws li Nws tus yam ntxwv txog kev koom siab yom? Nco ntsoov tias Nws caw “txhua tus kom los cuag nws thiab los txais yuav nws txoj kev tshav ntuj; thiab nws tsis txwv leej twg ntawm cov uas los cuag nws, tsis hais cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej; thiab nws nco ntsoov txog cov neeg tsis hwm Vajtswv; thiab txhua tus yeej zoo tib yam rau Vajtswv, tsis hais cov Neeg Yudais los yog Lwm Haiv Neeg.” (2 Nifais 26:33). Npaj chaw thiab tsim kev koom siab.
“Nyob thaj tsam ntawd muaj ib cov neeg yug yaj, lawv mus pw zov lawv cov yaj tom teb, thaum tsaus ntuj” (Lukas 2:8)
Yeej tsim nyog uas cov neeg yug yaj yog thawj cov uas mus ntsib tus Cawm Seej uas yog me nyuam mos liab. Cov yaj saub puag thaum ub hais tias Yexus Khetos yog “Ixayees tus Tswv Yug Yaj” (Phau Ntawv Nkauj 80:1) thiab tus “Tswv Yug Yaj uas kav thoob plaws lub ntiaj teb” (1 Nifais 13:41). Thiab Yexus Khetos hais tias, “Kuv yog tus tswv yug yaj zoo, thiab paub kuv cov yaj” (Yauhas 10:14). Qhov uas peb paub peb cov yaj thiab saib xyuas lawv yeej yog ib feem tseem ceeb ntawm peb txoj kev saib xyuas thiab kev txhawb pab zoo li tus Cawm Seej ua.
Vim muaj cov teeb ci ci thiab tej khoom zoo nkauj, muaj ntau yam uas peb saib tau hauv lub caij Christmas. Tiam sis tej zaum qhov zoo nkauj tshaj hauv lub caij no yeej yog qhov uas peb nco ntsoov kom xav txog cov uas peb txhawb pab thiab saib xyuas peb cov yaj. Kev saib xyuas yog kev nco txog qhaub noom uas ib tug neeg nyiam tshaj los sis kev nug tias nws yuav ua li cas thaum phav hauj lwm. Peb saib xyuas thaum peb pom thiab pab lwm tus raws li lawv xav tau—tej yam uas peb paub zoo thiab tej yam uas tsis yooj yim rau peb pom tau.
Thaum Cheryl tus txiv, Mick, tas sim neej, ua rau nws nyuaj siab kawg nkaus. Thaum txog thawj lub caij Christmas uas tsis muaj nws tus txiv, nws txoj kev kho siab loj tuaj. Zoo siab uas nws tus viv ncaus uas txhawb pab Shauna nyob ntawd. Shauna thiab nws tus txiv, Jim caw Cheryl nrog nkawd mus ua si ntau yam. Nkawd pom tias Cheryl lub tsho loj qub heev thiab txiav txim siab nkawd yuav pab. Ob peb hnub ua ntej Christmas, Shauna thiab Jim twb yuav Cheryl ib lub khoom plig: ib lub tsho loj tshiab thiab zoo nkauj. Nkawd paub txog tej yam uas Cheryl xav tau ntawm sab cev nqaij daim tawv uas yog ib lub tsho loj tiam sis nkawd kuj paub txog tej yam nws xav tau ntawm sab ntsuj plig uas yog kev nplij siab thiab kev koom siab. Nkawd twb ua tib zoo pab raws li nkawd ua tau thiab tau coj yam ntxwv zoo txog qhov uas peb ua tau kom saib xyuas peb cov yaj.3
“Cov yug yaj txawm sib tham hais tias, Peb cia li mus rau hauv lub nroog Npelehees” (Lukas 2:15)
“Peb cia li mus” yeej yog kev caw zoo kawg! Cov neeg yug yaj tsis tau xav tias lawv cov phooj ywg nkees dhau kom taug kev mus li ntawd. Lawv tsis tau mus twj ywm lawv tus kheej rau Npelehees. Lawv xyiv fab ib leeg hais rau ib leeg hais tias, “Peb cia li mus!”
Yog tias peb caw tsis tau peb cov phooj ywg mus saib tus Cawm Seej uas yog me nyuam mos liab, peb caw tau lawv kom paub txog lub hwj huam ntawm Christmas (los sis Khetos lub hwj huam) thaum peb caw lawv nrog peb mus pab lwm tus. Bonnie L. Oscarson, Koom Haum Ntxhais Hluas tus Tuam Thawj Tswj Hwm dhau los hais tias, “Peb yuav tsum muaj siab dawb pab lwm tus nyob ib puag ncig peb kom thiaj li muaj lub hwj huam Christmas ntxiv.”4 Cia li xav zoo li koj tuav ib tug tswm ciab. Lwm tus yeej pom tau thiab txais kev pab los ntawm txoj kev kaj los ntawm koj tsu tswm ciab, tiam sis xav txog qhov uas lawv yuav hnov qhov sov yog tias koj siv koj tus tswm ciab ua rau lawv tus tswm ciab cig thiab cia lawv tuav lawv tus kheej.
Yexus Khetos twb qhia hais tias cov uas coj raws li Nws yuav muaj txoj kev kaj ntawm txoj sia (saib Yauhas 8:12). Kev ua hauj lwm pab lwm tus ib yam li Nws yeej yog ib txoj kev rau peb coj raws li nws thiab txais tau txoj kev kaj uas Nws cog lus tias peb yuav muaj. Yog li ntawd cia li muab txoj kev kaj rau lwm tus thaum koj caw lawv nrog koj ua hauj lwm pab lwm tus! Koj thiab cov uas koj txhawb pab yuav ua li cas kom pab lwm tus? Tej zaum koj nrog lawv npaj zaub mov uas nej nyiam los sis muab ib lub khoom plig me me los sis ib tsab ntawv rau lwm tus. Nyob ua ke nej yuav hnov tau txoj kev kaj uas los ntawm kev coj raws li Khetos tus yam ntxwv pab lwm tus.
“Lawv qhia zaj uas tus tim tswv ceeb tsheej qhia rau lawv hais txog tus me nyuam ntawd” (Lukas 2:17).
Yeej yooj yim xav txog kev xyiv fab ntawm cov neeg yug yaj thaum lawv hais txog txoj moo zoo ntawm Khetos txoj kev yug los rau neeg coob npaum li lawv qhia tau. Cov tim tswv twb los tshaj tawm txog qhov uas tus Mexiyas uas cov yaj saub tau hais txog twb los lawm! Nws yeej los txog lawm! Muaj tseeb tiag, kev qhia txoj moo zoo txog tus Cawm Seej yog ib lub ntsiab ntawm zaj dab neeg txog Yexus Khetos txoj kev yug los. Cov tim tswv twb hu nkauj. Lub hnub qub qhia kev mus. Thiab cov neeg yug yaj twb tshaj tawm mus thoob plaws.
Peb yeej ntxiv tau peb tej lub suab rau zaj dab neeg Christmas thaum peb qhia txog txoj moo zoo thiab ua tim khawv txog tus Cawm Seej. Muam Jean B. Bingham, Koom Haum Niam Tsev tus Tuam Thawj Tswj Hwm tau qhia hais tias, “Thaum nej muaj cib fim sawv tus Cawm Seej cev ua hauj lwm txhawb pab, cia li nug nej tus kheej, ‘Kuv yuav ua li cas kom qhia txog txoj kev kaj ntawm txoj moo zoo rau tus neeg los yog tsev neeg no?’ “Tus Ntsuj Plig tshoov kuv lub siab kom kuv ua dab tsi?”5
Nov yog ob peb lub tswv yim rau koj xav txog thaum koj nrhiav kev paub tias koj yuav ua li cas ua tim khawv txog tus Cawm Seej thiab Nws txoj moo zoo:
-
Nrhiav ib nqe vaj lug kub uas piav txog koj tej kev xav txog tus Cawm Seej los sis qhia vim li cas koj ris Nws txiaj. Cia li qhia rau cov uas koj txhawb pab.
-
Ntaus ntawv los sis xa ib zaj hauv social media nrog ib daim video Christmas. Muaj tej daim video zoo kawg nyob hauv ChurchofJesusChrist.org!
-
Qhia ib tug phooj ywg txog ib yam uas koj nco ntsoov los yog ib txoj kab lig kev cai uas ua rau koj nco txog Khetos.
Muaj kev ntseeg hais tias tus Vaj Ntsuj Plig Dawb Huv yuav ua tim khawv txog qhov tseeb ntawm koj zaj lus tim khawv, ib yam li Nws tau ua tim khawv rau Xime-oos thiab Anas tias tus me nyuam Yexus yog tus Cawm Seej (saib Lukas 2:26, 38).
Txwj Laug Dieter F. Uchtdorf ntawm Pawg Kaum Ob tug Thwj Tim hais tias, “Yog peb xav hwm [Yexus Khetos] txoj kev los rau hauv lub ntiaj teb, peb yuav tsum ua li Nws tau ua thiab muaj siab hlub ncav tes pab peb cov neeg zej zog. Peb ua tau li no txhua hnub, los ntawm tej yam peb hais thiab ua. Thov kom peb muaj kab lig kev cai rau lub caij Christmas li no, txawm peb nyob qhov twg los xij—kom peb ua siab zoo ntxiv, zam txim ntxiv, txhob txiav txim, ua Vajtswv tsaug ntxiv, thiab muaj siab dawb pub peb tej khoom nplua mias rau cov uas xav tau.”6
© 2019 by Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Akiv: 6/18. Pub txhais ua lus Hmoob: 6/18. Kev txhais Ministering Principles, December 2019. Hmong. 15773 295