2019
Ta eo Bwebwenato in Kūriijmōj ej katakin kōj kōn Jerbal in Karejar
Tijem̧ba 2019

Pedped ko an Jerbal in Karejar, Tijem̧ba 2018

Ta eo Bwebwenato in Kūrijmōj ej Katakin Kōj kōn Jerbal in Karejar

“En̄in ej iien eo em̧m̧antata ilo juon iiō. Al juon al; Iien kūrijmōj ej ebaak tok wōt jab to ewaļo̧k. Kwaļo̧k bwebwenato eo em̧ool kōn ļotak eo an Jisōs, ke, āinwōt juon nin̄nin̄, Eaar itok n̄an laļ” (“The Nativity Song,” Children’s Songbook, 52).

Pija
ministering

Komelele jān Lo Lamb an Anij, jān Walter Rane

Tōre in iien Kūrijm̧ōj ej juon iien em̧m̧an ke jiip eo, jabōt ro, im jikin m̧ōn̄ā ko an menin mour, im iju ko em̧ōj aer kwaļo̧k juon meļeļe ekāāl. Raar erom jekjek ko raorōk ilo bar kwaļo̧k juon iaan iien ko raorōk tata ilo bwebwenato an armej: ļotak eo an Jisōs Kraist. Elōn̄ baam̧le ko rej kōm̧m̧ane juon jekjek in ļotak (nativity) ilo im̧ōko im̧wer. Ro jet rej kōm̧m̧ane bwen en juon men aorōk n̄an riit kōn bwebwenato eo kōn ļotak eo An ak bōk kuņaer ilo juon tieta. Āinwōt aolep bwebwenato ko kōn Kraist, bwebwenato eo kōn ļotak eo An ej obrak kōn katak ko jemaron̄ ekkatak kōn jerbal in karejar, kōn kwaļo̧k meram eo An n̄an kōmeram laļ in. Bwebwenato in kūrijm̧ōj ej bwebwenato in iakwe,” Būreejtōn Henry B. Eyring ekar ba, Rikakpilōklōk eo Kein Kajuon ilo Būreejtōnji eo Kein Kajuon.

“… Ilo bwebwenato in ļotak eo an Kraist, jemaron̄ in loe im en̄jake wōn kar E, im wōn E kiiō. Men jab in ekōmeraikļo̧k eddo eo ad. Im enaaj tōlļo̧k kōj n̄an meļo̧kļo̧k kōj make im n̄an kōmeraikļo̧k eddo eo n̄an ro jet.”1

“Bwe ejjeļo̧k jikier ilo im̧ōn ruwamāejet” (Luk 2:7)

Rilale m̧weo eaar likjab in kōm̧m̧ane juon ruum̧ n̄an Rilo̧mo̧o̧r eo, bōtaab jejjab aikuj in kōm̧m̧ane bōd jab eo! Jemaron̄ kōm̧m̧an ruum̧ n̄an Rilo̧mo̧o̧r eo ilo būruwōd kōn kōm̧m̧an ruum̧ n̄an ro jeid im jatid ilo tebōļ ko ad, ilo im̧ōko im̧ōd, im ilo iminene ko ad, Elōn̄ iminene ko an baam̧le remaron̄ kōm̧m̧an bwe en em̧m̧anļo̧k im em̧ool ememļo̧k kōn kobaik armej ro jet. Daiana im baam̧le eo an ewōr juon aer iminene kōn kūrļo̧k juon n̄an pād ippāer ilo Kūrijm̧ōj. Aolep Tijemba, rej ekōnono im jokāālet wōn eo rej kōņaan kūrļo̧k.2 Bōlen baam̧le eo am̧ emaron̄ in ijjino kōn juon iminene ainļo̧k wōt in. Bōlen juon eo kwoj jerbal in karejar n̄an e enaaj kōņaan koba waj ippān baam̧le eo am̧ ilo al al in Kūrijm̧ōj ko rem̧m̧an tata ippami ippān doon. Komaron̄ barāinwōt kōm̧m̧an ruum̧ ilo kōjota in Kūrijm̧ōj eo ami n̄an juon eo me emaron̄ jab wōr an baam̧le ilo eria eo.

Ta juon wāween em̧m̧anļo̧k n̄an keememe e Rilo̧mo̧o̧r eo jān ļoor waanjon̄ak in kakobaiktok eo An? Keememej bwe Ej kūrtok “er aolep n̄an itok n̄an Ippān im bōk leen em̧m̧an eo An; im E ejjeļo̧k Ej kabbōjrak e jān an itok Ippān, kilmeej im mouj, rilokjak im rianemkwōj, m̧aan im kōrā; im E ej ememej ro rejjan̄in ron̄ kōn E; im aolep rej āinwōt juon n̄an Anij, riJu im riAelōn̄ ko jim̧or” (2 Nipai 26:33). Kōm̧m̧an ruum̧ im ejaak kakobaiktok.

“Im ilo āne eo ewōr seperd rej pād ilo jikin wūjooj, im lale bwijin sip ko aer ilo bon̄” (Luke 2:8)

Āinwōt ejetjet bwe seperd ro renaaj kar ibwilijin ro m̧oktata n̄an iakiakwe nin̄nin̄ Rilo̧mo̧o̧r eo. Rikanaan ro etto raar kōnono kōn Jisōs Kraist āinwōt “Seperd in Israel” (Sam Ko 80:1) im “juon Seperd ioon aolepān laļ” (1 Nipai 13:41). Im Kraist Make eaar ba, “N̄a seperd em̧m̧an, im I jeļā ro Aō” (Jon 10:14). Jeļā jip ko ad im lali ej m̧ōttan eo eaorōk an rilale jip im jerbal in karejar āinwōt an kar Rilo̧mo̧o̧r ro kōm̧m̧ane.

Ippānļo̧k tōm̧a ko remeramļo̧k im kein kainōknōk ko, eļap ijo n̄an lale ilo iien Kūrijm̧ōj. Bōtaab bōlen aiboojoj eo eļap tata an iien eo maron̄ loe n̄e jej keememej n̄an ukōtļo̧k kalimjōk eo ad n̄an ro me jej jerbal in karejar n̄an er im mijeļo̧k wōt armej ro ad make. Mijeļo̧k wōt maron̄ in jeļā kōn m̧ōn̄ā eo enno tata ippān juon armej ak kajjitōk kōn karōk ko an juon kōn iien kakkije eo. Jej mijeļo̧k wōt n̄e jej lo im tōpar aikuj ko an ro jet—jim̧or ilo men ko ralikkar im men ko rejjab kanooj alikkar.

Ke ekar jidimkij an ļeo pāleen Cheryl kar jako, Mick, liin eaar lukkuun in jorrāān. Ke Kūrijm̧ōj eo an im̧aan tata ilo an jako ļeo epaaktok, ajimakeke eaar ļapļo̧k. Kam̧m̧oolol, sister in jerbal in karejar eo an Shuana eaar pād ijo. Shauna im ļeo pāleen, Jim, kar kūrļo̧k Cheryl ilo elōn̄ iien itok itak ko ilo iien kakkūje ko. Raar kile nuknuk māņeņ eo an Cheryl em̧or im raar jokāālet n̄an kōm̧m̧ane juon men kake. Jejjo raan m̧okta jān Kūrijm̧ōj, Shauna im Jim raar wiaik juon menin leļo̧k ilo Kūrijm̧ōj an Cheryl: juon nuknuk māņeņ kāāl. Raar jeļā kōn aikuj ko ilo kanniōk an Cheryl kōn juon nuknuk māņeņ bōtaab barāinwōt aikuj ko an ilo en̄jake kōn kaenōm̧m̧an im m̧ōttan. Raar kōm̧m̧ane juon men n̄an kake aikuj kein jon̄an wōt eo rekar maron̄e im kōm̧m̧ane juon waanjon̄ak aiboojoj kōn ekōjkan ad maron̄ mijeļo̧k wōt armej ro ad make.3

“Seperd ro rej kōnono n̄an doon im ba, Kiiō jen ilo̧k n̄an Betleem” (Luk 2:15)

“Kiiō jen ilo̧k” ej juon kūr ekam̧ōņōņō! Seperd ro raar jab ļōmņak bwe ro m̧ōttaer renaaj kar kanooj in kar m̧ōk n̄an etal ilo iaļ eo ļo̧k. Raar jab kanooj kōttōparļo̧k Betleem kōn er make. Raar lem̧ōņōņō in kar oktakļo̧k n̄an doon im ba, “Kiiō jen ilo̧k!”

Ilo ad maron̄ jab maron̄ kajjitōk ippān ro m̧ōttad n̄an itok n̄an nin̄nin̄ Rilo̧mo̧o̧r, jemaron̄ kajjitōk ippāer n̄an en̄jake jetōb in Kūrijm̧ōj eo (ak jetōb eo an Kraist) kōn jerbal ippād. “Wāween eo n̄an kōļapļo̧k jetōb eo an Kūrijm̧ōj ej n̄an kappukōtļo̧k ilo tenkwadik n̄an ro ipeļaakid im leļo̧k kōj make,” Bonnie L. Oscarson, kar Būreejtōn eo Eutiej an Doluul eo an Jiron̄ ro eaar ba.4 Ļōmņakeļo̧k am̧ jibwe juon kāāntōļ. Ro jet em̧ool remaron̄ lo im jeraam̧m̧an jān meram eo an kāāntōļ eo am̧, bōtaab ļōm̧ņakeļo̧k okmāņeņ eo remaron̄ en̄jake eļan̄n̄e kwoj kōjerbal kāāntōļ eo am̧ n̄an tile kāāntōļ eo aer im kōtļo̧k bwe ren jibwe meram eo kōn er make.

Kraist Make eaar katakin bwe ro me rej ļoor E renaaj bōk meram in mour (lale Jon 8:12). Jerbal āinwōt An kar jerbal ej juon wāween jemaron̄ ļoor E im lem̧ōņōņō kōn meram jab in kar kallim̧ur kake. Kōn menin kwaļo̧k meram eo kōn kūr ro jet n̄an jerbal ippam̧! Ekōjkan am̧ im ro kwoj jerbal in karejar n̄an er maron̄ jerbal ippān doon? Ippān doon kom̧ maron̄ jim̧or kōpooj m̧ōn̄ā ko renno tata ippāmi ak kōļo̧kjeņ an juon kōn juon menin leļo̧k edik ak ennaan. Ippān doon kom̧ maron̄ jim̧or en̄jake meram eo me ej itok jān ļoor waanjon̄ak in jerbal in jipan̄ eo an Kraist.

“Rej kabun̄bun̄ļo̧k naan eo ear waļo̧k n̄an er kōn nin̄nin̄ eo” (Luk 2:17)

Epidodoļo̧k n̄an ļōmņakeļo̧k lo̧udin̄din̄ eo elan̄lōn̄ an seperd ro ilo aer kwaļo̧k naan eo em̧m̧an ekabwilōn̄lōn̄ kōn ļotak eo an Kraist ippān jon̄an lōn̄ in wōt armej ro remaron̄ in kar kwaļo̧k n̄an er. Kar kōjjeļā kake jān kar enjeļ ro, Messaia eo kar kallim̧ur kake em̧ōj an itok! Ekar pād ijin! Ilo m̧ool, kwaļo̧k naan eo em̧m̧an kōn Rilo̧mo̧o̧r eo ej juon unin tōl an bwebwenato kon Iien Ļotak eo. Enjeļ ro raar al. Iju eo eaar ba kajjien iaļ eo. Im seperd ro raar kabun̄bun̄ļo̧k n̄an āne ko rettoļo̧k.

Jemaron̄ kobaik ainikied n̄an bwebwenato eo an Kūrijm̧ōj kōn kwaļo̧k naan eo em̧m̧an im kam̧ool kōn Rilo̧mo̧o̧r eo. “Ilo an wōr am̧ iien ko rem̧m̧an n̄an jutak ilo etan Rilo̧mo̧o̧r eo ilo kijejeto in jerbal in karejar ko am̧, kajjitōk ippam̧ make, ‘Ekōjkan aō maron̄ kwaļo̧k meram eo an gospel eo ippān armej in ak baam̧le in?’” Sister Jean B. Bingham, Būreejtōn eo Eutiej an Doulul eo an Kōrā ro eaar katakin. “Ta eo Jetōb eo ej im̧we eō n̄an kōm̧m̧ane?”5

Erkein rej jejjo elmakot ko n̄an am̧ ļōmņak kaki ilo am̧ kappukōt n̄an jeļā ekōjkan am̧ maron̄ kwaļo̧k naan in kam̧ool eo am̧ kōn Rilo̧mo̧o̧r eo im gospel eo An:

  • Pukōt juon eoon eo me ej kōmeļeļeik en̄jake ko am̧ kōn Rilo̧mo̧o̧r eo ak ej kwaļo̧k etke kwoj kam̧m̧oolol kōn E. Kwaļo̧k e ippān ro kwoj jerbal in karejar n̄an er.

  • Jilkinļo̧k juon ennaan ilo talboon ak social media ko ippān juon pija in alooj in Kūrijm̧ōj. Ewōr jet pija ko rekabwilōn̄lōn̄ ilo ChurchofJesusChrist.org!

  • Jiron̄ juon m̧ōttam̧ kōn juon ememļo̧kjeņ ak iminenen ejeno̧lok me ej kakeememej eok kōn Kraist.

Wōr tōmak bwe Jetōb Kwojarjar eo enaaj kwaļo̧k kam̧ool kōn m̧ool eo kōn naan in kam̧ool eo am̧, ejja āinwōt ke Ekar kam̧ool n̄an Simeon im Anna bwe nin̄nin̄ Jisōs eaar Rilo̧mo̧o̧r eo (lale Luk 2:26, 38).

“N̄an m̧ool ilo kautiej itok eo an [Jisōs Kraist] n̄an laļ in, jej aikuj in kōm̧m̧an āinwōt An kar kōm̧m̧an im kappukōtļo̧k ilo tenkwadik im jouj n̄an ro m̧ōttad” Elder Dieter F. Uchtdorf jān Doulul eo an Jon̄oulruo Rijilōk ro eaar ba. “Menin jemaron̄ in kōm̧m̧ane aolep raan, kōn naan im jerbal. Kōm̧m̧an bwe menin en erom iminene in Kūrijm̧ōj eo ad, jekdo̧o̧n ta ia eo jej pād ie—n̄an erom joujļo̧k jidik, ļapļo̧k jeorļo̧k bōd, kadikļo̧k ekajet, kōļapļo̧k kam̧m̧oolol, im ļapļo̧k jouj ilo ajije menin jeraam̧m̧an ko ad rellōn̄ ippān ro rej pād ilo aikuj.”6

© 2019 by Intellectual Reserve, Inc. All rights reserved. Kar jeje ilo USA. Kōmālim ilo kajin English: 6/18. Kōmālim an ukook: 6/18. Ukook eo an Ministering Principles, December 2019. Marshallese. 15773 874

Kakeememej ko

  1. Henry B. Eyring, “Christmas Stories” (Nokon in Jota in Kūrijm̧ōj an Būreejtōnji eo Kein Kajuon, Tij. 6, 2009), broadcasts.ChurchofJesusChrist.org.

  2. Lale Daiana Melina Albornoz Díaz, “Sharing Christmas,” Liaaona, Tij. 2007, 17.

  3. Lale Cheryl Boyle, “He Would Have Bought It for You,” Ensign, Dec. 2001, 57.

  4. Bonnie L. Oscarson, “Christmas Is Christlike Love” (First Presidency Christmas devotional, Dec. 7, 2014), broadcasts.ChurchofJesusChrist.org.

  5. Jean B. Bingham, “Jerbal in Karejar āinwōt Rilo̧mo̧o̧r ekar Kōm̧m̧ane,” Liaona, Māe 2018, 104.

  6. Dieter F. Uchtdorf, “Scatter Your Crumbs” (Nokon in Jotan in Kūrijm̧ōj an Būreejtōnji eo Kein Kajuon, Tij. 3, 2017), broadcasts.ChurchofJesusChrist.org.