Osisechakl er a Odingel, Ongeteruich ma ongerung el buil 2019

Ngera sel Cheldecheduch er a Kurismas a Osisecheklid el kirel a Odingel

“Tiang sel taem el kot el soad er a chelsel a rak. Mongitakl; e le Kurismas a di kmedung el mei. Mouchais er sel merang el cheldechedechal a cherellel a Jesus, oingerang, sera le tolechoi, eng mle er a beluulechad” (“The Nativity Song,” Children’s Songbook, 52).

siasing/Llecheklel

ministering

Omsodel mlara Behold the Lamb of God, mlara Walter Rane

Sel temel a Kurismas a kot el lungil taem e le sib, mengkar a sib, ongolel a charm, me a btuch a kmal mo er ngii a beches el belkul. Ng mo meklou a ultutelir er sel lolechotel a kot el tara klou a belkul omeruul er a reksi er a klechad: sel cherellel a Jesus Kristo. Ng betok el telungalek a olecholt er a cherellel a Jesus er a chelsel a blirir. A rebebil a menguiu er sel Cherellel malechub e te ngara klaiungader. Ngdi uai a rokui el cheldecheduch er a Kristo, e sel cheldechedechal a Cherellel a mui er a osisechakl el kid a sebeched el smuub el kirel a odingel, e olecholt er sel Llemesel el mo omekllomes er a beluulechad. “Sel cheldecheduch er a Kurismas a cheldecheduch el kirel a beltikelreng,” ng milekoi a President Henry B. Eyring, el Ongerung el Counselor er a First Presidency.

“… Chelsel a cheldecheduch el kirel a cherellel a Kristo, eng sebeched el mes e mo melchesuar el kmo ng mle uangera el Chad. Tiang a kobekakl a chelngeled er a omerael. E mo rullid el mo obes el kired e bai mo mengebekakl a chelngelir a rebebil.”¹

“Ng mlo meseked a lengiil el blai me ng dimlak a bo le kiei er ngii” (Lukas 2:7)

A oungerachel er a lengiil el blai a dimlak el kedmeklii a delmerab el mo er a Osobel, engdi kid a diak el kired el mo meruul er a osisiu el omeruul! Kid a sebeched el rulii a delmerab el mo er a Osobel el ngara chelsel a rengud el rulii a delmerab el mo er a rodam me a rodos er a tebeled, rekeblid, me a uldelid el omeruul. Ng betok el uldelid el omeruul er a telungalek a sebechel mo klebokel e mo ungil sel uldimukl er a rebebil er a rechad. A Daiana me a telungalek er ngii a ngar ngii a uldelid el omerolir el siotai er a rechad el mo ou Kurismas lobengeterir. Ng bek el Ongeteruich ma ongerung el buil, e te mo katekoi e melilt el kmo ngtechang a lebo le siotai er ngii.² Ng locha sebechel a telungalek er kau a mo omuchel er tial osisiu el uldelid omeruul. Ng locha soal mo obengkel a telungalek er kau a chad el moldingel er ngii e tmak el mengitakl a chelitakl er a Kurismas. Ke locha dirrek el mo rulii a basio er sel belsoil er a Kurismas el mo er a chad el ngii a diak a telungalek er ngii el kiei er a osisiu el basio.

Ngera a kmal ungil el teletael el mo outkeu er a Osobel ra bai molitrakl a Okesiul luldimukl er a rebebil? Momtab el kmo Ngii a siotai “er a rokui el mer Ngii e bol nguu sel lungil er Ngii; e ngii a diak lekotouar er tirkel mer ngii, mechedelekelk me a becheleleu, rekelbus ma mimokl, resechal me a redil; e ngii a melakt er tirkel diak el kristiano; ea rokui a di osisiu el mo er a Dios, e re Jew me a re Gentile” (2 Nephi 26:33). Mruul a eou e muldimukl.

“E tial beluu a mlarngii ar mengkar a charm el ngara ked ra klebesei, el mengkar a delebechel el sib” (Lukas 2:8)

Ng kora kmal atter el kmo a remengkar a sib a mo kot el mo mengemedaol er a tolechoi el Osobel. A reprofet er a rechuodel a ulmekedong er a Jesus Kristo el “Mengkerengel a sib er a Israel” (Psalm 80:1)me a “Mengkerengel a sib er a beluulechad el rokir” (1 Nephi 13:41). Ea Kristo a ngii a millekoi el kmo, “Ngak a ungil mengkerengel a sib e medengei a sib er ngak” (Johanes 10:14). Sel dodengei a sib er kid e mengkar er tir a klou a ututelel el omekrael e oldingel lolsisechakl el uai sel luruul er ngii a Osobel.

Ua medidiich el tama ra dengkii me a meringel el chad el besiich, eng betok a demad el tmuil el kirel a Kurismas. Engdi sel kot el klebokel el kirel tial taem a sebeched el metik er ngii sel bo dolatk er tirkel tir a doldingel er tir e omes er tirkel chedad. Omes er tirkel rechad a sebechel mo medengei a kall el sorir malechub e kede oker aikel bo loruul. Kede omes e olngeseu aikel lousbech—altang eng kmal di chemolt malechub eng diak.

Sera lemad a bechil a Cheryl, er a Mick, eng kmal mlo meral mekngit a rengul. Me seral kmedang tial kot el Kurismas el lak a bechil, eng kmal mlo sabisi. Meng ngungiang, ea oldingel el odos er ngii er a Shauna a mla er ngii. A Shauna me a bechil er a, Jim, a mle siotai er a Cheryl el mo lobengterir er aikel omilil er a ungil klebesei. Te milsang tial bilel a Cheryl el mechetengang meng mlo sorir el mo ngar ngii a relii el kirel. Sesel klebesei er a uchei er a lebo el Kurismas, ea Shauna me a Jim a milsang a Cheryl a beresent el beches el bail. Te mle medengei aikel ulsbechall er a tech el kmo a Cheryl a ousbech a bail el mengeald er ngii e dirrek el mle medengei a ulsbechall ra tekoi er a reng me a chelmengel. Te mle blak a rengrir el meruul aikel reuoll el ulechotii a ungil okesiu el kmo ngmekerang a domes er a rebebil.³

“A remengkar a sib a mocha katekoi el kmo, Mei me dorael el mora Bethlehem” (Lukas 2:15)

“Mei me dorael ”a deureng el siotai! A remengkar a sib a dimlak lomedasu el kmo a resechelirir a locha mesaul el mo merael er tial omerael. Ng dimlak el dil bleluk e lorael el mo er a Bethlehem el di tir. Ng mle dmeu a rengrir e ulebult el mo er a tang me a tang e uasei, “Mei me dorael!”

Maltang eng diak el sebeched el siotai er a resechelid el mei e mesang a tolechoi el Osobel, eng bai sebeched el siotai er tir el mo omelchesiu er a cheltel a Kurismas (malechub eng reng er a Kristo) sel losiou lobengked. “Sel mo melisiich er a cheltel a Kurismas a mo bekururau el olngeseu er tirkel meliuekl er kid e mesterir a temed,” el milekoi a Bonnie L. Oscarson, mla mo merek el Young Women General President.⁴ Ka momtab el kau a orreked er a kandalang. A rebebil a kmal sebecherir el mesang e mo ngmai a klungiaol er a llomes el ngar er tial kandalang er kau, engdi ka bai momtab er sel lomelchesuar er a keldelel tial kandalang alskeum ke ousbech er tial kandalang el mo omekard a kandalang er tir e mechititetir mel loldars er tial llomes el di tir.

A Kristo a ulsisechakl el kmo tirkel loltirakl er Ngii a mo oba llomes er a klengar (mesang Johanes 8:12). Sel dosiou el uai Ngii a tara rael el kid a oltirakl er Ngii e mo outkeu er sel yaksok el llomes. Me morous er tial llomes sel msiotai er a rebebil el mo mesiou lobengkem! Ng mekerang bom tmak el mesiou kau me a tirkel moldingel er tir? Kom tmak e remuul aikel somiu el kall malechub e kom mesang a kekerei el sengk el mo er a chad malechub eng tengami. Kom tmak el melchesuar a llomes sel moltirakl er a okesiul a Kristo el kirel a omesiou.

“E tulemerk a ikel tekoi el le silbedeterir er ngii el kirel ngii el ngalek” (Lukas 2:17)

Ng beot sel domdasu er sel deureng er tirkel mengkar a sib sera louchais er a mengasireng el chais er a cherellel a Kristo el mo er a rebetok el chad el lesterir. Mlocholt lokiu a reanghel, ea omlaoch el Messiah a mla mei! Ngii a mlar tiang! Meng merang, ouchais er sel ungil chisel a Osobel a kmal klou a belkul er sel cheldecheduch er a cherellel a Jesus. A reanghel a milngitakl. A btuch a milutk er a rael. Ea remengkar a sib a ulemerk er a chais.

Kid a sebeched el dochel a ngor el morsel cheldecheduch er a Kurismas sel domerk er a ungil chais e ouchais a klemerang el kirel a Osobel. “Mesel ngar ngii a techelem el mo olechotel a Osobel er a klisichel a odingel olisechakl, e moker er kau, ‘Ng mekerang e ngak a omerk er tial llemesel a ebangkelio el mo er a dersta el chad malechub eng telungalek?’” el ulsisechakl a Sister Jean B. Bingham, Relief Society General President. “Ngerang soal a Chedaol Reng a bo kuruul?”⁵

Aikakid a bebil er a tekoi el kau a sebechem lomdasu sel mosiik el kmo ke mekerang e ouchais er a klaumerang er kau el kirel a Osobel me a ebangkelio er Ngii:

Msikii a chedaol llechukl el ngii a ochotii a rengum el kirel a Osobel malechub eng ouchais el kmo ngera uchul meke mereng a Sulel. Mouchais er ngii el mo er tirkel moldingel er tir.
Modureklii a text malechub eng llechukl er a social media lobengkel a video er a Kurismas. Ngar ngii a bebil er a kmal lungil el ngarsel ChurchofJesusChrist.org!
Mouchais er a sechelim el kirel a tokubets el tekoi el kau a metebengii malechub eng uldelid el omeruul el rulau el mo melatk er a Osobel.

Bol ngarngii a klaumerang er kau el kmo a Chedaol Reng a mo sioning er a klemerang el klaumerang er kau, el di uasei sera le sioning el mo er a Simeon me a Anna el kmo a tolechoi el Jesus a mle Osobel (mesa Lukas 2:26, 38).

“Mesel meral mengull er a [Jesus Kristo] el mera beluulechad, eng kmal kired el meruul a uaikel luruul e mo olngeseu loba beltikelreng me a chubechub el mo er a rebebil er a rechad,” el dilung a Elder Dieter F. Uchtdorf er a Chelechad er a Teruich me a terung el Apostol. “Tiang a sebeched el meruul er a bek el sils, loba omelekoi me a omeruul. Bom nguu tiang mel uldelid omeruul er a Kurismas, a omngara ngidil basio—e bom bekerurau, bo mousubes, lak msal oukerrekeriil, bo moureng a saul, e bo el klou a ngelsuid el mo er tirkel lousbech a ngeseu.”⁶