Erosom Binom edze Aboaboa Israel Ano

“Dɛ ɔdɔ yɛ hɛn nkuranhyɛ no, anwanwadze bɛba, na yebenya akwan a yɛnye hɛn nkyerɛbaa na enuanom a ‘wɔayew’ no aba Jesus Christ N’asɛmpa no a ofua obiara no mu.” —Jean B. Bingham²

“Nna bɛyɛ mfe esia a menye mo kun tui baa kurow fofor mu no monnkɔr asɔr. Me Relief Society president fofor no bɛseraa me, rebisa me dɛ sɛ obotum asoma akyerɛbaa bi ma ɔabɛsera me a. Medze fɛr kakra dze, naaso me peen do. Akyerɛbaa yi bɛseraa me bosoom biara, ɔmmpɛ mbɔdɔm mpo no—na mowɔ bɔdɔm bi a odzi agor papa! No som a ɔdze rosom me no kɔr do mfe ebien, na onyaa nhyɛdo kɛse noara wɔ mo do.

“Nna ne nsera dodowara fa abrabɔ mu nkitahodzi ho, naaso dakor dakor obisaa me nsɛmbisa a ogyaa hɛn kɔr sunsum mu nkɔmbɔdzi mu. Iyinom maa moho ammbaa me, naaso opuhim me dɛ minsi egyinae dɛ mepɛ dɛ mokɔ kan wɔ asɛmpa no mu anaa meka bea a mowɔ no. Egyinasi yi yɛɛ aperdzi maa me, naaso mesan mu yii dɛ mebehyia asɛmpasomafo no.

“Dakor mokɔr sacrament nhyiamu a ɔyɛ mpɛn a odzi kan wɔ mfe esia mu no, nna ɔyɛ akomatu ma me dɛ mebɛhɛn dan no mu. Ber a menatsewee kɔr asɔr no, nna m’akyerɛbaa a ɔrosom me no rotweɔn me, na ɔnye me nantsewee hɛɛn asɔrdan no mu. Ekyir no, ɔnye me nantsewee san baa me kaar ho, rebisa me dza obotum ayɛ dze aboa me ma metum enyin abɛn Agyenkwa no yie.

“M’akyerɛbaa a ɔrosom me no ne mber na dɔ na ɔboaa me, kyerɛɛ me kwan sanee baa asɔr dwumadzi mu, na mubu no mbɔdzembɔ no dɛ akyɛdze kɛse koraa mu kor a wɔdze adom me. Ɔyɛ me enyisɔ dɛ nna ɔwɔ me nkyɛn wɔ m’akwantu a medze resan aba Ewuradze N’Asɔr no.”

Wɔdze dzin no esuma, ofi British Colimbia, a ɔwɔ Canada

“[Ɔ]bɛseraa me bosoom biara”

Ibesi dɛn botum akyerɛ dɛ edwen hɔn a erosom hɔn ho kyɛn ndzɛmba nkaa biara? (hwɛ Nkyerɛkyerɛ na Ahyɛmudzi 121:44).

“Nsɛmbisa”

Iribisa nsɛmbisa a oye no botum aboa epuhim aho-nhwehwɛmu. Hom nkaa dɛ yɛrosom no wɔ botae a ɔtra yɛresera hɔn edzi nkɔmbɔ ara.³

“Ɔrotweɔn me”

Obiara wɔdɛ ɔtse dɛ wɔayɛ no akwaaba (hwɛ 3 Nephi 18:32).

“Ɔwɔ me nkyɛn wɔ m’akwantu a medze resan aba”

Hɛn abambabɔ botum ayɛ soronko tsitsir ama hɔn a woefintsiw dɛ wɔbɛsan aba Agyenkwa no hɔ na woebenya ayarsã (hwɛ Hebrews 12:12–13).

“Akwan biara a ɔnye wo gye no, enye nkorɔfo nkyɛ mbrɛ Jesus Christ N’Asɔr ho si hia wo kɛse no. …

“… W’asɛdze nye dɛ ebɛkyɛ dza ɔwɔ w’akoma mu na edzi dza egye dzi no bɔbɔ bra.” —Elder Dieter F. Uchtdorf⁴

Erosom binom na erekyɛ asɛmpa no kɔ do afã na afã. Akwan binom a yebotum aboa hɛn anyɛnkofo na fipamfo ano ber a yɛrosom no—anaa yɛbɔsom ber a yɛreboaboa hɛn anyɛnkofo na fipamfo ano.

• Hom mbɔmu mfa nsom. Hwehwɛ akwan a ibotum ato nsa afrɛ anyɛnkofo anaa fipamfo ma wɔaka woho ber a erosom obi n’ehiadze. Bisa hɔn ma wɔmboa ma yɛ edziban ma enã a ɔawoo fofor, wɔsera fipamfo a n’enyi efir, anaa woresiesie obi a ɔyar ne fie.

• Hom mbɔmu nkyerɛkyerɛ adze. Susu dɛ ibɛma nyɛnko anaa fipamfo bi a ɔnntaa mmba asɔr ma ɔama kwan ma obi a orihyia asɛmpasomafo no wɔayɛ asɛmpasomafo adzesua wɔ ne fie Anaa wo nyɛnko no botum aboa wo ma wɔayɛ adzesua no anaa ɔnye wo akɔ adzesũa no wɔ obi fofor ne fie.

• Kɔ binom nkyɛn kɔboa hɔn ber a ihu ehiadze bi. Yɛ asɔrkɔ ho kaar nhyehyɛɛ fa boa. To nsa frɛ mbofra ma wɔmbra mbabun anaa Primary dwumadzi. Ebɛn akwan binom so do na ibotum asom na aboa binom ano?

• Fa mboa ndzɛmba a Asɔr no dze ama no dzi dwuma. Asɔr no ma mboa ndzɛmba pii ma asɔrmba ama wɔaboa hɔn ma wɔakyɛ asɛmpa no. Ibotum abrowse wɔ “Asɛmpasomafo” afã wɔ Asɛmpa Nwoma Korabea app no na asera ComeUntoChrist.org dze enya adwenkyerɛ wɔ ibrɛ ibesi bɔboa Israel ano wɔ wo sɔn mu.