Veiqaravi ena Tuvakawa

Wale tikoga oqo ena dua na vuka ki vale, au dabe volekati Steve, ka wasea vei au na italanoa ni veitiki ni nona bula vaka i koya. O koya a taurivola mai na vuli torocake, curuma yani na mataivalu ni Amerika me vaka e dua na kenadau ni veitaratara ena yabaki 18, ka sega ni dede sa tekivu cakacaka ena White House, ka vakarautaka na veitokoni ni veitaratara vua na Peresitedi kei Amerika. Mai na yabaki 18 ki na 26, a veiqaravi vei rau e rua na peresitedi kei Amerika. A ka matalau na nona italanoa!

“Steve,” au a kaya, “sa dodonu mo vola na italanoa eso oqo me baleti ira na nomu kawa! E gadrevi mera na ciqoma taumada na vei italanoa oqo mai na yasa ni nomu rai. A duavata kina.

Qai vakauqeti au na Yalo meu tarogi koya ena ka e kila me baleti ira na nona qase e liu. E kila tu o Steve e levu na ka e yasana vei tinana, ka oka kina na italanoa me baleta na nodratou a vakayakavi vata kei Abraham Lincoln na nona matavuvale ena dua na gauna donuya nona vunau tiko e taudaku ni vanua ena veidigidigi baleta na peresitedi kei Amerika ena 1860.

E a lailai na ka e kila ena yasana vei tamana. Ia, a vinakata me kila e levu tale na ka. Au ucuna mai noqu talevoni ka dolava na app ni FamilySearch. “Steve, e rawa ni daru kunei ira nomu vuvale ena gauna sara ga oqo!”

Au a sema sara kina Wi-Fi e loma ni waqavuka. Au a vakadavora na noqu talevoni ena teveli ni tere e mataqu me rawa ni keirau raica vata. Keirau vakasaqaqara ena FamilyTree. Ena loma ni vica na miniti keirau sa wadrava ruarua toka na sitivikiti ni vakamau nei tukana vakarua vua na buna vakarua.

“O ya o rau,” a kaya o koya. “Au sa qai nanuma rawa na iotioti ni yaca i buqu!”

Na yalo ni marau sa sobuti keirau ruarua. Keirau cakacaka me tarai cake na itukutuku baleti ira na nona qase ka lailai nona kilai ena loma 45 na miniti ka tarava. A kerei au meu yalataka vua ni keirau na tomana tikoga na vakasaqaqara vata e Colorado. Keirau veisoli naba ni talevoni ni vakaroro tiko na waqavuka.

Oqo o keirau, ka vuka tiko ena 30,000 fiti (9,145 m) e macawa, vata kei na dua na iyaya lailai e vaka-na levu ni ligaqu, vaqara tiko e dua na tagane kei na dua na yalewa rau vakawati ena 100 na yabaki sa oti ka rau sa yali voli vei koya kei na nona matavuvale. Vakasakiti dina! Ia, keirau a kunei rau. A umani vata na matavuvale. Sa vakananumi kina na italanoa. Na yalo ni vakavinavinaka sa vakilai me baleta na tekinolaji kei na iyaya ni cakacaka. E a vaka sara ga e dua na caka mana.

O Maria a sa luluqa tu me sivia e 20 na yabaki. Ena vica na vula sa oti, keirau a tiko vata ena vica na auwa vata kei koya e vale, ka vakadikeva na nona matavuvale mai na iwiliwili ni lewenivanua kei na itukutuku tale eso. Ena dua na gauna a tuturu na wainimatana ka kaya, “Au sa vulica rawa e levu na ka baleta noqu vuvale ena loma ga ni rua na aua mai na veika au vulica ena noqu bula taucoko!”

Ni sa tini na neitou gauna vata, keirau vakaveikilaitaki koya ki na tabana ni Relatives Around Me ka tiko e na loma ni FamilyTree app. Sa qai yaco me kunei ni o au kei watiqu e veiwekani vakayawa kei Maria. E a tuturu tale na wainimata, ka kaya ni a nanuma o koya ni tu duadua ga. E sega vakadua ni kila ni tiko eso na lewe ni vuvale ena vanua o ya. Ena vica na macawa e muri a sota kei neitou bisopi o Maria. Oqo e sa cakacaka tiko ena vakavakarau ki na valetabu, ka sa sotavi ira e vuqa na tavalena “vou” ena neitou tabanalevu!

O Ashley, e dua na marama au veiqaravi vua, ka tiko ruarua vei keirau nai vola ni vakasaqa ni tubui keirau. Na nona e mai vua na buna vakarua, kei na noqu e dua na ivola au biuta vata ni a noqu ivotavota na kato ni ivola ni vakasaqa nei Buqu ko Grrenwood ka sa takali.

Keirau a digitaka vata kei Ashley e dua na icakacaka ni kakana mai na neirau ivola, ka keirau sota vata ena dua na yakavi ni suka na cakacaka me vakatovolei kina. A digitaka me caka ivakalomavinaka, ka keirau a cakava taumada, ka biuta ena ovani. Au a digitaka na chip dip—e kakana tudei ena vei kanavata kece ni vuvale na Greenwood. O luvei Alice yalewa a vukei keirau ena tovolei ni ikanakana ni kakana. Oti o ya, baleta ni a sega ni vinakata o Ashley mera kania taucoko na ivakalomavinaka na luvena, a wasei yani eso vei ira na marama ka veiqaravi tiko vei ira.

Na ka au a taleitaka vakalevu me baleta na neirau bogi ni vakasaqa o ya ni keirau vakasaqa ka vavavi, keirau dau veivosakitaka na ulutaga ni veiqaravi eso—nona sasaga kei na noqu. Ia keirau a veitalanoataki ratou talega na neirau bubu kei na nana, ka gauna mareqeti vei keirau ruarua.

Na tuva kawa e rawa ni dolava na veikatuba ni madigi eso ki na veiqaravi ni rairai sa na sega ni dua tale na ka e rawata. Oqo e vica na vakasama e rawa ni o vakatovolea.

• Vukei ira mera vola ka vakacuruma na vosa katoni ni italanoa ni tuva kawa, vakabibi ke veidonui kei na itaba.

• Bulia e dua na jati se itukutuku ni tuvakawa eso ka rawa ni tabaki ka solia yani vakailoloma

• Vakavulica na sala eso mera maroroya kina na itukutuku ni nodra dui kawa ena ivolaniveisiga ena sala era marautaka. iVolaniveisiga katoni? iVolaniveisiga tabaki? iVolatukutuku ena vidio? E sa levu sara na madigi e tu me baleti ira era sega ni vinakata na ituvatuva tudei ni ivolaniveisiga.

• Lako vata ki na valetabu me cakava na cakacaka vakalotu me baleti ira na qase e liu. Se mo cakava na veicakacaka vakalotu me baleta na yaca ni nodra matavuvale kevaka e levu cake mai na kena e rawa ni ra qarava.

• Sota vata me ra wasea na ivalavala tudei eso ni matavuvale.

• Taura vata e dua na kalasi ni tuvakawa.