Osisechakl er a Odingel, Ongeru el Buil 2020

Oldingel lokiu a Reksi er a Telungalek

siasing/Llecheklel

ministering

Ulsunga er ngii a Joshua Dennis; sunga me a siasing er a Getty Images

Sel dolngeseu er a tara chad el meruul a reksi er a telungalek a mesisiich el teletael er a odingel. Sel momak er a rebebil el mo er a rebeldekir lokiu a cheldecheduch, e kolngeseu lomak a rengrir er a tekoi el tir a dimlak lodengei (mesa Malachi 4:5–6).

A lemeketeketa el chedal a Ikelesia malechub eng chad el dirkak a ta me rengesii a mla moluut el ebangkelio er a Jesus Kristo, eng di a rokui el ngelekel a Dios a semeriar el mo medengelii a uchelir.

Ng diak el meketeket e kede mo mechas a rengud er ngii el teletael, el ua ulecholt er tiakid el cheldecheduch.

Metik er a chedal a telungalek er a okedei el telael a kldidiul er a melidiul

Ak dirk mla er a skoki el ngara omerollek el mo remei, e dilengchokl er bita er a chad el Steve a ngklel, luluchais er ngak a telkib er a cheldecheduch el kirel. Ng tilobed er a high skuul, e soiseb er a klsoldau er a Merikel er a leteruich me a eai a rekil, e a uriul eng mlo oureor er a White House, lolngeseu er a rolel a tekoi er a olkeiungel er a Merredel er a Beluu er a Merikel. Meng teruich me a eai a rekil mol muut er a lluich me a elolem, e ngulureor cheungir a reteru el Merredel er a Beluu er a Merikel. A cheldechedechal a mechas a rengud er ngii!

“Steve,” Ak dulang, “Ng kirem lemuches aika el cheldecheduch el kirir a remerael mei ngelekem! Ng kirir el mo olab aika el cheldecheduch el ngar kau el mo er tir.” Ng kilengei.

Ea Chedaol Reng a mlengetikaik er ngak loker ngii el kmo ngera ng medengei el kirir a ruchelel. A Steve a mle betok a lodengei el kirel a rechedal a delal, luldimukl er a cheldechedechal a telungalek er ngii er a lomesoil lobengkel a Abraham Lincoln er a lorael campaign er a ikel ikrel a beluu er a Merikel er sera 1860.

Eng di, ng dimlak el sal medengelii sel kuk telungalek er a demal. E kmal mle soal mo medengelii. A kultebedii a dengua er ngak e mocha er a FamilySearch app. “Steve, ng sebeched losiik er a telungalek er kau er chelechang!”

Ak mocha ousbech er a Wi-Fi er a skoki. Ak ngiluu a dengua er ngak loiia er a bebul tial kekerei tebel mel sebecham el terung lomes er ngii. Aki mocha omes er a FamilyTree. Chelsel a sesei el bung e a ki mocha mesa babier er a chebechiil er a demal a demal rubak me a delal a delal a demal.

“Tirkakid!” ng millekoi. “Ak mla dobedebekii a ngakl lousbech er ngii er chelechang!”

Aki di diul kmal mlo imis el semeriar el terung. Aki uluureor losiik a ngklir tirkel ngii a diak el sal medengelterir el chedal el kmeed el okeua me a eim el bung. Ngullengit er ngak me ki molemolem el dmak loureor el meruul tiang sel ki bo er a Colorado. Aki mocha kauchais a lambang er a dengua er kemam er a ki mkerdang.

Ng uaisei el ki msilebek, lokedei el telael a cherridel (9,145 m) er a melidiul, loba klalou el di ua klungel chimak, losiik er a sechal me a redil el mle kaubuch er a kmeed el dart el rak er a memong el tir ngika el chad a dimlak lodengelterir. Mengasireng! Eng di aki miltik er tir. A telungalek a mloak. Me a cheldecheduch a mluklatk. Aki mlo omelchesiu el mereng a saul er a klekedall me a dongu el dousbech. Ng meral mle mengasireng.

Jonathan Petty, Colorado, USA

Iiliuekl er a Beches el Telungalek

A Maria a dimlak el sal mesisiich el ngara ikelesia el kmeed el lluich el rak. Sesei el buil er a memong, e a ki uleldingel er ngii er a blimam, losiik er a rechedal lokiu a babier er a sensus me a lmuut el bebil er a babier. Telkib eng longelang e dula el kmo, “Ak mla mo ungil medengelii a telungalek er ngak er a di chelsel a erul sikang el tir a dimlak kudengelterir er a chelsel a klengar ngak!”

Uriul er a ki mdak loureor, e a ki ulechotii er ngii sel Rchedak el Meliuekl er Ngak el ngara FamilyTree app. Ng bai mlo chemolt el kmo a bechik me a ngak a dirrek el mo chedal a Maria. Ng liluut el longelang, e kmo ngulemdasu el uase ng cheloit el di ngii el tang. Ng dimlak lodengei el kmo te ngarngii a rechedal er tial basio. Sesei el sandei ruriul e a Maria mlo omes er a bisop. Chelecha eng mengedmokl er ngii el mo er a templo, e kmal betok a “rebeches” el chedal el ngara ward er kemam.

Carol Riner Everett, North Carolina, USA

Teletelel Odingel

A Ashley, el ngii odos el kuldingel er ngii, me a ngak a olab a hong er a omeruul kall el ki mngilai er a redelmam el mechas. Sel lobang a lebilsang a delal a delal mechas, e sel kuk kubang a di mle ngak el rulii el mla er a blil a kloklel a Grandma Greenwood el kngiluu ruriul er a lemad.

A Ashley me ngak a ngillilt a ki bo moruul kall, e ulterkeklii a tal kesus el ki bo merek loureor e a ki mo dmak e meruul. E ngii a ngilleltii a kliou, me a ki rirelii e lilia er a oven. Ak ngilleltii a chip dip—el ngii a kot el sorir a telungalek er a Greenwood sel ngarngii a mur. A ngelekel a Ashley redil er a Alice a ulengeseu er kemam el mengarm aika el kall. Me a, Ashley dimlak el soal a rengelekel a bo longa ikal rokui el merekos el kall, e ngilai a bebil el mesterir tirkel lodos el ngii oldingel er tir.

Sel kmal mle soak er sel kesus a sera ki moruul a kall, e ki mosaod a teletael er a odingel—me a ikel ringel el kemam a ngara chelsel. Eng di aki dirrek el milsaod el kirel a redelemam el mechas me a redelemam, el di diul mle ungil a rengmam.

Jenifer Greenwood, Utah, USA

Tokubets el Teletael er a Ngesou

A reksi er a telungalek a sebechel mekengii a chesimer er a techall er a odingel sel bo domdasu el kmo ng diak a ngera el sebechel. Aikakid a bebil er a uldasu el sebechem lousbech.

Mngesuterir lemuches e losiseb er a mesil a cheldecheduch er a reksi er a telungalek, oumesingd aikel chatter er a siasing.
Mkedmeklii a chart malechub a di babier er a reksi er a telungalek el sebechem lodersii el omiange er kau.
Molisechakl a teletael el di mo tir el meruul a reksi er a telungalek lokiu omeluches er a journal er sel teletael lesemeriar ngii. Okiu omengedecheduch? Siasing? Video? Ng betok a bedengel a teletael er a journal el sebechir lousbech.
Mdak el mo er a templo el mo meruul chedaol ruoll el kirir a rebeldekir. A lechub e bo moruul chedaol ruoll el kirel a telungalek er tir a lsekum e te kmal betok el chad.
Bom mdak e mkauchais aikel uldelid lomeruul er a telungalek.
Mdak el ngara omesuub el kirel a reksi er a telungalek.