Na iVakavuvuli ni Veiqaravi, Maji 2020

Veiqaravi ena Veiqaravi e Valetabu

Ni da vukei ira tale eso mera marautaka na veivakalougatataki ni valetabu, eda sa veiqaravi tiko.

iVakatakilakila

ministering

iVakaraitaki e dakuna mai na Getty Images; itaba ni Valetabu e Tegucigalpa Honduras

Sa ka yaga sara na sasaga ni laki vakaitavi e valetabu. E vakavulica o Peresitedi Russell M. Nelson ni “valetabu sa ka bibi sara ki na noda vakabulai ka vakacerecerei ka vakakina ki na noda vuvale. …

“… Oi keda vakayadua eda gadreva tikoga na veivakaukauwataki vakayalo kei na veivakavulici ka rawa duadua ga ena vale ni Turaga.”¹

Na vakaitavi e valetabu e gadrevi me vakatulewataki kina na noda gauna, ilesilesi, kei na ivurevure veitaravi, ka vakakina na noda vakavakarau vakayalo. Eda sa dauveiqaravi ni da raica rawa na itatarovi e tarovi ira tiko na tacida kei na ganeda mai na valetabu ka vukei ira me kunei na kena iwali.

Na Valetabu sa iKoya e Dua na Veivakalougatataki e Rawa ni Marautaka e Dua

E dua na daukaulotu se qai lesu oti toka ga mai, o Meg, a taubale tiko yani ki na katuba ni Valetabu e Kona Hawaii ka raica sara e dua na goneyalewa ni dabe duadua tiko ena dua na idabedabe e tuba. A vakila o Meg ni dodonu me vosa vua na goneyalewa oqo, ia a sega ni kila na ka me tukuna. A qai taroga na ibalebale ni dua na samuqawe ena qurulasawa nei goneyalewa. A tekivu kina e dua na veivosaki ka rawa kina vei goneyalewa oqo, o Lani, me wasea na nona italanoa.

A tukuna o Lani vei Meg na nona sasaga me lesu tale me taucoko na nona vakaitavi ena Lotu, o ira na lewenilotu vinaka era sa veivuke tiko vua, kei na nona vakanuinui ena dua na siga me vauci vei luvena yalewa lailai.

A qai sureti Lani o Meg me laki dabe vata kei koya ena rumu ni wawa e valetabu. E na sega ni rawa ni rau curu e loma sara ni valetabu ena gauna oqo, ia e rau sa yaco rawa oqo me rau kosova na kena ilago. A vakadonuya o Lani, ka rau sa mani curuma vata yani na katuba levu. E dua na tamata cakacaka e valetabu a kauti rau sara ki na dua na idabedabe e toka ena ruku ni dua na itaba ni iVakabula.

Ni rau sa dabe sobu, a vakasolokakana o Lani, “Au a vinakata sara ga meu gole mai ki vale tabu nikua, ia au a rere vakalailai.” Baleta ni a muria na Yalotabu o Meg, a veivuke ena kena saumi na masu lo nei Lani.

Na Vakasama Eso mera Vukei O Ira E Sega Ni Tiko E Dua na Nodra iVolatara

O ira mada ga e sega ni tiko e dua na nodra ivolatara ni valetabu ena gauna oqo sa rawa mera vakalougatataki ena valetabu.

Wasea na nomu nanuma me baleta na sala sa vakalougatataki iko kina na Turaga ena cakacaka ni valetabu.
Sureta e dua me tiko ena dolavi raraba ni dua na valetabu, se na nodra vale na vulagi. Raica na siga dolavi raraba era sa roro tiko mai ena temple.ChurchofJesusChrist.org.
Raica na itaba ka vulica eso tale na ka me baleta na valetabu ena temples.ChurchofJesusChrist.org.

Cakava me Rawarawa Vei Ira Eso na Nodra Curuma na Valetabu

Vei ira mada ga na lewenilotu e tiko na nodra ivolatara ni valetabu, ena dau ibolebole tiko na nodra curuma na valetabu. Eso era na gadreva beka mera lakova e dua na sala balavu. Eso era na rairai vakaluveni lalai tiko se tiko nodra lewe ni matavuvale qase era gadreva tu mera karoni. Sa rawa meda cakacaka vata me yaco kina na veiqaravi ena valetabu me yaga vei ira na tamata kecega.

E vakila o Leola Chandler ni sa ulabaleti ena nona kauwaitaki watina tauvimate bibi tiko kei na va na luvedrau. A sa mani lewa me sa vakatikitikitaka e dua na gauna ena vei Tusiti yadua me laki curuma e dua na valetabu e toka voleka. Sa mai yaco kina me dua na ivurevure ni vakacegu kei na kaukauwa ena nona bula.

Ena dua na siga a rogoca o koya ni a vinakata sara e vica na marama qase sara ena nona tabanalevu me ra curuma na valetabu, ia e a sega na sala ni nodra veilakoyaki. A qai lomasoli o Leola me ratou vodo vata. Ena 40 na yabaki ka tarava, sa sega tale ni lako duadua ki valetabu.²

A vakalougatataki o Leola, ka a vakalougatataki ira na tamata ni a lomasoli mera lako vata kei koya ki na valetabu.

Na Vakasama Eso Mera Vukei Kina Eso Mera Curu ki Valetabu

E rawa vakacava mo vukei ira tale eso mera lako vakawasoma kina ki valetabu? Ena rawa mo raica talega eke ni veivakasama oqo ena vukei iko talega.

Na lako vata. Mo lomasoli mo vakarautaka na nona ilakolako e dua. Ena rawa ni vakayaloqaqataka e dua me laki curuma talega na valetabu.
Kerei ira na lewe ni nomu matavuvale se tabanalevu me vukei iko mo vakayacora na cakacaka vakalotu baleti ira na nomu qase, vakabibi ena gauna sa levu kina na yaca ni matavuvale sa vakarautaki tu ki na cakacaka vakalotu.
Mo lomasoli mo meimei me rawa vei ira na itubutubu mera laki curu ki valetabu. Se vakarautaka nomuni rawa ni veiwaseitaka na meimei mo ni raici ira vata tiko na dui luvemuni.

Ke sa Yawa Sara na Valetabu

Rau sa lomavata sara o Chandradas, “Roshan” kei Sheron Antony mai Colombo, e Sri Lanka, me rau sa vauci ena valetabu. Rau sa marautaki rau vakalevu na nodrau itokani o Ann kei Anton Kumarasamy. Ia eratou sa kila ni ilakolako ki na Valetabu e Manila Filipaini e sega ni rawarawa se sau lailai.

Rau a maroroi ilavo tiko mai o Roshan kei Sheron ka veivosakitaka nodrau waqavuka ni vo tu e vica na vula me rau vuka kina ena kena e rawa ni rau sauma rawa. Oti, sa yaco mai na kena siga. Ia, ena gauna ni nodrau vakacegu mai Malaysia, rau a raica ni kevaka e gadrevi me yaco na ilakolako ki na Yatu Filipaini, ena gadrevi me dua na nodrau ivolataranicuruvanua se me rau vuka ena dua tale na waqavuka. A sega ni rawa me rawati e dua na ivolataranicuruvanua, ka sega na ilavo me rau sauma kina na tikite ena dua tale na waqavuka. Ia sa dredre sara me rau vakasamataka rawa ni rau sa na lesu tale i vale ka sega ni laki vauci.

Ni rau sa sega ni kila se cava tale me caka, a qiriti Anton o Roshan. Rau a via veivuke sara mai o Anton kei Ann. Rau a dua vei ira na veiwatini mai Sri Lanka a vauci ena valetabu, ka rau kila ni sa dua na veivakalougatataki vinaka. Ia e rau se qai vakayagataka wale oti toka ga na nodrau ilavo maroroi me vukea e dua na lewe ni matavuvale e a gadreva tu na veivuke, ka sa sega ni veirauti tu na ilavo e tiko me rau vukei Roshan kei Sheron kina me voli na tikite ni dua tale na vuka.

E kena ivakarau mai Sri Lanka vei tagane vakawati me volia vei watina e dua na itaube koula me rawa vei watina me tiko vua eso na ilavo ke sa mate o watina tagane. Sa qai nanuma o Ann me sa na volitaka na nona itaube me voli kina na tikite vou. Na nona isolisoli lomasoli o ya a rawa kina vei Roshan kei Sheron me rau lokuca kina na nodrau tikinisiga ni tiko ena valetabu e Manila.

“Au kila na yaga ni dua na veivauci ni valetabu,” a kaya o Ann. “Au kila ni o Sheron kei Roshan rau na veivaqaqacotaki vakalevu sara ki na tabana. Au sega ni vinakata me rau calata na madigi oqo.”³

Na Vakasama Eso Mera Vukei Kina O Ira Era Sega ni Sikova Rawa na Valetabu

O na rairai kacivi mo laki veiqaravi vei ira era sega tiko wasoma se sega sara ga ni sikova rawa na valetabu ena vuku ni yawa ni vanua se isau vakailavo. Ia sa rawa mo raica na sala mera vukei kina mera marautaka kina na veivakalougatataki ni valetabu.

Vakavuvulitaka se vakaitavi vata ena vakavakarau ki valetabu se ena kalasi ni tuva kawa.
Solia vei ira e dua na itaba ni valetabu mera vakaliliga ena nodra loma ni vale.
Kevaka o sa lesu oti mai valetabu, wasea na nomu nanuma me baleta na veika o sa sotava kei na nomu ivakadinadina me baleta na cakacaka vakalotu ni valetabu.
Vukei ira mera kila vakalevu cake na veika e baleta na veiyalayalati era sa cakava kei na sala mera maroroi kina. Sa rawa mo vakayagataka na “Understanding Our Covenants with God: An Overview of Our Most Important Promises,” ena July 2012 Liahona.

© 2020 mai na Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni Ministering Principles, March 2020. Fijian. 16985 858