Erudua Wiadze Mfɛndzanan Ehyiadzi do dze Rosom

“Agyenkwa no hyɛɛ N’akãdofo no dɛ ‘hom ndodɔ homho nkorkor, dɛ mbrɛ madɔ hom no’(John 13:34). Ntsi yɛdwendwen mbrɛ Osii dɔɔ hɛn no. … Sɛ yɛma Ɔyɛ hɛn fasusu tsitsir a, ɔsɛ dɛ aber nyina yɛbɔ mbɔdzen dɛ yɛbɛtsen akɔ obiara do nye hɔn akã ho.” —President Dallin H. Oaks¹

Mfe pii a wɔabɛsen kɔ no hɛn fie kyerɛkyerɛnyi nwanwanyi Mike hyɛɛ no nsew dɛ emi na me mba baasa no yɛwɔ laptop kakraba bi a yɛdze hwɛ wiadze mfɛndzanan ehyiadzi. Ɔtoo nsa frɛɛ hɛn ntsɛmaara dɛ yɛmbra ne fie na yɛnye ɔno na ne yer, Jackie mbɔhwɛ, rekã no enyiber do dɛ wɔbɛpɛ dɛ yɛbɛkã hɔnho. Ɔyɛɛ me mba nkakraba no enyigye ara yie dɛ wɔhwɛɛ ehyiadzi no wɔ TV ankasa do; m’enyi sɔɔ abamba no a menyae; na hɛn nyina enyi gyee wɔ mber no a yɛbɔɔ mu dzii no ho.

Ɔno ekyir no, yɛrobɔ mu ahwɛ ehyiadzi no bɛyɛɛ hɛn ntɔyɛɛ. Yenyaa hɛnankasa hɛn TV no ekyir mpo no, yɛdaa ho dze enyigye kɔɔr Mike na Jackie hɔn fie kɔhwɛɛ wiadze mfɛndzanan ehyiadzi a, yɛdze dze hɛn sundze, akyerɛw mbuukuu na anondze. Yɛbɔɔ mu retsie nkɔnhyɛfo hɔn nsɛm no maa ɔyɛɛ soronko. Yɛbɛyɛɛ dɛ ebusua. Mike na Jackie bɛyɛɛ m’anyɛnkofo pa mu etsitsir na me mba nkakraba hɔn nananom a wodzi hɛn do. Hɔn dɔ na anyɛnkoyɛ ayɛ nhyira mapã ama m’ebusua. Hɔn pɛ dɛ wobue hɔn fie na hɔn akoma mu ma hɛn no ayɛ me enyisɔ papaapa.

Suzanne Erd, California, USA

“Wɔhyɛɛ no Nsew”

Ɔdɔ mu ara Agyenkwa no faa mber dze hun binom hɔn ehiadze na nkyii Ɔyɛɛ dza ɔbɛma hɔn nsa akã dɛm ehiadze no (hwɛ Matthew 9:35–36; John 6:5; 19:26–27). Yebotum ayɛ dɛmara.

“Ɔtoo nsa frɛe ntsɛmaara”

Yeehu hɔn a yɛsom hɔn no hɔn ehiadze ekyir no, anamɔn a odzi do nye yɛbɛyɛ ho biribi.“Yɛretsie nkɔnhyɛfo hɔn nsɛm”

Ɔsɛ dɛ “[ye]hyia mu mpɛn pii” (Moroni 6:5) dze bɔ mu sũa adze, yebɔmu nyin, na yɛkã sunsum mu ndzɛmba a ohia kɛse ma hɛn akra ho asɛm.

“Bra, betsie nkɔnhyɛnyi ne ndze, na tse Nyame N’asɛm”² botum ayɛ nsato tsitsir a yɛdze botum ama hɔn a yɛsom hɔn no.

“Ɔdɔ na anyɛnkoyɛ”.

Ama yɛaboa nokwar mu na yeenya nhyɛdo pa wɔ binom do no, otwar dɛ yɛdze ayamuhyehye na “ɔdɔ mapã” kyekyer nkitahodzi (hwɛ Nkyerɛkyerɛ na Ahyɛmudzi 121:41).

“Social media ahorow no yɛ wiadze mfɛndzanan edwindadze a obi noara botum dze edzi dwuma pa a obenya nsunsuando wɔ ankorankor na ebusua ebusua do. Na megye dzi dɛ ber no aba ama hɛn dɛ yɛyɛ Christ esuafo no, yɛdze nkenyan edwindadze yinom bedzi dwuma yie na yɛdze agye dase enyiberdo afa Nyankopɔn Onnyiewiei Egya, N’enyigye ho nhyehyɛɛ ma Ne mba, na Ne Ba, Jesus Christ, dɛ wiadze Agyenkwa no Hɔn ho. —Elder David A. Bednar³

Internet no ma hɛn kwan ma yɛnye wiadze nyina kyɛ asɛmpa no. Mepɛ dɛm no! Mekyɛ wiadze mfɛndzanan ehyiadzi ho ahokekãdze kumabaa, mbom mber no dodowara mobɔ mbɔdzen dɛ moboa binom ma wiadze mfɛndzanan ehyiadzi mu kasa ahorow no yɛhyɛ mpɛnsampɛnsamu ase wɔ ho. Yeruhu nsɛmbisa efi binom hɔ no botum ataa aboa hɛn ma yɛatse ndzɛmba ase wɔ kan fofor mu na obotum egya hɛn akɔ hɛnanakasa hɛn nsɛmbisa etsitsir no do.

Mebohu dɛ ber a edze nsɛmbisa yɛ mpɛnsampɛnsamu wɔ wiadze mfɛndzanan ehyiadzi kasa ahorow a enye ebusua ebusua a erosom hɔn no yɛ no, ɔboa wo ma ihu hɔn ahoɔdzen na hɔn ehiadze so. Me nsɛmbisa a mepɛ bisa kor nye, Ebɛnadze na edwen ho dɛ ɔyɛ wiadze mfɛndzanan ehyiadzi mu nhyiamu a wowiei a ɔnnkyeree yi ne nsɛngyinado?

No mbuae no, bɛyɛ aber nyina no, ɔma ihu dza ɔrokɔ do wɔ hɔn abrabɔ mu na dza ohia hɔn no. Ɔma wo kwan ma itum yɛ onua anaa akyerɛbaa a ɔrosom ara yie, osiandɛ itum hu hɔn yie.

Camille Gillham, Colorado, USA

“Kyɛ asɛmpa no”

Yɛabɔ anohoba dɛ “[yebe]gyina dɛ Nyankopɔn N’adasefo aber nyina wɔ adze nyina mu, wɔ gyinabew biara a [yɛ]wɔ mu no mu” (Mosiah 18:9).

“Hyɛ mpɛnsampɛnsamu bi ase”

Wiadze mfɛndzanan ehyiadzi mu nsɛm no botum ekenyan sunsum mu nkɔmbɔdzi nwanwa a ɔyɛ mfaso. Na mpɛnsampɛnsamu a ɔtsetse dɛm no botum ahyɛ hɔn nkitahodzi mu dzen na wɔaboa wo ma wo dasegye enyin, na ɔdze enyigye abrɛ wo! (hwɛ Nkyerɛkyerɛ na Ahyɛmudzi 50:22).

“Fa nsɛmbisa dzi dwuma”

“Nsɛmbisa pa bɔboa wo ma atse hɔn enyikadze, na nsɛnhia, anaa nsɛmbisa horow a binom bɔwɔ no ase. Obotum aboa w’adzekyerɛ, ɔto nsa frɛ Sunsum no na ɔboa nkorɔfo ma wosũa adze.”⁴