Tin ni Yima Rrin’ u Galasia ni Ngan Murwel ngay Ngan Machib

Be yib e garbeb, ma dani nang rogon David Dickson ni nge ayuweg e tabinaew rok ngan paer ni dabin ulum.

David, nge ppin rok, nge l’agruw e ppin ni faak e kaffin ri baed nga Fredonia, Arizona, USA, bangi n’en nib liyeg e burey nib tlb tomora’, nge paan, nib yo’or mit.

Tabinaew rok Dickson ni kar rent niged e kemus ni ba ngochol ni yima ta’ l’ud ngay e ma pi’ e gowal ngoraed. Me nang Dickson nib ga’fan ni ngan kunuy e l’ud ni bachan e garbeb e ba sug ko snow nge ays.

“Dariy e l’ud fa chensaw fa gonop ko rogon ni ngan muruwliy. David e ga’ar. “Danug nang ko mang e nggu rrin’.”

Boech e ward e ri fthed David fa’anra yad ba gaman ko l’ud napan e winter. “Dani n’uw napan ni kar nanged ni dariy,” e yoeg David. “Ulung ko elder e ri pi’ed e ayuw ngog ni ngan kunuy e l’ud. Ku sug ko falfalen’, mug fana’ e ayuw roared.”

Ta’aboch riy me nang ni fare yan ni ngan kunuy e l’ud e rib fal’ rogon ni kan tanam nag, nikan yarmiy nib fal’ rogon, nge ward nib fal’ rogon. Reb e kadbul ko Sabado, me David, nge ulung ko elders, nge kuboech e gidii’ ko ward e raned ko burey u lane bukun e truck nge trailers.

“Ta’ab misiw’, kemagar talne murwel roared nge gonop roared, ma ke pi’ e ward bukun e l’ud ko tabinaew rog ni gamaed ra gaman riy u lane l’agruw e winter,” e yoeg David “N’en ni kab ga’fan, e kan fil Ngog gubin ban’en nib tu’uf ni Nggu nang ni mornga’agen i kunuy e l’ud ni go’ gag. Napan ni gu chuw u Fredonia, ma ku nang rogon i muruwliy e chensaw, ma ku un ko ayuw i kunuy e l’ud ni daku nang ko urngin yay.”

Tin ni yima rrin’ u lane ward e gathi kemus nima fal’eg thilin e gidii’ ko Galasia machane Kuma fal’eg thilin e gidii’ u lane binaew.

“Kugu manang ba ppin, ni dani bee’ ko Galasia, ni kab bi’ech ko gin ni bay riy.” David e be yoeg. “Dakuriy e l’ud u tabinaew rok ni nge ayuweg ko lulum. Napan ni gu nanged, ma gamaed ayuweg ngan pi’ e l’ud ngak nib tu’uf nge taw ko napan nike m’ay e winter. Kari falfalen’ ni dakir yag ni nge non.”

Ayuw ni yibe pi’ u Fredonia e yibe gay rogon ni gubin e gidii’ ma ba fal’ rogon ni dabi magawon ko ulum nge taw ko ngiyal’ nike m’ay e winter.

Napan ni guba’ ko mission u Romania, me Meg Yost nge cha’an ni yow e ri guyew ba tabinaew ni ke n’uw napan ni dakir bow nga galasia. “Stanicas e kab kakrom ni ri uned ko Galasia u Romania,” Meg e be yoeg,“ ma yaed ba tu’uf romaed.”

Napan ni taw ko ngiyall’ ni ngan tanam man yarmiy ban’en, me yoeg e pi toygang’ ni ngan tay e “Nep ko Pioneer.” Iraray e re balayal’ ni ngan tafney nag e pi pioneer ni kar tha’ebed yu Mariken ngar thap gaed nga Salt Lake City. Ku ir e ngiyal’ ni ngan tay fan e pi pioneer ko Galasia u Romania.

Meg e ga’ar, “Ku leam niged ni iraray e kanawo’ nib mangil ko boech e gidii’ ulane galasia ni ngar yoeged e mich roared ni kar uned ko galasia nge rogon nikar guyed e Galasia nike ga’ u Romania.” “Gamaed leam nag fare tabinaew ku Stanica ni ngan uneg raed ngay. Gu pininged raed ni ngar uned, ma kari falfalen’ gaed!”

Napan fare neap, Stanica e ku dawori taw gaed napan ni ke taw ko ngiyal’ ni ngan tabab.

“Ku magar gaed ni dabir baed.” e be yoeg Meg. “Machane ta’aboch riy mar baed u langan fare maab. Stanicas e ri yoeged e mich roared ni mornga’agen fare gospel nge Galasia. Mar noned ko boech e gidii’ u lane galasia ni dawor mada’ gaed nike n’uw napan.”

Ke bing e gidii’ ko branch pa’ raed ngak fare tabinaew ku Stanicas. Bin migid e Madnom, ma ke falfalen’ nike guy Sister Stanica u galasia.

“Napan ni waen ko fare branch ni ri in e pul, ma ku be yib!” Meg e be yoeg. “Gube leam nag nike ayuweg napan nike yag ni nge yoeg e mich rok ma ke thamiy nib mu’un nga fithik e ma’athuk ma ba tu’uf u lan fare branch.”

• Fal’eg rogon e tin ni ngan rrin’ ni ra ayuwegney: PIn’en ni ngan rrin’ e rayog ni nge ayuweg e tin nib tu’uf ko gidii’. Rayog ni ngan tanam nag ni nge ayuweg bee’ fa gidii’. Ba tu’uf ni nge ayuweg e pi’in nike un, demtrug ko ngar naged raed, ma ngan nang boech mornga’agen fare gospel, fa ngan thamiy fare Kan Nthothup.

• Pining gubin e gidii’. Napan ni gara fal’eg e pin’en ni ngan rrin’, mag pining e pi’in ni ra ayuweg ngar uned. tay u wun’um e pi’in ni kafini un ko galasia, pi’in nike palog ko galasia, pi’in nib bitir, pi’in ni fal’ yangren, pi’in nib m’ar, nge gidii’ nib thil e taliw roraed. Pining raed e n’en ni ngan rrin’, ma yoeg ni ga ba adag ni ngar baed.

• Ni un ko n’en ni yibe rrin’: Pi’in ni gimed ra pining e ra yag ban’en ngak ko pin’en ni yibe rrin’ u galasia fa’anra yaed ra un ngay. Reb e kanawo’ ni ngan ma’thuk e bee’ ni nge murwel ko tawa’ath roared, tin ni yaed ba cheg riy, napan ni yibe rrin’ e tin ni fan e Galasia.

• Pining e magaer ko gidii’ ni gubin: Fa’anra ke un e fagar rom, mag athamgil ngam ayuweg raed ni dabi kirkireb gaed. Ta’aborogon, fa’anra gara guy e gidii’ ni danum nang, ma ngam gol mag non ngoraed!