ការងារបម្រើតាមរយៈភាពខ្លួនទីពឹងខ្លួន

ការជួយមនុស្សដទៃឲ្យមានភាពខ្លួនទីពឹងខ្លួនគឺជាការផ្គត់ផ្គង់ និងការងារបម្រើតាមរបៀបរបស់ព្រះអម្ចាស់ ។

សមាជិកគ្រួសារ មិត្តភក្ដិ និងអ្នកជិតខាងរបស់យើងជាច្រើនចាប់អារម្មណ៍ទៅលើការមានភាពខ្លួនទីពឹងខ្លួនកាន់តែខ្លាំងឡើង ។ ដោយការចូលរួមក្នុងការផ្ដួចផ្ដើមកម្មវិធីភាពខ្លួនទីពឹងខ្លួនរបស់សាសនាចក្រ នោះសមាជិកសាសនាចក្រកំពុងស្វែងរកឱកាសដើម្បីបម្រើ ថែទាំ និងផ្ដល់ការងារបម្រើ ខណៈពួកគេផ្ដល់ពរជ័យដល់មនុស្សដទៃជាមួយនឹងគោលការណ៍ដែលនាំមកនូវ « សេចក្ដីសង្ឃឹម សេចក្ដីសុខសាន្ដ និងការរីកចម្រើនកាន់តែខ្លាំង » ។^១

« ខ្ញុំបាននៅផ្ទះ »

ដោយ គ្រីសស៊ី ខេបលើ រដ្ឋអារីហ្សូណា ស.រ.អ

ខ្ញុំបានមានការពិបាកខាងហិរញ្ញវត្ថុបន្ទាប់ពីការលែងលះគ្នា ហើយបានព្យាយាមស្វែងរកផ្លូវត្រឡប់ចូលទៅកន្លែងការងារវិញ បន្ទាប់ពីបានធ្វើជាមេផ្ទះមើលកូនអស់រយៈពេលប្រាំបីឆ្នាំ ។ ខ្ញុំក៏មានការលំបាកខាងវិញ្ញាណផងដែរ ហើយព្យាយាមស្វែងរកសេចក្ដីពិត និងសេចក្ដីជំនឿ ទោះជាខ្ញុំមិនដែលបានឈានជើងចូលក្នុងសាលជំនុំ តាំងពីខ្ញុំនៅជាយុវវ័យ ។

នៅថ្ងៃអាទិត្យមួយ ខ្ញុំកំពុងបោកខោអាវនៅផ្ទះបងស្រីច្បងបំផុតរបស់ខ្ញុំឈ្មោះ ព្រីស៊ីលឡា ដែលជាសមាជិកសកម្មក្នុងសាសនាចក្រ ។ ខណៈខ្ញុំនៅទីនោះ ព្រីស៊ីលឡាបានអញ្ជើញខ្ញុំឲ្យទៅព្រះវិហារជាមួយនឹងគ្រួសាររបស់គាត់—ជាការអញ្ជើញលើកទីមួយមកកាន់ខ្ញុំក្នុងពេលជាង ១៥ ឆ្នាំមកនេះ ។

ដំបូង ខ្ញុំរៀងស្ទាក់ស្ទើរ ប៉ុន្ដែកាលពីយប់មុននោះ ខ្ញុំបានអង្វរសូមព្រះឲ្យបង្ហាញខ្ញុំអំពីរបៀបដើម្បីចូលទៅកាន់តែជិតនឹងទ្រង់ ។ ក្រោយពីមានអារម្មណ៍ដាស់តឿនខាងក្នុងខ្លួនមួយ ខ្ញុំបានសន្និសដ្ឋានថា « ហេតុអ្វីមិនទៅស្ដាប់ ហើយមើលឲ្យឃើញដោយខ្លួនឯង ក្នុងនាមជាមជ្ឈិមវ័យដោយដួងចិត្ត និងភ្នែករបស់ខ្លួនឯងផ្ទាល់ទៅ ? »

កាលយើងនៅក្នុងការប្រជុំសាក្រាម៉ង់ ខ្ញុំបានសម្គាល់ឃើញបណ្ណផ្សព្វផ្សាយមួយនៅលើផ្ទាំងព័ត៌មានថ្ងៃអាទិត្យ ដែលប្រកាសពីវគ្គសិក្សាភាពខ្លួនទីពឹងខ្លួនស្ដីពីហិរញ្ញវត្ថុផ្ទាល់ខ្លួន ។ ខ្ញុំមិនទាន់បានត្រៀមខ្លួនដើម្បីត្រឡប់មកសាសនាចក្រវិញទេ ប៉ុន្ដែខ្ញុំមានអារម្មណ៍ទាក់ទាញឲ្យទៅវគ្គសិក្សា ១២ សប្ដាហ៍នេះ ។ ដោយមានការលើកទឹកចិត្តពីបងស្រី និងបងថ្លៃប្រុសរបស់ខ្ញុំ នោះខ្ញុំបានចុះឈ្មោះចូលរៀន ដោយសង្ឃឹមថានឹងគ្រាន់តែរៀនពីរបៀបដើម្បីដាក់ផែនការថវិកា និងសងបំណុលគេវិញប៉ុណ្ណោះ ។ ប៉ុន្ដែ ថ្នាក់នោះបានផ្លាស់ប្ដូរខ្ញុំខាងវិញ្ញាណ ។

ខ្ញុំមានការភ្ញាក់ផ្អើលនឹងសារលិខិតខាងវិញ្ញាណក្នុងពេលពីរបីសប្ដាហ៍ដំបូងនៅក្នុងថ្នាក់នោះ ប៉ុន្ដែនៅអំឡុងពេលម៉ោងរៀនលើកទីបី ខ្ញុំបានទទួលអារម្មណ៍សន្ធប់ ដែលជាការបញ្ជាក់ថា ខ្ញុំបាននៅផ្ទះ ហើយស្ដាប់ឮសេចក្ដីពិតថ្មីៗ ប៉ុន្ដែដែលខ្ញុំធ្លាប់ស្គាល់ហើយ ។ ខ្ញុំបានចាកចេញពីថ្នាក់រៀន ហើយបើកឡានតំរង់ឆ្ពោះទៅជួបព្រីស៊ីលឡាភ្លាម ។ ខ្ញុំបានសួរគាត់ទាំងទឹកភ្នែកថា « តើខ្ញុំទទួលបានអារម្មណ៍នេះបន្ថែមទៀតនៅក្នុងជីវិតរបស់ខ្ញុំដោយរបៀបណា ? » គាត់បានរៀបចំឲ្យពួកអ្នកផ្សព្វផ្សាយសាសនាចាប់ផ្ដើមបង្រៀនខ្ញុំ ។

សមាជិកនៅក្នុងថ្នាក់ភាពខ្លួនទីពឹងខ្លួនរបស់ខ្ញុំបានចូលរួមក្នុងមេរៀនផ្សព្វផ្សាយសាសនារបស់ខ្ញុំដែរ ហើយបានគាំទ្រខ្ញុំ ។ ពួកគេបានមានឥទ្ធិពលដ៏យូរអង្វែងមកលើជីវភាពខាងវិញ្ញាណរបស់ខ្ញុំ ហើយបានជួយខ្ញុំឲ្យអភិវឌ្ឍទីបន្ទាល់មួយអំពីដំណឹងល្អ និងព្យាការីសម័យទំនើប ។

នៅក្នុងពេលដែលខ្ញុំរៀនដើម្បីបញ្ចប់វគ្គសិក្សានេះ ខ្ញុំបានមានការផ្លាស់ប្ដូរខាងសាច់ឈាម និងខាងវិញ្ញាណជាច្រើន ។ ខ្ញុំបានចាប់ផ្ដើមការងារថ្មីជាមួយនឹងក្រុមហ៊ុនដ៏ល្អមួយ ហើយខ្ញុំបានបង់ផ្ដាច់បំណុលជាច្រើន ។

ប៉ុន្ដែពរជ័យដ៏កាន់តែជ្រាលជ្រៅ និងផ្អែមល្ហែមនេះដែលបានកើតមកពីវគ្គសិក្សានេះ រួមមានការបង្កើតចំណងមិត្តភាពដ៏ល្អផូរផង់ ការអភិវឌ្ឍទំនាក់ទំនងវិជ្ជមានជាមួយនឹងប៊ីស្សពដែលបានលើកទឹកចិត្ត ការរកឃើញទីបន្ទាល់អំពីដង្វាយមួយភាគក្នុងដប់ ការទទួលបានបណ្ណចូលព្រះវិហារបរិសុទ្ធរបស់ខ្ញុំ ការទទួលបានអំណោយទានពិសិដ្ឋ និងការឃើញកូនច្បងពីរនាក់របស់ខ្ញុំទទួលបុណ្យជ្រមុជទឹក ។

ផ្លូវរបស់ខ្ញុំទៅកាន់ភាពខ្លួនទីពឹងខ្លួនកំពុងលាតត្រដាងនៅឡើយ ប៉ុន្ដែសម្រាប់ដំណើររបស់ខ្ញុំទាំងប៉ុន្មានទៀត ខ្ញុំនឹងឱបក្រសោបមេរៀនដែលខ្ញុំបានរៀនទាំងអស់ និងចំណងមិត្តភាពដែលខ្ញុំបានបង្កើត ។

អញ្ជើញ ចូលរួម ពង្រឹង

ដើម្បីជួយពួកបរិសុទ្ធថ្ងៃចុងក្រោយឲ្យសម្រេចបានភាពខ្លួនទីពឹងខ្លួន—ទាំងខាងហិរញ្ញវត្ថុ និងខាងវិញ្ញាណ—សាសនាចក្របានចាប់ផ្ដើមកម្មវិធីផ្ដួចផ្ដើមភាពខ្លួនទីពឹងខ្លួននៅក្នុងឆ្នាំ ២០១៤ ។ ក្រោយពីការប្រជុំធម្មនិដ្ឋានចាប់ផ្ដើម អ្នកចូលរួមជ្រើសរើសវគ្គសិក្សាចំនួន ១២ សប្ដាហ៍ដែលមានបួនខុសៗគ្នា ។

ដោយសារក្រុមខ្លួនទីពឹងខ្លួនដំណើរការជាក្រុមប្រឹក្សា នោះវាផ្ដល់ឱកាសដ៏ប្រសើរបំផុតមួយក្នុងការផ្ដល់ការងារបម្រើដើម្បីបំពេញតាមតម្រូវការខាងហិរញ្ញវត្ថុ ខាងការអប់រំ ខាងវិជ្ជាជីវៈ និងខាងវិញ្ញាណរបស់មនុស្សដទៃ ។ សមាជិកក្រុមរៀនពីគ្នា ប្រឹក្សាជាមួយគ្នា និងគាំទ្រគ្នាទៅវិញទៅមក ។ ពួកគេក៏ចែកចាយគំនិត ហើយទទួលខុសត្រូវចំពោះគ្នាទៅវិញទៅមកផងដែរ ។

សូមអធិស្ឋានថា តើសមាជិកគ្រួសារ មិត្តភក្ដិ ឬអ្នកជិតខាងណាម្នាក់ដែលបងប្អូនអាចអញ្ជើញឲ្យមកកាន់វគ្គសិក្សាភាពខ្លួនទីពឹងខ្លួននេះបាន ហើយចូលរួមជាមួយពួកគេ ។ សូមចាំថា គោលការណ៍នៃភាពខ្លួនទីពឹងខ្លួនអាចផ្ដល់ពរជ័យដល់បុត្រាបុត្រីរបស់ព្រះទាំងអស់ មិនថាពួកគេជាសមាជិកសាសនាចក្រឬអត់នោះទេ ។

« ខ្ញុំបានចេញពីថ្នាក់រៀនរាល់ដងមានអារម្មណ៍ពោរពេញដោយសេចក្ដីស្រឡាញ់ »

នៅពេលនាងបានទៅលេងព្រះវិហារបរិសុទ្ធ Temple Square នៅទីក្រុងសលត៍ លេក រដ្ឋយូថាហ៍ ជាមួយនឹងកូនប្រុសអាយុ ១០ ឆ្នាំរបស់នាង ឈ្មោះវិនសិន នៅខែ ធ្នូ ឆ្នាំ ២០១៦ ខេធី ហ្វាំង បានគិតថាខ្លួនជា « មនុស្សមិនមានភាពជឿជាក់លើខ្លួនឯង » ។ នាងបានចាកចេញពីសាសនាចក្រនៅអាយុ ១៦ ឆ្នាំ បានក្លាយជាម្ដាយទោលនៅអាយុ ១៧ ឆ្នាំ បានចាបផ្ដើមចាក់សាក់ និងចេះស្គាល់រសជាតិកាហ្វេ ។ ប៉ុន្ដែនៅអំឡុងពេលទៅលេងព្រះវិហារបរិសុទ្ធ Temple Square នោះ វិនសិនបានមានអារម្មណ៍មកពីព្រះវិញ្ញាណបរិសុទ្ធ ហើយបានសួរម្ដាយរបស់ខ្លួនថា តើគាត់អាចរៀនមេរៀនជាមួយអ្នកផ្សព្វផ្សាយសាសនាបានទេ ។

ទោះជានាងធ្វើការពីរកន្លែង ៨០ ម៉ោងក្នុងមួយសប្ដាហ៍ក្ដី ក៏ខេធីបានសិក្សាដំណឹងល្អជាមួយវិនសិនដែរ ដោយបានស្រាវជ្រាវរកចម្លើយចំពោះសំណួររបស់គាត់ ចន្លោះពេលមកជួបរបស់អ្នកផ្សព្វផ្សាយសាសនា ។ នៅរដូវក្ដៅឆ្នាំ ២០១៧ នាងបានចាប់ផ្ដើមចូលរួមក្នុងការប្រជុំរបស់សាសនាចក្រ ជាកន្លែងដែលនាងបានដឹងអំពីវគ្គសិក្សាភាពខ្លួនទីពឹងខ្លួនរបស់សាសនាចក្រ ។

នាងបានពោលថា « ខ្ញុំបានដឹងថា វាជាអ្វីមួយដែលអាចជួយខ្ញុំបាន » ។ « ប្រហែលខ្ញុំមិនចាំបាច់ធ្វើការពីរកន្លែង ឬពឹងផ្អែកទៅលើឪពុកម្ដាយរបស់ខ្ញុំពេញមួយជីវិតនោះទេ » ។

ខេធីបានដាក់ឈ្មោះឲ្យវគ្គសិក្សារបស់នាងថា « ការពង្រឹងខាងសាច់ឈាម និងខាងវិញ្ញាណដ៏អស្ចារ្យណាស់ » មិនមែនដោយសារតែអ្វីដែលនាងបានរៀននោះទេ ប៉ុន្ដែក៏ដោយសារតែរបៀបដែលក្រុមខ្លួនទីពឹងខ្លួនរបស់នាងបានទទួលយកនាង និងផ្ដល់ការងារបម្រើដល់នាងផងដែរ ។

របៀបដែលបងប្អូនអាចជួយបាន

នេះជាយោបល់មួយចំនួនមកពីខេធី ស្ដីអំពីរបៀបដែលយើងអាចធ្វើឲ្យកម្មវិធីផ្ដួចផ្ដើមភាពខ្លួនទីពឹងខ្លួនរបស់សាសនាចក្រ ជាឱកាសមួយដើម្បីផ្ដល់ការងារបម្រើទាំងខាងវិញ្ញាណ និងខាងសាច់ឈាម ៖

« ផ្ដល់ការគាំទ្រ និងការលើកទឹកចិត្ត ។ ក្រុមរបស់ខ្ញុំបានគាំទ្រខ្ញុំតាមរបៀបមួយដែលខ្ញុំបានចេញពីថ្នាក់រៀនរាល់ដង មានអារម្មណ៍ពោរពេញទៅដោយសេចក្ដីស្រឡាញ់ » ។
« ចែកចាយបទពិសោធន៍របស់បងប្អូន ។ ភាពស្មោះត្រង់ និងការបើកចិត្តឲ្យទូលាយដែលយើងមានចំពោះគ្នាទៅវិញទៅមកបានធ្វើឲ្យដួងចិត្តរបស់យើងមានអារម្មណ៍កាន់តែប្រសើរឡើង ។ បងប្អូននឹងមិនដែលដឹងទេថា នរណានឹងទទួលបានប្រយោជន៍មកពីអ្វីដែលបងប្អូនចែកចាយនោះទេ » ។
« សូមនិយាយចេញមក ។ ខ្ញុំនិយាយអំពីរបៀបដែលជីវិតរបស់ខ្ញុំបានប្រសើរឡើងយ៉ាងខ្លាំង ដោយសារខ្ញុំបង់ដង្វាយមួយភាគក្នុងដប់របស់ខ្ញុំ ហើយទៅព្រះវិហារ ។ ខ្ញុំយកសៀវភៅហិរញ្ញវត្ថុផ្ទាល់ខ្លួនសម្រាប់ភាពខ្លួនទីពឹងខ្លួនរបស់ខ្ញុំតាមខ្លួនទៅកាន់កន្លែងធ្វើការ ទុកដូចជាអ្នកព្យាបាលអាកប្បកិរិយាមួយអញ្ចឹង ។ ពេលណាសមរម្យ ខ្ញុំចែកចាយគោលការណ៍វាមួយចំនួនជាមួយនឹងមនុស្សដទៃ » ។
« សូមទៅកាន់វគ្គសិក្សាភាពខ្លួនទីពឹងខ្លួនសម្រាប់ខ្លួនឯង ប៉ុន្ដែសូមសង្កេតមើលអស់អ្នកដែលអាចត្រូវការជំនួយរបស់បងប្អូន ។ ខ្ញុំបានខកមិនបានរៀនស្ទើរតែពាក់កណ្ដាលមេរៀននៃវគ្គសិក្សានេះ ដោយសារតែការផ្លាស់ប្ដូរកាលវិភាគនៅកន្លែងធ្វើការរបស់ខ្ញុំ ប៉ុន្ដែសមាជិកក្រុមរបស់ខ្ញុំបានបន្ដទាក់ទង និងលើកទឹកចិត្តខ្ញុំ ។ វាអស្ចារ្យណាស់ដែលមានអារម្មណ៍ថា ខ្ញុំនៅតែជាកម្មសិទ្ធិ ទោះជាពេលខ្ញុំមិនអាចនៅទីនោះក្ដី » ។

© 2020 by Intellectual Reserve, Inc. All rights reserved. បោះពុម្ពនៅ ស.រ.អា ។ អនុមតិជាភាសាអង់គ្លេស ៖ ៦/១៩ ។ អនុមតិឲ្យបកប្រែ ៖ ៦/១៩ ។ ការបកប្រែនៃ Ministering Principles, August 2020. Cambodian. 16723 258