Stap Givhan tru long Kam, Folem Mi

Taem oli singaotem Ofelia Trejo de Cardenas blong tijim ol yang adalt long Meksiko Siti Wod blong hem, hem i filim se blong gat wan gudfala rilesensip wetem wanwan studen blong Sandei Skul Klas blong hem bae i leftemap paoa blong hem blong tij mo mekem olgeta i strong.

“Sapos mi nogat wan gudfala rilesensip wetem ol studen blong mi mo sapos oli no filim lav blong mi, oli maet no save bilif long mi taem mi stap tijim wan klas o serem testemoni blong mi,” hem i talem. “Bae oli filim se mi jes wan Sandei Skul tija nomo.”

?Be olsem wanem Sista Cardenas i save developem wan kaen rilesensip olsem sapos hem i tij wan taem nomo long evri tu wik? Hem i faenem ansa tru long teknoloji. Wetem mobael fon aplikesen WhatsApp, hem mo ol studen blong hem oli stap konek evri dei tru long teks mo ol voes mesej. Nao, evri dei bifo nekis Sandei Skul lesen, wan klas volontia i sendem wan ves blong skripja blong nekis lesen wetem wan mesej blong hemwan we i go wetem lesen ia, i go long ol nara klas memba. Afta we oli ridim ves ia mo mesej ia, ol klas memba oli ansa wetem ol tingting blong olgeta wanwan.

“Taem oli ridim skripja, oli sendem wan hapi fes blong mekem mi save se oli bin ridim o stadi long skripja ia mo we oli bin tingting abaot skripja ia,” Sista Cardenas i talem. Taem we i taem blong nekis Sandei lesen, ol studen oli rere blong tekpat.

Evri dei koneksen ia i bin blesem wan yang adalt i no long taem i pas, we papa mo mama blong hem oli no aktiv long Jos.

“Mi laekem taem mi luk hem i kam long jos from mi save se blong kasem ples we hem i stap long hem, hem i mas go tru long samfala jalenj” Sista Cardenas i talem. “Mi sua se ol skripja mo ol tingting we ol fren blong hem long klas we oli bin sendem aot mo ol skripja mo tingting we hem i bin sendem aot taem we i taem blong hem, i bin mekem hem i kam strong fulap.”

Sista Cardenas i talem se blong stap givhan tru long ol skripja i no stop wetem Sandei lesen blong hem mo koneksen blong klas wetem skripja evri dei.

“Fasin blong rere blong mi i tekem tu blong stap prea from ol studen blong mi”, hem i talem. “Mi no tingting long olgeta long Sandei nomo be evri dei blong wik tu. Wanwan long olgeta oli gat ol spesifik mo defren nid. Wanwan i wan Pikinini blong God. Mi tingbaot olgeta taem mi stap rere long lesen blong mi.”

Mo taem hem i tij, hem i lisin—tugeta long ol studen blong hem mo long Tabu Spirit.

“Tija hem i Spirit, ” we hem i harem long ol voes blong ol studen blong hem plante taem. “Mi mas lisin gud, from wanem oli talem i revelesen we Spirit i stap givim long olgeta.”

Carla Guterrez Ortega Cordoba i filim blesing blong save stap olsem wan memba blong Sandei Skul klas blong Sista Cardenas Sandei from envaeromen blong hem i fidim mo givhan long man. Carla i talem se envaeromen ia i from ol samting ia:

• Priperesen: Stap serem ol skripja mo tingting i helpem ol studen blong rere from nekis klas. “Stadi skripja evri dei i fidim yumi mo mekem save blong yumi i kam moa bigwan,” hem i eksplenem.

• Tekpat: “Yumi evri wan i toktok. Hemia i letem mi blong save ol klas fren blong mi moa dip, olsem ol fren mo olsem ol brata mo sista.”

• Lav: “Sista Cardenas i tekem yu long han. Klas blong mifala i fil olsem haos naet, wetem fulap brata mo sista. I spesel tumas.”

• Tabu Spirit: “Mifala i gat wan naes mo gudfala spirit insaed long klas blong mifala from mifala i wan wetem Spirit. ”

• Testemoni: “Kam, Folem Mi i bin helpem mi blong rere blong serem testemoni blong mi. Mi gat wan save we i moa bigwan long saed blong Buk blong Momon mo Baebol. Hemia i letem mi blong serem wanem mi stap lanem wetem ol klas fren blong mi long skul mo ol pipol long wok.”

Taem Greg mo Nicky Christensen, blong Kentaki, YSA, i ridim abaot kavenan blong Abraham long ol skripja wetem ol trifala boe blong olgeta, oli faenem i had blong eksplenem long olgeta. Oli disaed olsem wan famli se wanwan long olgeta bae i stadi abaot kavenan blong Abraham olgetawan, mo afta serem wanem oli faenem.

“Mifala i kasem sam interesting komen,” Greg i talem. “Boe blong mitufala we i gat eit yia, i lanem se nem blong Abraham i bin Abram. Nem blong hem i jenis i go long Abraham from hem i bin mekem wan promes long Lod blong tanem hem long ol sin mo laef long wan stret mo gud laef. Mi bin sapraes tumas se hem i bin save kam antap wetem hemia.”

Evriwan i bin lanem wan niu samting mo gat wan gud storian abaot wanem nao i kavenan blong Abraham mo wanem i minim long Ol Lata‑dei Sent tudei.

“Plante taem mifala i jes go raon long rum mo wanwan i ridim ol skripja ves blong famli skripja stadi blong mifala.” Nicky i talem. “Oli mekemKam Folem Mi blong help moa blong stap tij folem Spirit. Naoia taem mifala i stadi tugeta, mi filim Spirit i stap stikim mi smosmol blong tekem storian blong mifala long wan defren daereksen folem nid blong famli blong mifala.

Blong stap yusum Kam, Folem Mi i no bin helpem famli blong olgeta nomo blong tekpat moa mo intres long famli gospel stadi, be i bin helpem Greg mo Nicky blong givhan long ol nid blong spirit blong ol pikinini blong olgeta.

“Kam Folem Mi i helpem mi blong tijim ol pikinini blong mi,” Nicky i talem. “I bin helpem mi tu blong go tru long ol defren jalenj we i mi gat samtaem wetem ol pikinini blong mi. Mi filim mi wan moa wetem Spirit, mi lisin kolosap moa, mo mi bin kasem ol filing mo tingting blong Spirit long olsem wanem mi save helpem wanwan pikinini.”

Greg i laekem ol storian blong gospel we i longwan moa we Kam, Folem Mi i help blong karem i kam insaed long famli. “Ol boe blong mifala oli defren evriwan long wea ples oli stap long hem wetem save we oli gat abaot gospel,” hem i talem.“Kam, Folem Mi i bin givim wan rod blong mifala blong helpem wanwan long olgeta blong lan folem ol nid blong olgeta. Blong luk olgeta oli stap gro long lav blong olgeta long gospel, mo stap wajem olgeta oli luk save olsem wanem oli save yusum save blong olgeta long gospel long laef blong olgeta, i bin wan naesfala blesing.”