Erudua Bra, Bɛka Mo Do do dze Rosom

Ber a wɔfrɛɛ Ofelia Trejo de Cárdenas dɛ ɔnkyerɛ young adultfo adze wɔ ne Mexico City ward no, ɔtsee nkã dɛ ɔnye ne Kwesida Skuul adzesũafo no kor biara renya nkitahodzi mapã no bɛma oetum akyerɛ hɔn adze na ɔahyɛ hɔn dzen yie.

Ɔsee dɛ, “Sɛ mannye m’adzesuafo no ennya nkitahodzi mapã na sɛ wɔanntse modɔ nkã a, sɛ merekyerɛ adze anaa meregye me dasee a wɔnnkɛgye me edzi.’’ “Ebia wobenya atsenkã dɛ meyɛ Kwesida Skuul kyerɛkyerɛnyi ara.’’

Naaso Akyerɛbaa Cárdenas besi dɛn botum enya nkitahodzi a ɔtse dɛm sɛ ɔkyerɛ adze kor pɛr wɔ adapɛn ebien biara mu a? Oduaa abaefo tɛknɔlɔgye do dze nyaa nyiano. Ɔdze mobile foon WhatsApp a ɔwɔ do no, annkyɛr na ɔnye n’adzesuafo no nam text na ndze nkaabɔ do renya daa daa nkitahodzi. Afei, dabiara ansaana Kwesida Skuul adzesũa a odzi do no, adzesũa ɔhofamanyi bi dze kyerɛwsɛm nyiyimu fi adzesũa a odzi do no mu a ankorankor adwenkyerɛ ka ho dze kɛma adzesũafo nkaafo no. Wɔkenkan nyiyimu na adwenkyerɛ no wie a, adzesuafo no dze hɔn adwenkyerɛ yi ano.

Akyerɛbaa Cárdenas see dɛ, “Sɛ wɔkenkan kyerɛwsɛm no a, wɔdze enyigye enyim mfonyin to do ama meehu dɛ wɔakenkan anaa woesũa kyerɛwsɛm no na wɔadwendwen ho.’’ Ber a Kwesida adzesũa a odzi do no bodu no, nna adzesuafo no ayɛ krado dɛ wɔdze hɔnho bɛhyɛ mu.

Ɔnnkyɛree na daa daa nkitahodzi yi hyiraa aberantsɛba bi a nna n’awofo mmbɔ hyew wɔ Asɔr no mu.

Akyerɛbaa Cárdenas see dɛ, “Sɛ muhu no dɛ ɔaba asɔr a, menya ahomka osiandɛ minyim dɛ obodu hɔ no, nna oedua ɔhaw ahorow pii mu. “Minyim pefee dɛ kyerɛwsɛm na adwenkyerɛ horow a n’adzesũa mfɛfo dze akɔ to do no, na sɛ odu no do a, adwenkyerɛ na kyerɛwsɛm horow a ɔdze kɔ no na wɔahyɛ no dzen mbordo no.’’

Akyerɛbaa Cárdenas see dɛ orudua kyerɛwsɛm no do dze asom no mma ne Kwesida adzesũa na n’adzesũafo hɔn daa daa kyerɛwsɛm nkitahodzi no nngyae.

Ɔsee dɛ. “Mpaabɔ ma m’adzesũafo no kã m’ahoboaboa no ho. “Monndwen hɔnho Kwesida nko mbom dabiara wɔ dapɛn no mu so. Hɔn mu kor biara wɔ ehiadze pɔkyee ahorow a ɔyɛ soronko. Kor biara yɛ Nyame ne Ba. Modwen hɔn ho ber a mereyɛ m’adzesũa ho ahoboa.’’

Na sɛ ɔkyerɛ adze a, otsie—n’adzesũafo na Sunsum Krɔnkrɔn no nyina.

“Sunsum Krɔnkrɔn no nye kyerɛkyerɛnyi,’’ a ɔtaa tse no wɔ n’adzesũafo kasaa mu. “Ɔwɔ dɛ me kyɛn m’asowa osiandɛ dza wɔkã no nye nyikyerɛ a Sunsum no dze rema hɔn.’’

Carla Gutiérrez Ortega Córdoba tse dɛ ɔyɛ adom dɛ ɔyɛ Akyerɛbaa Cárdenas ne Kwesida Skuul adzesũanyi osian ntsetsee na som a wɔsom wɔ bea hɔ no ntsi. Carla dze ma hɔ bea tse no kyerɛ ndzɛmba beberee, a dza ɔka ho nye:

• Ahoboaboa: Erekyɛ kyerɛwsɛm na adwenkyerɛ horow boa adzesũafo ma wɔyɛ adzesũa a odzi do no ahoboa. Ɔkyerɛkyerɛ mu dɛ, “Daa daa kyerɛwsɛm horow no nyɛn hɛn na ɔtserɛw hɛn nyimdzee mu.’’

• Ahohyɛmu: “Hɛn nyina kasa. Iyi boa me ma muhu m’adzesũa mfɛfo yie ara, dɛ anyɛnkofo na dɛ enuanom mbanyin na nkyerɛbaa.’’

• Ɔdɔ: “Akyerɛbaa Cárdenas suo wo nsa mu. Hɛn adzesua tse dɛ ewimbir fie, a enuanom mbanyin na nkyerɛbaa pii wɔ hɔ. Ɔyɛ soronko mapã.’’

• Sunsum Krɔnkrɔn No: “Yenya dɛw, koryɛ sunsum wɔ hɛn adzesũa hɔ osiandɛ yɛnye Sunsum no nam fakor.’’

• Dasegye: “Bra, Bɛka Mo Do aboa me ma maayɛ krado dɛ mebɛgye me dasee. Menya nyimdzee a no mu dɔ yie wɔ Mormon Nwoma na Bible no ho. Dɛm no ma mo kwan ma menye m’adzesua mfɛfo a wɔwɔ skuul na nkorɔfo a wɔwɔ m’edwuma mu no kyɛ dza murusũa.’’

Ber a Greg na Nicky Christensen, a wofi Kentucky, USA nye hɔn mba mbanyin baasa, kenkaan Abraham n’ahyɛmudzi ho asɛm wɔ kyerɛwsɛm mu no, ɔyɛɛ dzen maa hɔn dɛ wɔbɛkyerɛkyerɛ mu akyerɛ hɔn. Wɔdween ho dɛ wɔyɛ ebusua no hɔn mu kor biara nankasa bosũa Abraham n’ahyɛmudzi no na afei wɔakyɛ dza wobohu.

Greg see dɛ, “Yenyaa nsɛm a nna ɔyɛ enyigye.’’ “Hɛn mfe awɔtwe no sũae dɛ nna nkyɛ Abraham ne dzin yɛ Abram. Ne dzin sesae yɛɛ Abraham osiandɛ ɔbɔɔ Ewuradze anohoba dɛ obefi bɔn ho na ɔabɔ tsenenee bra. Ɔyɛɛ me ahobow dɛ otumii hun dɛm.’’

Hɔn nyina sũaa adze fofor na mpɛnsapɛnsamu no kɔr yie wɔ dza Abraham n’ahyɛmudzi tse ho na mbrɛ osi som bo ma Latter-day Saintfo ndɛ.

Nicky see dɛ, “Hɛn ebusua kyerɛwsɛm nsũae no nna yɛkɔ aprɔw ara wɔ dan no mu dɛ odu wo do a nna akenkan kyerɛwsɛm nyiyimu no.’’ “Bra, Bɛka Mo Do fa mbrɛ edze Sunsum no rekyerɛkyerɛ adze ara yie do. Afei sɛ yɛbɔ mu sũa a, metse Sunsum ne nkenyan nketsenkeste dɛ yɛnyɛ hɛn mpɛnsapɛnsamu no kwan fofor a ogyina hɛn ebusua ehiadze ahorow no do.’’

Wɔdze Bra, Bɛka Mo Do ridzi dwuma no mmboa hɔn ebusua no ma wɔmmfa hɔn ho nnhyɛ mu na hɔn enyi nngyee ebusua asɛmpa nsũae ho nko, mbom wɔasan so aboa Greg na Nicky ma wɔasom hɔn mba wɔ hɔn sunsum mu ehiadze horow no ho.

Nicky see dɛ, “Bra, Bɛka Mo Do boa me ma mekyerɛ me mba adze.’’ “Ɔsan so boa me ma me siesie tafɛrbanyinbɔmu horow a ɔtɔfabi a menye me mba nya no. Metse Sunsum ne nkã mbordo, metsie yie mbordo, na meenya nkenyan wɔ mbrɛ mebesi botum aboa abofra kor biara ho.”

Greg n’enyi gye asɛmpa mpɛnsapɛnsamu ara yie no a Bra, Bɛka Mo Do dze ba ebusua mu no ho. Ɔsee dɛ, “Ɔson beebi a hɛn mbanyinmba no nyina woedu wɔ hɔn asɛmpa nyimdzee mu.” “Bra, Bɛka Mo Do ama hɛn kwan ma yɛboa hɔn mu kor biara a ogyina hɔn ehiadze horow do. Yeruhu hɔn dɛ worinyin wɔ hɔn dɔ ma asɛmpa no mu na yɛrehwɛ mbrɛ wobesi botum dze asɛmpa nyimdzee no abɔ bra wɔ hɔn abrabɔ mu no ayɛ nhyira nwanwa.”