Veiqaravi ena Lako Mai, Mo Muri Au

Ena gauna ea kacivi kina o Ofelia Trejo de Cárdenas me veivakavulici vei ira na itabagone qase cake ena nona tabanalevu e Mexico City, ea vakila o koya ni kevaka e tiko e dua na veimaliwai voleka kei ira yadua na nona gonevuli ni Matawilivola ni Sigatabu ena vakalevutaka na nona gugumatua me veivakatavulici ka vakaqaqacotaki ira.

“Kevaka e sega ni’u veimaliwai vakavoleka kei ira na noqu gonevuli, kevaka era sega ni vakila na noqu loloma, era na sega beka ni vakabauti au ni’u vakavulica tiko e dua na kalasi se ni’u wasea na noqu ivakadinadina,” a kaya o koya. “E rawa ni ra vakila ni o au e dua ga na qasenivuli ni Matawilivola ni Siga Tabu.”

Ia e rawa vakacava vei Sisita Cárdenas me vakatorocaketaka e dua na veimaliwai vakaoqo kevaka e veivakavulici vakadua ga ena loma ni rua na macawa? A kunea na kena isau mai na tekinolaji. Ena kena vakayagataki na WhatsApp ni talevoni veikauyaki, a sa yaco me ratou sa dau sema tiko o koya kei ira na nona gonevuli ki na itukutuku ni tex kei na domo ena veisiga. Ia oqo, ena veisiga ni se bera na lesoni ni Matawilivola ni Sigatabu ka tarava, ena vakauta e dua na lewe ni kalasi volodia ki vei ira na vo ni kalasi e dua na tikina mai na ivolanikalou ni lesoni ka tarava kei na nona vakasama me baleta na tikina oya. Ni wiliki oti na tikina kei na vakasama, era na biuta yani o ira na lewe ni kalasi na nodra nanuma.

“Ni ra wilika na ivolanikalou, era na vakauta mai e dua na mata mamarau ka me’u kila ni ra sa wilika se ra sa vulica na ivolanikalou ka ra sa vakasamataka tiko,” a kaya o Sister Cárdenas. Ni sa yaco mai na gauna ni lesoni ni Sigatabu ka tarava, era sa vakavakarau tu na gonevuli me ra vakaitavi.

Na isema ni veisiga oqo ea vakalougatataki kina e dua na itabagone qase cake ka rau sa sega tu ni vakaitavi ena Lotu o rau na nona itubutubu.

“Au dau taleitaka ni’u raici koya ni lako mai ki Lotu baleta ni’u kila ni na lako curuma mai e vica na bolebole me na qai yaco rawa mai kea,” e kaya o Sisita Cárdenas. “Au vakabauta ni ivolanikalou kei na vakanananu era sa wasea na nona lewe ni kalasi kei na ivolanikalou kei na vakanananu ka wasea mai o koya ni yacovi koya mai na madigi esa vakaukauwataki koya sara vakalevu.”

E kaya o Sisita Cárdenas ni veiqaravi ena vakayagataki ni ivolanikalou, e sega ni mai tini ena nona lesoni ni Sigatabu kei na nodra veisemati tiko na nona kalasi ena ivolanikalou ena veisiga.

“Na noqu vakavakarau e oka kina noqu masulaki ira na noqu gonevuli,” a kaya o koya. “Au sega walega ni nanumi ira ena Sigatabu ia ena veisiga talega. O ira yadua e tiko na nodra gagadre bibi ka duidui. Na gone yadua sa luve ni Kalou. Au dau vakasamataki ira ni‘u sa vakarautaka tiko na noqu lesoni. ”

Ni veivakavulici, ena vakarorogo—ruarua vei ira na nona gonevuli kei na Yalo Tabu.

“Na qasenivuli sa ikoya na Yalo,” ka dau rogoca wasoma ena domodra nona gonevuli. “Au na dau vakarorogo baleta na veika era tukuna sai koya na ivakatakila e solia vei ira na Yalo.”

E vakila o Carla Gutiérrez Ortega Cordoba na veivakalougatataki ni lewena na kalasi ni Matawilivola ni Sigatabu nei Sister Cárdenas’s baleta na kena qaravi ena yalo ni veimaroroi kei na tuvanaki vakamatau ni veiqaravi. E vakabauta o Carla ni vu mai oya ena vica na ka, oka kina na:

• Vakavakarau: Na wasei ni ivolanikalou kei na vakasama ena vukei ira na gonevuli me ra vakavakarau ki na kalasi e tarava. “Na wiliki ni ivolanikalou e veisiga e vakani keda ka vakarabailevutaka na noda kila ka,” e vakamacalataka o koya.

• Vakaitavi: “Keimami vosa kece. Oqo e vakatarai au me’u kilai ira vakavinaka na noqu lewe ni kalasi, vaka itokani kei na taciqu kei na ganequ. ”

• Loloma: “E veituberi ena yalo malua o Sisita Cárdenas. Na neitou kalasi e vaka na lotu vakamatavuvale, ka ra lewena tiko e vica na taciqu kei na ganequ. E vakasakiti sara. ”

• Na Yalo Tabu: “E tiko e dua na yalo taleitaki, ni veirogorogoci, ena neitou kalasi baleta ni keimami vakavurea edua nai tuvaki me vakatara vua na Yalo me tiko kei keimami.”

• iVakadinadina: “Lako Mai, Mo Muri Au sa vukei au me’u tuvakarau me’u wasea na noqu ivakadinadina. Sa titobu cake na noqu kila na iVola i Momani kei na iVolatabu. Me rawa ni’u wasea kina na veika au sa vulica tiko mai, vei ira na noqu lewenikalasi e koronivuli kei ira na tamata e vanua ni cakacaka. ”

Ni rau wilika o Greg kei Nicky Christensen, mai Kentucky, e Amerika, me baleta na veiyalayalati vaka-Eparama kei iratou na luvedrau tagane e tolu ena ivolanikalou, ea dredre me rau vakamacalataka vei iratou. Eratou sa mani duavata vakamatavuvale me ratou na vulica na veiyalayalati vaka-Eparama vakai iratou yadua ka me ratou qai wasea na veika eratou sa dui kunea.

“E tu eso na vakasama talei,” e kaya o Greg. “Sa qai kila kina o luvei keirau yabaki walu ni yacai Eparaama e liu o Eparama. A veisau na yacana me o Eparaama baleta ni a yalataka vua na Turaga me gole tani mai na ivalavala ca ka bulataka e dua na bula dodonu. Au kurabui dina ni a rawa ni kauta cake mai na tikina oya. ”

Eratou a vulica taucoko e dua na ka vou ka a veivosakitaka vinaka sara nai balebale ni veiyalayalati vaka-Eparama kei na cava na kena ibalebale vei ira na Yalododonu Edaidai nikua.

“Keitou dau cowiri wavoki ga ena loma ni rumu ka dui taura yadua me wilika na veitikina enai volanikalou, ena neitou vulica vakavuvale nai volanikalou. “Lako mai, Mo Muri Au e vakanamata vakalevu cake kina veivakavulici ena Yalo. Ena gauna oqo ni keitou vuli vata, au vakila na veibiligi lailai mai vua na Yalo me muataki na veivosaki ena dua tale na sala ka yavutaki ena gagadre ni neitou matavuvale.”

Na vakayagataki ni Lako Mai, Mo Muri Au e sega walega ni vukea na nodratou matavuvale me ratou vakaitavi vakalevu cake ka taleitaka na vulici ni kosipeli vakamatavuvale, ia sa vukei rau talega o Greg kei Nicky me veiqaravi ki na nodratou gagadre vakayalo na luvedrau.

“Lako Mai, Mo Muri Au e vukei au meu vakavulici iratou na luvequ,” e kaya o Nicky. “E vukei au talega meu walia rawa na bolebole eso ena so na gauna au dau sotava vata kei ira na luvequ. Au vakila niu salavata tiko kei na Yalo, au dau vakarorogo vakavoleka, kau ciqoma na veivakauqeti ena ivakarau meu vukei iratou yadua na gone. ”

E dau taleitaka o Greg na veivosakitaki vakabalavu ni kosipeli ka veivuke kina na Lako Mai, Mo Muri Au me vakavurea ena matavuvale. “O iratou na luvei keirau tagane eratou duidui enai tagede ni nodratou kila na kosipeli,” e kaya o koya. “Lako Mai, Mo Muri Au e sa vakarautaka vei keirau e dua na sala me vukei iratou yadua me vuli, ka yavutaki ena nodratou dui gagadre. Na raici ni nodratou tubu cake ena lomana na kosipeli ka saravi iratou ena nodratou cakacakataka na sala e rawa ni ratou vakayagataka kina na nodratou kila na kosipeli ena nodratou bula e sa dua na veivakalougatataki totoka. ”