« ការងារបម្រើតាមរយៈ ចូរមកតាមខ្ញុំ » លីអាហូណា ខែ កញ្ញា ឆ្នាំ ២០២០ ។
គោលការណ៍នៃការងារបម្រើ ខែ កញ្ញា ឆ្នាំ ២០២០
ការងារបម្រើតាមរយៈ ចូរមកតាមខ្ញុំ
តើ ចូរមកតាមខ្ញុំ អាចជួយអ្នកធ្វើឲ្យមានការផ្លាស់ប្តូរមួយនៅក្នុងជីវិតអ្នកដទៃទៀតបានដោយរបៀបណា ?
មិនថាអ្នកនៅជាមួយគ្រួសារអ្នក នៅក្នុងថ្នាក់សាលាថ្ងៃអាទិត្យ ជាគ្រូបង្រៀន ឬជាសិស្សម្នាក់ ឬនៅសាលា កន្លែងធ្វើការ ឬនៅកន្លែងណាផ្សេងទៀតក្ដី ការសិក្សាព្រះគម្ពីរតាមរយៈ ចូរមកតាមខ្ញុំ ផ្ដល់នូវឱកាសគ្រប់គ្រាន់ ដើម្បីផ្ដល់ការងារបម្រើដល់អ្នកដទៃទៀត ។ បន្ទាប់ពីអ្វីៗទាំងអស់ ការបង្រៀន « គឺលើសពីការដឹកនាំការពិភាក្សាមួយនៅថ្ងៃអាទិត្យទៅទៀត វាទាក់ទងនឹងការងារបម្រើដោយសេចក្ដីស្រឡាញ់ និងការផ្ដល់ពរជ័យដល់មនុស្សដទៃទៀតជាមួយនឹងដំណឹងល្អ » ។១
ភ្ជាប់ទំនាក់ទំនងជាមួយសិស្ស
ពេល អូហ្វីលៀ ត្រេហូ ដេ ខារដេណាស ត្រូវបានហៅឲ្យបង្រៀនយុវមជ្ឈិមវ័យនៅក្នុងវួដម៉ិកស៊ីកូ ស៊ី.ធី. របស់គាត់ គាត់បានមានអារម្មណ៍ថា ការមានចំណងទាក់ទងដ៏ជិតស្និតជាមួយនឹងសិស្សម្នាក់ៗនៅក្នុងថ្នាក់សាលាថ្ងៃ អាទិត្យរបស់គាត់ នឹងបង្កើនសមត្ថភាពរបស់គាត់ដើម្បីបង្រៀន និងពង្រឹងពួកគេ ។
គាត់និយាយថា « ប្រសិនបើខ្ញុំពុំមានចំណងទាក់ទងដ៏ជិតស្និតជាមួយនឹងសិស្សរបស់ខ្ញុំទេ ហើយប្រសិនបើពួកគេពុំទទួលអារម្មណ៍នៃសេចក្ដីស្រឡាញ់របស់ខ្ញុំទេ នោះពួកគេអាចនឹងមិនជឿខ្ញុំ ពេលដែលខ្ញុំកំពុងបង្រៀនថ្នាក់មួយ ឬកំពុងថ្លែងទីបន្ទាល់របស់ខ្ញុំ » ។ « ពួកគេអាចមានអារម្មណ៍ថា ខ្ញុំគ្រាន់តែជាគ្រូបង្រៀនថ្នាក់សាលាថ្ងៃអាទិត្យម្នាក់តែប៉ុណ្ណោះ » ។
ប៉ុន្តែ តើបងស្រីខារដេណាសអាចបង្កើតចំណងទាក់ទងមួយបែបនោះបានដោយរបៀបណា បើគាត់បង្រៀនតែរៀងរាល់ពីរសប្ដាហ៍ម្ដងនោះ ? គាត់បានរកឃើញចម្លើយតាមរយៈបច្ចេកវិទ្យា ។ ដោយប្រើប្រាស់កម្មវិធីនៅលើទូរសព្ទចល័ត WhatsApp នោះគាត់ និងសិស្សរបស់គាត់បានភ្ជាប់ទំនាក់ទំនងភ្លាមៗជារៀងរាល់ថ្ងៃ តាមរយៈសារជាអក្សរ និងសារជាសំឡេង ។ ឥឡូវនេះ ជារៀងរាល់ថ្ងៃមុនដល់ពេលមេរៀនសាលាថ្ងៃអាទិត្យបន្ទាប់ទៀត អ្នកស្ម័គ្រចិត្តម្នាក់ពីក្នុងថ្នាក់ផ្ញើខគម្ពីរមួយចេញពីមេរៀនបន្ទាប់នោះទៅកាន់សមាជិកថ្នាក់ផ្សេងទៀត ជាមួយនឹងគំនិតផ្ទាល់ខ្លួនដែលទាក់ទង ។ បន្ទាប់ពីអានខ និងគំនិតនោះហើយ សមាជិកថ្នាក់ឆ្លើយតបដោយភ្ជាប់នឹងគំនិតរបស់ពួកគេផ្ទាល់ ។
បងស្រីខារដេណាសនិយាយថា « ពេលពួកគេអានព្រះគម្ពីរ ពួកគេផ្ញើមុខរីករាយមួយ ដូច្នេះខ្ញុំដឹងថា ពួកគេបានអាន ឬបានសិក្សាព្រះគម្ពីរ ហើយថាពួកគេបានមានការគិតពីវា » ។ នៅពេលមេរៀនថ្ងៃអាទិត្យបន្ទាប់ទៀតមកដល់ ពួកសិស្សបានរៀបចំដើម្បីចូលរួម ។
ទំនាក់ទំនងប្រចាំថ្ងៃនេះ ថ្មីៗនេះបានផ្ដល់ពរជ័យដល់យុវមជ្ឈិមវ័យម្នាក់ ដែលឪពុកម្ដាយរបស់គាត់មិនសកម្មនៅក្នុងព្រះវិហារ ។
បងស្រីខារដេណាសនិយាយថា « ខ្ញុំចូលចិត្តឃើញគាត់មកកាន់ព្រះវិហារណាស់ ដោយសារខ្ញុំដឹងថា ដើម្បីទៅកាន់ទីនោះ គាត់ត្រូវតែឆ្លងកាត់ឧបសគ្គមួយចំនួន » ។ « ខ្ញុំប្រាកដថា បទគម្ពីរ និងគំនិតទាំងឡាយដែលមិត្តរួមថ្នាក់របស់គាត់បានផ្ញើ ព្រមទាំងបទគម្ពីរ និងគំនិតទាំងឡាយដែលគាត់បានផ្ញើពេលដល់វេនគាត់នោះ បានពង្រឹងគាត់យ៉ាងច្រើន » ។
បងស្រីខារដេណាសនិយាយថា ការងារបម្រើតាមរយៈបទគម្ពីរមិនបានបញ្ឈប់ជាមួយនឹងមេរៀនថ្ងៃអាទិត្យរបស់គាត់ និងទំនាក់ទំនងខាងព្រះគម្ពីរប្រចាំថ្ងៃរបស់ថ្នាក់គាត់នោះទេ ។
គាត់និយាយថា « ការរៀបចំរបស់ខ្ញុំរួមមានការអធិស្ឋានសម្រាប់សិស្សរបស់ខ្ញុំ » ។ « ខ្ញុំគិតអំពីពួកគេ មិនត្រឹមតែថ្ងៃអាទិត្យប៉ុណ្ណោះទេ គឺជារៀងរាល់ថ្ងៃក្នុងសប្ដាហ៍ទៀតផង ។ ពួកគេម្នាក់ៗមានតម្រូវការជាក់លាក់ និងខុសៗគ្នា ។ ពួកគេម្នាក់ៗគឺជាបុត្រាបុត្រីរបស់ព្រះ ។ ខ្ញុំគិតអំពីពួកគេខណៈខ្ញុំកំពុងរៀបចំមេរៀនរបស់ខ្ញុំ » ។
ហើយនៅពេលដែលគាត់បង្រៀន គាត់ស្ដាប់—សិស្សរបស់គាត់ផង និងព្រះវិញ្ញាណបរិសុទ្ធផង ។
« គ្រូបង្រៀនគឺជាព្រះវិញ្ញាណ » ដែលគាត់តែងតែឮនៅក្នុងសំឡេងសិស្សរបស់គាត់ជាញឹកញាប់ ។ « ខ្ញុំត្រូវតែយកចិត្តទុកដាក់ ដោយសារអ្វីដែលពួកគេនិយាយគឺជាវិវរណៈដែលព្រះវិញ្ញាណកំពុងផ្ដល់ទៅដល់ពួកគេ » ។
ថ្នាក់របស់យើងគឺ « ដូចជារាត្រីជួបជុំគ្រួសារ »
ខាឡា ហ្គូធារេស្ស អរតេហ្កា ខូដូបា មានអារម្មណ៍ថាវាជាពរជ័យមួយដែលបានធ្វើជាសមាជិកម្នាក់ក្នុងថ្នាក់សាលាថ្ងៃអាទិត្យរបស់បងស្រីខារដេណាស ដោយសារតែបរិយាកាសដ៏បីបាច់ និងផ្ដល់ការងារបម្រើរបស់ថ្នាក់នោះ ។ ខាឡាជឿថា បរិយាកាសនេះបានមកពីកត្តាមួយចំនួន រួមមាន ៖
-
ការរៀបចំ ៖ ការចែកចាយបទគម្ពីរ និងគំនិតជួយសិស្សឲ្យរៀបចំសម្រាប់ថ្នាក់បន្ទាប់ទៀត ។ នាងពន្យល់ថា « បទគម្ពីរប្រចាំថ្ងៃចិញ្ចឹមបីបាច់យើង ហើយពង្រីកចំណេះដឹងរបស់យើង » ។
-
ការចូលរួម ៖ « យើងទាំងអស់គ្នានិយាយ ។ ការណ៍នេះអនុញ្ញាតឲ្យខ្ញុំស្គាល់មិត្តរួមថ្នាក់របស់ខ្ញុំកាន់តែស៊ីជម្រៅទៀត ជាមិត្តភក្ដិ និងជាបងប្អូនប្រុសស្រី » ។
-
សេចក្ដីស្រឡាញ់ ៖ « បងស្រីខារដេណាសដឹកដៃអ្នក ។ ថ្នាក់របស់យើងមានអារម្មណ៍ថា ដូចជារាត្រីជួបជុំគ្រួសារ ដោយមានបងប្អូនប្រុសស្រីមួយចំនួន ។ វាពិសេសខ្លាំងណាស់ » ។
-
ព្រះវិញ្ញាណបរិសុទ្ធ ៖ « យើងមានស្មារតីរីករាយ ចុះសម្រុងគ្នានៅក្នុងថ្នាក់របស់យើង ដោយសារពួកយើងមានគំនិតដូចគ្នាទៅនឹងព្រះវិញ្ញាណ » ។
-
ទីបន្ទាល់ ៖ « ចូរមកតាមខ្ញុំ បានជួយខ្ញុំឲ្យត្រៀមរួចរាល់ដើម្បីចែកចាយទីបន្ទាល់របស់ខ្ញុំ ។ ខ្ញុំមានការចេះដឹងកាន់តែស៊ីជម្រៅអំពីព្រះគម្ពីរមរមន និងព្រះគម្ពីរប៊ីប ។ ការណ៍នោះអនុញ្ញាតឲ្យខ្ញុំចែកចាយពីអ្វីដែលខ្ញុំកំពុងរៀនជាមួយនឹងមិត្តរួមថ្នាក់របស់ខ្ញុំនៅសាលារៀន និងជាមួយមនុស្សនៅកន្លែងធ្វើការ » ។
ការផ្ដល់ការងារបម្រើចំពោះតម្រូវការខាងវិញ្ញាណ
ពេលដែល ហ្គ្រេក និង និកគី គ្រីស្ទិនសិន មកពីរដ្ឋ ឃិនធើឃី ស.រ.អា. បានអានអំពីសេចក្ដីសញ្ញានៃអ័ប្រាហាំនៅក្នុងព្រះគម្ពីរជាមួយកូនប្រុសបីនាក់របស់ពួកគាត់ ពួកគាត់បានឃើញថាវាពិបាកដើម្បីពន្យល់ទៅដល់ពួកគេ ។ ពួកគាត់បានសម្រេចចិត្តជាក្រុមគ្រួសារថា ពួកគាត់ម្នាក់ៗនឹងសិក្សាសេចក្ដីសញ្ញានៃអ័ប្រាហាំដោយផ្ទាល់ខ្លួន ហើយបន្ទាប់មកចែកចាយអ្វីដែលពួកគាត់បានរកឃើញ ។
ហ្គ្រេកនិយាយថា « យើងបានទទួលយោបល់គួរឲ្យចាប់អារម្មណ៍មួយចំនួន » ។ « កូនអាយុប្រាំបីឆ្នាំរបស់យើងបានរៀនថា អ័ប្រាហាំធ្លាប់មានឈ្មោះថា អាប់រ៉ាម ។ ឈ្មោះរបស់លោកត្រូវបានផ្លាស់ប្តូរទៅជាអ័ប្រាហាំ ដោយសារលោកបានធ្វើការសន្យាជាមួយនឹងព្រះអម្ចាស់ ដើម្បីងាកចេញពីអំពើបាប ហើយរស់នៅដោយសុចរិតវិញ ។ ខ្ញុំបានមានការភ្ញាក់ផ្អើលណាស់ដែល គាត់អាចធ្វើដូច្នោះបាន » ។
ពួកគេទាំងអស់គ្នាបានរៀនអ្វីថ្មីៗ ហើយបានមានការពិភាក្សាដ៏ល្អមួយអំពីអ្វីដែលជាសេចក្ដីសញ្ញានៃអ័ប្រាហាំ និងអត្ថន័យរបស់វាចំពោះពួកបរិសុទ្ធថ្ងៃចុងក្រោយនៅសព្វថ្ងៃនេះ ។
និកគីនិយាយថា « ពីមុនយើងគ្រាន់តែដាក់វេនគ្នាអានខទាំងឡាយក្នុងព្រះគម្ពីរសម្រាប់ការសិក្សាព្រះគម្ពីរជាគ្រួសាររបស់យើង » ។ « ចូរមកតាមខ្ញុំ ផ្តោតទៅលើការបង្រៀនដោយព្រះវិញ្ញាណច្រើនជាង ។ ឥឡូវនេះ ពេលយើងសិក្សាជាមួយគ្នា ខ្ញុំមានអារម្មណ៍បំផុសគំនិតបន្តិចពីព្រះវិញ្ញាណឲ្យដឹកនាំការពិភាក្សារបស់យើងទៅកាន់ទិសដៅមួយផ្សេងទៀត ដោយផ្អែកទៅលើសេចក្ដីត្រូវការរបស់គ្រួសារយើង » ។
ការប្រើប្រាស់ ចូរមកតាមខ្ញុំ មិនត្រឹមតែបានជួយគ្រួសាររបស់ពួកគាត់ឲ្យកាន់តែចូលរួម និងកាន់តែចាប់អារម្មណ៍លើការសិក្សាដំណឹងល្អប៉ុណ្ណោះទេ តែវាក៏បានជួយហ្គ្រេក និងនិកគីឲ្យផ្ដល់ការងារបម្រើចំពោះសេចក្ដីត្រូវការខាងវិញ្ញាណរបស់កូនៗរបស់ពួកគាត់ផងដែរ ។
និកគីនិយាយថា « ចូរមកតាមខ្ញុំ ជួយខ្ញុំបង្រៀនកូនៗរបស់ខ្ញុំ » ។ « វាក៏ជួយខ្ញុំឲ្យដោះស្រាយឧបសគ្គផ្សេងៗផងដែរ ដែលពេលខ្លះខ្ញុំមានជាមួយនឹងកូនៗរបស់ខ្ញុំ ។ ខ្ញុំមានអារម្មណ៍កាន់តែស៊ីចង្វាក់នឹងព្រះវិញ្ញាណ ខ្ញុំស្ដាប់កាន់តែជិតឡើង ហើយខ្ញុំបានទទួលការបំផុសពីរបៀបដែលខ្ញុំអាចជួយកូនម្នាក់ៗ » ។
ហ្គ្រេករីករាយនឹងការពិភាក្សាដំណឹងល្អដែលកាន់តែវែង ដែល ចូរមកតាមខ្ញុំ ជួយធ្វើឲ្យកើតឡើងនៅក្នុងគ្រួសារ ។ គាត់និយាយថា « ចំណេះដឹងខាងដំណឹងល្អរបស់កូនប្រុសៗរបស់យើងគឺមានកម្រិតខុសគ្នាទាំងអស់ » ។« ចូរមកតាមខ្ញុំ បានផ្ដល់នូវរបៀបមួយសម្រាប់យើង ដើម្បីជួយពួកគេម្នាក់ៗឲ្យរៀនដោយផ្អែកទៅលើតម្រូវការរបស់ពួកគេ ។ ការមើលឃើញពួកគេរីកចម្រើននៅក្នុងសេចក្ដីស្រឡាញ់របស់ពួកគេចំពោះដំណឹងល្អ និងការមើលពួកគេរកឃើញពីរបៀបដែលពួកគេអាចអនុវត្តចំណេះដឹងខាងដំណឹងល្អនៅក្នុងជីវិតរបស់ពួកគេ គឺជាពរជ័យដ៏អស្ចារ្យមួយ » ។
© 2020 by Intellectual Reserve, Inc. All rights reserved. បោះពុម្ពនៅ ស.រ.អា ។ អនុមតិជាភាសាអង់គ្លេស ៖ ៦/១៩ ។ អនុមតិឲ្យបកប្រែ ៖ ៦/១៩ ។ ការបកប្រែនៃ Ministering Principles, September 2020. Cambodian. 16724 258