“Erudua Mbofra na Mbabun Nhyehyɛɛ no do dze Rosom,” Liahona, Ɔbɛsɛ 2020

Mfonyin

Erosom ho Fapem

Mfonyin horow no Tom Garner, Isaac Darko Acheampong, Alexander K. Boateng, na Jonas Rebicki twitwae.

Erosom ho Fapem, Ɔbɛsɛ 2020

Erudua Mbofra na Mbabun Nhyehyɛɛ no do dze Rosom

Erohwɛ binom ma woenyin na eroboa hɔn wɔ hɔn abrabɔ akwantu mu no nye erosom no botae tsitsir.

Akwan horow piinara wɔ hɔ a yebotum bodua Mbofra na Mbabun Nhyehyɛɛ no do dze asom. Ibia na ewɔ mbofra anaa mbabun wɔ wɔankasa wo fie. Ibia na eyɛ baanodzinyi wɔ nhyehyɛɛ no mu anaa esom ebusua ebusua a wɔwɔ mbofra na mbabun. Anaa ibia na inyim mbofra anaa mbabun binom (na ɔno dze hɛn nyina bɛkã ho). Mbrɛ wo gyinabew bɛtse biara no, akwan pii wɔ hɔ a ibotum dze nhyehyɛɛ no anaa ne fapem nkyerɛkyerɛ no behyira binom hɔn abrabɔ.

Yɛrebɔmu Etutu Hɛnho Mpon

Mbofra na Mbabun no ne tsirmpɔw no tsim dabiara mbɔdzembɔ do dɛ yɛbɛyɛ tse dɛ Agyenkwa no ara yie, Ɔno a Ɔsoom emudzi mu no. Dodowara a wɔdze hɔnho ahyɛ nhyehyɛɛ no mu no esũa dɛ mber dodow a etu w’abrabɔ ne sibew ahorow no mpon no, dɛm ara na inya edwindadze ara yie a edze bɔboa anaa edze bɔsom nkaafo.

Mbom Mbofra na Mbabun nhyehyɛɛ no dze, onnhia dɛ ebɔtweɔn esũa biribi ansaana ehyira nkaafo. Adzesũa no mu ankasa ma akwan pii ma edze som.

Aberantsɛba bi a wɔfrɛ no Prophet a ɔtse Ghana no, ɔrehyɛ botae wɔ Mbofra na Mbabun dɛ obosũa sanku bɔ no, nna ɔyɛ ahyɛsedze ara. Prophet se dɛ, “Ɔyɛ mo botae so dɛ mobɔboa nkorɔfo binom ma woehu afa dza murusũa no ho.”

Onnyaa nnyɛɛ kyerɛkyerɛnyi mpo no, no botae abɛyɛ adze kɛse koraa akyɛn dza osusuu ho no. Sesei adzesũafo 50 na wɔnye Prophet reyɛ sankubɔ ho adzesũa wɔ asɔrdan no mu. Na woananom mpo na wɔrekyerɛ Prophet na dɛm adzesũafo 50 no? Alexander M. na Kelvin M., a hɔn beenu no edzi mfe 13. Kelvin se, “Yɛpɛ dɛ yɛkyerɛ ayamuyie kyerɛ nkorɔfo nkaa no.”

Dapɛn biara mu nda ebiasa no, mbabun beenu no kyerɛ sankubɔ ho ahyɛse adzesũa a wɔnngye obiara a orubosũa no sika biara. Mfaso bi so abɛkã sankubɔ ho adzesũa no ho. Adzesũafo no hɔn mu pii a woduaa sankubɔ ho adzesũa no do a woyii Asɔr no enyim kyerɛɛ hɔn no, ekyir no wosũaa asɛmpa no a wɔyɛɛ hɔn adwen dɛ wobonuma.

Ber a yɛrobɔ mbɔdzen dɛ yebotutu hɛnho mpon no, yebotum ato nsa afrɛ binom dɛ wɔmbɛkã hɛnho dze asom hɔn.

Kwan a Wɔfa Do dze Som Konyimdzi mu

Dɛ ɔyɛ Primary president no, Sabrina Simões Deus Augusto a ofi Curitiba, Brazil no, oehu mbrɛ nhyehyɛɛ no ne ankorankor mpontu nhyehyɛɛ no esi aboa ne stake mu mbofra na mbabun no. Naaso oetum ehu akwan ahorow pii a obotum dze dza oesũa afa ankorankor mpontu ho wɔ n’edwuma mu no bedzi dwuma dɛ akyerɛbaa a ɔsom.

Akyerɛbaa Augusto se, “Sɛ mutu talent bi mpon a, mubotum dze dɛm talent no aboa obi a mosom no.”

Akyerɛbaa Augusto kyerɛɛ nkyerɛbaa no kor a wɔnye no ama no no mbrɛ wosi yɛ chocolate tɔfe. Sesei dɛm akyerɛbaa no yɛ chocolate tɔfe na ɔtɔn dze boa n’ebusua hɔn akɔhoma. Akyerɛbaa Augusto kãa dɛ, “Abosoom pii ekyir no, ɔyɛɛ me adom dɛ akyerɛbaa kor so kyerɛɛ me mbrɛ mibesi bɛyɛ ɛwo paanoo a mubotum atɔn.” “Yɛrutu hɛn talent horow mpon na yɛnye binom rekyɛ no botum ehyira hɛn abrabɔ nkorkor na wɔama hɛn nkitahodzi mu dɛ nkyerɛbaa a wɔsom no mu ayɛ hyew ara yie.”

© 2020 odzi wɔ Intellectual Reserve, Inc. All rights reserved. Wotsintsimii wɔ USA. English approval: 6/19. Translation approval: 6/19. Ministering Principles, October 2020 ne nkyerɛasee.Fante. 16725 502

Mbofra na Mbabun Nhyehyɛɛ no Besi Dɛn Botum Aboa Wo ma Asom?

To nsa frɛ binom ma wɔmfa hɔnho nhyɛ Mbofra na Mbabun nhyehyɛɛ no mu.

Ibotum ato nsa afrɛ mbabun na mbofra a esom hɔn no hɔn ebusua ebusua ma wɔdze hɔnho ahyɛ Mbofra na Mbabun nhyehyɛɛ no mu. Bia hɔn enyi bɛgye dɛ wɔdze hɔnho bɛhyɛ dwumadzi horow, ankorankor mpontu anaa asɛmpa adzesũa afã no a ɔwɔ nhyehyɛɛ no mu no. (Ama eenya nsɛm binom so a ɔfa erosom ho edua Come, Follow Me, do no hwɛ “Erudua Bra, Bɛka Mo Do,do dze Rosom,” wɔ Fankwa 2020 Liahona.)
Tae hɔn botae horow no ekyir.

Dɛ eyɛ onuabanyin anaa akyerɛbaa a ɔsom ebusua ebusua a wɔwɔ mbabun no, eda gyinabew ara yie mu a ebotum ataa hɔn ekyir wɔ botae ahorow a wɔreyɛ ho edwuma wɔ Mbofra na Mbabun no ho. Hɔn botae horow no yɛ ankorankor dze, naaso sɛ inyim dza hɔn enyi gye ho a, ibotum ama mboa wɔ akwan ahorow mu. Iyi botum ayɛ dɛ ihwehwɛ nsaano mfonyinyɛ ho akãdze a wɔrohwehwɛ no, erosom dɛ ɔtsɛmbuafo a ɔbɔsɔ hɔn akɔndɔdze a wɔreyɛ no ahwɛ, anaa dza awea ho no ebɛyɛ hɔn kandzifo. Inyim mbrɛ wosi sesã kaar ne engine oil? Wosi pam atar a ɔatsew? Ana awea wɔ mbrɛ wɔyɛ edwuma hwehwɛ ho mpɛnsampɛnsamu? Sɛ hɔn enyi gye dza ewɔ ho nyimdzee anaa inyim yɛ ho a ibotum akyɛ.
To nsa frɛ binom ma wɔmbɛkã w’ankorankor mpontu ho.

Ankorankor mpontu nnyɛ mbofra na mbabun nko dze. Wo mfe a edzi biara no, wankasa ibotum edze woho ahyɛ nhyehyɛɛ no mu. Ber a ihwer mber dze tu w’abrabɔ mu sunsum, nkitahodzi, honandua, na adwen mu mpon no, ibɛyɛ ahoboa ara yie dze asom nkorɔfo, onyia ibehyia no biara no. Na tse dɛ Prophet wɔ Ghana no, ibotum ehyira nkaafo ber a ito nsa frɛ hɔn ma wɔnye wo yɛ, sɛ ɔyɛ wɔreyɛ sankubɔ ho adzesũa, anaa mpɔwmu-tsentsen adzesũadze, anaa wɔrobɔmu esũa kasa bi.
Yɛ erosom ho botae.

Susu dɛ ebɔhwer mber dakor biara a edze rosom. Iyi botum ayɛ edze text rekɛma ana irigyina ahwɛ mbrɛ ndzɛmba si rokɔ anaa ereyɛ enyikadze nhyiamu bi ho nhyehyɛɛ. Erefa mber ahyehyɛ hɔn a esom hɔn no awoda, anaa iridzi hɔn ekyir wɔ social media do dze ahwehwɛ dza hɔn enyi gye ho anaa dza ndaasa yi mu wɔreyɛ no botum akã ho. Erefa sima enum ara dze adwen dza obi fofor hia ho no botum egya wo akɔ nkenyan adwen nsusui a obotum dze nsesã aba.