Serem Laet blong Sevya long Krismes

Taem mi gat 11 yia, tija blong mi blong Sandei Skul, Brata Deets, i talem long klas blong mifala se sapos mifala i lanem baehat Ol Toktok blong Bilif mo eksplenem long hem wanem oli minim, bae hem i pem wan set blong skripja blong mifala.

Brata mo Sista Deets oli wan yang kapol we oli jes mared, mo oli jes statem laef blong olgeta. Mi no sua sapos Brata Deets i save pem wan presen blong eniwan. Be mi disaed se sapos hem i ting se Ol Toktok Blong Bilif oli impoten tumas blong lanem baehat, bae mi tekem jalenj ia.

Afta we mi lanem evri 13 tok blong bilif, taem i bin pas mo mi bin fogetem abaot promes blong hem.

Afta, long dei blong Krismes, mi bin kasem wan pasel we oli raetem nem blong mi long hem. Mi openem mo faenem wan set blong skripja we hem i blong mi nomo, wetem wan kad blong stap leftemap tingting blong mi blong ridim olgeta evri dei. Hemia long 1972, mo kasem tedei mi stil gat ol skripja ia. Oli wan samting we mi laekem tumas.

Hem i no praes blong presen ia be, kaen fasin we hem i soem long mi mo sakrifaes we hem i wantem mekem blong mi we i mekem mi gat wan strong tingting blong stadi ol tok blong God. Mi traem blong folem eksampol blong Brata Deets blong givhan, blong givim ol presen we i gat mining long olgeta raon long mi, mo stap hop se bae mi save blesem laef blong ol narawan olsem we hem i bin mekem long mi.

Taem olgeta we oli stap planem sosol aktiviti blong wod blong mifala blong Krismes, oli askem mi blong visitim mo invaetem wan les-aktiv memba mo invaetem hem blong kam tekpat long program ia, mi mas talem tru se mi bin fraet smol. Mi bin mitim Darren wan taem nomo, taem we hem i bin tekpat long wan aktiviti blong wod samtaem i pas finis. Hem i bin werem wan hankijif blong ol man we i stap ron long moto long hed blong hem. Hem i bin fasem longfala waet hea blong hem, hem i gat fulap waet mustas, mo han blong hem i fulap long tatu.

Nao, wetem wan memba blong komiti, mi stanap long doa step blong Darren, mo stap tingting long wanem bae hem i talem. Hem i askem mifala blong kam insaed, mo mifala i talem long hem from wanem mifala kam luk hem. Hem i talem, “!O, bae mi laekem blong mekem hemia!”

Hem i bin mekem wan gudfala wok blong help blong mekem aktiviti ia i gat mining long plante man. Afta samtaem, oli bin askem givhan kompanion blong mi mo mi blong go visitim Darren evri dei. Oltaem hem i glad blong luk mitufala, mo mifala i bin gat sam naesfala storian. Mi glad tumas long insperesen ia blong invaetem hem blong kam tekpat long program blong wan aktiviti blong wod we i lid i go long wan gudfala rilesensip.

Hemia i sam long ol samting we yu save mekem long olgeta we bae yu givhan long olgeta, we bae oli save se yu stap tingbaot olgeta long spesel taem ia blong yia.

1. Samtaem wan fon kol nomo o wan teks mesej i save mekem wan bigfala wok. Statem wan storian wetem wan simpol toktok olsem “?Halo, yu oraet?” i save mekem wan bigfala jenis.

2. Joenem olgeta blong selebretem ol impoten taem mo ol samting we oli winim long ol taem we i stret. Krismes hem i wan gudfala taem blong lanem abaot ol bilif we yumi gat we i semmak. Taem yu serem ol bilif mo lisin long ol narafala wan, yu openem doa blong kasem moa save.

3. Prea from olgeta wanwan. Askem Papa long Heven blong Hem i helpem yu blong tingbaot ol defren wei blong karem olgeta i kam moa kolosap long Pikinini blong Hem.

4. Ol presen we i simpol, oltaem bae oli tingbaot olgeta. I no nidim blong givim ol flas flas presen blong mekem se man i laekem. Presen blong givim taem, presen blong save lisin, save serem wan foto o wan memori—evri presen ia oli save kam ol presen we i kam long hat.

5. Givim presen blong testemoni. Askem olgeta blong serem lav blong olgeta long Sevya wetem yu, mo askem blong serem lav blong yu long Hem wetem olgeta.

6. Invaetem ol narawan blong kam long wan Krismes seves. Sam long ol pipol oli wantem blong wosip be oli no save wea ples oli save go long hem. Invaetem olgeta blong kam wosip wetem yu.

7. Fulumap haos blong olgeta wetem pis. Letem olgeta i save se ol misinari oli gat wan spesel Krismes mesej we oli save serem, wan mesej we i save karem hop mo lav i kam long hat blong olgeta.

Ol nid blong evri kongregesen oli defdefren. Sam oli kasem samting aot long ol bigfala aktiviti we oli stap oganaesem. Ol narafala kongregesen oli save kasem samting aot long samting we i smol mo simpol. Olgeta we oli tekpat blong planem mo oganaesem ol aktiviti ia oli prea blong save olsem wanem oli save helpem ol nid we i stap.

• Ol memba long ol trifala stek long Paris, Franis, oli help blong sapotem wan Laetem Wol naet we i nidim wan talen so mo wan fasen so we oli stap soemaot ol defren stael blong ol klos. Oli rere long ol ting we oli givim long ol rifuji mo ol pipol we oli nogat haos.

• Shalot Not Karolina Sentrol Stek i holem wan “Krismes raon long Wol” taem blong komuniti, wetem wan sosol aktiviti blong selebretem Kraes tru long kakae, Krismes tradisen raon long wol we oli soem, miusik, ol seves projek, mo Krismes drama blong ol pikinini.

• Ol memba blong Fero Bij Florida Stek i joen wetem wan komuniti blong rimaenem yumi from wanem yumi selebretem Krismes. Ol pleplei oli donetem i go long ol jariti komuniti. Wan kwaea blong Praemeri i singsing, mo plante jos oli gat ol smol stol blong soem ol infomesen.

• Jaksonvil Florida Saot Stek i soem wan vidio blong Sevya blong Wol blong komuniti.