Wasei ni Rarama ni iVakabula ena Siganisucu

Niu se qai yabaki 11, noqu qasenivuli ni Wilivola ni Sigatabu, o Baraca Deets, a tukuna vei keitou na lewe ni kalasi ni kevaka keitou na cavuqaqataka na Yavu ni Vakabauta ka vakamacalataka vua na cava na kena ibalebale, ena volia o koya vei keitou na neitou dui ivolanikalou.

O Baraca kei Sister Deets erau a veiwatini gone, ka rau sa qai tekivu tiko mada ga. Au sega ni kila se na rawa ni volia o Baraca Deets e dua na iloloma vua e dua. Ia au a vakadeitaka ni kevaka me nanuma ni Yavu ni Vakabauta sa ka bibi sara meu cavuqaqataka, au na taura na bolebole.

Niu sa vakacavara taucoko na yavu e 13, ka toso tiko na gauna au sa guilecava sara na nona yalayala.

Ia, ena siga ni Siganisucu, au a ciqoma e dua na pakete ka tiko kina na yacaqu. Au cega kau kunea e dua na iwase ni ivolanikalou me noqu, kei na dua na kadi ka vakayaloqaqataki au meu dau wiliki ira vakawasoma. Mai na yabaki 1972, me yacova mai na siga oqo se tu ga vei au na ivolanikalou eso oqori. Era sa ka talei sara vei au.

A sega ni isau ni iloloma ia na yalovinaka a vakaraitaka vei au kei na solibula a tu vakarau me cakava vei au ka vakavuna vei au na gagadre titobu meu vulica na vosa ni Kalou. Au tovolea meu muria na ivakaraitaki ni veiqaravi nei Baraca Deets ena noqu solia na isolisoli e vakaibalebale vei ira era tu wavoliti au, ka nuitaka niu na rawa ni vakalougatataka na nodra bula na tani me vaka na nona sa vakalougatataka na noqu.

Ena gauna era kerei au kina na tuvalaka tiko na neitou soqo ni Siganisucu ni tabanalevu meu sikova e dua na lewenilotu luluqa ka sureti koya me mai vakaitavi ena parokaramu, au rawa ni vakatusa niu a rere. Au se qai sotavi Darren vakadua ga mai liu, ena gauna a vakaitavi kina ena dua na itaviqaravi ni tabanalevu. A daramaka voli e dua na ivesuniulu ni vodo motopai e na yadrena. Na uluna vulavula balavu e a vesu toka ena dua na tobe, dua toka na kumi vulavula balavu, ka robota tu na ligana na samuqawe.

Ena gauna oqo, keirau a lako vata kei na dua na lewe ni komiti, au a duri tu ena matanikatuba nei Darren, ka vakataroga se cava e rawa ni kaya. A kerei keirau me keirau curu ki loma, ka keirau tukuna vua na vuna keirau tiko kina e kea. A kaya, “Isa, au na taleitaka meu cakava o ya!”

E a vakayacora e dua na cakacaka veivakurabuitaki, ena nona veivuke me cakava na itaviqaravi me vakaibalebale vei ira e lewe levu. Ena dua na gauna lekaleka i muri, keirau a kerei kei noqu itokani ni veiqaravi me keirau dau sikovi Darren vakawasoma. E dau taleitaka o koya me raici keirau, ka dau ka marautaki na neitou veivosaki. Au vakavinavinaka ni veivakauqeti me sureti me mai vakaitavi ena parokaramu ni dua na itaviqaravi ni tabanalevu e a veimuataki ki na dua na veimaliwai vakamareqeti.

Oqo eso na ka e rawa ni o cakava mo vakadeitaka kina ni o ira o veiqaravi tiko vei ira era na kila ni o dau nanumi ira tiko, vakabibi ena gauna vakaoqo ni yabaki.

1. Ena so na gauna e dua na qiri se dua na itukutuku ena tex e dau yaco kina na veika veivakurabuitaki. Na tekivutaki ni dua na veitalanoa rawarawa ena “Bula, o sa vakacava tiko beka?” ena rawa ni vakavuna na veisau.

2. Duavata ena nodra marau ni gadrevi vakakina. Na Siganisucu e rawa ni dua na gauna cecere me vulici kina na vakabauta eda wasea vata. Ni o wasea na nomu vakabauta ka vakarorogo vei ira na tani, o sa dolava na katuba ki na kila-ka cecere cake.

3. Masulaki ira ena yacadra. Kerea na Tamada Vakalomalagi me vukei iko mo vakasamataka na sala eso mo kauti ira vakavoleka kina vua na Luvena.

4. E dau nanumi tu ga vakavinaka na isolisoli rawarawa. E sega ni dodonu me ra caka sara vakamatau na isolisoli me ra taleitaki kina. Na isolisoli ni gauna, na isolisoli ni vakarorogo, na kena wasei e dua na itaba se dua na ivakananumi—oqo e rawa ni ra isolisoli kece mai na vu ni Yalo.

5. Solia na isolisoli ni ivakadinadina. Kerei ira me ra wasea vata kei iko na nodra lomana na iVakabula, ka wasea na nomu lomani Koya vata kei ira.

6. Sureta eso tale mera tiko ena dua na soqoni ni Siganisucu. Eso na tamata era via sokalou ia era sega ni kila na vanua mera lako kina. Sureti ira mera lako mai ka sokalou vata kei iko.

7. Vakasinaita na nodra itikotiko ena vakacegu. Vakaraitaka vei ira ni o ira na daukaulotu e tiko e dua na nodra itukutuku bibi ni Siganisucu e rawa ni ra wasea, e dua ka na kauta mai na inuinui kei na loloma ki yalodra.

Na vei gagadre ni ivavakoso yadudua e duidui. Eso ena yaga vei ira na tuvalaki ni dua na itaviqaravi levu. Eso tale na ivavakoso ena yaga vei ira e dua ga na ka lailai ka rawarawa. O ira era vakaitavi ena tuvalaki kei na vakarautaki ni itaviqaravi me ra vakasamataka ena yalomasumasu na sala me sotavi kina na gagadre e tiko.

• O ira na lewenilotu mai na tolu na iteki e Parisi, Varanise, era veivuke ena kena tokoni e dua na soqoni ni Vakararamataka na Vuravura ka a vakayacori kina na vakaraitaki taledi kei na vakaraitaki isulusulu. Era vakarautaka na veika eso me soli vei ira na isenivalu kei na tamata era sotava tiko na sega ni vakavale.

• Na iteki e Charlotte ena vualiku kei Carolina e a vakayacori kina e dua na “Siganisucu mai na veiyasai Vuravura” me baleta na itikotiko raraba, kei na dua na veimaliwai me marautaka na Karisito ena kakana, na vakaraitaki ni ivakarau ni Siganisucu mai na veiyasai vuravura, na sere ivakatagi, na cakacaka ni veiqaravi, kei na ivakatakarakara ni vale ni manumanu me nodra na gonelalai.

• Era duavata na lewe ni iteki na Vero Beach mai Florida ena dua na ivakananumi vakaitikotiko ni vuna eda marautaka kina na Siganisucu. Era a soli na iyaya ni vakatatalo ki na veisoqosoqo vakaitikotiko ka veiqaravi vei ira na vakaloloma. Era a lagasere e dua na matasere ni lalai, ka vuqa na lotu e a tiko na vanua me ra vakaraitaki itukutuku kina.

• Na iteki o Jacksonville Florida e a vakaraitaka e dua na vakatasuasua ni iVakabula ni Vuravura me baleta na itikotiko.