Faib tus Cawm Seej txoj Kev Kaj thaum lub Caij Christmas

Thaum kuv muaj hnub nyoog 11 xyoos, kuv tus kws qhia Hnub Caiv Kev Kawm Vaj Lug Kub, tus Nus Deets, qhia peb hoob hais tias yog tias peb yuav muab Tej Nqe Kev Ntseeg cim cia thiab piav saib tej nqe ntawd txhais li cas, nws yuav yuav ib xuv vaj lug kub rau peb txhua tus.

Tus Nus thiab tus Viv Ncaus Deets yog ib khub niam txiv hluas, nyuam qhuav pib ua neej. Kuv tau xav tias tus Nus Deets tsis muaj nyiaj txaus yuav yuav ib qho txiaj ntsim rau leej twg hlo li. Tiam sis kuv txiav txim siab hais tias yog nws saib tej Nqe Kev Ntseeg ua ib yam tseem ceeb ntxim cim kom tau, kuv yuav sim ua li ntawd.

Tom qab uas kuv cim tiav tag nrho 13 nqes, sij hawm dhau mus thiab kuv tsis nco qab txog nws txoj lus cog tseg.

Ces, thaum Hnub Christmas, kuv txawm txais ib pob khoom uas muaj kuv lub npe sau rau. Kuv qhib thiab txawm pom ib xuv vaj lug kub rau kuv, ua ke nrog ib daim ntawv uas muaj lus sau hais tias kom kuv ua tib zoo rau rau siab nyeem vaj lug kub. Lub sij hawm ntawd yog xyoo 1972, thiab txog txij no kuv tseem muaj cov vaj lug kub ntawd. Kuv saib cov vaj lug kub ntawd rau nqi heev.

Tsis yog qhov txiaj ntsim ntawd kim heev tiam sis yog qhov uas tus Nus Deets ua siab zoo rau kuv thiab nws kam siv cov nyiaj uas nws tsis muaj kom ua dab tsi zoo rau kuv uas ua rau kuv muaj lub siab xav kawm Vajtswv txoj lus. Niaj hnub nim no kuv sim ua raws li tus Nus Deets tus yam ntxwv txhawb pab lwm tus neeg thiab muab txiaj ntsim rau cov neeg ib ncig ntawm kuv, kuv cia siab tias kuv yuav foom koob hmoov rau lwm tus neeg ib yam li tus Nus Deets tau foom koob hmoov rau kuv.

Thaum cov neeg uas npaj peb pawg ntseeg txoj kev sib ntsib nco txog hnub Christmas hais kom kuv mus ntsib ib tug mej zeej uas tsis tshua muab siab rau ntseeg thiab caw nws koom pab peb lub txheej xwm ntawd, kuv ib nyuag ntshai thiab. Kuv tau ntsib Darren ib zaug xwb ua ntej ntawd, thaum nws tau koom pab peb pawg ntseeg ua lwm txoj kev ntxim saib ntxim ua. Nws tau ntoo phuam so hws caij maus taus rau ntawm nws lub hauv pliaj. Nws khi nws cov plaub hau dawb paug ua moj tuam, nws tuaj hwj txwv dawb paug, thiab nws ob txhais tes kos duab rau lawm tag.

Nim no, ua ke nrog lwm tus mej zeej, kuv sawv rau ntawm Darren lub qhov rooj, es kuv xav paub saib nws yuav hais li cas. Nws caw wb los tsev, thiab wb qhia nws yog vim li cas wb tuaj xyuas nws. Nws hais tias, “Yog lauj, kuv yeej xav ua li ntawd!”

Nws ua zoo kawg nkaus, thiab nws pab ua rau qhov ntxim saib ntixm ua ntawd muaj nqi rau coob leej ntau tus. Tsis ntev tom qab ntawd, lawv tau hais kom kuv thiab kuv tus khub mus txhawb pab thiab mus xyuas Darren ntshawv ntshis. Nws yeej los zoo siab pom wb, thiab wb zoo siab nrog nws sib tham. Kuv zoo siab uas qhov kev tshoov siab kom caw nws los pab peb pawg ntseeg txoj kev ntxim saib ntxim ua ua rau wb sib raug zoo thiab ua phooj ywg.

Nram qab no yog ob peb yam uas koj ua tau kom qhia tau cov neeg koj txhawb pab hais tias koj xav txog lawv, twb yog thaum lub caij no.

1. Qee zaum koj hu xov tooj mus ntsib lawv los yog sau ntawv text mus ntsib lawv yeej zoo. Nrog lawv tham, hais tias, “Nyob zoo, koj nyob li cas?” yeej zoo heev thiab.

2. Thaum twg tsim nyog nrog lawv koom ua koob tsheej. Lub caij Christmas yog ib lub sij hawm zoo heev kawm txog tej kev ntseeg uas peb txhua tus ntseeg. Thaum koj qhia koj txoj kev ntseeg rau lwm tus neeg thiab mloog lawv, koj to taub tau lawv zoo dua.

3. Thov Vajtswv foom koob hmoov rau lawv. Thov Leej Txiv Saum Ntuj Ceeb Tsheej pab koj xav txog tej yam koj ua tau kom coj lawv txav los ze dua Nws Tib Leeg Tub.

4. Tej qhov txiaj ntsim me me yog tej yam lawv nco ntsoov. Tej txiaj ntsim no tsis tas loj heev kom tus neeg txais thiaj nyiam. Lub txiaj ntsim uas siv sij hawm nrog lawv, mloog lawv, faib ib daim duab los yog ib yam ua koj nco qab tau—tej no puav leej yog tej txiaj ntsim los ntawm lub siab lub ntsws los.

5. Ua tim khawv rau lawv ua ib qho txiaj ntsim. Hais kom lawv ua tim khawv txog qhov uas lawv hlub tus Tswv, thiab qhia lawv hais tias koj kam ua tim khawv txog koj txoj kev hlub tus Tswv thiab.

6. Caw lwm tus neeg nrog koj koom ib txoj kev sib ntsib noj lub cim nco txog thaum lub caij Christmas. Ib txhia neeg xav pe hawm Vajtswv tiam sis tsis paub hais tias yuav mus qhov twg. Caw lawv nrog koj pe hawm Vajtswv.

7. Ua rau lawv lub tsev muaj kev thaj yeeb nyab xeeb. Qhia lawv hais tias cov tub txib muaj ib txoj lus tshwj xeeb hais txog Christmas uas lawv xav qhia lawv, ib txoj lus uas yuav coj kev cia siab thiab kev hlub los rau lawv lub siab lub ntsws.

Txhua pawg ntseeg nyias muaj nyias tej kev xav tau. Ib txhia neeg tau kev pab los ntawm txoj kev ua ib qho ntxim saib ntxim ua loj dua. Tej zaum lwm pawg neeg yuav tau kev pab los ntawm ib yam me me. Lawv cov uas npaj thiab ua tej kev ntxim saib ntxim ua yeej thov Vajtswv pab tshoov lawv tej siab kom thiaj pab raws li tej kev xav tau uas muaj.

• Cov mej zeej los ntawm peb ceg txheem ntseeg hauv Paris, France, tau pab txhawb nqa ib qho ntxim saib ntxim ua nco txog kev Taws Teeb rau lub Ntiaj Teb es muaj ib qho kev sib xeem kev txawj thiab ib qho kev qhia tsoos tsho. Lawv npaj tej khoom uas lawv tau muab rau cov neeg tawg rog thiab cov neeg uas tsis muaj tsev nyob.

• Ceg Txheem Ntseeg Charlotte North Carolina Central muaj ib qho ntxim saib ntxim ua nco txog “Christmas nyob txhua qhov hauv lub Ntiaj Teb” rau koog zej zog, es muaj ib qho kev lom zem kom ua koob tsheej txog Khetos dhau los ntawm kev noj mov ua ke, tej kev ua Christmas thoob ntiaj teb, suab nkauj, tej kev pab lwm tus neeg, thiab qhov uas cov me nyuam ua txuj ua cov neeg ib ncig ntawm Yexus thaum nws yug los.

• Cov mej zeej ntawm Ceg Txheem Ntseeg Vero Beach Florida Stake koom ua ke nrog lawv koog zej zog kom qhia yog vim li cas peb ua koob tsheej nco txog Christmas. Lawv muab khoom ua si pub rau cov chaw pab hauv koog zej zog. Lub Koom Haum Me Nyuam Yaus ib pawg hu nkauj tau hu nkauj thiab ntau lub koom txoos tau muaj npuj uas muaj ntaub ntawv xov xwm qhia txog lawv.

• Ceg Txheem Ntseeg Jacksonville Florida South Stake tau tso ib qho ntxim saib ntxim ua txog tus Cawm Seej ntawm lub Ntiaj Teb rau koog zej zog.