Kev Khi Lus uas Kav Ib Txhis

Thaum peb khi lus nrog Vajtswv, peb tso qhov nruab nrab tseg tas mus li. Vajtswv yeej yuav tsis tso cov uas tau nrog Nws khi lus tseg ib zaug li. Muaj tseeb tiag, tag nrho cov uas tau khi lus nrog Vajtswv lawv txais tau ib txoj kev hlub thiab lub siab hlub tshuab yam tshwj xeeb. Lus Henplais hais tias txoj kev hlub ntawm peb tej kev khi lus no yog hesed (חֶסֶד).³

Hesed tsis muaj ib lo lus Askiv zoo ib yam. Ntshe nyuaj heev rau cov neeg uas tau txhais lus hom King James Version ntawm Phau Vaj Lug Kub Npaivnpaum thaum lawv txhais lo lus hesed ua lus Askiv. Feem ntau lawv twb txhais li no tias “lovingkindness” los yog lub siab hlub tshua. Qhov no yeej qhia lub ntsiab feem ntau ntawm lo lus hesed. Kuj tau txhais ua lwm yam thiab, xws li “lub siab hlub” thiab “kev zoo.” Hesed yog ib lo lus txawv heev uas piav txog kev khi lus uas ob tog yeej sib khi lus tias nyias yuav muab siab npuab thiab hlub nyias.

Kev sib yuav xilethi-aus yeej yog kev khi lus zoo li no. Ib khub niam txiv yuav tsum khi lus nrog Vajtswv thiab ib leeg khi lus rau ib leeg tias lawv ib leeg yuav muab siab npuab ib leeg thiab sib hlub.

Hesed yeej yog ib txoj kev hlub thiab kev hlub tshua tshwj xeeb uas Vajtswv muab rau cov neeg uas tau nrog Nws khi lus. Thiab peb muab hesed rau Nws ib yam thiab.

Daim Duab

ib khub niam txiv tshiab nyob rau ntawm ib lub tuam tsev

Daim duab los ntawm Jerry L. Garns

Vim Vajtswv muaj hesed rau cov uas khi lus nrog Nws, Nws yuav hlub lawv. Nws tseem yuav txhawb nqa lawv thiab muab cib fim rau lawv hloov siab. Nws yuav zam txim pub rau lawv thaum lawv hloov siab lees txim. Thiab yog lawv mus ua txhaum, Nws yuav pab lawv rov qab nrhiav kev mus cuag Nws.

Tom qab peb nrog Vajtswv khi lus, peb haj yam nrog Nws sib raug zoo ntau tshaj ua ntej peb tau khi lus. Tam sim no peb koom ua ke. Vim peb tau khi lus nrog Vajtswv, Nws yeej yuav siv zog pab peb tsis tu tsis tseg, thiab peb yeej yuav tsis ua rau Nws txoj kev hlub tshua peb tas lawm. Peb txhua tus muaj chaw hauv Vajtswv lub siab. Nws cia siab rau peb.

Nej txhua tus paub cov lus no uas tus Tswv tau hais rau tus Yaj Saub Joseph Smith. Twb yog los ntawm kev tshwm sim. Tus Tswv hais rau Joseph tias, “Txoj kev cog lus no los kuj yog rau nej thiab, vim nej twb yog los ntawm Anplaham los, thiab lo lus cog tseg yog muab rau Anplaham” (Lus Qhuab Qhia thiab Kev Khi Lus 132:31).

Yog li ntawd, twb tau muab txoj kev khi lus kav ib txhis no txum tim rov qab los vim yog ib feem ntawm kev Muab Txoj Moo Zoo Txum Tim Rov Qab Los. Cia li xav txog qhov no! Kev khi lus ntawm kev sib yuav uas khi hauv lub tuam tsev yeej muaj feem nrog Anplaham txoj kev khi lus. Nyob hauv lub tuam tsev ib khub niam txiv txais tag nrho cov koob hmoov uas tau muab tshwj tseg rau Anplaham, Ixaj, thiab Yakhauj cov xeeb leej xeeb ntxwv uas rau siab ntseeg.

Ib yam li Adas ua, peb tau pib taug txoj kev ua raws li peb tej kev khi lus thaum peb ua kev cai raus dej. Ces peb taug mus ntxiv thaum peb mus hauv lub tuam tsev. Peb txais cov koob hmoov ntawm Anplaham txoj kev khi lus hauv tej lub tuam tsev dawb huv. Cov koob hmoov no ua rau peb “yuav tau tej rooj theej kiab, tej nceeg vaj, tej nom tswv, tej lub hwj chim, thiab tej kev kav, kom peb yuav txais ‘kev tsa nto thiab yeeb koob nyob hauv txhua yam’ [Lus Qhuab Qhia thiab Kev Khi Lus 132:19]” tom qab peb sawv rov los.⁴

Nyob hauv Phau Qub qhov kawg, peb nyeem Malakis tej lus cog tseg qhia tias Eliyas yuav “tig cov txiv lub siab mus rau cov me nyuam, thiab tig cov me nyuam lub siab mus rau cov txiv” (Malakis 4:6). Nyob hauv Ixayees puag thaum ub, tej lus hais txog cov txiv lug ntsiab yog cov txiv xws li Anplaham, Ixaj, thiab Yakhauj. Peb kawm meej txog lo lus cog tseg no thaum peb nyeem nqe lus uas Maulaunais hais rau tus Yaj Saub Joseph Smith: “Nws [Eliyas] yuav muab tej lus cog tseg uas tau muab cog rau cov txiv yawg lawm coj los cog rau hauv cov me nyuam lub siab, thiab cov me nyuam lub siab yuav tig mus rau lawv cov txiv yawg” (Joseph Smith—Keeb Kwm 1:39) Cov txiv yawg ntawd yeej suav Anplaham, Ixaj, thiab Yakhauj. (Saib Lus Qhuab Qhia thiab Kev Khi Lus 27:9–10.)

Daim Duab

daim duab txog Yexus Khetos

Tej qhov los ntawm Khetos thiab tus Nom Tswv Hluas, los ntawm Heinrich Hofmann

Yexus Khetos: Tus Nruab Nrab ntawm txoj Kev Khi Lus

Tus Cawm Seej txoj kev txi txheej txhoj tau qhib kev rau Leej Txiv ua raws li Nws tej lus cog tseg uas Nws cog rau Nws cov me nyuam. Vim Yexus Khetos yog “txoj kev, yog qhov tseeb, thiab yog txoj sia,” ces “tsis muaj leej twg mus cuag tau Leej Txiv tsuas yog mus ntawm [Nws] mus xwb thiaj tau” (Yauhas 14:6). Twb tau muaj raws li Anplaham txoj kev khi lus vim muaj tus Tswv Yexus Khetos, peb tus Cawm Seej, txoj Kev Theej Txhoj. Yexus Khetos yeej yog tus nruab nrab ntawm Anplaham txoj kev khi lus.

Phau Qub yeej tsis yog ib phau vaj lug kub xwb; Phau Qub yeej yog ib phau keeb kwm thiab. Nej tau nyeem txog Xalais thiab Anplas txoj kev sib yuav. Vim nkawd tsis muaj me nyuam, Xalais muab nws tus ntxhais qhev, Hankas, rau Anplas ua nws tus poj niam, raws li tus Tswv tau qhia. Hankas tau yug Ixama-ees.⁵ Anplas hlub Ixama-ees, tiam sis nws tsis yog tus me nyuam uas yuav txais kev khi lus ntawd. (Saib Chiv Keeb 11:29–30; 16:1, 3, 11; Lus Qhuab Qhia thiab Kev Khi Lus 132:34.)

Vajtswv tau foom koob hmoov rau Xalais, thiab vim Xalais muaj kev ntseeg,⁶ nws xeeb tub thaum nws laus heev thiaj li yuav muaj raws li txoj kev khi lus dhau los ntawm nws tus tub, Ixaj (saib Chiv Keeb 17:19). Nws tau yug los nyob hauv txoj kev khi lus.

Vajtswv tau muab Xalais thiab Anplas ob lub npe tshiab—Xalas thiab Anplaham (saib Chiv Keeb 17:5, 15). Qhov uas muab ob lub npe tshiab no rau nkawd twb qhib ib lub neej tshiab thiab ib txoj hmoov tshiab rau tsev neeg no.

Anplaham hlub Ixama-ees thiab Ixaj zoo ib yam. Vajtswv tau qhia Anplaham tias Ixama-ees yuav muaj xeeb leej xeeb ntxwv coob thiab los ua ib haiv neeg coob heev (saib Chiv Keeb 17:20). Tiam sis, Vajtswv kuj qhia meej tias txoj kev khi lus kav ib txhis los yuav muaj los ntawm Ixaj (saib Chiv Keeb 17:19).

Tag nrho cov uas txais txoj moo zoo yeej los ua Anplaham cov xeeb ntxwv. Nyob hauv phau Kalatias peb nyeem hais tias:

“Nej twb ua kev cai raus dej rau sawv daws pom lawm hais tias … nej thiaj coj tau nej tus yam ntxwv zoo ib yam li Yexus Khetos tus.

“… Nej yog cov uas nrog Yexus Khetos koom ib txoj sia.

“Nej txhua tus uas ntseeg Yexus Khetos, nej puav leej yog Anplaham cov xeeb ntxwv, nej yeej yuav tau tej uas Vajtswv cog lus tseg lawm hais tias, nws yuav muab pub rau nej” (Kalatias 3:27–29).

Yog li ntawd, peb yuav txais txoj kev khi lus los ua peb tug thaum peb yug los los sis thaum muaj neeg yuav peb los ua lawv tus.

Daim Duab

cov neeg sau los ua ke saib neeg ua kev cai raus dej

Ixaj thiab Lenpekas tus tub Yakhauj tau yug los hauv txoj kev khi lus. Tsis tas li ntawd, nws tau xaiv kom ua raws li txoj kev khi lus ntawd. Nej paub tias, tau muab Yakhauj lub npe hloov ua Ixayees (saib Chiv Keeb 32:28), uas txhais tias “cia Vajtswv yeej” los sis “tus uas yeej nrog Vajtswv.”⁷

Nyob hauv phau Khiav Dim peb nyeem hais tias “Vajtswv … nco txog tej lus uas nws tau cog tseg rau Anplaham, Ixaj thiab Yakhauj lawm” (Khiav Dim 2:24). Vajtswv tau qhia rau Ixayees cov me nyuam, yog lawv mloog Nws lus thiab ua raws li Nws tej kev khi lus, ces lawv yuav los ua ib haiv neeg uas muaj nqis rau Nws (saib Khiav Dim 19:5).

Cov lus “haiv neeg uas muaj nqis” los twb txhais los ntawm lo lus Henplais segullah, uas txhais hais tias ib yam uas muaj nqis heev.⁸

Phau 2 Kev Cai qhia tias txoj kev khi lus no tseem ceeb npaum li cas. Cov Thwj Tim hauv Phau Tshiab paub txog txoj kev khi lus. Tom qab Petus tau kho ib tug neeg tuag ceg nyob ntawm lub lub tuam tsev, nws tau qhia cov neeg uas los saib txog Yexus. Petus hais tias, “Tus Vajtswv uas yog peb yawg koob Anplaham, Ixaj thiab Yakhauj tus Vajtswv ua rau nws tus tub Yexus tau koob meej” (Tes Hauj Lwm 3:13).

Petus tau xaus nws zaj lus thaum nws hais tias, “Thaum Vajtswv kom nws cov cev lus qhia nws tej lus cog tseg rau nej twb yog nws xav pab nej, thiab tej lus uas nws cog tseg rau nej cov yawg koob twb yog nws cog lus rau nej thiab. Vajtswv cog lus tseg rau Anplaham hais tias, Kuv yuav foom koob hmoov ntawm koj tus xeeb ntxwv mus rau txhua haiv neeg hauv qab ntuj no” (Tes Hauj Lwm 3:25). Petus tau qhia meej rau lawv tias ib feem ntawm Yexus Khetos ntiag tug hauj lwm yog kom muaj raws li Vajtswv txoj kev khi lus.

Tus Tswv tau hais ib zaj lus qhia ib yam li no rau cov neeg nyob hauv Amelikas puag thaum ub. Nyob ntawd, tus Khetos uas tau sawv rov los tau qhia cov neeg ntawd lawv yog leej twg tiag tiag. Nws tias:

“Nej yog cov yaj saub tej me nyuam; thiab nej yog los ntawm tsev neeg Ixayees; thiab nej yog los ntawm txoj kev khi lus uas Leej Txiv tau khi nrog nej cov yawg koob, uas tau hais rau Anplaham tias: Thiab los ntawm koj cov tub ki txhua pab neeg ntawm lub ntiaj teb yuav tau koob hmoov.

“Leej Txiv xub tsa kuv los rau nej, thiab xa kuv los foom koob hmoov rau nej kom nej txhua tus tig ntawm nws tus kheej tej kev ua phem mus; thiab li no los twb vim yog nej yog cov me nyuam ntawm txoj kev khi lus” (3 Nifais 20:25–26).

Nej puas pom tias qhov no tseem ceeb npaum li cas? Cov neeg uas ua raws li lawv tej kev khi lus nrog Vajtsw yeej yuav tiv taus kev txhaum! Cov neeg uas ua raws li lawv tej kev khi lus yuav muaj zog txaus tiv taus tej lub hwj huam ntawm lub ntiaj teb no.

Daim Duab

txiv neej uas txais lub cim nco txog

Tus Tswv tau txib kom peb qhia txoj moo zoo thiab qhia txog kev khi lus rau lwm tus. Yog vim li no peb thiaj muaj cov tub txib ntxhais txib. Nws xav kom Nws txhua tus me nyuam muaj cib fim xaiv tus Cawm Seej txoj moo zoo thiab taug mus txoj kev ua raws li lawv tej kev khi lus. Vajtswv xav muab tag nrho cov neeg sib khi ua ke ua raws li kev khi lus uas Nws khi nrog Anplaham puag thaum ub.

Yog li ntawd, cov tub txib txoj hauj lwm yeej yog ib feem tseem ceeb ntawm kev muab Ixayees sau los ua ke. Kev sib sau no yeej yog qhov tseem ceeb tshaj plaws uas muaj hauv lub ntiaj teb no. Tsis muaj dab tsi uas muaj yeeb koob tshaj. Tsis muaj dab tsi uas tseem ceeb tshaj. Tus Tswv cov tub txib ntxhais txib—Nws cov thwj tim—yeej ua qhov tseem ceeb tshaj plaws, lub hom phiaj tseem ceeb tshaj plaws, txoj hauj lwm tseem ceeb tshaj plaws hauv lub ntiaj teb no hnub no.

Tiam sis yeej muaj ntau ntxiv. Yuav tsum qhia txoj moo zoo rau cov neeg uas nyob daim ntaub thaiv sab tod thiab. Vajtswv xav kom txhua leej txhua tus, nyob ob sab ntawm daim ntaub thaiv, txais tau cov koob hmoov ntawm Nws txoj kev khi lus. Nws qhib txoj kev ua raws li kev khi lus rau txhua leej txhua tus. Peb thov kom txhua tus taug txoj kev ntawd nrog peb. Tsis muaj ib txoj hauj lwm uas pab neeg koom ua ke li no. Vim “tus Tswv yeej hlub tshua txhua tus uas yuav muaj lub siab tiag tiag, hu txog nws lub npe dawb huv” (Hilamas 3:27).

Rau qhov tau muab lub Pov Thawj Hwj Mekhixedes txum tim rov qab los, cov poj niam thiab txiv neej uas ua raws li lawv tej kev khi lus txais tau “tag nrho … cov koob hmoov ntawm sab ntsuj plig” uas muaj hauv txoj moo zoo (Lus Qhuab Qhia thiab Kev Khi Lus 107:18; ntxiv qhov uas ntawv qaij).

Thaum tau muab lub Tuam Tsev Kirtland fij tseg nyob rau xyoo 1836, raws li tus Tswv tau txib, Eliyas tshwm sim. Nws lub hom phiaj yog dab tsi? “Kom muab cov me nyuam [lub siab tig] mus rau cov txiv” (Lus Qhuab Qhia thiab Kev Khi Lus 110:15). Eli-as kuj tshwm sim. Nws lub hom phiaj yog dab tsi? Nws yuav muab “lub caij nyoog tso txoj cai ntawm Anplaham txoj moo zoo cob rau [Joseph Smith thiab Olivery Cowdery], hais tias los ntawm wb thiab wb cov tub ki txhua tiam neeg tom qab wb yuav tau koob hmoov” (Lus Qhuab Qhia thiab Kev Khi Lus 110:12). Yog li ntawd, tus Xib Hwb tau muab txoj cai pov thawj hwj rau Joseph Smith thiab Oliver Cowdery thiab txoj cai muab cov koob hmoov ntawm Anplaham txoj kev khi lus rau lwm tus.⁹

Nyob hauv lub Koom Txoos, peb ua raws li peb tej kev khi lus ib leeg thiab nyob ua ke. Tej khub niam txiv uas sib yuav thiab lawv tsev neeg muaj kev sib hlub tshwj xeeb vim lawv koom ua ke ib leeg nyob rau ib sab ntawm ib leeg, tiam sis kuj muaj kev koom ua ke tshiab nyob ntseg thaum peb nrog Vajtswv khi lus!

Tej zaum yog lub ntsiab no thaum Nifais hais tias Vajtswv “hlub cov uas xav tau nws los ua lawv tus Vajtswv” (1 Nifais 17:40). Yog vim li no, los ntawm kev khi lus ntawd, tag nrho cov uas ua kev khi lus nrog Vajtswv thiab nrog Nws kom ua ke li no yuav muaj kev siab hlub tshwj xeeb no—los sis hesed—mus txog “ib txhiab tiam neeg” (2 Kev Cai 7:9).

Thaum peb khi lus nrog Vajtswv ceb peb txoj kev txheeb ze Nws yeej hloov mus ib txhis li. Qhov no foom koob hmoov rau peb kom muaj kev hlub thiab lub siab hlub tshua ntau ntxiv.¹⁰ Kev khi lus no yuav hloov peb lub siab thiab Vajtswv yuav pab peb hloov los ua neeg zoo dua. Vajtswv cog lus tias peb kuj yuav los ua “ib haiv neeg uas muaj nqis” rau Nws (Phau Ntawv Nkauj 135:4).

Vajtswv cog lus tias cov uas ua raws li lawv tej kev khi lus dawb ceev yuav txais txoj sia nyob mus ib txhis thiab txais kev tsa nto, uas yog “lub txiaj ntsim zoo tshaj plaws ntawm tag nrho Vajtswv tej txiaj ntsim” (Lus Qhuab Qhia thiab Kev Khi Lus 14:7). Yexus Khetos yog tus pov thawj ntawm tej kev khi lus ntawd (saib Henplais 7:22; 8:6). Cov neeg uas ua raws li lawv tej kev khi lus hlub Vajtswv thiab cia Nws yeej tag nrho txhua yam kom cia Nws ua tus uas muaj hwj huam ntau tshaj plaws hauv lawv lub neej.

Nyob hauv peb lub caij nyoog peb txais cov koob hmoov yawg suab thiab kawm txog qhov uas peb koom ua ke nrog cov yawg suab puag thaum ub. Cov koob hmoov ntawd kuj pab peb saib yuav muaj li cas thaum yav tom ntej.

Daim Duab

Yexus nrog Petus tham

Lovest Thou Me More Than These? los ntawm David Lindsley

Qhov uas Vajtswv hu Ixayees ua yog ua tib zoo kom txhua tus mej zeej hauv lub Koom Txoos paub txog kev xyiv fab thiab tej txiaj ntsim uas los ntawm kev khi lus nrog Vajtswv. Yog kev hu kom txhua tus txiv neej thiab poj niam, thiab tub hluas ntxhais hluas uas khi lus nrog Vajtswv, qhia txoj moo zoo rau cov uas lawv ntsib. Yeej yog kev hu kom txhawb nqa thiab pab peb cov tub txib ntxhais txib, cov uas tus Tswv txib mus muab neeg ua kev cai raus dej thiab pab muab Ixayees sau los ua ke, yog li ntawd peb yuav ua Vajtswv haiv neeg thiab Nws yuav ua peb tus Vajtswv (saib Lus Qhuab Qhia thiab Kev Khi Lus 42:9).

Txhua tus txiv neej thiab txhua tus poj niam uas ua cov kab ke pov thawj hwj thiab ua raws li lawv tej kev khi lus nrog Vajtswv yeej yuav txais tau Vajtswv lub hwj chim. Peb ris tus Tswv lub npe rau peb tus kheej. Peb kuj ris Nws lub npe rau peb haiv neeg thiab. Qhov uas peb siv lub npe Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yog ib qho tseem ceeb uas peb haiv neeg ris Nws lub npe. Muaj tseeb tiag, txhua yam cov mej zeej ua hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej qhia txog Vajtswv txoj kev muaj hesed.

Vim li cas Ixayees tau tawg ri niab? Yog vim cov neeg tau ua tsis raws li cov lus txib thiab muab pob zeb ntaus cov yaj saub. Leej Txiv uas hlub lawv tiam sis tu siab heev tau muab Ixayees tawg khiav ri niab mus qhov txhia chaw.¹¹

Tiam sis, Nws cog lus rau lawv tias yuav muaj ib hnub Nws yuav muab Ixayees sau los ua ke hauv Nws pab yaj.

Xeem neeg Yudas tau muaj kev lav ris npaj lub ntiaj teb rau tus Tswv txoj kev los zaum thib ib. Los ntawm xeem neeg ntawd, Vajtswv tau hu Maivliag los ua leej niam rau Vajtswv Leej Tub.

Xeem neeg Yauxej, dhau los ntawm nws thiab Axenas ob tug tub, Efala-is thiab Manaxes (saib Chiv Keeb 41:50–52; 46:20), los muaj kev lav ris coj txoj kev muab Ixayees sau los ua ke, kom npaj lub ntiaj teb rau tus Tswv txoj Kev Los Zaum Ob.

Vim Vajtswv muaj hesed uas tsis paub kawg, ces Nws yeej xav muab Ixayees sau los ua ke. Nws yog peb Leej Txiv Saum Ntuj Ceeb Tsheej! Nws xav kom Nws txhua tus me nyuam—nyob ob sab ntawm daim ntaub thaiv—hnov txog Yexus Khetos txoj moo zoo.

Txoj kev ua raws li peb tej kev khi lus yeej yog ib txoj kev hlub—hesed uas zoo kawg nkaus, kev muaj siab hlub thiab kev ncav tes pab lwm tus. Qhov uas yus hnov txoj kev hlub ntawd yeej pab yus dim thiab txhawb nqa yus. Kev xyiv fab zoo tshaj plaws uas nej yuav muaj yog thaum nej hlub Vajtswv thiab tag nrho Nws cov me nyuam kawg siab kawg ntsws.

Kev hlub Vajtswv tshaj nej hlub lwm tus yeej yog qhov uas ua rau nej nyob kaj siab lug, txais kev nplij siab, ua siab loj, thiab muaj kev xyiv fab.

Txoj kev ua raws li peb tej kev khi lus yeej hais txog peb txoj kev sib raug zoo nrog Vajtswv—yog kev sib raug zoo nrog Nws uas muaj hesed. Thaum peb nrog Vajtswv khi lus, peb tau khi lus nrog ib tug uas yeej yuav ua raws li Nws hais. Nws yuav ua txhua yam Nws ua tau, yog tsis cuam tshuam peb txoj kev ywj siab xaiv, kom pab peb ua raws li peb tej kev khi lus.

Phau Ntawv Maumoos pib thiab xaus thaum hais txog txoj kev khi lus kav ib txhis no. Txij ntawm phab ntawv qhia npe mus txog thaum Maumoos thiab Maulaunais hais lus tim khawv, Phau Ntawv Maumoos hais txog txoj kev khi lus no (saib Maumoos 5:20; 9:37). “Qhov uas Phau Ntawv Maumoos yuav los yog ib lub cim rau tag nrho lub ntiaj teb tias tus Tswv tau pib muab Ixayees sau los ua ke thiab yuav ua raws li Nws tej kev khi lus rau Anplaham, Ixaj, thiab Yakhauj.”¹²

Kuv cov kwv tij thiab cov muam, Vajtswv tau hu peb hauv lub caij nyoog tseem ceeb kawg nkaus hauv lub ntiaj teb no kom qhia neeg txog qhov zoo nkauj thiab lub hwj chim ntawm txoj kev khi lus kav ib txhis no. Peb Leej Txiv Saum Ntuj Ceeb Tsheej tso siab rau peb kom ua txoj hauj lwm zoo kawg nkaus no.