සදාකාලික ගිවිසුම

අපි දෙවියන්වහන්සේ සමඟ ගිවිසුමක් ඇති කරගත් පසු, අපි මධ්‍යස්ථ භූමිය සදහටම අත්හරිමු. දෙවියන්වහන්සේ සමඟ එවැනි බැඳීමක් ඇති කරගත් අය සමඟ උන්වහන්සේ එම සම්බන්ධතාවය අත් නොහරිනු ඇත. ඇත්ත වශයෙන්ම, දෙවියන්වහන්සේ සමඟ ගිවිසුමක් ඇති කරගත් සියලු දෙනාටම විශේෂ ආකාරයේ ප්‍රේමයකට සහ දයාවකට ප්‍රවේශය ඇත. හෙබ්‍රෙව් භාෂාවෙන් එම ගිවිසුම් ප්‍රේමය හෙසෙඩ් ලෙස හැඳින්වේ (חֶסֶד).³

හෙසෙඩ් යන වචනයට ප්‍රමාණවත් ඉංග්‍රීසි සමානකමක් නොමැත. බයිබලයේ ජේම්ස් රජුගේ අනුවාදයේ පරිවර්තකයන් ඉංග්‍රීසියෙන් හෙසෙඩ් පරිවර්තනය කරන්නේ කෙසේද යන්න ගැන මහත් පරිශ්‍රමයක් දරන්නට ඇත. ඔවුන් බොහෝ විට “ප්රේමණීය කරුණාව” තෝරා ගත්හ. මෙය බොහෝ දේ ග්‍රහණය කර ගන්නා නමුත් හෙසෙඩ් යන්නෙහි සියලු අරුත එය නොවේ. වෙනත් පරිවර්තනයන් එය “දයාව” සහ “යහපත්කම” ලෙසද ගෙනහැර දක්වයි. හෙසෙඩ් යනු දෙපාර්ශවයම එකිනෙකාට පක්ෂපාතීව සහ විශ්වාසවන්තව සිටීමට බැඳී සිටින ගිවිසුම් සම්බන්ධතාවයක් විස්තර කරන අද්විතීය යෙදුමකි.

සෙලෙස්ටියල් විවාහයක් යනු එවැනි ගිවිසුම් සම්බන්ධතාවයකි. ස්වාමිපුරුෂයා සහ භාර්යාව දෙවියන්වහන්සේ සමඟ සහ එකිනෙකා සමඟ පක්ෂපාතීව හා විශ්වාසවන්තව සිටීමට ගිවිසුමක් ඇති කරගනිති.

හෙසෙඩ් යනු දෙවියන්වහන්සේ සමඟ ගිවිසුමක් ඇති කර ගත් අය කෙරෙහි උන්වහන්සේට හැඟෙන විශේෂ ආකාරයක ප්‍රේමයක් සහ දයාවකි. එමනිසා අපි උන්වහන්සේට හෙසෙඩ් ආකාරයට ප්‍රතිචාර දක්වමු.

රූපය

දේවමාළිගාවෙන් පිටත සිටින අලුත විවාහ වූ යුවළක්

ඡායාරූපය ජෙරී එල්. ගාර්න්ස් විසිනි

දෙවියන්වහන්සේ උන්වහන්සේ සමඟ ගිවිසුම් ඇතිකරගෙන සිටින අය කෙරෙහි හෙසෙඩ් ඇතිකරගන්නා නිසා, උන්වහන්සේ ඔවුන්ට ප්‍රේම කරන සේක. උන්වහන්සේ ඔවුන් සමඟ දිගටම වැඩ කරන අතර ඔවුන්ට වෙනස් වීමට අවස්ථාව ලබා දෙනු ඇත. ඔවුන් පසුතැවිලි වූ විට උන්වහන්සේ ඔවුන්ට සමාව දෙනු ඇත. තවද ඔවුන් අයාලේ ගියහොත්, උන්වහන්සේ වෙත ආපසු යන මාර්ගය සොයා ගැනීමට උන්වහන්සේ ඔවුන්ට උපකාර කරයි.

ඔබ සහ මම දෙවියන්වහන්සේ සමඟ ගිවිසුමක් ඇති කරගත් පසු, උන්වහන්සේ සමඟ අපගේ සම්බන්ධතාවය අපගේ ගිවිසුමට පෙර තිබුනාට වඩා සමීප එකක් වේ. දැන් අපි එකට බැඳී සිටිමු. දෙවියන්වහන්සේ සමඟ ඇති අපගේ ගිවිසුම නිසා, අපට උපකාර කිරීමට උන්වහන්සේ දරන වෑයමේදී උන්වහන්සේ කිසිදා වෙහෙසට පත් නොවනු ඇති අතර, අප සමඟ උන්වහන්සේගේ දයාවන්ත ඉවසීම කිසිවිටෙකත් ඉක්මවා යන්නට අපි හේතුවක් නොවන්නෙමු. අප සෑම කෙනෙකු වෙනුවෙන්ම දෙවියන්වහන්සේගේ හදවතේ විශේෂ ස්ථානයක් ඇත. උන්වහන්සේ අප කෙරෙහි විශාල බලාපොරොත්තු තබාගෙන ඇත.

ජෝසෆ් ස්මිත් අනාගතවක්තෘවරයාට ස්වාමින්වහන්සේ දුන් ඓතිහාසික ප්‍රකාශය ගැන ඔබ දනියි. එය පැමිණියේ එළිදරව්වකින්. ස්වාමින්වහන්සේ ජෝසෆ්ට මෙසේ පැවසීය, “මෙම පොරොන්දුව නුඹලාගේද වන්නේය, මක්නිසාද නුඹලා ආබ්‍රහම්ගේ නිසාත්, තවද ආබ්‍රහම් වෙතට පොරොන්දු තැබූ නිසාත් ය” (දහම සහ ගිවිසුම් 132:31).

ඒනිසා, මෙම සදාකාලික ගිවිසුම, ශුභාරංචිය එහි පූර්ණත්වය තුළ නැවත පිහිටුවීමේ කොටසක් ලෙස නැවතත් පිහිටුවන ලදි. ඒ ගැන සිතන්න! දේවමාළිගාවේ කරන ලද විවාහ ගිවිසුමක් ආබ්‍රහමික ගිවිසුමට සෘජුවම සම්බන්ධ වේ. දේවමාළිගාවේදී ආබ්‍රහම්, ඊසාක් සහ යාකොබ්ගේ ඇදහිලිවන්ත පරම්පරා සඳහා වෙන් කර ඇති සියලුම ආශිර්වාද යුවළකට හඳුන්වා දෙනු ලැබේ.

ආදම් කළාක් මෙන්, ඔබත් මමත් පෞද්ගලිකව බව්තීස්මයේදී ගිවිසුම් මාර්ගයට ඇතුළු වූයෙමු. පසුව අපි දේවමාළිගාව තුලදී සම්පූර්ණයෙන්ම එයට ඇතුල් වන්නෙමු. ආබ්‍රහමික ගිවිසුමේ ආශිර්වාද ශුද්ධ වූ දේවමාළිගාව තුලදී ප්‍රදානය කෙරෙයි. අපව මරණයෙන් නැවත නැගිටුවනු ලැබීමෙන් පසු, මෙම ආශිර්වාද “සිංහාසන, රාජ්‍යයන්, රාජධානින්, සහ බලයන්, අධිපත්‍යයන්, සියලු උස්ථානයන්හි සහ ගැඹුරෙහිදී උරුමයන්’ ලැබීමට ඉඩ සලස්වයි [දහම සහ ගිවිසුම් 132:19].”⁴

පරණ ගිවිසුමේ අවසාන පාඨයේ, එලයිජා “පියවරුන්ගේ හදවත දරුවන් වෙතටත් දරුවන්ගේ හදවත ඔවුන්ගේ පියවරුන් වෙතටත් හරවන” (මලාකි 4:6) බවට මලාකිගේ පොරොන්දුව ගැන අපි කියවමු. පුරාණ ඊශ්‍රායෙලයේ, පියවරුන් යන නිර්දේශනයන්ට ආබ්‍රහම්, ඊසාක් සහ යාකොබ් යන පියවරුන් ඇතුළත් වන්නට ඇත. මොරෝනි අනාගතවක්තෘ ජෝසෆ් ස්මිත් වෙත උපුටා දක්වන ලද මෙම පදයේ විවිධ අනුවාදයන් කියවන විට මෙම පොරොන්දුව පැහැදිලි වේ: “ඔහු [එලයිජා] පියවරුන්ට දුන් පොරොන්දු දරුවන්ගේ හදවත් තුළ රෝපණය කරනු ඇත, දරුවන්ගේ හදවත් ඔවුන්ගේ පියවරුන් වෙත හැරෙනු ඇත” (ජෝසෆ් ස්මිත්—ඉතිහාසය 1:39). එම පියවරුන්ට නිසැකවම ආබ්‍රහම්, ඊසාක් සහ යාකොබ් ඇතුළත් වේ. (බලන්න දහම සහ ගිවිසුම් 27:9–10.)

රූපය

යේසුස් ක්‍රිස්තුස්වහන්සේගේ අනුරූපය

හෙයින්රිච් හොෆ්මන් විසින්, Christ and the Rich Young Ruler [ක්‍රිස්තුස්වහන්සේ සහ පොහොසත් තරුණ පාලකයා] හි විස්තර

යේසුස් ක්‍රිස්තුස්වහන්සේ: ගිවිසුමේ කේන්ද්‍රය

පියාණන්වහන්සේ තම දරුවන් වෙත දුන් පොරොන්දු ඉටු කිරීමට ගැලවුම්කරුවාණන්ගේ වන්දිගෙවීමේ පූජාව හැකියාව ලබාදුන්නේය. යේසුස් ක්‍රිස්තුස්වහන්සේ “මාර්ගයද, සත්‍යද, ජීවනයද වන නිසා: [උන්වහන්සේ] තුළින් හැර කිසිවෙක් පියාණන්වහන්සේ තුළට පැමිණෙන්නේ නැත” (යොහාන් 14:6). අපගේ ගැලවුම්කරුවාණන් වන, ස්වාමින් වූ යේසුස් ක්‍රිස්තුස්වහන්සේගේ වන්දිගෙවීම නිසා ආබ්‍රහමික ගිවිසුමේ ඉටුවීම ශක්‍ය වේ. ආබ්‍රහමික ගිවිසුමේ කේන්ද්‍රයේ සිටින්නේ යේසුස් ක්‍රිස්තුස්වහන්සේ ය.

පරණ ගිවිසුම යනු ශුද්ධලියවිලි පොතක් පමණක් නොවේ; එය ඉතිහාස පොතක් ද වේ. සාරායි සහ ආබ්‍රම්ගේ විවාහය ගැන කියෙව්වා ඔබට මතක ඇති. ඔවුන්ට දරුවන් නැති නිසා, සාරයි විසින් ස්වාමින්වහන්සේගේ මගපෙන්වීමට අනුව ආබ්‍රම්ගේ භාර්යාව වීමට ඇගේ දාසිය වූ හාගර්ට ඉඩ දුන්නාය. හාගර් ඉෂ්මායෙල්ව බිහි කළාය.⁵ ආබ්‍රම් ඉෂ්මායෙල්ට ආදරය කළ නමුත්, ඔහු එම ගිවිසුම ඉදිරියට ගෙන යන දරුවා නොවිය යුතු විය. (බලන්න උත්පත්ති 11:29–30; 16:1,3,11; දහම සහ ගිවිසුම් 132:34.)

දෙවියන්වහන්සේගෙන් ආශිර්වාදයක් ලෙස සහ සාරයිගේ ඇදහිල්ලට ප්‍රතිචාර වශයෙන්, ⁶ ඇය තම මහලු වයසේදීත් පිළිසිඳ ගත්තාය, එසේ වූයේ එවිට එම ගිවිසුම ඇගේ පුත් ඊසාක් හරහා ඉදිරියට යා යුතු හෙයිනි (බලන්න උත්පත්ති 17:19). ඔහු ගිවිසුම තුළ උපත ලැබුවේය.

දෙවියන්වහන්සේ සාරයි සහ ආබ්‍රම්ට අලුත් නම් ලබා දුන්සේක––සාරා සහ ආබ්‍රහම් (බලන්න උත්පත්ති 17:5, 15). ඒ අලුත් නම් පිරිනැමීම මේ පවුලට අලුත් ජීවිතයක නව ඉරණමක ආරම්භය සනිටුහන් කළේය.

ආබ්රහම් ඉෂ්මායෙල්ට සහ ඊසාක් යන දෙදෙනාටම ආදරය කළේය. දෙවියන්වහන්සේ ආබ්‍රහම්ට පැවසුවේ ඉෂ්මායෙල් වැඩි වර්ධනය වී ශ්‍රේෂ්ඨ ජාතියක් වනු ඇති බවය (බලන්න උත්පත්ති 17:20). ඒ අතරම, සදාකාලික ගිවිසුම ඊසාක් හරහා පිහිටුවන බව දෙවියන්වහන්සේ පැහැදිලි කළේය (බලන්න උත්පත්ති 17:19).

ශුභාරංචිය පිළිගන්නා සියල්ලෝම ආබ්‍රහම්ගේ පෙළපතට අයත් වේ. ගලාති පොතේ අපි මෙසේ කියවමු:

“මක්නිසාද නුඹලාගෙන් ක්‍රිස්තුස්වහන්සේ තුළට බව්තීස්ම කරනු ලැබූ සියල්ලෝ ක්‍රිස්තුස්වහන්සේ පැළඳගත්තෝය.

“… ඔබ සියල්ලෝම ක්‍රිස්තුස් යේසුස් තුළ එකය.

“ඉඳින් නුඹලා ක්‍රිස්තුස්වහන්සේගේ නම්, නුඹලා ආබ්‍රහම්ගේ වංශයද පොරොන්දුව ලෙස උරුමක්කාරයෝද වන්නහුය” (ගලාති 3:27–29).

මේ අනුව, අපට උපතින් හෝ දරුකමට හදා ගැනීමෙන් ගිවිසුමේ උරුමක්කාරයන් විය හැකිය.

රූපය

බව්තීස්ම කිරීමේ රැස්වීම සඳහා මිනිසුන් රැස් වී

ඊසාක් සහ රෙබෙකාගේ පුත් යාකොබ් ගිවිසුම තුළ උපත ලැබීය. ඊට අමතරව, ඔහු තමාගේම කැමැත්තෙන්ම එයට ඇතුල් වීමට තීරණය කළේය. ඔබ දන්නා පරිදි, යාකොබ්ගේ නම ඊශ්‍රායෙල් ලෙස වෙනස් විය (බලන්න උත්පත්ති 32:28), එහි තේරුම “දෙවියන්වහන්සේට ජය ගැනීමට ඉඩ දෙන්න” හෝ “දෙවියන්වහන්සේ සමඟ ජය ගන්නා තැනැත්තා” යන්නයි.”⁷

නික්මයාම පොතෙහි අපට මෙසේ කියවිය හැකියි “දෙවියන්වහන්සේ ආබ්‍රහම්, ඊසාක් සහ යාකොබ් සමඟ ඇති තම ගිවිසුම සිහි කළ සේක” (නික්මයාම 2:24). දෙවියන්වහන්සේ ඉශ්‍රායෙල් දරුවන්ට පැවසුවේ, “ඔබ සැබවින්ම මාගේ හඬට කීකරු වී, මාගේ ගිවිසුම පිළිපදින්නේ නම්, ඔබ මට සුවිශේෂී වස්තුවක් වනු ඇත” කියායි (නික්මයාම 19: 5).

“සුවිශේෂී වස්තුවක්” යන වාක්‍ය ඛණ්ඩය හෙබ්‍රෙව් සෙගුල්ලා භාෂාවෙන් පරිවර්තනය කර ඇත, එහි තේරුම ඉතා වටිනා වස්තුවක්—“නිධානයක්”⁸ යන්නයි.

ද්විතීය කථාව පොත මෙම ගිවිසුමේ වැදගත්කම විස්තර කරයි. අලුත් ගිවිසුමේ ප්‍රේරිතවරුන් මෙම ගිවිසුම ගැන දැන සිටියහ. පේත්‍රැස් දේවමාළිගාවේ පඩිපෙළ මත සිටි කොර මිනිසෙකුව සුව කළ පසු, ඔහු යේසුස්වහන්සේ ගැන බලා සිටි අයට ඉගැන්නුවේය. පේත්‍රැස් මෙසේ පැවසීය, “ආබ්‍රහම්ගේ, ඊසාක්ගේ සහ යාකොබ්ගේ දෙවියන්වහන්සේ, අපගේ පියවරුන්ගේ දෙවියන්වහන්සේ, උන්වහන්සේගේ පුත් වූ යේසුස්වහන්සේව මහිමයට පත් කළ සේක” (ක්‍රියා 3:13).

පේත්‍රැස් ශ්‍රාවකයන්ට මෙසේ පවසමින් ඔහුගේ පණිවිඩය අවසන් කළේය, “ඔබ අනාගතවක්තෘවරුන්ගේ සහ දෙවියන්වහන්සේ ආබ්‍රහම්ට පැවසූ අපගේ පියවරුන් සමඟ ඇති කරගත් ගිවිසුමේ දරුවෝ ය, ඔබේ වංශයෙන් පොළොවේ සියලු ජාතීන් ආශිර්වාද ලබන්නෝ ය” (ක්‍රියා 3 :25). දෙවියන්වහන්සේගේ ගිවිසුම ඉටු කිරීම ක්‍රිස්තුස්වහන්සේගේ ධර්මදූතයේ කොටසක් බව පේත්‍රැස් ඔවුන්ට පැහැදිලි කළේය.

ස්වාමින්වහන්සේ පුරාණ අමෙරිකාවේ ජනයාට ද එවැනිම දේශනාවක් කළසේක. එහිදී, මරණයෙන් නැවත නැගිටි ක්‍රිස්තුස්වහන්සේ එම ජනතාවට ඔවුන් ඇත්තටම කවුද කියා පැවසූ සේක. උන්වහන්සේ මෙසේ පැවසීය:

“තවද බලන්න, නුඹලා අනාගතවක්තෘවරුන්ගේ දරුවන්ය; තවද නුඹලා ඊශ්‍රායෙල් නිවැසියන්ය; තවද නුඹලාගේ වංශය කරුණුකොටගෙන පොළොවේ සියලු ඥාතියෝ ආශිර්වාද ලබන්නෝයයි, ආබ්‍රහම්ට මෙසේ කියමින් නුඹලාගේ පියවරුන් සමඟ පියාණන්වහන්සේ කරනු ලැබූ ගිවිසුමය.

“පියාණන්වහන්සේ නුඹලා හට මාව පළමුවෙන් නැගිටිවාළු සේක, තවද නුඹලා සෑම අයෙකුවම ඔහුගේ අයුතුකම් වලින් ඉවතට හරවාගෙන නුඹලාට ආශිර්වාද කිරීමට මා යැවූ සේක; තවද මෙය මක්නිසාද නුඹලා ගිවිසුමේ දරුවන් බැවින්ය” (3 නෙපි 20:25–26).

ඔබ මෙහි වැදගත්කම දකිනවාද? දෙවියන්වහන්සේ සමඟ තම ගිවිසුම් රකින අය පාපයට ඔරොත්තු දෙන ප්‍රාණයන් බවට පත්වනු ඇත! තම ගිවිසුම් රකින අයට ලෝකයේ නිරන්තර බලපෑමට එරෙහි වීමට ශක්තිය ලැබේ.

රූපය

සක්‍රමේන්තුවට සහභාගී වන පුද්ගලයෙක්

අපට ශුභාරංචිය ප්‍රචාරය කිරීමටත් ගිවිසුම බෙදා ගැනීමටත් ස්වාමින්වහන්සේ ආඥා කර ඇත. අපට ධර්මදූතයින් සිටින්නේ මේ නිසාය. ගැලවුම්කරුවාණන්ගේ ශුභාරංචිය තෝරාගෙන ගිවිසුම් මාර්ගයට පිවිසීමට උන්වහන්සේගේ සෑම දරුවෙකුටම අවස්ථාව ලැබෙනු අතැයි උන්වහන්සේ බලාපොරොත්තු වෙයි. දෙවියන්වහන්සේ ආබ්‍රහම් සමඟ පුරාණයේ ඇති කරගත් ගිවිසුමට සියලු මිනිසුන්ව සම්බන්ධ කිරීමට උන්වහන්සේට අවශ්‍යය.

මේ අනුව, ධර්මදූත කාර්යය ඊශ්‍රායෙලයේ මහා එක්රැස් කිරීමේ අත්‍යවශ්‍ය අංගයකි. අද පොළව මත සිදුවන වැදගත්ම දෙය එම එක්රැස් කිරීමයි. එහි විශාලත්වය සමඟ වෙනත් කිසිවක් සැසඳිය නොහැක. එහි වැදගත්කම සමඟ වෙනත් කිසිවක් සැසඳිය නොහැක. ස්වාමින්වහන්සේගේ ධර්මදූතයින්—උන්වහන්සේගේ ගෝලයන්––අද පොළොවේ විශාලතම අභියෝගය, ශ්‍රේෂ්ඨතම හේතුව, ශ්‍රේෂ්ඨතම කාර්යයෙහි නිරතව සිටිති.

නමුත් එහි ඊට වඩා දෙයක්—විශාල දෙයක් තිබේ. තිරයෙන් අනෙක් පැත්තේ සිටින මිනිසුන්ට ශුභාරංචිය පතුරුවා හැරීමේ විශාල අවශ්‍යතාවයක් තිබේ. දෙවියන්වහන්සේට අවශ්‍ය වන්නේ, තිරය දෙපස සිටින සෑම කෙනෙකුම, උන්වහන්සේගේ ගිවිසුමේ ආශිර්වාද භුක්ති විඳීමයි. ගිවිසුම් මාර්ගය සැමට විවෘතය. අපිත් සමඟ ඒ මාර්ගයේ ගමන් කරන්න කියා අපි සැමටම ආයාචනා කරමු. වෙනත් කිසිම කාර්යයක් එතරම් විශ්වීය වශයෙන් ඇතුළත් නොවේ. මක්නිසාද “මෙසේ ඔවුන්ගේ හදවතේ අවංක භාවයෙන් උන්වහන්සේගේ ශුද්ධ වූ නාමයෙන් හඬගසන්නා වූ සියලුදෙනාටම එනම් ස්වාමින්වහන්සේ කරුණාවන්තය” (හිලමන් 3:27).

මෙල්කිසදෙක් පූජකත්වය නැවත පිහිටුවා ඇති නිසා, ගිවිසුම්—රකින ස්ත්‍රීන්ට සහ පුරුෂයින්ට ශුභාරංචියේ “සියලු ආත්මික ආශිර්වාද” වෙත ප්‍රවේශය ඇත (දහම සහ ගිවිසුම් 107:18; අවධාරණය කිරීම් එකතු කර ඇත).

ස්වාමින්වහන්සේගේ මගපෙන්වීම යටතේ, 1836 දී කර්ට්ලන්ඩ් දේවමාළිගාව කැපකිරීමේදී, එලයිජා පෙනී සිටියේය. ඔහුගේ අරමුණ? “දරුවන්ව පියවරුන් වෙත හැරවීම ය” (දහම සහ ගිවිසුම් 110:15). එලියා ද පෙනී සිටියේය. ඔහුගේ අරමුණ? “අප සහ අපගෙන් පසු අපගේ වංශයේ සියලු පරම්පරාවන් ආශිර්වාදිත වන බව කියමින්, ආබ්‍රහම්ගේ ශුභාරංචියේ කාලපරිච්ඡේදය” ජෝසෆ් ස්මිත් සහ ඔලිවර් කව්ඩ්‍රි වෙත බාරදීම ය (දහම සහ ගිවිසුම් 110:12). මේ අනුව, ස්වාමින්වහන්සේ මෙම ආබ්‍රහමික ගිවිසුමේ අද්විතීය ආශිර්වාද අන් අයට ප්‍රකාශ කිරීම සඳහා පූජකත්ව අධිකාරිත්වය සහ අයිතිය ජෝසෆ් ස්මිත් සහ ඔලිවර් කව්ඩ්‍රි මත ප්‍රදානය කළේය.⁹

සභාවේදී, අපි තනි තනිව සහ සාමූහිකව මෙම ගිවිසුම් මාවතේ ගමන් කරමු. විවාහ සහ පවුල් සුවිශේෂී ප්‍රේමයක් ඇති කරන අද්විතීය පාර්ශ්වික බැඳීමක් බෙදාගන්නවා සේම, අපගේ දෙවියන්වහන්සේට සෘජුගිවිසුමකින් අප බැඳී සිටින විට නව සබඳතාවයක් ගොඩනැගේ!

දෙවියන්වහන්සේ “උන්වහන්සේව ඔවුන්ගේ දෙවියන්වහන්සේ කරගැනීමට කැමති අයට ප්‍රේම කරන සේක” (1 නෙපි 17:40) යැයි පැවසූ විට නෙපි අදහස් කළේ මෙය විය හැකිය. ගිවිසුමේ කොටසක් ලෙස, දෙවියන්වහන්සේ සමඟ මෙම බැඳීම සහ සමීප සබඳතාවයට ඇතුල් වන සියල්ලන්ටම, “පරම්පරා දහසකට” පවා විශේෂ දයාව සහ ප්‍රේමය—හෝ හෙසෙඩ්—ලබා ගත හැක්කේ මේ නිසා ය (ද්විතීය කථාව 7:9).

දෙවියන්වහන්සේ සමඟ ගිවිසුමක් ඇති කරගැනීම උන්වහන්සේ සමඟ අපගේ සම්බන්ධතාවය සදහටම වෙනස් කරයි. එය අපට අමතර ප්‍රේමයකින් සහ දයාවකින් ආශිර්වාද කරයි.¹⁰ එය අප කවුරුන්ද යන්න සහ අපට විය හැකි අය වීමට දෙවියන්වහන්සේ අපට උපකාර කරන්නේ කෙසේද යන්න බලපායි. අපටත් උන්වහන්සේ හට “සුවිශේෂී නිධානයක්” විය හැකි බව අපට පොරොන්දු වී ඇත (ගීතාවලිය 135:4).

ශුද්ධ වූ ගිවිසුම් ඇති කර ඒවා රකින අයට “දෙවියන්වහන්සේගේ සියලු දීමනා අතරින් ශ්රේෂ්ඨතම” දීමනාව වන සදාකාල ජීවනය සහ උත්කර්ෂය පොරොන්දු වී ඇත (දහම සහ ගිවිසුම් 14:7). එම ගිවිසුම්වල ඇපකරු වන්නේ යේසුස් ක්‍රිස්තුස්වහන්සේ ය (බලන්න හෙබ්‍රෙව් 7:22; 8:6). දෙවියන්වහන්සේට ප්‍රේම කරන සහ ඔවුන්ගේ ජීවිතයේ අනෙකුත් සියලු දේ අභිබවා යාමට උන්වහන්සේට ඉඩ දෙන ගිවිසුම් රකින්නෝ ඔවුන්ගේ ජීවිතයේ බලවත්ම බලපෑම උන්වහන්සේ බවට පත්කරගනිති.

අපේ කාලයේ අපි පීතෘමූලික ආශිර්වාද ලබා ගැනීමටත්, අතීත පීතෘමූලිකයන් සමඟ අපගේ සම්බන්ධතාවය ඉගෙන ගැනීමටත් වරප්‍රසාද ලබා ඇත. එම ආශිර්වාද ඉදිරියේදී සිදුවීමට නියමිත දේ ගැන ද අවබෝධයක් සපයයි.

රූපය

යේසුස්වහන්සේ පේත්‍රැස් සමග කතාකරමින්

ඩේවිඩ් ලින්ඩ්ස්ලි විසින්, Lovest Thou Me More Than These?” [මේ දේවල් වලට වඩා නුඹ මට ප්‍රේම කරනවාද?]

ගිවිසුම්ගත ඊශ්‍රායෙලය ලෙස අපගේ කැඳවීම වන්නේ, සභාවේ සෑම සාමාජිකයෙකුම දෙවියන්වහන්සේ සමඟ ගිවිසුම් ඇති කරගැනීමේ වරප්‍රසාද සහ ප්‍රීතිය අවබෝධ කරගන්නා බව සහතික කිරීමයි. එය සෑම ගිවිසුම්-රකින පිරිමියෙකුටම සහ කාන්තාවකටම, ගැහැණු ළමයෙකුටම සහ පිරිමි ළමයෙකුටම, ඔවුන්ගේ බලපෑමට ලක්විය හැකි වටපිටාව තුළට එන අය සමඟ ශුභාරංචිය බෙදා ගැනීමට දිරිගැන්වීමේ කැඳවීමකි. බව්තීස්ම කිරීමට සහ ඊශ්‍රායෙලය එක්රැස් කිරීමට උපකාර කිරීමට උපදෙස් සමඟ යවනු ලැබ ඇති අපගේ ධර්මදූතයින්ට සහයෝගය දැක්වීමට සහ දිරිගැන්වීමට කරන කැඳවීමකි, එවිට අපට එකට එක්ව දෙවියන්වහන්සේගේ සෙනඟ විය හැකි අතර උන්වහන්සේ අපගේ දෙවියන්වහන්සේ වනු ඇත (බලන්න දහම සහ ගිවිසුම් 42:9).

පූජකත්ව නියෝගවලට සහභාගී වන සහ දෙවියන්වහන්සේ සමඟ ගිවිසුම් ඇති කරගන්නා සහ රකින සෑම පිරිමියෙකුටම සහ සෑම ස්ත්‍රියකටම දෙවියන්වහන්සේගේ බලයට සෘජු ප්‍රවේශය ඇත. අපි පුද්ගලයන් වශයෙන් ස්වාමින්වහන්සේගේ නාමය අප මත ගනිමු. සෙනඟක් ලෙසද අපි උන්වහන්සේගේ නාමය අප වෙතට ගනිමු. යේසුස් ක්‍රිස්තුස්වහන්සේගේ පසුදවස් වල ශුද්ධවන්තයන්ගෙන් යුත් සභාව යන නිවැරදි නාමය භාවිතා කිරීමට දැඩි ආශාවක් දැක්වීම, ජනතාවක් ලෙස අප උන්වහන්සේගේ නාමය අප වෙත ගෙනයාමට අත්‍යවශ්‍ය මාර්ගයකි. සැබවින්ම, යේසුස් ක්‍රිස්තුස්වහන්සේගේ පසුදවස් වල ශුද්ධවන්තයන්ගෙන් යුත් සභාවේ සහ එහි සාමාජිකයන්ගේ සෑම කාරුණික ක්‍රියාවක්ම දෙවියන්වහන්සේගේ හෙසෙඩ් ප්‍රකාශනයකි.

ඊශ්‍රායෙලය විසිරුවා හැරියේ ඇයි? මක්නිසාද සෙනඟ ආඥා කඩකර අනාගතවක්තෘවරුන්ට ගල් ගැසූ බැවිනි. ප්‍රේමණීය නමුත් ශෝකයට පත් පියෙක් ඊශ්‍රායෙල් දේශය විසිරුවා හරිමින් ප්‍රතිචාර දැක්වීය.¹¹

කෙසේවෙතත්, යම් දවසක ඊශ්‍රායෙල්වරුන් නැවත උන්වහන්සේගේ ගාලට රැස් කරන බවට පොරොන්දුවක් දී උන්වහන්සේ ඔවුන්ව විසුරුවා හැරියේය.

ස්වාමින්වහන්සේගේ පළමු පැමිණීම සඳහා ලෝකය සූදානම් කිරීමේ වගකීම යුදා ගෝත්‍රයට පවරා ඇත. එම ගෝත්‍රයෙන්, දෙවියන්වහන්සේගේ පුත්‍රයාගේ මව වීමට මරියාව කැඳවනු ලැබීය.

යෝසෙප්ගේ ගෝත්‍රයට, ඔහුගේ සහ අසෙනත්ගේ පුත්‍රයන් වන එෆ්‍රායිම් සහ මනස්සේ හරහා (බලන්න උත්පත්ති 41:50–52; 46:20), ස්වාමින්වහන්සේගේ දෙවන පැමිණීම සඳහා ලෝකය සූදානම් කිරීමට ඊශ්‍රායෙලය එක්රැස් කිරීමේ නායකත්වයේ වගකීම පැවරී ඇත.

එවැනි කාලානුරූපී හෙසෙඩ් සම්බන්ධයක් තුළ, දෙවියන්වහන්සේ ඊශ්‍රායෙලය එක්රැස් කිරීමට කැමති වීම ස්වාභාවිකය. උන්වහන්සේ අපගේ ස්වර්ගික පියාණන්ය! යේසුස් ක්‍රිස්තුස්වහන්සේගේ නැවත පිහිටුවන ලද ශුභාරංචිය පිළිබඳ පණිවිඩය තිරය දෙපස සිටින—උන්වහන්සේගේ සෑම දරුවෙකුම—ඇසීම උන්වහන්සේට අවශ්‍යය.

ගිවිසුම් මාර්ගය යනු—එම ඇදහිය නොහැකි තරම් හෙසෙඩ්, දයානුකම්පිත සැලකිල්ල සහ එකිනෙකා වෙත ළඟාවිය හැකි ප්‍රේමයේ මාවතකි. එම ප්‍රේමය විමුක්ති සහගත සහ උසස් කරන බව ලෙස දැනෙන හැඟීමකි. ඔබ අත්විඳින ලොකුම ප්‍රීතිය වන්නේ, ඔබ දෙවියන්වහන්සේ සමඟ සහ උන්වහන්සේගේ සියලු දරුවන් සමඟ ප්‍රේමයෙන් ගිලී සිටින විට දැනෙන හැඟීමයි.

ඕනෑම කෙනෙකුට හෝ වෙනත් ඕනෑම දෙයකට වඩා දෙවියන්වහන්සේට ප්‍රේම කිරීම සැබෑ සාමය, සැනසීම, විශ්වාසය සහ ප්‍රීතිය ගෙන දෙන තත්වයකි.

ගිවිසුම් මාර්ගය යනු දෙවියන්වහන්සේ සමඟ අපගේ සම්බන්ධතාවයයි—උන්වහන්සේ සමඟ අපගේ හෙසෙඩ් සම්බන්ධතාවයයි. අපි දෙවියන්වහන්සේ සමඟ ගිවිසුමකට ඇතුල් වන විට, තම වචනය සැමවිටම රකින උන්වහන්සේ සමඟ අපි ගිවිසුමක් ඇති කර ගන්නෙමු. අපගේ තෝරාගැනීමේ නිදහසට බාධා නොකර, අපගේ ගිවිසුම තබා ගැනීමට අපට උපකාර කිරීමට උන්වහන්සේ, උන්වහන්සේට කළ හැකි සෑම දෙයක්ම කරනු ඇත.

මොර්මොන්ගේ පොත ආරම්භ වන්නේත් අවසන් වන්නේත් මෙම සදාකාලික ගිවිසුම ගැන සඳහන් කරමිනි. එහි මාතෘකා පිටුවේ සිට මොර්මොන් සහ මොරෝනිගේ අවසාන සාක්ෂි දක්වා, මොර්මොන්ගේ පොත එම ගිවිසුම ගැන සඳහන් කරයි (බලන්න මොර්මොන් 5:20; 9:37). “මොර්මොන්ගේ පොතේ පැමිණීම ස්වාමින්වහන්සේ ඊශ්‍රායෙලය එක්රැස් කිරීමටත් ආබ්‍රහම්, ඊසාක්, සහ යාකොබ් සමඟ ඇති කරගත් ගිවිසුම් ඉටු කිරීමටත් ආරම්භ කර ඇති බවට මුළු ලෝකයටම ලබාදෙන සලකුණකි.”¹²

මගේ ආදරණීය සහෝදර සහෝදරියනි, සදාකාලික ගිවිසුමේ අලංකාරය සහ බලය පිළිබඳව ලෝකයට ඉගැන්වීමට පොළොවේ ඉතිහාසයේ මෙම තීරණාත්මක අවස්ථාවේදී අපව කැඳවා ඇත. අපගේ ස්වර්ගීය පියාණන්වහන්සේ මෙම උතුම් කාර්යය කිරීමට අප කෙරෙහි විශ්වාසය තබයි.