Wan Famli blong Ol Wol Magasin

Pikja

magasin

Stat long Jenuware 2021, Jos i stat blong pablisim trifala wol magasin, we oli: Fren (blong ol pikinini we oli gat 3–11 yia), Blong Ol Yut Oli Kam Strong (blong ol yut we oli gat 11–18 yia), mo Liahona (blong ol adalt). Ol magasin ia, oli tekem ples blong ol fofala fas magasin blong Jos, we tri long olgeta, oli bin stap pablisim nomo long Inglis.

Taem we oli bin mekem anaonsmen blong ol niufala magasin ia, Fas Presidensi i bin talem: “Mifala i wantem se evri memba long evri ples bae oli sabskraeb mo welkamem paoa ia blong holemtaet fet, long ol hat mo hom blong olgeta” (leta blong Fas Presidensi, 14 Ogis 2020).

Mifala i stap wokhad blong mekemsua se, i nomata se yu yu blong Slovenia, o yu blong Spen, Madagaska, o Masajusets, olgeta magasin ia oli blong yu. So, i nomata se yu toktok lanwis Koria, o Kiribas, o haos blong yu oli wokem long simen o bambu, sapos yu yu baptaes 80 yia i pas finis, i yestedei nomo, olgeta atikol ia, oli soemaot testemoni blong yu, eksperiens blong yu, mo haos blong fet blong yu. Hemia i wan long ol bigfala blesing we oli kamaot long ol wol magasin ia: oli mekem yumi joen wanples, mo oli mekem yumi tingbaot se yumi evriwan i pat blong wan wol Jos famli.

Taem yumi gat trifala wol magasin ia, bae i letem samples 97 pesen blong ol memba blong oli kasem wan pepa magasin evri manis, o evri tu manis. (Long taem bifo, !i gat wanfala magasin nomo long wan yia!) Jekem KAO pej ia blong kasem moa infomesen long wei we bae oli pablisim ol atikol blong ol magasin ia long ol defren lanwis.

Long Magasin koleksen insaed long Gospel Library, bambae yu luk wan skwea blong wanwan long ol trifala wol magasin ia, mo tu, bae yu luk wan skwea blong niufala magasin we oli pablisim onlaen nomo, we i blong Ol Yang Adalt, we oli singaotem YA long Wik. Yu save lanem moa abaot wanwan long ol pablikesen ia, long ples ia, insaed long seksen “Abaot Ol Magasin blong Jos.”