“Usa ka Pamilya sa Tibuok Kalibotan nga mga Magasin,” Nob. 2021.
Usa ka Pamilya sa Tibuok Kalibotan nga mga Magasin
Sugod sa Enero 2021, ang Simbahan nagsugod og pagpamantala og tulo ka tibuok kalibotan nga magasin: ang Higala (alang sa kabataan nga nag-edad og 3–11), Alang sa Kalig-on sa mga Kabatan-onan (alang sa kabatan-onan nga nag-edad og 11–18), ug ang Liahona (alang sa mga hamtong). Kini nga mga magasin nagpuli sa upat ka magasin sa Simbahan sa una, tulo niana gimantala sa Iningles lamang.
Sa dihang ilang gianunsyo kining bag-o nga mga magasin, ang Unang Kapangulohan mipahayag, “Among tinguha mao nga ang mga miyembro bisan asa mo-subscribe ug mohangop niining makapalig-on sa pagtuo nga impluwensiya nganha sa ilang mga kasingkasing ug mga panimalay” (sulat sa Unang Kapangulohan, Agosto 14, 2020).
Nagtrabaho kami og maayo aron makasiguro nga bisan naggikan man kamo sa Slovenia o Spain, Madagascar o Massachusetts, kini nga magasin alang kaninyo. Bisan ang inyong pinulongan Korean o Kiribati, masementado man inyong balay o kawayan, nabunyagan man kamo 80 na ka tuig ang milabay o kagahapon pa lang, kini nga mga artikulo nag-aninag sa inyong pagpamatuod, sa inyong kasinatian, ug sa hugot nga pagtuo sa inyong panimalay. Mao kanang usa sa dako nga mga panalangin niining tibuok kalibotan nga mga magasin: mohiusa kini kanato ug mopahinumdom kanato nga kitang tanan nahisakop sa usa ka tibuok kalibotan nga pamilya sa Simbahan.
Ang pag-angkon og tulo ka tibuok kalibotan nga mga magasin motugot og mga 97 ka porsyento sa mga miyembro sa pagdawat og giimprinta nga magasin matag bulan o matag duha ka bulan. (Sa miagi, ang ubang mga pinulongan nakadawat lamang og usa ka magasin sa usa ka tuig!) Tan-awa kini nga FAQ nga pahina alang sa dugang nga impormasiyon mahitungod sa unsa ka sagad mamantala ang sulod sa magasin sa nagkalainglaing pinulongan.
Diha sa koleksiyon sa Mga Magasin sa Gospel Library, makakita kamo og usa ka pundok alang sa matag usa sa tulo sa tibuok kalibotan nga mga magasin, ingon man usab usa ka pundok alang sa bag-o nga digital lamang nga pagmantala alang sa mga young adult nga gitawag og YA Matag Semana. Makakat-on kamo og dugang pa bahin niining mga pagmantala dinhi sa “Mahitungod sa Mga Magasin sa Simbahan” nga seksiyon.