Kev Hloov Siab Los Ntseeg Yog Peb lub Hom Phiaj

Lub hom phiaj ntawm tag nrho kev kawm thiab kev qhia txog txoj moo zoo yog kom peb hloov siab los ntseeg Leej Txiv Saum Ntuj Ceeb Tsheej thiab Yexus Khetos thiab pab peb hloov los ua neeg zoo li Nkawd. Yog li ntawd, thaum peb kawm txog txoj moo zoo, peb tsis nrhiav kev txawj ntse tshiab xwb; peb xav los ua “neeg tshiab” (2 Kauleethaus 5:17). Qhov no txhais hais tias peb tso siab rau Leej Txiv Saum Ntuj Ceeb Tsheej thiab Yexus Khetos kom pab peb hloov peb lub siab, peb tej kev xav, tej yam peb ua, hloov qhov uas peb yog neeg zoo li cas.

Tiam sis txoj kev kawm txog txoj moo zoo uas txhawb peb txoj kev ntseeg kom muaj zog thiab ua rau peb hloov siab los ntseeg tsis yog ib txoj kev uas peb muaj peev xwm ua tau ib me pliag xwb. Txoj kev kawm li no yeej tawm chav kawm mus nkag rau hauv peb lub siab thiab lub tsev. Yog xav ua li no, yus yuav tsum rau rau siab to taub thiab ua neej raws li txoj moo zoo. Yuav tsum muaj tus Vaj Ntsuj Plig Dawb Huv tshoov peb lub siab thiaj li yuav kawm txog txoj moo zoo txaus kom hloov siab los ntseeg tiag.

Tus Vaj Ntsuj Plig Dawb Huv coj peb mus rau qhov tseeb thiab ua tim khawv txog qhov tseeb ntawd (saib Yauhas 16:13). Nws ua rau peb txawj xav, pab peb to taub, thiab tshoov peb lub siab los ntawm Vajtswv tej kev tshwm sim, uas yog lub hauv paus ntawm txhua yam tseeb. Tus Vaj Ntsuj Plig Dawb Huv ua rau peb lub siab hloov ua dawb huv. Nws tshoov peb lub siab kom peb ua raws li qhov tseeb, thiab Nws ntxhi lus rau peb kom ua li no. Muaj tseeb tiag, “tus Vaj Ntsuj Plig Dawb Huv … yuav qhia txhua yam rau nej” (Yauhas 14:26).

Yog li ntawd, thaum peb kawm, qhia, thiab ua raws li txoj moo zoo, qhov tseem ceeb los peb yuav tsum nrhiav kom muaj tus Ntsuj Plig nrog nraim peb nyob ua ntej. Lub hom phiaj no los yuav tsum pab peb xaiv thiab coj peb tej kev xav thiab tej yam peb ua. Peb yuav tsum nrhiav qhov uas pab peb txais tau tus Ntsuj Plig thiab xyeej txhua yam uas ntiab lub hwj huam ntawd mus—vim peb paub tias yog peb yuav tsim nyog muaj tus Vaj Ntsuj Plig Dawb Huv nrog peb nyob, peb yeej yuav tsim nyog nrog Leej Txiv Saum Ntuj Ceeb Tsheej thiab Nws Leej Tub, Yexus Khetos, nyob.