Ia Saunia Mea Tatau Uma
Teuina o Meaai a le Aiga
© 2007 Puletaofia e le Intellectual Reserve, Inc.
Ua taofia aia tatau uma. Lolomi i le ISA
Faamaonia le faaPeretania: 3/07
Faamaonia le faaliliuga: 3/07
Savali mai le Au Peresitene Sili
Uso e ma Tuafafine Pele:
Na foafoaina e lo tatou Tama Faalelagi lenei lalolagi matagofie, faatasi ai ma mea ua tumu ai, mo lo tatou manuia ma lo tatou faaaogaina. O Lona faamoemoega o le saunia lea o mea tatou te manaomia a o tatou savavali ai i le faatuatua ma le usiusitai. Ua Ia poloai mai ma le alofa ia i tatou ina ia “saunia mea tatau uma” (tagai MFF 109:8) ina ia mafai ai ona tatou tausia i tatou lava ma o tatou tuaoi ma lagolago atu i epikopo a o latou tausia isi tagata pe afai e ono tulai mai ni faigata.
Matou te uunaia tagata o le Ekalesia i le lalolagi atoa ina ia saunia mo faigata o le olaga, e ala lea i le i ai o se sapalai masani o meaai ma vai ma sina tupe e teuina.
Matou te talosaga atu ina ia outou atamamai a o outou teuina ia meaai ma vai ma faaputuputu a outou tupe teu. Aua foi nei soona faia; mo se faataitaiga, e le o se faiga faautauta le nofo aitalafu ina ia teuina ai a outou meaai uma i le taimi e tasi. O le fuafuaina ma le faaeteete, e te mafaia ai i se taimi umi ona faavaeina se sapalai o meaai e teuina i le fale ma se vaega tupe faaleoleo.
Matou te iloa e i ai nisi o outou e le mafai ona maua ni punaoa tautupe po o se nofoaga e teu ai ni mea faapena. O nisi o outou e ono faasaina e le tulafono ona teuina se aofaiga tele o meaai. Matou te uunaia outou ina ia teuina se aofaiga tele e mafai pe a faatagaina ai.
Ia faamanuia outou e le Alii i a outou taumafaiga i le teuina o meaai i le fale.
O Le Au Peresitene Sili
O Faavae o Meaai e Teuina i le Fale
Sapalai e Tolu Masina
Ia faaputu se sapalai laitiiti o meaai lea ua avea o se vaega masani o a outou mea e ‘ai i aso taitasi. O se tasi auala e faia ai lenei mea o le faatauina lea o nai meaai faaopoopo i vaiaso taitasi ina ia faaputu ai se sapalai o meaai mo le vaiaso e tasi. Ona mafai lea ona e faaputuputuina malie lau sapalai seia oo ina lava mo se tolu masina. O nei meaai e tatau ona feliuai soo ina ia le faaleagaina ai.
Vai Inu
Ia teu ni vai inu mo tulaga e ono faaleagaina ai le suavai pe motusia foi.
Afai o loo sau sao le vai mai se punavai lelei o loo faamama ai muamua, ona leai lea o nisi faamama e manaomia; ae a leai, ia togafitia muamua le vai a o lei faaaogaina. Ia teu vai i totonu o ni koneteina malolosi, e le mama, ma e faigata ona ta’ei. Ia mafaufau i le faaaogaina o ni fagu pa’u e masani ona faaaogaina mo sua o fualaau aina po o vai suamalie.
Ia teu ese koneteina o vai mai vaega vevela ma le susulu sa’o i ai o le la.
Tupe Faaleoleo
Ia faavae se tupe faaleoleo e ala lea i le teuina o sina seleni i vaiaso taitasi ma faasolosolo ai lava ona faatupulaia i se aofaiga talafeagai (tagai i le taiala o le Ia Saunia Mea Tatau Uma: O Mea Tautupe a le Aiga).
Sapalai MO TAIMI UUMI
Mo manaoga mo taimi uumi, ma i nofoaga e faatagaina ai, ia faasolosolo malie lava ona faaputuputu se sapalai o meaai ia o le a umi se taimi e lelei ai ma e mafai ona e faaaogaina ina ia ola ai pea, e pei o saito, araisa paepae, ma pi.
O nei meaai e mafai ona lelei pea mo le 30 tausaga po o le sili atu pe a lelei ona fafao ma teu i se nofoaga mālū, ma mago. O se vaega o nei meaai e mafai ona feliuai i lau sapalai o le tolu masina.
“Ia outou faatulagaina; ia saunia mea tatau uma, ma faatuina se fale, o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale o le tulaga maopoopo atoatoa, o se fale o le Atua” (MFF 109:8).
Asiasi i le www.providentliving.org mo nisi faamatalaga e uiga i le teuina o meaai i le fale.