Para kadagiti Nagannak—Panangisagana kadagiti Annakyo para iti Tungpal Biag iti Dana ti Katulagan ti Dios

Insuro ni Nephi a “ti ruangan a pagserkan [tayo]” iti dana ti katulagan “ket panagbabawi ken panagbuniag babaen ti danum” (2 Nephi 31:17). Dagiti panagkagumaanyo a tumulong kadagiti annakyo nga agsagana para iti panagbuniag ken kumpirmasion ket mabalinda nga ipaddak ti sakada a sititibker iti dayta a dana. Mangrugi dagitoy a panagkagumaan iti panangisuro maipapan iti pammati ken ni Jesucristo ken panagbabawi. Iramanda pay ti panangisuro maipapan iti no kasano a pabaruentayo dagiti katulagantayo iti panagbuniag babaen ti pannakiranudtayo iti sakramento iti tunggal lawas.

Adtoy ti sumagmamano a resources a makatulong kenka: 2 Nephi 31; special issue ti magasin a Friend maipapan iti panagbuniag; Gospel Topics, “Baptism,” Gospel Library.

• Tunggal adda padasmo a mangpapigsa iti pammatim iti Nailangitan nga Ama ken ni Jesucristo, ibinglaymo daytoy iti anakmo. Tulongam a makaawat a ti pammati ket maysa a banag a mabalin a dumakkel ken pumigpigsa iti unos ti panagbiag. Ania dagiti sumagmamano a banag a mabalin nga aramiden ti anakmo tapno mapatanor ti napigpigsa a pammati ken ni Cristo sakbay a mabuniagan?

• No di umisu ti pili ti anakmo, agsao a siraragsak maipapan iti sagut a panagbabawi. Ket no agaramidka iti biddut a pili, ibinglaymo ti rag-o a dumteng no agbabawika. Paneknekan a gapu ta nagsagaba ken natay ni Jesucristo gapu kadagiti basoltayo, inikkannatayo iti pannakabalin nga agbalbaliw. No agkiddaw ti anakmo iti pammakawan, siwayawaya ken siraragsak a pakawanem.

• Ibagam iti anakmo ti maipapan iti panagbuniagmo. Ipakitam dagiti ladawan ken ibinglay dagiti lagip. Isaritam maipapan iti no kasano ti nariknam, no kasano a dagiti katulagam iti panagbuniag ket nakatulong kenka a mangam-ammo a nasaysayaat ken ni Jesucristo, ken no kasano nga agtultuloyda a mangbendision iti biagmo. Allukoyen ti anakmo nga agdamag kadagiti saludsod.

• No adda panagbuniag iti pamiliam wenno iti wardmo, itugotmo ti anakmo tapno kitaenna daytoy. Pagsaritaanyo maipapan iti nakita ken nariknayo iti anakmo. No mabalin, makisaritaka iti tao a mabuniagan ken agsaludsodka a kas iti sumaganad: “Kasano nga inaramidmo daytoy a pangngeddeng? Kasano a nagsaganaka?”

• Tunggal madlawmo nga ar-aramiden ti anakmo ti maysa a banag nga inkarina nga aramidenna, ikkam iti napudno a pammadayaw. Ilawlawag a ti panangtungpal kadagiti panagkumit ket mangtulong kadatayo nga agsagana nga agtungpal kadagiti katulagan nga aramidentayo no mabuniagantayo. Ania ti ikaritayo iti Dios no mabuniagantayo? Ania ti ikarina kadatayo? (kitaen iti Mosiah 18:8–10, 13).

• No adda sagrado a padasmo ken ti anakmo nga agpada (kas iti simbaan, bayat ti panagbasa kadagiti nasantuan a kasuratan, wenno bayat ti panagserbi iti maysa a tao), ibagam kenkuana ti maipapan kadagiti naespirituan a rikna wenno impresion nga adda kenka. Awisem ti anakmo a mangibinglay no kasano ti riknana. Kitaen dagiti nadumaduma a wagas a mabalin a makisarita ti Espiritu kadagiti tao, agraman dagiti wagas a pannakisaritana kenka a personal. Tulongam ti anakmo a mangbigbig kadagiti kanito a mapadpadasanna ti impluensia ti Espiritu Santo.

• Aggigiddan a buyaen ti sumagmamano kadagiti video iti Gospel Library collection a napauluan iti “Hear Him!” Pagsasaritaan maipapan kadagiti nadumaduma a wagas a pannakangngeg dagiti katulongan ti Apo iti timekna. Awisem ti anakmo a mangidrowing iti ladawan wenno agaramid iti video maipapan iti no kasano a mangngegna ti timek ti Mangisalakan.

• Saritaen no kasano a nangbendision kenka ti panagbalin a miembro ti Ti Simbaan ni Jesucristo dagiti Santo iti Ud-udina nga Aldaw. Kasano a nakaasidegka iti Nailangitan nga Ama ken ni Jesucristo bayat ti panagserbim kadagiti dadduma ken kas iti panagserbi kenka dagiti dadduma? Tulongam ti anakmo a mangpanunot kadagiti wagas tapno agserbi ken mangpapigsa kadagiti dadduma kas miembro ti Simbaan.

• Aramidem ti sakramento a sagrado ken naragsak a pasamak iti pamiliam. Tulongam ti anakmo a mangiplano kadagiti wagas a mangipamaysa ken ni Jesucristo bayat ti sakramento. Kasano nga ipakitatayto a sagrado kadatayo ti sakramento?

• Adu nga isyu ti magasin a Friend ti mangiraman kadagiti artikulo, estoria, ken aktibidad a tumulong kadagiti ubbing nga agsagana para iti panagbuniag ken kumpirmasion. Bay-an a pilien ti anakmo ti sumagmamano a basaen ken magustuanna a kaduam. (Kitaen met iti collection “Preparing for Baptism” iti benneg dagiti ubbing iti Gospel Library.)

  Ladawan

  ubing a lalaki a mabumbuniagan

Ti priesthood isu ti turay ken bileg ti Dios a pangbendisionanna kadagiti annakna. Adda ditoy daga ti priesthood ti Dios ita iti Ti Simbaan ni Jesucristo dagiti Santo iti Ud-udina nga Aldaw. Amin a miembro ti Simbaan a mangsalimetmet kadagiti katulaganda—agraman dagiti ubbing—ket naparaburan iti bileg ti priesthood ti Dios kadagiti pagtaenganda a mangpapigsa iti bagbagida ken kadagiti pamiliada (kitaen iti General Handbook: Serving in The Church of Jesus Christ of Latter-day Saints, 3.5, Gospel Library). Daytoy a bileg ti tumulongto kadagiti miembro iti panangaramid iti trabaho ti Dios iti pannakaisalakan ken pannakaitan-ok iti bukodda a biag ken dagiti pamiliada (kitaen iti General Handbook, 2.2).

Umawattayo kadagiti ordinansa babaen ti turay ti priesthood. No agserbi dagiti lallaki ken babbai kadagiti takem wenno calling iti Simbaan, aramidenda dayta babaen ti turay ti priesthood, iti babaen ti panangiturong dagidiay agig-iggem kadagiti tulbek ti priesthood. Amin nga annak ti Nailangitan nga Ama—dagiti annakna a lallaki ken babbai —ket mabendisionanto bayat ti nasaysayaat a pannakaawatda iti priesthood.

Tapno masursuro ti ad-adu pay maipapan iti priesthood, kitaen iti Russell M. Nelson, “Spiritual Treasures,” Liahona, Nob. 2019, 76–79; Russell M. Nelson, “The Price of Priesthood Power,” Liahona, Mayo 2016, 66–69; “Priesthood Principles,” kapitulo 3 iti General Handbook.

• Aramidem dagiti ordinansa ti priesthood a naan-anay a paset ti biag ti pamiliam. Kas pagarigan, tulongam ti anakmo nga agsagana iti naespirituan para iti sakramento iti tunggal lawas. Paregtaem ti anakmo nga agsapul kadagiti bendision ti priesthood no masakit wenno kasapulanna ti liwliwa wenno panangiturong Aramidem nga ugali ti mangilawlawag kadagiti wagas a pangbendisionan ti Apo ti pamiliam babaen ti bileg ti priesthood.

• Bayat ti aggigiddan a panagbasayo kadagiti nasantuan a kasuratan, kitaenyo dagiti gundaway a pagsasaritaan no kasano a bendisionan ti Dios dagiti tao babaen iti bilegna. Iburaymo dagiti padasmo idi pinaraburannaka ti Dios babaen iti priesthoodna. Para kadagiti pagarigan dagiti bendision nga awatentayo manipud iti Dios babaen iti priesthood, kitaen iti General Handbook, 3.23.5.

• Ammuem ti linia ti priesthood ti turay ti maysa a tao iti pamiliam. (Makaawat dagiti Melchizedek Priesthood holder iti maysa a kopia ti liniada ti turay babaen ti panangipatulod iti email iti LineofAuthority@ChurchofJesusChrist.org; kitaen met iti “Request a Priesthood Line of Authority” iti Help Center iti ChurchofJesusChrist.org.) Saritaem no apay a napateg a maammuan a naggapu ti turay ti priesthood ken ni Jesucristo a mismo. Apay nga ibinglayna daytoy kadatayo?

• Isurom iti anakmo a kalpasan ti panagbuniag, mabalinna ti umawat iti bileg ti priesthood babaen ti panagtungpalna iti katulagan ti panagbuniag. Aggigiddan nga irebyu ti mensahe ni President Russell M. Nelson “Spiritual Treasures” (Liahona, Nob. 2019, 76–79). Ibagam iti anakmo no kasano nga inyeg dagiti ordinansa ti priesthood ti bileg ti Dios iti biagmo. Para iti listaan ti sumagmamano a wagas a pannakabendisiontayo babaen iti bileg ti priesthood, kitaen iti General Handbook,3.5.

• Paglilinnawagan ti saludsod nga “Ania ti kaasping ti maysa a katulongan ti Apo?” Aggigiddan a basaen ti Doktrina ken Katulagan 121: 36–42, ket agsapul kadagiti sungbat. Tunggal madlawmo ti anakmo (wenno sabali pay) a mangyaplikar iti maysa kadagiti pagbatayan wenno kababalin kadagitoy a bersikulo, ilawlawagmo daytoy.

• No agus-usarka wenno ti anakmo kadagiti tulbek a manglukat iti maysa a ruangan wenno mangpaandar iti maysa a kotse, maaddaanka iti kanito a mangidilig kadagita a tulbek kadagiti tulbek nga iggem dagiti lider ti priesthood. Para iti depinision dagiti tulbek ti priesthood, kitaen iti General Handbook, 3.4.1). Ania ti “luktan” wenno “rugian” dagiti tulbek ti priesthood para kadatayo? Kitaen met iti Gary E. Stevenson, “Where Are the Keys and Authority of the Priesthood?,” Liahona, Mayo 2016, 29–32; “Where Are the Keys?” (video), Gospel Library.

• No nai-set apartka para iti maysa a calling, awisem ti anakmo a mangimatang, no mabalin. Bay-am a makita ti anakmo nga ipatpatungpalmo ti callingmo. Mabalin nga agsapulka pay kadagiti maitutop a wagas a matulongannaka. Iladawam no kasano a mariknam ti bileg ti Apo iti callingmo.

Dagiti templo ti paset ti plano ti Nailangitan nga Ama para kadagiti annakna. Kadagiti templo, mangaramidtayo kadagiti sagrado a katulagan iti Nailangitan nga Ama bayat ti pannakipasettayo kadagiti sagrado nga ordinansa, nga amin dagitoy ket mangitudo ken ni Jesucristo. Nangipaay ti Nailangitan nga Ama iti wagas para kadagiti amin nga annakna a mangaramid kadagiti katulagan ken makipaset kadagiti ordinansa, agraman dagiti saan a nakaawat kadagitoy iti daytoy a biag. Iti rugi ti tawen nga agtawen iti ubing iti 12, umdasen ti tawen ti anakmo tapno mabuniagan ken makumpirmaan iti templo para kadagiti pimmusay a kapuonan.

• Dumar-ayka a masansan iti templo no ipalubos dagiti kasasaadmo. Kasaritam ti anakmo no apay a mapmapanka ken no kasano a tulongannaka ti templo a makarikna a nasingsingedka iti Nailangitan nga Ama ken ni Jesucristo.

• Irebyu ken paglilinnawagan dagiti saludsod iti temple recommend a sangkamaysa. Kasaritam ti anakmo maipapan iti no ania ti mapasamak iti maysa nga interbyu iti temple recommend. Ibinglaymo no apay a napateg kenka ti kaadda ti maysa a temple recommend.

• Aggigiddan a basaen ti Malakias 4:6. Pagsaritaan no kasano a maiturong dagiti pusoyo kadagiti kapuonanyo. Ammuem ti ad-adu pay maipapan kadagiti kapuonanyo babaen ti aggigiddan a panangsukisok iti pakasaritaan ti pamiliayo iti FamilySearch.org. Sapulem dagiti kapuonan a kasapulan a mabuniagan ken makumpirmaan. Matulongannaka ti consultant iti temple and family history iti ward.

• Aggigiddan nga irebyu ti sumagmamano kadagiti resources iti koleksion a napauluan iti “Temple” iti benneg dagiti ubbing iti Gospel Library. (Kitaen met iti “Preparing Your Child for Temple Baptisms and Confirmations” iti ChurchofJesusChrist.org.)

Ti maysa a patriarchal blessing ket mabalin a pagtaudan ti pannarabay, liwliwa, ken inspirasion. Naglaon daytoy iti personal a balakad manipud iti Nailangitan nga Ama kadatayo ken tumulong kadatayo a makaawat iti agnanayon a pakabigbigan ken panggeptayo. Tulongam ti anakmo nga agsagana nga umawat iti patriarchal blessing babaen ti panangisuro kenkuana iti kaipapanan ken sagrado a kasasaad dagiti bendision ti patriarka.

Tapno masursuro ti ad-adu pay, kitaen iti Gospel Topics, “Patriarchal Blessings,” Gospel Library.

• Ibinglaymo iti anakmo ti padasmo nga umawat iti maysa a patriarchal blessing. Mabalinmo nga ibinglay dagiti banag a kas iti no kasano a nagsaganaka nga umawat iti daytoy, no kasano a nakatulong kenka nga umas-asideg iti Dios, ken no kasano nga usarem ti bendision iti biagmo. Mabalinmo pay nga awisen ti anakmo a makisarita kadagiti dadduma a miembro ti pamilia a nakaawat kadagiti patriarchal blessingda.

• Maaddaan iti panawen a mangrebyu nga aggigiddan iti sumagmamano kadagiti resources iti Gospel Topics, “Patriarchal Blessings.” Tapno maammuan ti maipapan iti proseso ti panangawat iti maysa a patriarchal blessing, kitaen iti General Handbook, 18.17.

• No adda dagiti kapuonam a nakaawat kadagiti patriarchal blessing, mabalin a makaparegta ti panangbasa iti sumagmamano kadagitoy a kadua ti anakmo. Tapno agkiddaw iti bendision dagiti kapuonanyo a natayen, ag-log in iti ChurchofJesusChrist.org, iklik ti account icon iti top right corner ti screen, ket pilien ti “Patriarchal Blessing.”

• Kalpasan a nakaawat ti anakmo iti maysa a patriarchal blessing, awisem ti asino man a miembro ti pamilia a nakaimatang tapno mangisurat kadagiti riknada ken mangibinglay kadagitoy iti anakmo.

Kayat ti Dios nga ipaayan, wenno bendisionan, dagiti amin nga annakna iti “bileg nga aggapu iti ngato” (Doktrina ken Katulagan 95:8). Mapantayo iti templo tapno maminsan laeng nga awatentayo ti bukodtayo nga endowment, ngem dagiti katulagan nga aramidentayo iti Dios ken ti naespirituan a bileg nga itedna kadatayo a kas paset ti endowment ket mabalin a mangbendision kadatayo iti inaldaw a panagbiagtayo.

• I-display ti ladawan ti maysa a templo iti pagtaenganyo. Ibagam iti anakmo maipapan kadagiti rikna a mapadasam iti templo. Masansan a pagsaritaanyo ti maipapan iti ayatyo iti Apo ken iti balayna ken dagiti katulagan nga inaramidyo sadiay.

• Aggigiddan nga agsukisok iti temples.ChurchofJesusChrist.org. Basaen nga aggiddan dagiti artikulo kas iti “About the Temple Endowment” ken “Prepare for the House of the Lord.” Bay-am nga agdamag ti anakmo iti ania man a saludsodna maipapan iti templo. Para iti panangiwanwan maipapan iti no ania ti mabalinyo a pagsasaritaan iti ruar ti templo, kitaen iti mensahe ni Elder David A. Bednar “Prepared to Obtain Every Needful Thing” (Ensign wenno Liahona, Mayo 2019, 101–4; kitaen nangnangruna iti benneg a napauluan iti “Home-Centered and Church-Supported Learning and Temple Preparation”).

• Bayat ti pannakipasetyo iti anakmo wenno panangsaksi kadagiti dadduma nga ordinansa (kas iti sakramento wenno maysa a bendision ti pannakaagas), maaddaanka iti kanito a mangilawlawag iti simbolismo a nairaman iti ordinansa. Ania ti ibagi dagiti simbolo? Kasano a mangipaneknekda ken ni Jesucristo? Makatulong daytoy iti anakmo nga agsagana a mangutob iti simboliko a kaipapanan dagiti ordinansa iti templo, a mangipaneknek pay ken ni Jesucristo.

• Tulongam ti anakmo a mangpaliiw no kasano a tungtungpalenna ti katulagan ti panagbuniag a nailadawan iti Mosiah 18:8–10, 13. Tulongam pay ti anakmo a mangpaliiw no kasano a bembendisionan ti Apo isuna. Mangbangon iti panagtalek ti anakmo iti kabaelanna a mangtungpal kadagiti katulagan.

• Agsaritaka a sipapanayag ken masansan maipapan iti no kasano a mangiwanwan dagiti katulagam iti templo kadagiti pilim ken tumulong kenka a dumur-as nga as-asideg ken ni Jesucristo. Mabalinmo nga usaren ti General Handbook, 27.2, tapno mangrebyu kadagiti katulagan nga aramidentayo iti templo.

Insuro ni Elder David A. Bednar: “Ti maysa a kapatgan a banag a mabalinmo nga aramiden tapno agsagana para iti awag nga agserbi ket ti agbalin a missionary a nabayag sakbay a mapanka iti mission. … Saan a mapan iti mision ti isyu; imbes ketdi, ti isyu ket panagbalin a missionary ken panagserbi iti unos ti panagbiagtayo nga addaan iti amin a puso, kabaelan, panunot, ken pigsatayo. … Agsagsaganakayo para iti tungpal biag nga aramid a panagmisionario” (“Becoming a Missionary,” Liahona, Nob. 2005, 45–46). Ti adda a padas ti anakmo a panagbalin a missionary ket mangbendisionto kenkuana iti agnanayon, saan laeng a para iti panawen a mabalin nga agserbi a kas maysa a missionary.

Tapno masursuro ti ad-adu pay, kitaen iti Russell M. Nelson, “Preaching the Gospel of Peace,” Liahona, Mayo 2022, 6–7; M. Russell Ballard, “Missionary Service Blessed My Life Forever,” Liahona, Mayo 2022, 8–10; Missionary Preparation: Adjusting to Missionary Life, Gospel Library.

• Imodelo no kasano nga ibinglay ti ebanghelio kadagiti gagangay a wagas. Kanayon nga agbalinka nga alerto kadagiti gundaway a mangibinglay iti dadduma kadagiti riknam maipapan iti Nailangitan nga Ama ken ti Mangisalakan ken dagiti bendision nga awatem kas maysa a miembro ti Simbaanna. Awisem dagiti dadduma a makikadua iti pamiliam kadagiti aktibidad a mainaig iti Simbaan ken pamilia.

• Agsapulka kadagiti gundaway para iti pamiliam a makilangen kadagiti missionary. Awisem ida a mangisuro kadagiti gagayyemmo, wenno idiayam a palubosam ida a mangisuro kadagiti tao iti pagtaenganyo. Saludsodem kadagiti missionary maipapan kadagiti padasda ken no kasano a ti panagserbi kas missionary ket tumultulong kadakuada nga umas-asideg ken ni Jesucristo. Saludsodem pay no ania ti inaramidda (wenno tinarigagayanda nga inaramid koma) tapno agsaganada nga agbalin a missionary.

• No nagserbika iti maysa a mision, agsaritaka a sipapanayag ken masansan maipapan kadagiti padasmo. Wenno awisem dagiti gagayyem wenno miembro ti pamilia a nagserbi kadagiti mision tapno agsaritada maipapan iti misionda. Mabalinmo pay nga isarita dagiti wagas a nakaibinglayam iti ebanghelio kadagiti dadduma iti unos ti panagbiagmo. Tulongam ti anakmo a mangpanunot kadagiti wagas a mabalinna nga ibinglay ti ebanghelio.

• Ikkam ti anakmo kadagiti gundaway a mangisuro kadagiti pagbatayan ti pamiliam iti ebanghelio. Mabalin met nga agsanay ti anakmo a mangibinglay kadagiti pammatina iti dadduma. Kas pagarigan, mabalinmo nga ilawlawag dagiti saludsod a kas iti “Kasano a yam-ammotayo ti Libro ni Mormon iti maysa a tao a di pay pulos nakangngeg iti daytoy?” wenno “Kasano nga iladawantayo ti panagkasapulan iti Mangisalakan iti maysa a tao a saan a Kristiano?”

• Tulongam ti anakmo nga agbalin a komportable a makisarita kadagiti tao. Ania dagiti sumagmamano a nasayaat a wagas a pangirugian iti maysa a panagsasarita? Paregtaem ti anakmo a mangsursuro no kasano a dumngeg iti ibagbaga dagiti dadduma, maawatanna no ania ti adda iti pusoda, ken mangibinglay kadagiti kinapudno iti ebanghelio a mabalin a mangbendision iti biagda.

• Agsapulka kadagiti gundaway para iti anakmo a mangammo maipapan kadagiti dadduma a kultura ken pammati. Tulongam a mangbigbig ken mangraem kadagiti nasayaat ken pudno a pagbatayan kadagiti pammati dagiti dadduma.

Iti templo, mabalin nga agkallaysa ti asawa a lalaki ken asawa a babai para iti kinaagnanayon. Mapasamak daytoy iti maysa nga ordinansa a maawagan iti pannakailantip. Uray no mabalin nga adayo pay a tawen daytoy nga ordinansa para iti anakmo a lalaki wenno babai, dagiti babassit, simple, agtultuloy a banag nga aggigiddan nga aramidenyo kabayatan dagita a tawen ket makatulong kenkuana nga agsagana para iti daytoy nakaskasdaaw a bendision.

• Aggiddan a basaen ti “The Family: A Proclamation to the World” iti Gospel Library. Ania ti isuro daytoy a waragawag maipapan iti kinaragsak iti biag ti pamilia ken maipapan kadagiti naballigian a panagasawa? Kaduam ti anakmo, mangpilika iti maysa kadagiti pagbatayan a nailista iti waragawag tapno adalen. Mabalinmo a kitaen dagiti nasantuan a kasuratan a mainaig iti dayta a pagbatayan iti Pangiwanwan iti Nasantuan a Kasuratan. Mabalinmo pay ti mangituding kadagiti panggep a tun-oyen tapno naan-anay a mayaplikar dayta a pagbatayan iti pamiliam. Bayat ti panangaramidmo kadaiti panggepmo a tun-oyen, pagsasaritaan a sangkamaysa ti epekto ti panagbiag iti dayta a pagbatayan iti biag ti pamilia.

• Kaduam ti anakmo, basaen ti mensahe ni Presidente Dieter F. Uchtdorf nga “In Praise of Those Who Save” (Ensign wenno Liahona, Mayo 2016, 77–80). No makadanonka iti benneg a napauluan iti “A Society of Disposables, mabalinmo a sapulen dagiti banag iti pagtaenganyo a maibelleng ken dadduma pay a banag a saan. Pagsasaritaan no kasano a naiduma ti panangtratoyo kadagiti banag no kayatyo nga agpaut dagitoy. Ania ti isingasing daytoy maipapan iti no kasano ti nasken a panangtratotayo kadagiti relasion iti panagasawa ken pamilia? Ania pay ti masursurotayo manipud iti mensahe ni Presidente Uchtdorf maipapan iti no kasano a matulongannatayo ti Mangisalakan a mangbangon kadagiti natibker a panagasawa ken pamilia?

• No naasawaankayo, sipapannayagkayo iti anakyo maipapan kadagiti banag a mariknam a nasayaat ti ar-aramidenyo kas agassawa, dagiti banag a masursuroyo, ken dagiti wagas nga ikagkagumaanyo a pasayaaten. No nailantipka ken ti asawam iti templo, ipakitayo iti anakyo babaen ti pagwadan no kasano nga ikagkagumaanyo a tungpalen dagiti katulaganyo iti tunggal maysa ken iti Apo. Ibagayo iti anakyo no kasano nga ikagkagumaanyo a pagbalinen ti Nailangitan nga Ama ken ti Mangisalakan a sentro ti relasionyo ken no kasano a tultulongandakayo.

• No kasapulan a maaramid dagiti pangngeddeng ti pamilia, mangangay kadagiti konseho ti pamilia ken panaglilinnawag. Siguraduenyo a mangngeg ken maipatpateg ti amin nga opinion dagiti miembro ti pamilia. Usaren dagitoy a panaglilinnawag kas gundaway a mangmodelo iti nasalun-at a komunikasion ken kinaimbag kadagiti relasion ti pamilia, uray no saan nga agpapada ti panangkita ti tunggal maysa kadagiti banag.

• No adda saan a panagtutunos wenno panagsusuppiat iti pamilia, ipakitam ti kinaanus ken pannakipagrikna. Tulongam ti anakmo a makakita no kasano a makatulong kenkuana ti panangtaming iti panagsusuppiat kadagiti wagas a kas ken ni Cristo nga agsagana para iti naragsak a panagasawa. Aggigiddan a basaen ti Doktrina ken Katulagan 121:41–42, ket pagsaritaan no kasano a mayaplikar dagiti pagbatayan kadagitoy a bersikulo iti panagasawa.