Alang sa Kalig-on sa mga Kabatan-onan: Usa ka Bag-o nga Magasin alang sa Kabatan-onan

Ang Alang sa Kalig-on sa mga Kabatan-onan usa ka magasin alang lamang sa kabatan-onan. Matag isyu adunay makapabayaw nga espirituhanon nga mga mensahe gikan sa Apostoles ug sa uban nga mga lider sa Simbahan, mga pagpamatuod ug mga kasinatian gikan sa kabatan-onan sa tibuok kalibotan, makalingaw nga mga kalihokan, ug daghan pa. Sa matag pahina makakaplag kamo og kadasig ug kalig-on nga makatabang kaninyo nga makakita og hingpit nga kalipay isip disipulo ni Jesukristo.

Daghang artikulo ug kalihokan diha sa Alang sa Kalig-on sa mga Kabatan-onan mosuporta sa inyong pagtuon sa mga kasulatan nga nalakip sa Dali, Sunod Kanako matag bulan. Kini makatabang sa paglig-on sa inyong personal ug pamilya nga pagtuon sa kasulatan ug mokonektar kaninyo sa kabatan-onan sa tibuok kalibotan samtang magtuon sila sa samang mga kasulatan. Bisan asa pa kamo nagpuyo, kini nga mga artikulo modasig ug motabang kaninyo samtang maningkamot kamo sa pagpuyo sa unsay inyong nakat-onan gikan sa mga kasulatan matag adlaw!

Ang For the Strength of Youth gustong makadungog gikan kaninyo! Makatabang kamo sa pagpanalangin sa kabatan-onan sa tibuok kalibotan. Ang pagpakigbahin sa inyong mga kasinatian sa pagpuyo sa ebanghelyo makapadasig sa kabatan-onan bisan asa.

Palihog padad-i kami sa bisan unsa sa mosunod:

• usa ka higayon sa dihang matinud-anon kamong nagsunod sa ebanghelyo, bisan kon kini lisod

• usa ka hagit diin ang inyong hugot nga pagtuo sa Dios mitabang kaninyo sa paglahutay

• mga panghunahuna kon unsa ang kasinatian nga mamahimong usa ka miyembro sa Simbahan ni Jesukristo sa dapit diin kamo nagpuyo

• usa ka kasinatian diin ang usa ka tawo mipakita kaninyo sa tinuod nga Kristohanon nga gugma

• ang inyong pagpamatuod

• bisan unsa nga istorya nga nagpakita kon giunsa sa ebanghelyo pagpanalangin ang inyong kinabuhi

Ipadala ang inyong sugilanon ngadto sa ftsoy@ChurchofJesusChrist.org.

Nasayod ba kamo nga ang Alang sa Kalig-on sa mga Kabatan-onan nagmantala og dugang pa nga hilisgotan kay sa unsay inyong makit-an sa naimprinta nga magasin? Kining digital nga mga pakapin makita diha sa ChurchofJesusChrist.org o diha sa Gospel Library app.

Alang sa dugang pa nga makalingaw ug makapabayaw nga hilisgotan, sulayi ang Gospel Living app! Kini adunay feed nga puno sa mubo nga mga pasulit, mga video, mga tip sa pagtuon sa kasulatan, mga wallpaper, ug daghan pa.

Tan-awa sa “Mga Opsiyon nga Digital” alang sa dugang nga impormasyon sa digital nga hilisgotan alang sa kabatan-onan.