Ko e Kaumeʻá: Ko ha Makasini Fakaemāmani Lahi maʻá e Fānaú

ʻOku fakaafeʻi ʻe he makasini ko e Kaumeʻá ʻa e fānau ʻi he funga ʻo e māmaní ke nau muimui fakataha kia Sīsū. ʻOku ʻi he makasini takitaha ha ngaahi talanoa mei he folofolá, ngaahi pōpoaki angai mo e fānaú mei he kau palōfitá mo e kau taki kehe ʻo e Siasí, fanga kiʻi vaʻinga mo e ʻū peesi valivalí, mo e ngaahi talanoa ʻo ha fānau ʻi he funga ʻo e māmaní ʻoku nau tui ki he Fakamoʻuí. ʻOku ʻi he Kaumeʻá ha ngaahi fakamatala ʻoku longomoʻui mo langaki tui ʻa ia kuo liliu ki ha lea fakafonua ʻe 48.

ʻI he ngaahi konga ʻoku fakatautefito ki he fānau lalahi angé mo e fānau iiki angé, ʻoku ʻi he pulusinga takitaha foki ʻo e Kaumeʻá ha ngaahi fakakaukau ke fakafiefiaʻi ʻaki e efiafi fakafāmili ʻi ʻapí mo e ngaahi lesoni ʻo e Haʻu, ʻo Muimui ʻIate Aú maʻá e fānau ʻo e toʻu kotoa pē. ʻE lava ke tokoniʻi ʻe he Kaumeʻá ʻa e fānaú mo e ngaahi fāmilí ke fakalakalaka ʻenau poto ʻi he laukongá mo e tohinimá, fakatupulaki ʻenau mahino ki he ongoongoleleí, mo nau ofi ange ai kia Sīsū Kalaisi, ko honau Fakamoʻuí mo e kaumeʻá.

ʻE lava ke fakaʻaongaʻi ʻe he mātuʻá mo e kau faiakó ʻa e makasiní ke tokoni ki hono akoʻi ʻo e folofolá fakataha mo e Haʻu, ʻo Muimui ʻIate Aú. ʻE lava ke fakaʻaongaʻi e ngaahi talanoa ʻi he makasiní ko ha meʻangāue fakafaiako mālohi pea mo kamataʻi ha fepōtalanoaʻaki mo e fānaú fekauʻaki mo ʻenau ngaahi aʻusiá.

ʻOku pulusi ʻe he Kaumeʻá ʻa e ngaahi vitiō ʻo e talanoa fakafolofolá mo e ngaahi vitiō hiva-fakataha ki he fānaú, kae pehē foki ki ha ngaahi talanoa fakaʻilekitulōnika pē fekauʻaki mo ha ngaahi kaveinga pelepelengesi. Kumi ha ngaahi vitiō mo ha ngaahi meʻa lahi ange ʻi he ChurchofJesusChrist.org pe ʻi he polokalama Gospel Library.

ʻOku fie fanongo ʻa e Kaumeʻá ki he fānau ʻi he funga ʻo e māmaní! Kātaki ʻo ʻomi ha niʻihi ʻo e ngaahi meʻá ni:

• ko ha taimi kuó ke fili ai ki he totonú, neongo ʻene faingataʻá,

• ko ha tā pe tā fakatātā ʻo koe ʻi he temipalé

• ko ha taimi naʻá ke tokoniʻi ai ha taha

• ko ha sīpinga ʻo e founga ʻoku fakaʻaongaʻi ai ʻe homou fāmilí ʻa e Kaumeʻá (fakakau ai ha laʻitā!)

• ko ha tā fakatātā pe ʻaati kehe ʻoku hā ai ha talanoa ʻi he folofolá, ko Sīsū, ko e ngaahi temipalé, mo e alā meʻa pehē.

ʻAve hoʻo talanoá pe ʻātí ki he friend@ChurchofJesusChrist.org.