Paano ko bala istoryahon ang akon bata parte sa positibo nga sekswalidad?

Madamo nga ginikanan ang nagapang-alang-alang ukon nahuya mag-istorya sa ila kabataan parte sa sekswalidad, ukon nahadlok sila nga ang pag-istorya sa ila mga kabataan parte sa sekswalidad magapukaw sang ila sekswal nga pangginawi. Ang matuod, kon indi mo pag-istoryahon ang imo kabataan parte sa sekswalidad, matun-an nila ini sa iban. Paagi sa paghiwat sang regular nga mga paghinambalanay sa imo mga kabataan parte sa importante nga mga topiko pareho sang sekswalidad, mabuligan mo sila nga maintiendihan nga hilway ka nila nga mapalapitan.

Kalabanan sa mga kabataan natural nga mausisaon, kag gusto nila maintiendihan ang natural, hinatag-sang-Dios nga mga balatyagon nga ila nagakaeksperiyensyahan. Sarang mo ihanda ang imo kaugalingon sa pagpakighambal sa imo mga kabataan parte sa sekswalidad paagi sa pagpanumdom kon daw ano ka sang pareho ka sa ila edad. Ano ang pila sa mga balatyagon ang imo naeksperiyensyahan? Ano ang imo mga panghunahuna, mga pamangkot, ukon mga kabalaka sadto? Sa diin ka nangita sang impormasyon? Ano ang gusto mo kuntani nga nabatian ukon gintudlo sa imo?

OK lang kon daw indi ka sigurado kon paano dalhon ining mga paghinambalanay. Magamit mo ang imo kahuyang agud pabaskugon ang imo relasyon sa imo kabataan. Mabatyagan sang mga kabataan ang imo pagpalangga kon tampad ka kag sinsero sa pagpakighambal sa ila, bisan pa nga mahimo nga ginasaw-ahan ka.

Para pabakuron ang bukas nga komunikasyon, sarang mo:

• Sugdan samtang bata pa ang imo kabataan paagi sa pagtawag sang mga parte sa lawas sa husto sini nga mga ngalan. Ginatudloan sini ang mga kabataan parte sa ila mga lawas kag ginapahamtang sa ila ang lenggwahe nga kinahanglan nila agud mangin positibo kag may ihibalo.

• Ipahibalo sa imo kabataan nga sarang sila mamangkot sa imo sang bisan ano nga mga pamangkot, kag dayon tinguhai nga indi magsala-sala ukon malisyahan ang ila mga pamangkot ukon pagpanugid. Magkalipay nga nagaistorya sila sa imo, ipakita sa ila ang imo pagpalangga kag suporta, kag himoa ang tanan agud magpadayon nga bukas ang komunikasyon.

• Likawi ang paggamit sang mga paanggid para sa sekswalidad. Kinahanglan sang kabataan ang impormasyon nga ginapahayag sa maathag kag tampad nga paagi. Halimbawa, pila ka mga lamharon ang nagaistorya nga may mga leksyon nga ang pagsupak sa layi sang kaputli ginkumparar sa nausang na nga bubble gum ukon pagkaon nga ginpasa-pasa sa mga tawo sa sulod sang kuwarto kag gani wala na sing may nanamian sini. Bisan pa nga maayo ang intensyon, ining klase sang mga paanggid masami nga nagahatag sang kahadlok parte sa sekswalidad ukon mga balatyagon sang manubo ukon indi na mabalik nga pagtahod-sa-kaugalingon.

• Maghiwat sang mga leksyon sa home evening parte sa mga topiko angot sa sekswalidad kag tugoti ang imo kabataan nga magtudlo kon pamatyag nila handa na sila. Ang mga topiko mahimo nga maglakip sang paghinupang, panan-aw sa kaugalingon, kag ang positibo nga mga aspeto sang sekswalidad.

• Hambali kon paano nga normal ang pagbatyag sang sekswal nga mga balatyagon kag ang sekswal nga pagkapukaw. Indi kinahanglan sang mga kabatan nga aktohan inang mga balatyagon kag pamatyagan pero sarang nila ini nga hangpon. Nagakahulugan ini sang pagmulalong sang sekswal nga mga balatyagon pero indi ang negatibo nga paghusga sang mga ini. Ang pagtuon nagapakita nga ang pagmulalong makabulig sa mga kabataan nga maghimo sang mas maayo nga mga pagpili nga nagabagay sa ila mga panindugan kag mga tuyo lab-uton.

• Tinguhai nga indi magpakalain ukon magpangakig kon ang mga kabataan nagatandog sang ila kaugalingon ukon ang mga lamharon nagaako nga naga-masturbate. Ang reaksyon sang mga ginikanan sa sining mga gawi nagaapekto sa panan-aw sang mga kabataan kag mga lamharon sa ila kaugalingon kag sa ila sekswalidad.

• Tudloi ang imo kabataan sang rason sa likod sang mga talaksan may kaangtanan sa mga relasyon kag sekswalidad. Samtang ginatudlo mo ining mga talaksan kag mga rason kon ngaa importante ang mga ini, tandai nga importante nga himuon ini nga wala nagapabatyag sang pagpakahuya ukon kahadlok.¹