Chan ru tin’aatinaq rik’ineb’ lin kok’al chirix li xtusulal li wank rik’in junaq ixq malaj junaq winq?

Naab’aleb’ li na’b’ej yuwa’b’ej ink’a’ neke’raj aatinak rik’ineb’ lix kok’al chirix li wank rik’in junaq winq malaj junaq ixq, malaj neke’xxuwa naq li aatinak a’an tixk’eheb’ lix kok’al chi paalto’k rik’in li na’leb’ a’an. A’b’anan, wi ink’a’ tat-aatinaq rik’ineb’ laa kok’al chirix li wank rik’in junaq winq malaj junaq ixq, sa’ jalan chik na’ajej te’xtzol. Wi taawaatinaheb’ chi kok’ aj xsa’ laa kok’al chirixeb’ li na’leb’ aajel ru, jo’ xtusulal li wank rik’in junaq winq malaj junaq ixq, naru nakatenq’aheb’ chixtawb’al ru naq junelik neke’ru chi aatinak aawik’in.

Lix k’ihaleb’ li kok’al neke’raj tzolok, ut neke’raj xtawb’aleb’ ru li eek’ahom k’eeb’ileb’ re xb’aan li Dios. Naru nakakawresi aawib’ chi aatinak rik’ineb’ laa kok’al chirix li xtusulal wank rik’in junaq winq malaj junaq ixq rik’in xk’oxlankil chan chaq ru laa k’a’uxl laa’at naq toj ka’ch’inat chaq jo’eb’ a’an. K’a’ru li xaweek’a? K’a’ruheb’ chaq laa k’oxlahom, laa patz’om, ut laa k’a’uxl? B’ar xasik’ aana’leb’? K’a’ raj ru xawab’i malaj xatzol?

Maak’a’ naxye wi ink’a’ nakanaw chan ru aatinak chirix a’in. Naru nakawoksi lix anchalil aach’ool re xkawob’resinkil laa wanjik rik’ineb’ laa kok’al. Eb’ li kok’al te’reek’a laa rahom wi maak’a’ aab’alaq’ sa’ aatinak rik’ineb’, us ta maare ch’a’aj b’ayaq chawu.

Re naq sa’ xyaalalil tex’aatinaq, laa’at naru:

• Naq toj kok’eb’ laa kok’al, oksi tz’aqal xk’ab’a’eb’ lix cha’alil lix junxaqalileb’. A’in naxk’e xna’leb’eb’ li kok’al chirix lix tib’eleb’ ut chirixeb’ li aatin tento te’xnaw re naq kawaqeb’ rib’ ut wanqeb’ xna’leb’.

• K’eheb’ chixnaw laa kok’al naq naru te’xpatz’ yalaq k’a’ru aawe, ut maak’eheb’ chi xutaanak xb’aan li neke’xpatz’ malaj li neke’xye aawe. Sahaq aach’ool naq yookeb’ chi aatinak aawik’in, raheb’ ut tenq’aheb’, ut yal aaq’e chi aatinak rajlal rik’ineb’.

• Maawoksi li jaljookil ru aatin re xch’olob’ankil li xtusulal ru wank rik’in junaq winq malaj junaq ixq. Eb’ li kok’al tento te’tzoloq chi ch’olch’o ru. Qayehaq, wankeb’ li saaj li neke’xye naq xk’utman chiruheb’ naq xq’etb’al li chaq’rab’ re li saq ru ch’oolejil a’an chanchan li toq’ ak toq’ininb’il malaj tzakemq li neke’xnumsi chirib’ileb’ rib’ li kristiaan, ut ink’a’ chik atawanb’il ru. Us ta ink’a’ ki’ajman, li jaljookil ru aatin a’an maare naxk’eheb’ chi xuwak chirix li xtusulal li wank rik’in junaq winq malaj junaq ixq malaj chireek’ankil naq maak’a’eb’ aj-e xb’aan lix b’aanuhomeb’.

• Aatinanqex sa’ junkab’al chirix li xtusulal li wank rik’in junaq winq malaj junaq ixq ut kanab’eb’ laa kok’al chixk’utb’al li na’leb’ naq yo’on wanqeb’. Naru tex-aatinaq chirix li ok sa’ ch’ajomal, li junxaqalil, ut li k’a’ru chaab’il chirix li xtusulal li wank rik’in junaq winq malaj junaq ixq.

• Ye reheb’ naq ak re naq wankeb’ li qeek’ahom chirix li wank rik’in junaq winq malaj junaq ixq. Eb’ li kok’al ink’a’ tento te’xb’aanu li neke’reek’a, a’ut us naq te’xnaw k’a’ruheb’. A’in ajwi’ xk’eeb’al reetal li eek’ahom a’an ut ink’a’ xraqb’al aatin chirixeb’. Li tz’ilok-ix naxk’ut naq wi eb’ li kok’al neke’xk’e reetal li neke’reek’a, naru te’xsik’ ru chi us li na’leb’ li jayalinb’il rik’ineb’ lix paab’ahom ut lix meta.

• Matjosq’o’ naq eb’ li kok’al neke’xch’e’ xtz’ejwaleb’ malaj li saaj neke’xye naq xe’xyal li masturbacion. Lix sumehomeb’ li na’b’ej yuwa’b’ej nim xwankil rik’in k’a’ru te’reek’a li kok’al ut li saaj ut k’a’ru te’reek’a chirix li xtusulal li wank rik’in junaq winq malaj junaq ixq.

• K’ut chiruheb’ laa kok’al k’a’ut naq naqapaab’eb’ li na’leb’ a’in chirix li xtusulal li wank rik’in junaq winq malaj junaq ixq. Naq yookat chixk’utb’al li na’leb’ a’in ut k’a’ut naq neke’qapaab’ ut k’a’ut naq aajeleb’ ru, chijultiko’q aawe naq taab’aanu chi maak’a’ li xutaanank chi moko li xib’esink.¹