“ເຮົາຈະລົມກັບລູກຂອງເຮົາກ່ຽວກັບເລື່ອງເພດທີ່ດີຕໍ່ສຸຂະພາບໄດ້ແນວໃດ?” ການຊ່ວຍເຫລືອສຳລັບພໍ່ແມ່ (2021)
“ເຮົາຈະລົມກັບລູກຂອງເຮົາກ່ຽວກັບເລື່ອງເພດທີ່ດີຕໍ່ສຸຂະພາບໄດ້ແນວໃດ?” ການຊ່ວຍເຫລືອສຳລັບພໍ່ແມ່
ເຮົາຈະລົມກັບລູກຂອງເຮົາກ່ຽວກັບເລື່ອງເພດທີ່ດີຕໍ່ສຸຂະພາບໄດ້ແນວໃດ?
ພໍ່ແມ່ຫລາຍຄົນອາດຮູ້ສຶກລັງເລ ຫລື ອາຍທີ່ຈະລົມກັບລູກໆຂອງຕົນກ່ຽວກັບເລື່ອງເພດ, ຫລື ເຂົາເຈົ້າຢ້ານວ່າການລົມກັບລູກໆຂອງຕົນກ່ຽວກັບເລື່ອງເພດຈະປຸກພຶດຕິກຳທາງເພດຂອງພວກເຂົາ. ຄວາມຈິງກໍຄື, ຖ້າພວກທ່ານບໍ່ລົມກັບລູກໆຂອງພວກທ່ານກ່ຽວກັບເລື່ອງເພດ, ເຂົາກໍຈະຮຽນຮູ້ກ່ຽວກັບເລື່ອງນີ້ຈາກແຫລ່ງອື່ນ. ໂດຍການສົນທະນາກັບລູກໆຂອງພວກທ່ານເປັນປະຈຳກ່ຽວກັບຫົວຂໍ້ສຳຄັນເຊັ່ນເລື່ອງເພດທີ່ດີຕໍ່ສຸຂະພາບ, ພວກທ່ານຈະຊ່ວຍໃຫ້ພວກເຂົາເຂົ້າໃຈວ່າ ພວກທ່ານເປັນຄົນທີ່ພວກເຂົາສາມາດເວົ້າລົມນຳກ່ຽວກັບເລື່ອງນີ້ໄດ້.
ເດັກນ້ອຍສ່ວນຫລາຍຈະມີຄວາມຢາກຮູ້ຢາກເຫັນໂດຍທຳມະຊາດ, ແລະ ພວກເຂົາຢາກເຂົ້າໃຈຄວາມຮູ້ສຶກທຳມະຊາດທີ່ພວກເຂົາມີຢູ່, ຊຶ່ງພຣະເຈົ້າໄດ້ປະທານໃຫ້ພວກເຂົາ. ພວກທ່ານສາມາດກຽມຕົວເອງໃຫ້ພ້ອມທີ່ຈະລົມກັບລູກໆຂອງພວກທ່ານກ່ຽວກັບເລື່ອງເພດ ໂດຍຈື່ວ່າພວກທ່ານເຄີຍເປັນແນວໃດຕອນທີ່ອາຍຸສ່ຳພວກເຂົາ. ພວກທ່ານເຄີຍປະສົບກັບຄວາມຮູ້ສຶກຢ່າງໃດແດ່? ພວກທ່ານໄດ້ມີຄວາມຄິດ, ຄຳຖາມ, ຫລື ຄວາມກັງວົນຫຍັງແດ່? ພວກທ່ານໄດ້ຊອກຫາຂໍ້ມູນຈາກໃສ? ພວກທ່ານຫວັງວ່າຕອນນັ້ນພວກທ່ານຈະໄດ້ຍິນ ຫລື ໄດ້ຮັບການສິດສອນຫຍັງແດ່?
ຖ້າພວກທ່ານຮູ້ສຶກບໍ່ແນ່ໃຈກ່ຽວກັບວິທີທີ່ຈະສົນທະນາໃຫ້ດີທີ່ສຸດກ່ຽວກັບເລື່ອງນີ້ ກໍບໍ່ເປັນຫຍັງ. ພວກທ່ານສາມາດໃຊ້ຈຸດອ່ອນຂອງພວກທ່ານເພື່ອສ້າງຄວາມສຳພັນກັບລູກໆຂອງພວກທ່ານໄດ້. ລູກໆສາມາດຮູ້ສຶກເຖິງຄວາມຮັກຂອງພວກທ່ານໄດ້ ເມື່ອພວກທ່ານສຸດຈະຫຼິດ ແລະ ຈິງໃຈໃນການສື່ສານກັບພວກເຂົາ, ເຖິງແມ່ນວ່າພວກທ່ານຈະຮູ້ສຶກບໍ່ສະບາຍໃຈກໍຕາມ.
ເພື່ອສົ່ງເສີມການສື່ສານແບບເປີດໃຈ, ພວກທ່ານສາມາດ:
-
ເລີ່ມເມື່ອລູກໆຂອງພວກທ່ານຍັງນ້ອຍຢູ່ ໂດຍການເອີ້ນສ່ວນຕ່າງໆຂອງຮ່າງກາຍຕາມຊື່ທີ່ຖືກຕ້ອງຂອງມັນ. ສິ່ງນີ້ຈະຊ່ວຍສອນເດັກນ້ອຍກ່ຽວກັບຮ່າງກາຍຂອງພວກເຂົາ ແລະ ໃຫ້ພາສາທີ່ພວກເຂົາຕ້ອງການ ເພື່ອທີ່ຈະມີສຸຂະພາບທີ່ດີ ແລະ ມີຄວາມຮູ້.
-
ໃຫ້ລູກໆຂອງພວກທ່ານຮູ້ວ່າ ພວກເຂົາສາມາດຖາມພວກທ່ານກ່ຽວກັບເລື່ອງໃດກໍໄດ້, ແລ້ວພະຍາຍາມທີ່ຈະບໍ່ສະແດງທ່າທີເກີນຈິງ ຫລື ເຮັດໃຫ້ພວກເຂົາອັບອາຍກັບຄຳຖາມ ຫລື ຄຳສາລະພາບຂອງພວກເຂົາ. ສະຫລອງທີ່ພວກເຂົາໄດ້ມາລົມກັບພວກທ່ານ: ສະແດງຄວາມຮັກ ແລະ ສະໜັບສະໜູນພວກເຂົາ, ແລະ ເຮັດສຸດຄວາມສາມາດຂອງພວກທ່ານເພື່ອສື່ສານຕໍ່ໄປ.
-
ຫລີກລ້ຽງການໃຊ້ຄຳປຽບທຽບກ່ຽວກັບເລື່ອງເພດ. ເດັກນ້ອຍຕ້ອງການຂໍ້ມູນທີ່ຖືກນຳສະເໜີຢ່າງຊັດເຈນ ແລະ ກົງໄປກົງມາ. ຍົກຕົວຢ່າງ, ຊາວໜຸ່ມບາງຄົນເລົ່າເຖິງບົດຮຽນທີ່ປຽບທຽບການຝ່າຝືນກົດພົມມະຈັນ ໃສ່ກັບການຫຍ້ຳຊິງງົ້ມ ຫລື ການກິນອາຫານທີ່ເປັນເງື່ອນຂອງຄົນອື່ນ ທີ່ຖືກສົ່ງຕໍ່ຈາກຄົນໜຶ່ງໄປຫາອີກຄົນໜຶ່ງຢູ່ທົ່ວຫ້ອງ ດັ່ງນັ້ນ ມັນຈຶ່ງບໍ່ເປັນສິ່ງທີ່ໜ້າເພິ່ງປາດຖະໜາອີກຕໍ່ໄປ. ເຖິງແມ່ນວ່າຈະມີເຈດຕະນາດີກໍຕາມ, ແຕ່ການປຽບທຽບເຊັ່ນນີ້ ມັກຈະສົ່ງເສີມຄວາມຢ້ານກົວກ່ຽວກັບເລື່ອງເພດ ຫລື ຄວາມຮູ້ສຶກວ່າຄຸນຄ່າຂອງຕົນເອງຕ່ຳ ຫລື ບໍ່ສາມາດແກ້ໄຂໄດ້.
-
ຈັດບົດຮຽນການສັງສັນໃນຕອນແລງກ່ຽວກັບຫົວຂໍ້ຕ່າງໆທີ່ກ່ຽວຂ້ອງກັບເລື່ອງເພດ ແລະ ໃຫ້ລູກໆຂອງພວກທ່ານສິດສອນເມື່ອພວກເຂົາຮູ້ສຶກພ້ອມ. ຫົວຂໍ້ຕ່າງໆອາດລວມທັງ ໄລຍະຕົ້ນໄວລຸ້ນ, ລັກສະນະຂອງຮ່າງກາຍ, ແລະ ແງ່ບວກເລື່ອງເພດ.
-
ໂອ້ລົມວ່າ ການມີຄວາມຮູ້ສຶກທາງເພດ ແລະ ການກະຕຸ້ນທາງເພດເປັນເລື່ອງທຳມະດາຢ່າງໃດ. ເດັກນ້ອຍບໍ່ຈຳເປັນຕ້ອງເຮັດຕາມຄວາມຮູ້ສຶກເຫລົ່ານັ້ນ ແຕ່ສາມາດຮັບຮູ້ມັນໄດ້. ນີ້ໝາຍເຖິງ ການສັງເກດຄວາມຮູ້ສຶກທາງເພດ ແຕ່ບໍ່ຕັດສິນມັນໃນທາງລົບ. ການວິໄຈພົບວ່າ ການຝຶກຄວາມຮັບຮູ້ສາມາດຊ່ວຍໃຫ້ເດັກນ້ອຍຕັດສິນໃຈໄດ້ດີກວ່າ ຊຶ່ງສອດຄ່ອງກັບຄຸນຄ່າ ແລະ ເປົ້າໝາຍຂອງພວກເຂົາ.
-
ພະຍາຍາມທີ່ຈະບໍ່ເຮັດທ່າທີແບບລັງກຽດ ຫລື ໃຈຮ້າຍ ເມື່ອເດັກນ້ອຍມີສ່ວນໃນການສຳພັດຕົວເອງ ຫລື ເມື່ອລູກຄົນໜຸ່ມຍອມຮັບກ່ຽວກັບການສຳເລັດຄວາມໃຄ່ດ້ວຍຕົນເອງ. ວິທີທີ່ພໍ່ແມ່ຮັບມືກັບພຶດຕິກຳເຫລົ່ານີ້ ຈະສົ່ງຜົນກະທົບຕໍ່ການທີ່ເດັກນ້ອຍ ແລະ ລູກຄົນໜຸ່ມຮູ້ສຶກກ່ຽວກັບຕົນເອງ ແລະ ເລື່ອງເພດຂອງພວກເຂົາ.
-
ສອນລູກໆຂອງພວກທ່ານກ່ຽວກັບເຫດຜົນທີ່ຢູ່ເບື້ອງຫລັງມາດຕະຖານຕ່າງໆທີ່ກ່ຽວຂ້ອງກັບຄວາມສຳພັນ ແລະ ເລື່ອງເພດ. ເມື່ອພວກທ່ານສິດສອນມາດຕະຖານເຫລົ່ານີ້ ແລະ ເຫດຜົນວ່າເປັນຫຍັງມັນຈຶ່ງມີຄຸນຄ່າ, ໃຫ້ຈື່ຈຳໄວ້ວ່າ ເປັນສິ່ງສຳຄັນທີ່ຈະເຮັດເຊັ່ນນັ້ນ ໂດຍທີ່ບໍ່ເຮັດໃຫ້ມີຄວາມອັບອາຍ ຫລື ຄວາມຢ້ານກົວ.1