Katakin, Ekkatak, im Kōjerbal Ennaan ko jān Kweilo̧k eo Eļap

Kajjitōk ko ilaļ renaaj jipan̄ rūkaki ro ilo aer kōpooj n̄an kōjerbal ennaan ko ilo kweilo̧k eo eļap n̄an katakin. N̄e aikuj, rūkaki ro rej ko̧o̧njeļ ippān būreejtōnji eo an doulul eo an elder ro ak Doulul eo an Kōrā ro ilo aer kejokļo̧kjeņ kōn kajjitōk kein.

• Etke būreejtōnji eo an doulul eo an elder ro im Doulul eo an Kōrā ro raar kāālet ennaan in n̄an ekōnono kake? Ta eo rej kōjatdikdik membōr ro renaaj jeļā im kōm̧m̧ane ālkin ekōnono kōn ennaan in?

• Ta eo rikōnono eo ekōņaan bwe membōr ro ren meļeļe? Ta katak ko ilo gospel in liin ak ļein ej kajjieon̄ in katakin? Ekōjkan an pedped in katakin kein jerbal n̄an doulul eo elder ro ak Doulul eo an Kōrā ro?

• Eoon ta ko rikōnono in ej kōjerbale n̄an jipan̄ ennaan in an? Ebar wōr ke eoon ko membōr ro remaron̄ riiti me enaaj kam̧wūlaļļo̧k meļeļe eo aer? (Kwomaron̄ lo jet ilo endnote ko an ennaan eo ak ilo Unin Tōl an Jeje Ko Rekwōjarjar [scriptures.ChurchofJesusChrist.org].)

• Ta kajjitōk ko kwomaron̄ kajjitōk me renaaj jipan̄ membōr ro kejeo̧kļo̧kjeņ im kōjerbali katak ko ilo ennaan eo? Ta kajjitōk ko renaaj jipan̄ er lo jetjet eo an katak kein ilo mour ko aer, ilo baam̧le ko aer, im ilo jerbal eo an Irooj?

• Ta eo imaron̄ kōm̧m̧ane n̄an karuwaineneiktok Jetōb eo n̄an kweilo̧k eo ad? Ta eo imaron̄ kōjerbal n̄an kōdepakpakļo̧k iien ekōnono eo, ekoba bwebwenato ko, waanjon̄ak ko, al ko, ak pija? Ta eo rikōnono eo ekar kōm̧m̧an n̄an jipan̄ membōr ro meļeļe ennaan eo an?

• Rikōnono eo ekar ke kōm̧m̧an jabdewōt wāween karuwainene ko? Elmen aō jipan̄ membōr ro en̄jake ikdeleel n̄an kōm̧m̧ani karuwainene ko?

Elōn̄ wāween ko rūkaki ro remaron̄ jipan̄ membōr ro ekkatak jān im kōjerbal ennaan ko an kweilo̧k eo eļap. Erkein rej jejjo waanjon̄ak ko; rūkaki ro emaron̄ wōr ļōmņak ko jet me enaaj em̧m̧anļo̧k aer jerbal ilo doulul eo an elder ro ak Doulul eo an Kōrā ro aer.

• Kōjerbal m̧ool kein n̄an mour ko ad. Kajjitōk ippān membōr ro n̄an lale ennaan ko im kappukot m̧ool ko me remaron̄ jipan̄ er kōtōprak jerbal eo an Anij kar leļo̧k n̄an er āinwōt kajjojo armej ak āinwōt juon doulul eo an elder ro im Doulul eo an Kōrā ro. N̄an waanjon̄ak, ta eo jej ekkatak me emaron̄ jipan̄ kōj āinwōt rijerbal in karejar ro? āinwōt ro jinen im jemān? āinwōt membōr mijenede ro? Ekōjkan an ennaan in kareel ļōmņak ko, en̄jake ko, im jerbal ko ad?

• Ekōnono ilo kūrup ko. Ajije membōr ro ilo kūrup jidik ko, im jitōn̄ kajjojo kūrup ko n̄an riiti im ekōnono kōn kajjojo ennaan ko reoktak ilo kweilo̧k eo. Innām kajjitōk ippān kajjojo kumi n̄an kwaļo̧k juon m̧ool raar loe im ekōjkan an jerbal n̄an er. Ak kwomaron̄ ejaaki kumi ko kōn membōr ro me raar ekkatak jekjōn ko roktak an ennaan eo im kōm̧m̧an bwe ren kwaļo̧k ippān ro jet ta eo raar loe.

• Kappukot uwaak ko n̄an kajjitōk ko. Karuwaineneik membōr ro n̄an uwaaki kajjitōk ko āinwōt in kōn ennaan eo jān kweilo̧k eo: Ta katak ko rem̧ool ilo gospel in jekar loe ilo ennaan in? Elmen ad kōjerbal m̧ool kein? Ta karuwainene ko im kōjeraam̧m̧an em̧ōj kallim̧ur kaki me kar litok? Ta eo ennaan in ej katakin kōj kōn jerbal ko Anij me ekōņaan bwe jān kōm̧m̧ani? Ak ejaake jejjo kajjitōk ko am̧ make me rej kōketak membōr ro n̄an kam̧wūlaļ aer ļōmņak kōn ennaan eo ak kōjerbal m̧ool ko ej katakin. Kōtļo̧k bwe membōr ro ren kāālet juon iaan kajjitōk kein im pukōt uwaak ko ilo ennaan eo.

• Kwaļo̧k ennaan ko jān naan eo. Karuwaineneik membōr ro n̄an kwaļo̧k ennaan ko jān naan in kweilo̧k eo me ej im̧we er n̄an kakūrm̧ool eddo ko aer ilo jerbal in lo̧mo̧o̧r eo im mour ijo eutiej tata. Kōketak er n̄an ļōmņak kōn ekōjkan aer maron̄ kwaļo̧k ennaan kein n̄an kōjeraam̧m̧an juon, ekoba ro kwoj iakwe er im armej ro kwoj jerbal in karejar n̄an er.

• Kwaļo̧k juon kein katak. M̧oktata, karuwainene jejjo membōr ro n̄an boktok juon men jān m̧weo me remaron̄ katakin kōn ennaan ko an kweilo̧k eo. Ilo iien kweilo̧k eo, kajjitōk ippān membōr ro n̄an kōmeļeļeik ekōjkan an unin kōnono ko iookļo̧k ennaan eo im ekōjkan an ennaan eo jerbal n̄an mour ko aer.

• Kapooj juon katak n̄an katakin ilo mōko. Kajjitōk ippān membōr ro bwe ren jerbal ilo ruo kumi n̄an kōpooj juon katak n̄an nokon in jota an baam̧le pedped wōt ioon ennaan jān kweilo̧k in. Remaron̄ uwaaki kajjitōk ko āinwōt kein: Ekōjkan ad maron̄ kōm̧m̧an bwe ennaan eo en jetjet n̄an baam̧le ko ad? Ekōjkan ad maron̄ kwaļo̧k ennaan in ippān armej ro jej jerbal in karejar n̄an er?

• Kwaļo̧k en̄jake ko. Riit ippān doon jet iaan naan ko jān ennaan ko ilo kweilo̧k eo. Kajjitōk ippān membōr ro n̄an kwaļo̧k jet waanjon̄ak ko ilo jeje ko rekwojarjar im jān mour ko aer me ej kwaļo̧k im rie katak ko rej katakin ilo naan kein.

• Pukot juon ennaan ekadu. Kajjitōk ippān membōr ro n̄an etale ennaan eo an kweilo̧k eo pukōt ennaan ko me eļap meleļeier n̄an er. Kajjitōk ippāer bwe ren kwaļo̧k ennaan eo ekadu im ta eo rekar katak jān e. Kajjitōk ippāer n̄an kwaļo̧k ekōjkan an katak kein jipan̄ er kōttōprak jerbal eo an Irooj.

N̄an meļeļe ko reļļapļo̧k kōn ekōjkan ekkatak im katakin jān ennaan ko ak kweilo̧k eo eļap, lale “Ideas for Learning and Teaching from General Conference.” (Jiped “Ideas for Study” ium̧win “General Conference” ilo the Gospel Library.)