“Liahona,” Jen. 2021.
Liahona
Stap Poenem Yumi Evriwan I Go long Jisas Kraes
Insaed long Buk blong Momon, yumi stap ridim se Lod i bin rere long wan Liahona blong helpem Lihae mo famli blong hem blong gotru long wokbaot blong olgeta. Hem i bin wan “kampas, we bae i soemaot long olgeta wan stret rod we i go long promes graon” (Alma 37:44). Anda long daereksen blong ol profet we oli stap laef, magasin ia, Liahona, blong tedei, i wan gaed we i go wetem yumi long wokbaot blong yumi, mo i poenem yumi long wei we i go long Jisas Kraes, iven long medel blong strong win.
Wan Niu Liahona
Magasin ia, Liahona i blong ol bigman mo bigwoman, mo hem i haelaetem ol tijing mo ol seves blong ol Lida blong Jos, i serem ol atikol we oli save givim insperesen we i soem olsem wanem blong yusum ol prinsipol blong gospel, blong sapotem fasin blong lanem gospel insaed long hom we i senta, mo i givim ol niu wei blong lukluk gospel tru long ol topik blong Kam Folem Mi.
Ol Profet we Oli Stap Laef Oli Soem Rod
Insaed long wanwan namba, i gat wan niu orijinol atikol we wan memba blong Fas Presidensi o Kworom blong Olgeta Twelef Aposol i rere long hem. Ridim wanem ol profet mo ol aposol oli stap tijim tedei.
Ki Pipol we Oli Ridim
Magasin ia, Liahona, i givim sam tul we i save givim insperesen long evri adalt memba, we i tekem tu ol yang singgel adalt, ol yang adalt, ol niu memba, mo ol memba we oli raep long tingting, mo ol papa mo mama. Long ol yang adalt, Liahona i stap pablisim tu ol atikol we oli stap long YA long Wik, we i wan dijitol magasin blong ol yang adalt.
I Go Raon long Wol
Magasin ia, Liahona, i traehad blong blesem ol memba raon long ful wol. Magasin ia, oli stap pablisim long 23 lanwis evri manis, hemia long dijitol o onlaen, mo long pepa, mo i gat 25 moa lanwis we oli kasem evri tu manis, long dijitol mo long pepa. Oli stap jusum sam long ol ki mesej ia long dijitol blong oli serem long homples long 39 moa lanwis. Hemia i minim se, Liahona magasin ia, i stap blong ol memba oli save ridim long 87 lanwis evri manis.
Moa Dijitol Atikol
?Yu yu save se Liahona i stap pablisim moa samting bitim wanem we bae yu faenem long pepa magasin? Ol dijitol atikol ia, yu save faenem olgeta long liahona.ChurchofJesusChrist.org/study?lang=bis o insaed long Liahona insaed long Gospel Laebri ap.
Eria Spesifik Atikol
Ful Liahona oli transletem long 48 lanwis. Kolosap evri namba i gat ol atikol we i kam long ol lokol komiti blong ol wokman mo ol volontia we oli singaotem olgeta. Ol lokol atikol ia, insaed i gat ol mesej we oli kam long Eria Presidensi, ol atikol long saed blong ol lokol samting we oli bin hapen, ol stori mo ol testemoni we oli kam long ol lokol memba, mo sam moa. Long plante eria, hemia i stap insaed long dijitol Liahona blong evri manis insaed long Gospel Laebri.
Sendem Stori blong Yu i Kam long Mifala
Mifala long Liahona i wantem harem yufala. Yu save givim insperesen long ol memba raon long wol taem yu stap serem ol eksperiens blong yu wetem traehad blong yu blong stap laef folem gospel. Sendem ol atikol, ol aedia mo ol fidbak i go long Liahona online.
Pem sabskripsen Naoia
Blong gat moa infomesen long sabskraeb long Liahona, visitim online store mo jusum lanwis we yu wantem. Ol pej we i stret folem Eria blong yu, bae oli ademap otomatik hemia folem ples we yu stap long hem.
Not: I save tekem tri manis bifo sabskripsen blong yu i tekem ples.