“Liahona,” Sānuali 2021.
Liahona
Tataki Kotoa Kitautolu kia Sīsū Kalaisi
ʻI he Tohi ʻa Molomoná, ʻoku tau lau ai ʻa hono teuteuʻi ʻe he ʻEikí ʻa e Liahoná ke tokoni kia Līhai mo hono fāmilí ke fakalakalaka ʻi heʻenau fonongá. Ko ha “kāpasa, [ʻa ia te ne] tuhuʻi kiate kinautolu ha hala hangatonu ki he fonua ʻo e talaʻofá” (ʻAlamā 37:44). ʻI he malumalu ʻo e fakahinohino ʻa e kau palōfita moʻuí, ʻoku hoko ʻa e makasini Liahoná ʻi hotau kuongá ni ko ha fakahinohino ʻoku ʻalu fakataha mo kitautolu ʻi heʻetau fonongá mo fakahinohino ʻa e hala kia Sīsū Kalaisí, ʻo aʻu pē ki he uhouhonga ʻo e matangí.
Ko ha Liahona Foʻou
ʻOku fakamamafaʻi ʻe he makasini Liahona maʻá e kakai lalahí ʻa e ngaahi akonaki mo e ngāue ʻa e kau taki ʻo e Siasí, vahevahe ha ngaahi fakamatala fakalaumālie ʻoku nau fakahaaʻi e founga ke fakaʻaongaʻi ai e ngaahi tefitoʻi moʻoni ʻo e ongoongoleleí, poupouʻi hono ako ʻo e ongoongoleleí ʻoku fakatefito ʻi ʻapí, mo ʻomi ha ngaahi fakakaukau ki he ngaahi tefito ʻo e Haʻu, ʻo Muimui ʻIate Aú.
Ko e Fakahinohino mei he Kau Palōfita Moʻuí
ʻOku ʻoatu ʻi he makasini takitaha ha fakamatala foʻou mo totonu kuo teuteuʻi ʻe ha mēmipa ʻo e Kau Palesitenisī ʻUluakí pe Kōlomu ʻo e Kau ʻAposetolo ʻe Toko Hongofulu Mā Uá. Lau ʻa e meʻa ʻoku akoʻi ʻe he kau palōfitá mo e kau ʻaposetoló he ʻaho ní.
Kakai Mahuʻinga ʻOku Fanongo Maí
ʻOku ʻomi ʻe he Liahoná ha naunau ueʻi fakalaumālie ʻo e ongoongoleleí maʻá e kāingalotu lalahi kotoa pē, kau ai ʻa e fakamatala maʻá e kau taautaha lalahí, kakai lalahi kei talavoú, kau mēmipa foʻoú, kāingalotu matuʻotuʻá, mo e mātuʻá. Ki he kakai lalahi kei talavoú, ʻoku pulusi foki ʻe he Liahoná ha niʻihi ʻo e ngaahi fakamatala ʻoku maʻu ʻi he YA Fakauiké, ko ha makasini fakaʻilekitulōnika maʻá e kakai lalahi kei talavoú.
Tokoni Fakaemāmani Lahi
ʻOku feinga ʻa e Liahoná ke tāpuekina ʻa e kāingalotu ʻi he funga ʻo e māmaní. ʻOku pulusi ʻa e makasiní ʻi ha lea fakafonua ʻe 23 ʻi he māhina kotoa pē ʻi he founga fakaʻilekitulōniká mo e founga pākí pea ʻi ha ngaahi lea fakafonua kehe ʻe 25 ʻi he fakahili māhina kotoa pē, ʻi he founga fakaʻilekitulōnika mo founga pākí. ʻOku lava ke maʻu fakaʻilekitulōnika atu ha ngaahi pōpoaki mahuʻinga ke tufaki fakalotofonua ʻi ha ngaahi lea fakafonua kehe ʻe 39. ʻOku lava ke maʻu atu ʻe he kāingalotú ʻa e makasini Liahoná ʻi ha lea fakafonua ʻe 87 ʻi he māhina kotoa pē.
Ngaahi Fakamatala Fakaʻilekitulōnika Lahi Ange
Naʻá ke ʻiloʻi nai ʻoku pulusi ʻe he Liahoná ha meʻa lahi ange ʻi he meʻa te ke maʻu ʻi he makasini kuo pākí? ʻE lava ke maʻu ʻa e ngaahi fakalahi fakaʻilekitulōnika ko ʻení ʻi he liahona.ChurchofJesusChrist.org pe ʻi he Liahoná ʻi he polokalama Gospel Library.
Ngaahi Fakamatala Pau Fakaʻēliá
ʻOku liliu ʻa e Liahoná kakato ki ha lea fakafonua ʻe 48. ʻOku meimei ke kau ʻi he makasini kotoa pē ha ngaahi meʻa naʻe faʻu ʻe he kōmiti fakalotofonua ʻo e kau ngāué pe kau ngāue tokoni kuo uiuiʻi. ʻOku kau ʻi he ngaahi fakamatala fakalotofonua ko ʻení ha ngaahi pōpoaki mei he kau mēmipa ʻo e Kau Palesitenisī Fakaʻēliá, fakamatala fekauʻaki mo e meʻa fakalotofonua ʻoku hokó, ngaahi talanoa mo e fakamoʻoni mei he kāingalotu fakalotofonuá, mo ha ngaahi meʻa lahi ange. Ki he ngaahi ʻēlia lahi, ʻoku maʻu ʻa e fakamatalá ni ʻi he Liahona fakaʻilekitulōniká ʻi he māhina takitaha ʻi he Gospel Library.
ʻOmi Hoʻo Talanoá Kiate Kimautolu
ʻOku fie fanongo ʻa e Liahoná meiate koe. Te ke lava ʻo ueʻi fakalaumālie ʻa e kāingalotu ʻi he funga ʻo e māmaní ʻi hoʻo vahevahe hoʻo ngaahi aʻusia ʻi hono moʻui ʻaki ʻo e ongoongoleleí. ʻOmi hoʻo ngaahi fakamatalá, fakakaukaú mo e fakamatala tokoní ki he Liahona ʻi he ʻinitanetí.
Lēsisita he Taimí Ni
Ke maʻu ha fakamatala lahi ange ki hono totongi ʻo e Liahoná, hū ki he falekoloa ʻinitanetí pea fili ʻa e lea fakafonua ʻoku fie maʻú. ʻE ʻotomētiki pē hono fakakau atu e ngaahi peesi fakalotofonua pau fakaʻēliá ʻo fakatatau mo e feituʻu ʻokú ke ʻi aí.
Fakatokangaʻi ange: ʻE lava pē ke aʻu ʻo māhina ʻe tolu kae toki ola lelei ʻa e totongi makasiní.