Kuv yuav ua li cas kom muaj tus Vaj Ntsuj Plig Dawb Huv lub hwj chim hauv kuv lub neej thiab thaum kuv ua tub txib?
Tus Vaj Ntsuj Plig Dawb Huv ua li cas kom pab tib neeg hloov siab los ntseeg?
Kuv yuav ua li cas kom pab tib neeg uas peb qhia hnov tus Vaj Ntsuj Plig Dawb Huv lub hwj huam?
Kuv yuav ua li cas kom kuv tej lus thov Vajtswv muaj nqis ntxiv?
Kuv yuav ua li cas kom paub thaum tus Vaj Ntsuj Plig Dawb Huv tshoov kuv lub siab?
Nrhiav Kom Tau tus Vaj Ntsuj Plig Dawb Huv txoj Kev Coj
Lub txiaj ntsim Vaj Ntsuj Plig Dawb Huv yog ib lub txiaj ntsim zoo tshaj plaws uas Vajtswv tau muab rau Nws cov me nyuam. Yog ib qho tseem ceeb thaum koj ua cov tub txib txoj hauj lwm. Yuav tsum muaj tus Vaj Ntsuj Plig Dawb Huv lub hwj chim coj thiab muab kev tshwm sim rau koj thaum koj pab tib neeg ua kev cai raus dej, ua kev pom zoo, thiab hloov siab lo ntseeg.
Yuav tsum ua hauj lwm ntawm sab ntsuj plig kom muaj tus Vaj Ntsuj Plig Dawb Huv coj koj lub neej. Yuav tsum sib zog thov Vajtswv thiab kawm cov vaj lug kub txhua hnub Koj kuj yuav tsum ua raws li koj tej kev khi lus thiab coj raws li Vajtswv cov lus txib (saib Mauxiyas 18:8–10, 13). Yuav tsum tsim nyog txais lub cim nco txog txhua lub lim tiam (saib Lus Qhuab Qhia thiab Kev Khi Lus 20:77, 79).
Txhua hnub koj raug tej xwm txheej uas sib txawv. Tus Ntsuj Plig tej kev tshoov siab yuav pab koj paub ua li cas thiab hais li cas. Thaum koj nrhiav thiab ua raws li tej kev tshoov siab no, tus Vaj Ntsuj Plig Dawb Huv yuav pab koj txawj ua tej yam thiab pab lwm tus tshaj qhov uas koj ua tau koj tus kheej xwb. Nws yuav pab koj ua txhua yam thaum ua tub txib thiab thaum koj ua neej. (Saib 2 Nifais 32:2–5; Amas 17:3; Hilamas 5:17–19; Lus Qhuab Qhia thiab Kev Khi Lus 43:15–16; 84:85.)
Daim Duab
Thawj Tswj Hwm Russell M. Nelson
“Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv” (Russell M. Nelson, “Kev Tshwm Sim rau lub Koom Txoos, Kev Tshwm Sim rau Peb lub Neej,” Liahona, Tsib Hlis Ntuj 2018, 96).
Daim Duab
Txoj Kev Kaj thiab Qhov Tseeb, los ntawm Simon Dewey
Khetos txoj Kev Kaj
Twb muab Khetos txoj Kev Kaj “rau txhua tus neeg kom nws yuav paub qhov zoo thiab qhov phem” (Maulaunais 7:16; saib nqe 14–19; kuj saib Yauhas 1:9). Khetos txoj Kev Kaj yog txoj kev to taub, kev txawj ntse, thiab lub hwj huam uas muab dhau los ntawm Yexus Khetos. Lub hwj huam no yog ib yam uas yus txais ua ntej txais lub txiaj ntsim Vaj Ntsuj Plig Dawb Huv. Qhov no yuav coj tib neeg uas muaj siab xav kawm thiab ua raws li Yexus Khetos txoj moo zoo.
Tus Vaj Ntsuj Plig Dawb Huv
Tus Vaj Ntsuj Plig Dawb Huv Yog Neeg Li Cas
Tus Vaj Ntsuj Plig Dawb Huv yog tus thib peb hauv Pawg Vajtswv. Nws yog ib tug ntsuj plig thiab tsis muaj ib lub cev nqaij daim tawv (saib Lus Qhuab Qhia thiab Kev Khi Lus 130:22). Nws yog tus Nplij Siab, tus uas tus Cawm Seej cog lus tias yuav qhia Nws cov thwj tim txog txhua yam thiab ua rau lawv nco txog tej yam uas Yexus tau qhia (saib Yauhas 14:26).
Tus Vaj Ntsuj Plig Dawb Huv lub Hwj Chim
Zaj lus tim khawv uas los rau cov neeg uas xav paub qhov tseeb tiag ua ntej lawv ua kev cai raus dej yeej los ntawm tus Vaj Ntsuj Plig Dawb Huv lub hwj chim. Txhua tus neeg txais tau ib zaj lus tim khawv txog Yexus Khetos thiab Nws txoj moo zoo dhau los ntawm tus Vaj Ntsuj Plig Dawb Huv lub hwj chim. “Los ntawm tus Vaj Ntsuj Plig Dawb Huv lub hwj chim nej yuav paub qhov tseeb ntawm txhua yam” (Maulaunais 10:5).
Lub Txiaj Ntsim Vaj Ntsuj Plig Dawb Huv
Lub txiaj ntsim Vaj Ntsuj Plig Dawb Huv yog txoj cai kom muaj tus Vaj Ntsuj Plig Dawb Huv nrog nraim peb nyob yog tias peb tsim nyog. Peb txais tau lub txiaj ntsim Vaj Ntsuj Plig Dawb Huv tom qab peb ua kev cai raus dej. Twb muab rau peb thaum ua txoj kab ke ua kev pom zoo.
Tus Yaj Saub Joseph Smith twb hais tias, “Tus Vaj Ntsuj Plig Dawb Huv thiab lub txiaj ntsim Vaj Ntsuj Plig Dawb Huv yeej tsis zoo ib yam. Khaulenias tau txais tus Vaj Ntsuj Plig Dawb Huv ua ntej nws los ua kev cai raus dej, qhov uas yog Vajtswv lub hwj chim uas tau los qhia nws tias txoj Moo Zoo muaj tseeb, tiam sis nws txais tsis tau lub txiaj ntsim Vaj Ntsuj Plig Dawb Huv los mus txog thaum nws ua kev cai raus dej tas lawm” (Teachings of Presidents of the Church: Joseph Smith [2007], 97).
Peb hloov los ua neeg dawb huv dhau los ntawm lub txiaj ntsim Vaj Ntsuj Plig Dawb Huv thiab Nws lub hwj chim—peb ua neeg dawb huv ntxiv, zoo ntxiv, zoo li Vajtswv ntxiv. Los ntawm Yexus Khetos txoj kev txhiv dim thiab tus Vaj Ntsuj Plig Dawb Huv lub hwj chim uas hloov peb ua neeg dawb huv peb sab ntsuj plig thiaj li yug dua tshiab thaum peb ua raws li peb tej kev khi lus uas peb nrog Vajtswv khi ua ke (saib Mauxiyas 27:25–26).
Tus Ntsuj Plig Dawb Huv ntawm Kev Cog Lus
Peb kuj hu tus Vaj Ntsuj Plig Dawb Huv ua tus Ntsuj Plig Dawb Huv ntawm Kev Cog Lus (saib Lus Qhuab Qhia thiab Kev Khi Lus 88:3). Tus Vaj Ntsuj Plig Dawb Huv pom zoo hais tias cov kab ke pov thawj hwj uas peb txais thiab peb tej kev khi lus yeej yog tej uas Vajtswv pom zoo. Cov uas tus Ntsuj Plig Dawb Huv ntawm Kev Cog Lus tau muab khi yuav txais tag nrho txhua yam uas Leej Txiv muaj (saib Lus Qhuab Qhia thiab Kev Khi Lus 76:51–60; Efexus 1:13–14; Phau Qhia txog Vaj Lug Kub, “Ntsuj Plig Dawb Huv ntawm Kev Cog Lus”).
Tus Ntsuj Plig Dawb Huv ntawm Kev Cog Lus yuav tsum muab txhua txoj kab ke thiab kev khi lus khi kom thiaj li muaj tom qab lub neej no (saib Lus Qhuab Qhia thiab Kev Khi Lus 132:7, 18–19, 26). Txoj kev khi ntawd nyob ntawm seb peb puas rau siab ntseeg tsis tu tsis tseg.
Tej Txiaj Ntsim ntawm tus Ntsuj Plig
Tus Tswv muab tej txiaj ntsim ntawm tus Ntsuj Plig kom foom koob hmoov rau peb thiab siv kom foom koob hmoov rau lwm tus (saib Lus Qhuab Qhia thiab Kev Khi Lus 46:8–9, 26). Piv txwv hais tias, cov tub txib uas kawm ib yam lus tshiab txais tau lub txiaj ntsim hais lwm yam lus kom muab Vajtswv txoj kev pab rau lawv txawj hais lwm yam lus kom qhia tau lwm tus.
Twb piav txog tej lub txiaj ntsim ntawm tus Ntsuj Plig nyob hauv Maulaunais 10:8–18, Lus Qhuab Qhia thiab Kev Khi Lus 46:11–33, thiab 1 Kauleethaus 12:1–12. Tej nqe vaj lug kub no piav txog tej lub txiaj ntsim ntawm tus Ntsuj Plig xwb. Tej zaum tus Tswv yuav muab lwm yam txiaj ntsim rau peb nyob ntawm peb txoj kev rau siab ntseeg, peb tej kev xav tau, thiab tej yam uas lwm tus xav tau.
Tus Cawm Seej caw peb nrhiav tej lub txiaj ntsim ntawm sab ntsuj plig no (saib Lus Qhuab Qhia thiab Kev Khi Lus 46:8; 1 Kauleethaus 14:1, 12). Tej lub txiaj ntsim no yuav los ntawm kev thov Vajtswv, kev ntseeg, thiab kev siv zog—thiab raws li Vajtswv lub siab nyiam.
Petus thiab Yauhas tau ua li cas kom nrhiav tej lub txiaj ntsim ntawm sab ntsuj plig?
Vajtswv tau ua li cas kom teb lawv tej lus thov?
Koj kawm dab tsi txog koj txoj hauj lwm los ntawm zaj lus no?
Daim Duab
ib pawg thov Vajtswv
Tus Ntsuj Plig lub Hwj Chim Pab Neeg Hloov Siab Los Ntseeg
Kev hloov siab los ntseeg yog los ntawm tus Vaj Ntsuj Plig Dawb Huv lub hwj chim. Koj txoj hauj lwm yog kev pab lwm tus muaj tus Ntsuj Plig lub hwj chim hauv lawv lub neej. Nyob nram qab no muaj tej lub tswv yim kom pab koj ua li no.
Cia li nrhiav kom muaj tus Ntsuj Plig nrog nraim koj nyob los ntawm kev thov Vajtswv, kev tshawb nrhiav cov vaj lug kub, thiab kev ua raws li koj tej kev khi lus.
Cia li siv tus Ntsuj Plig thaum koj qhia txog tus Cawm Seej thiab kev Muab Txoj Moo Zoo Txum Tim Rov Qab Los. Cia li ua raws li tus Ntsuj Plig qhia kom hloov koj zaj lus thiaj li pab txhua tus neeg raws li lawv xav tau.
Ua tim khawv tias koj paub los ntawm tus Vaj Ntsuj Plig Dawb Huv lub hwj chim tias tej yam uas koj qhia muaj tseeb. Thaum koj ua tim khawv, tus Vaj Ntsuj Plig Dawb Huv yuav ua tim khawv rau lwm tus.
Cia li caw tib neeg ua tej yam, thiab txhawb nqa lawv kom ua raws li lawv tau cog lus lawm. Thaum tib neeg ua raws li lawv tau cog lus, lawv yuav muaj tus Vaj Ntsuj Plig Dawb Huv lub hwj chim ntxiv. Saib tshooj 11.
Nug tib neeg txog tej yam uas muaj los thaum lawv ua qhov uas koj tau caw lawv ua. Lawv txoj kev ntseeg yuav loj tuaj thaum lawv hloov siab lees txim, ua raws li cov lus txib, thiab ua raws li lawv tau cog lus. Pab lawv paub thaum tus Ntsuj Plig tshoov lawv lub siab.
Daim Duab
Thawj Tswj Hwm M. Russell Ballard
Thawj Tswj Hwm M. Russell Ballard tau qhia li no tias: “Kev hloov siab los ntseeg yeej los ntawm tus Ntsuj Plig lub hwj chim. Thaum tus Ntsuj Plig tshoov tib neeg lub siab, ces ua rau lawv hloov siab. Thaum tib neeg … hnov tus Ntsuj Plig tshoov lawv lub siab, los sis thaum lawv pom puav pheej uas qhia tias tus Tswv muaj lub siab hlub lawv, lawv txais kev txhawb nqa thiab lawv sab ntsuj plig muaj zog zuj zus thiab lawv txoj kev ntseeg Nws yuav loj tuaj. Tus Ntsuj Plig yeej yuav tshoov lawv lub siab li no thaum ib tug neeg txaus siab sim ua li tus Tswv tej lus [saib Amas 32:27]. Thaum peb ua li no ces ua rau peb xav tias txoj moo zoo muaj tseeb” (“Now Is the Time,” Ensign, Kaum Ib Hlis Ntuj 2000, 75).
Kev Kawm Koj tus Kheej Los Sis Nrog tus Khub
Kawm ib los sis ob peb nqe ntawm tej nqe vaj lug kub no. Thaum koj nyeem, cia li muaj ib lub siab xav to taub ib tug neeg xav li cas thaum nws hloov siab los ntseeg. Sau ntawv txog koj tej kev tshoov siab hauv koj phau ntawv ceev txog kev kawm. Nrog lwm tus tub txib thiab tus mej zeej sib tham txog tej yam uas koj kawm.
Kawm ib los sis ob peb nqe ntawm tej nqe vaj lug kub no. Thaum koj nyeem, cia li xav seb koj yuav ua li cas kom siv tus Ntsuj Plig lub hwj chim pab neeg hloov siab los ntseeg thaum koj qhia. Sau ntawv txog koj tej kev xav thiab tej kev tshoov siab hauv koj phau ntawv ceev txog kev kawm. Nrog lwm tus tub txib thiab tus mej zeej sib tham txog tej yam uas koj kawm.
Kom pab lwm tus neeg hloov siab los ntseeg, koj yuav qhia raws li tus Ntsuj Plig lub hwj chim (saib Lus Qhuab Qhia thiab Kev Khi Lus 50:13–14, 17–22). Tus Tswv tau hais tias, “Thiab tus Tswv yuav muab tus Ntsuj Plig rau nej los ntawm txoj kev thov Vajtswv nrog kev ntseeg; thiab yog nej tsis muaj tus Ntsuj Plig nej yuav tsum tsis txhob qhia” (Lus Qhuab Qhia thiab Kev Khi Lus 42:14).
Thaum koj thov Vajtswv pab koj qhia tib neeg, tus Vaj Ntsuj Plig Dawb Huv lub hwj chim yuav coj koj tej lus qhia “mus rau noob neej lub siab” (2 Nifais 33:1). Thaum koj qhia raws li tus Ntsuj Plig thiab lwm tus txais los ntawm tus Ntsuj Plig, ces “ib leeg [yuav] to taub ib leeg thiab puav leej txais kev txhawb nqa thiab xyiv fab ua ke (Lus Qhuab Qhia thiab Kev Khi Lus 50:22).
Thov Li Cas
Yexus tau qhia peb kom paub thov Vajtswv (saib Mathais 6:9–13; 3 Nifais 18:19). Mob siab thov thiab muaj siab xav ua raws li tej kev tshoov siab uas koj txais los ntawm tus Vaj Ntsuj Plig Dawb Huv. Yuav tsum txo hwj chim, thiab siv zog tsis tu tsis tseg kom thov Vajtswv tiag (saib Maulaunais 10:3–4; Lus Qhuab Qhia thiab Kev Khi Lus 8:10).
Ua Vajtswv tsaug txhua zaus koj thov. Qhov uas koj txhob txwm ua Vajtswv tsaug yuav pab koj paub tias Vajtswv muaj lub siab hlub koj npaum li cas hauv koj lub neej. Yuav qhib koj lub siab thiab pab koj txais kev tshoov siab.
Cia li thov “kawg siab kawg ntsws” kom txais tau kev siab hlub (Maulaunais 7:48). Siv lwm tus lub npe thaum koj thov Vajtswv pab lawv. Thov kom pab cov neeg uas koj qhia. Nrhiav kev tshoov siab kom paub tias koj yuav ua li cas kom caw lawv thiab pab lawv los cuag Yexus Khetos.
Kev Kawm Ntawv Koj tus Kheej
Kawm txog tus Tswv zaj lus thov Vajtswv nyob hauv Mathais 6:9–13. Nug koj tus kheej tej lus nug nram qab no, thiab sau ntawv txog tej kev tshoov siab uas koj txais nyob hauv koj phau ntawv ceev txog kev kawm.
Koj lub luag hauj lwm ua ib tug tub txib hloov koj tej lus thov Vajtswv li cas?
Koj tej lus thov Vajtswv puas qhia tias koj xav kom lawv lub neej tau koob hmoov?
Koj thov Vajtswv li cas kom muaj peev xwm kov yeej tej kev ntxias?
Koj thov Vajtswv li cas kom txais kev pab ntawm sab ntsuj plig thiab sab cev nqaij daim tawv?
Koj puas qhuas Vajtswv thaum koj thov Nws?
Thaum Twg Yuav Tsum Thov
Koj yuav tsum thov Vajtswv thaum twg? Tus Tswv hais tias, “Cia li mob siab nrhiav, thov Vajtswv tas mus li, thiab cia li ntseeg, ces txhua yam yuav ua hauj lwm ua ke kom zoo rau nej” (Lus Qhuab Qhia thiab Kev Khi Lus 90:24).
Tus Tswv caw koj siv sij hawm thaum nyob koj tus kheej kom thov Vajtswv: “Cia li nkag mus rau hauv nej chav tsev teev tiam, thiab … thov nej Leej Txiv” (3 Nifais 13:6; kuj saib nqe 7–13).
Thawj Tswj Hwm Gordon B. Hinckley qhia hais tias: “Txhua hnub thaum sawv ntxov … , cov tub txib yuav tsum txhos caug thiab thov tus Tswv kom lawv txawj hais lus thiab kom siv lawv foom koob hmoov rau cov neeg uas lawv yuav qhia. Yog lawv ua li no, ces yuav muaj ib txoj kev kaj tshiab los rau hauv lawv lub neej. Yuav haj yam muaj siab xav ua txoj hauj lwm no. Lawv yuav kawm hais tias, lawv yog tus Tswv cov tub qhe uas sawv Nws cev hais lus rau tib neeg” (“Missionary Service,” Thawj txoj Kev Sib Ntsib Cob Qhia cov Thawj Coj Nyob Thoob Plaws lub Ntiaj Teb, Ib Hlis Ntuj 11, 2003, 20).
Tso Siab rau Vajtswv Thaum Peb Thov Vajtswv
Qhov uas koj ntseeg Vajtswv txhais tias koj tso siab rau Nws. Koj tso siab rau Nws lub siab nyiam thiab lub sij hawm uas Nws teem tseg kom teb koj tej lus thov (saib Yaxayas 55:8–9). Thawj Tswj Hwm Dallin H. Oaks qhia tias:
“Peb txoj kev ntseeg muaj zog npaum li cas los, yeej yuav kom peb ua raws li tus uas peb ntseeg lub siab nyiam. Nco ntsoov qhov ntawd thaum koj xav tias Vajtswv tsis teb koj tej lus thov raws li txoj kev uas koj xav los sis lub sij hawm uas koj xav. Kev muab siab rau ntseeg tus Tswv Yexus Khetos los yeej yuav tsum ua raws li Vajtswv tus txheej txheem, ua raws li tus Tswv txoj kev zoo thiab lub siab nyiam thiab lub tswv yim thiab lub sij hawm uas Nws teem tseg. Thaum twg peb ntseeg thiab tso siab rau tus Tswv, peb muaj kev kaj siab lug thiab kev nyab xeeb hauv peb lub neej tiag” (“Kev Theej Txhoj thiab Kev Ntseeg,” Ensign, Plaub Hlis Ntuj 2010, 30).
Hais txog thaum tsis txais kev teb yus tej lus thov, Thawj Tswj Hwm Russell M. Nelson hais tias:
“Kuv paub yus xav li cas! Kuv paub tias yus ntshai thiab quaj npaum li cas thaum zoo li ntawd. Tiam sis kuv kuj paub tias Vajtswv yeej tsis tso peb tej lus thov tseg. Nws yeej zoo siab thaum peb muaj kev ntseeg. Kuv paub tias Leej Txiv Saum Ntuj Ceeb Tsheej uas muaj tswv yim tag nrho pom tau ntau dua li peb pom tau. Peb paub txog peb tej teeb meem thiab kev mob kev nkeeg hauv lub ntiaj teb no, tiam sis Nws paub txog peb txoj kev txawj hloov ua neeg uas tsis txawj tuag. Yog peb thov Vajtswv kom paub Nws lub siab nyiam thiab ua siab ntev thiab ua siab loj ua raws li Nws lub siab nyiam, ces raws li Nws txoj kev thiab lub siab nyiam Nws yuav kho peb zoo” (“Jesus Christ—the Master Healer,” Liahona, Kaum Ib Hlis Ntuj 2005, 86).
Daim Duab
Txoj Kev Mus rau Ema-us, los ntawm Greg Olsen
Kawm Kom Paub tus Ntsuj Plig tej Kev Tshoov Siab
Yeej yog ib qho tseem ceeb uas koj thiab cov neeg uas koj qhia yuav tsum kawm kom to taub thaum twg tus Ntsuj Plig qhia. Tus Ntsuj Plig yeej ib txwm hais lus ntsiag to qhia koj hauv koj lub siab lub ntsws thiab tej kev xav. Tus yaj saub Eliyas twb kawm tias tus Tswv lub suab tsis nyob hauv cov cua, tsis nyob hauv av qeeg, los sis tsis nyob hauv cov hluav taws—tiam sis yog “ib lub suab yau yau” (1 Vaj Ntxwv 19:12). Tsis yog “ib lub suab xob quaj,” tiam sis yog “ib lub suab uas meej mos muag kawg nkaus li, zoo li yog ib lub suab ntxhi,” thiab yog “lub suab [uas] chob txog ntua nruab siab” (Hilamas 5:30).
Tib neeg yeej ib leeg txawv ib leeg thaum hnov tus Ntsuj Plig tej lus. Txawm yog yus hnov tej lus no li cas los, cov vaj lug kub qhia peb kom paub thaum twg peb hnov tus Ntsuj Plig. Piv txwv hais tias, tus Ntsuj Plig yuav txhawb nqa koj thiab coj koj ua zoo. Nws yuav ua rau koj lub siab kaj. Nws yuav coj koj txo hwj chim thiab txiav txim raws li kev ncaj ncees. (Saib Lus Qhuab Qhia thiab Kev Khi Lus 11:12–14 thiab nqe lus “Kev Kawm Ntawv Koj tus Kheej” nyob hauv zaj lus no.)
Thaum nws teb lo lus nug hais tias “Peb yuav tsum ua li cas kom thiaj li paub tias tus Ntsuj plig tshoov peb lub siab?” Thawj Tswj Hwm Gordon B. Hinckley tau nyeem Maulaunais 7:13, 16–17. Ces nws hais tias:
“Thaum kawg mas txoj kev sim seb yeej yog li ntawd. Puas yaum nej ua zoo, txhawb nqa, muaj zog, ua qhov yog, ua siab zoo, ua siab dawb? Ces yeej yog Vajtswv tus Ntsuj Plig. …
“… Yog tias qhia kom nej ua zoo, ces yog los ntawm Vajtswv. Yog tias qhia kom nej ua phem, ces yog los ntawm tus dab phem. … Thiab yog tias nej ua qhov yog thiab ua neej raws li txoj kev yog, ces nej yeej yuav paub hauv nej lub siab tias tus Ntsuj Plig hais li cas rau nej.
“Peb paub thaum twg tus Ntsuj Plig tshoov peb lub siab los ntawm cov koob hmoov uas los ntawm tus Ntsuj Plig—tej yam uas ua rau peb kaj siab, uas txhawb nqa, uas zoo thiab txhawb peb lub siab thiab ua rau peb xav zoo dua thiab hais lus zoo dua thiab ua tej yam zoo dua yeej yog los ntawm Vajtswv tus Ntsuj Plig” (Teachings of Gordon B. Hinckley [1997], 260–61).
Thaum koj nrhiav thiab ua raws li tus Vaj Ntsuj Plig Dawb Huv qhia, koj txoj kev txawj paub thaum twg Nws qhia koj thiab to taub yuav loj zuj zus (saib 2 Nifais 28:30). Kev kawm kom to taub tus Ntsuj Plig lus yeej zoo li kev kawm ib yam lus tshiab. Yog ib tug txheej txheem uas yuav tsum rau siab ua thiab ua siab ntev ua.
Cia li nrhiav kom muaj tus Vaj Ntsuj Plig Dawb Huv coj koj kev kawg siab kawg ntsws. Yog tias koj xav txog lwm yam tas li, tej zaum koj yuav tsis hnov tus Ntsuj Plig tej lus ntxhi yau yau. Los sis tej zaum Nws yuav tos hais lus rau koj mus txog thaum koj xav txais Nws lub hwj huam thiab txo hwj chim muaj lub siab xav ua raws li Nws tej kev tshoov siab.
Muaj tej neeg hauv lub ntiaj teb yeej xav kom koj tsom ntsoov rau lawv lub suab. Tej lus no yeej yuav ua rau koj txais tsis taus tej kev tshoov siab tsuas yog koj muaj tus Ntsuj Plig nyob hauv koj lub siab xwb. Cia li nco txog tus Tswv tej lus ntuas: “Cia li ua siab tus thiab paub hais tias kuv yog Vajtswv” (Phau Ntawv Nkauj 46:10; kuj saib Lus Qhuab Qhia thiab Kev Khi Lus 101:16).
Daim Duab
Txwj Laug David A. Bednar
“Vajtswv siv ntau yam tus txheej txheem kom muab kev tshwm sim rau Nws cov tub thiab cov ntxhais, xws li tej kev xav hauv yus lub siab thiab yus lub hlwb, kev ua npau suav, … thiab kev tshoov siab. Tej lub sij hawm peb txais kiag kev tshwm sim uas muaj zog; tej lub sij hawm peb maj mam txais kev tshwm sim zuj zus tuaj. Kev txais, to taub, thiab ua raws li Vajtswv tej kev tshwm sim yog tej txiaj ntsim ntawm sab ntsuj plig es peb sawv daws yuav tsum xav tau thiab nrhiav raws li kev tsim nyog (David A. Bednar, “The Spirit of Revelation in the Work,” 2018 kev sib ntsib rau qhov chaw tshaj tawm txoj moo zoo cov thawj coj).
Kev Kawm Ntawv Koj tus Kheej
Cia li kawm tej nqe vaj lug kub nyob hauv daim phiaj no. Cia li xav txog tej lub sij hawm thaum koj xav txog los sis txais tej kev tshoov siab raws li piav hauv tej nqe vaj lug kub no. Thaum koj kawm thiab ua neej ntxiv, cia li sau lwm nqe vaj lug kub rau daim no. Cia li xav txog qhov uas koj yuav ua li cas siv tej ntsiab cai no kom pab lwm tus paub thiab hnov tus Ntsuj Plig.
Qhuab qhia tus xib hwm thiab cov tub ntxhais kawm ntawv.
Tso Siab rau tus Ntsuj Plig
Vim koj yog tus Tswv tus tub qhe, koj yuav tsum ua Nws txoj hauj lwm raws li Nws txoj kev thiab Nws lub hwj chim. Tus Yaj Saub Joseph Smith qhia hais tias “tsis muaj leej twg uas qhia tau Txoj Moo Zoo yog tsis muaj tus Vaj Ntsuj Plig Dawb Huv” (Teachings: Joseph Smith, 332).
Tso siab rau tus Ntsuj Plig kom coj koj ua txhua yam ntawm koj txoj hauj lwm no. Nws yuav pab koj to taub thiab tshoov koj lub siab. Nws yuav pab koj nrhiav tau neeg rau koj qhia tau thiab yuav ua rau koj muaj hwj chim qhia. Nws yuav pab koj thaum koj pab txhawb nqa cov mej zeej, cov mej zeej uas rov qab los, thiab cov neeg hloov siab los ntseeg lawv txoj kev ntseeg.
Cov tub txib ib txhia ntseeg lawv tus kheej. Lwm tus tsis tshua ntseeg li ntawd. Txo hwj chim ntseeg thiab tso siab rau Yexus Khetos, tsis txhob ntseeg koj tus kheej. Tso siab rau tus Ntsuj Plig es tsis txhob tso siab rau koj tej txuj ci thiab tej kev muaj peev xwm. Tus Vaj Ntsuj Plig Dawb Huv yuav ua rau koj txawj ua tej yam tshaj qhov koj ua tau koj tus kheej.
Kev Kawm Vaj Lug Kub
Kawm tej nqe vaj lug kub no thiab xav seb ua li cas tej nqe no teb tej lus nug tseem ceeb uas koj yuav tsum nug txhua hnub. Koj yuav ua dab tsi kom siv tej lus qhia hauv tej nqe no thaum koj nrhiav neeg, siv sij hawm npaj kev, thiab kawm ntawm koj tus kheej thiab nrog koj tus khub? Koj yuav ua li cas kom ua raws li tej nqe no thaum koj qhia, caw neeg ua raws li lawv tau cog lus, thiab rov qab xyuas seb lawv ua li cas?
Siv tej Lus uas Ntseeg Tau Kom Pom Zoo rau Koj tej Kev Tshoov Siab
Thaum koj thov Vajtswv kom tshoov koj lub siab, muab koj tej kev tshoov siab ntawm sab ntsuj plig piv rau cov vaj lug kub thiab cov yaj saub tej lus qhia. Tej kev tshoov siab los ntawm tus Ntsuj Plig yuav nrog tej yam no sib haum.
Nrhiav Kev Tshwm Sim Thaum Ua Koj txoj Hauj Lwm
Ua tib zoo kom paub tias tej kev xav uas koj txais nrog koj txoj hauj lwm sib haum. Tsuas yog Vajtswv hu koj muab txoj cai yog rau koj, tej kev tshoov siab los ntawm tus Ntsuj Plig yeej yuav tsis qhia kom koj ntuas los yog hais kom lawv hloov. Piv txwv hais tias, koj yuav tsis txais kev tshwm sim kom qhia ib tug npisov tias nws yuav tsum ua li cas thaum nws ua nws txoj hauj lwm uas Vajtswv hu nws ua.
Daim Duab
Lub Txiaj Ntsim txoj Kev Kaj
Paub Thaum Twg tus Ntsuj Plig Tshoov Koj lub Siab Tiag
Thawj Tswj Hwm Howard W. Hunter ntuas hais tias: “Cia kuv hais lus ceeb toom rau nej. … Kuv xav tias yog peb tsis xyuam xim … , peb yuav pib sim hnov qhov cuav uas tsis yog los ntawm tus Tswv tus Ntsuj Plig tiag tiag thaum siv tej kev uas tsis tsim nyog thiab ntxias taus neeg. Kuv txhawj thaum tib neeg hais tias qhov uas yus quaj los sis los kua muag qhia tias yus muaj tus Ntsuj Plig nrog yus nyob. Tus Tswv tus Ntsuj Plig yeej yuav ua rau yus muaj tej kev xav hauv lub siab lub ntsws uas muaj zog heev, thiab ua rau yus los kua muag, tiam sis qhov uas yus ua li ntawd yeej tsis qhia tias tus Ntsuj Plig nyob ntawd” (The Teachings of Howard W. Hunter [1997], 184).
Tsis Txhob Yuam tej Yam ntawm Sab Ntsuj Plig
Yeej yuam tsis taus tej yam ntawm sab ntsuj plig. Koj yeej muaj tau tus cwj pwm thiab ua tej yam uas caw tus Ntsuj Plig los, thiab koj npaj tau koj tus kheej, tiam sis koj qhia tsis tau thaum twg los sis ua li cas tej kev tshoov siab yuav los rau koj. Ua siab ntev thiab ntseeg tias koj yuav txais tej yam uas koj xav tau thaum twg txog lub sij hawm yog lawm.
Ceev tej Yam uas Los ntawm tus Ntsuj Plig Kom Dawb Huv
Vim yog yog ib tug tub txib, tej zaum koj yuav paub txog tej yam ntawm sab ntsuj plig ntau dua li koj paub ua ntej hauv koj lub neej. Tej yam no yeej dawb ceev thiab twb muab rau koj kom txhawb nqa koj, qhia koj, los sis kho koj.
Ntau yam no los yeej zoo dua yog koj tsis qhia leej twg. Cia li qhia thaum twg tus Ntsuj Plig qhia koj tias koj yuav foom koob hmoov rau lwm tus neeg yog koj ua li ntawd (saib Amas 12:9; Lus Qhuab Qhia thiab Kev Khi Lus 63:64; 84:73).
Tej lub Sij Hawm Siv Koj txoj Kev Txiav Txim Zoo
Tej lub sij hawm peb xav kom tus Ntsuj Plig coj peb mus ua txhua yam. Tiam sis, feem ntau tus Tswv xav kom peb ua raws li peb txoj kev txiav txim zoo (saib Lus Qhuab Qhia thiab Kev Khi Lus 60:5; 61:22; 62:5). Thawj Tswj Hwm Dallin H. Oaks qhia tias:
“Qhov uas yus xav kom tus Tswv coj yus mus yeej yog ib yam zoo, tiam sis yus kuj yuav tsum to taub tias peb Leej Txiv Saum Ntuj Ceeb Tsheej cia peb txiav txim siab txog ntau yam. Kev txiav txim siab yeej yog ib yam uas pab peb hloov ua zoo uas peb yuav tsum kawm hauv lub neej no. Tib neeg uas cia tus Tswv txiav txim txog txhua yam thiab thov Vajtswv kom txais kev tshwm sim txog txhua yam uas yuav tsum xaiv mas ntshe tsis ntev ces yuav muaj ib lub sij hawm thaum lawv thov Vajtswv coj lawv kev thiab lawv tsis txais tej lus teb. Piv txwv hais tias, nyaj yuav muaj li no ntau zaus thaum twg tej yam uas yuav tsum xaiv tsis tshua muaj nqis ntau los sis xaiv ob yam los yeej tsim nyog.
“Peb yuav tsum xav hauv peb lub siab, siv tej kev txawj tawm tswv yim raws li tus uas Tsim peb tau muab rau peb. Ces peb yuav tsum thov Vajtswv kom coj peb thiab ua raws li tej lus ntawd yog peb txais tau. Yog peb tsis txais tej lus kom coj peb kev, peb yuav tsum ua raws li peb txoj kev txiav txim zoo. Tib neeg uas yuam kom txais kev tshwm sim txog tej yam uas tus Tswv tau xaiv kom tsis txhob coj peb ua los tej zaum yuav tawm ib lub tswv yim los ntawm lawv txoj kev xav los sis qhov cuav, los sis tej zaum lawv yuav txais tau kev teb los ntawm kev tshwm sim cuav” (“Our Strengths Can Become Our Downfall,” Ensign, Kaum Hli Ntuj 1994, 13–14).
Kev Kawm Vaj Lug Kub
Kev tso sib rau tus Ntsuj Plig yeej tseem ceeb heev tus Tswv thiaj li ceeb toom peb kom tsis txhob xyeej los sis tso tus Ntsuj Plig tseg. Koj kawm dab tsi los ntawm tej nqe vaj lug kub no?
Sau txoj kab muab ib daim ntawv faib ua ob sab. Sau cov lus rau ib sab hais tias “Tus Tswv Tau Ua Dab Tsi” thiab lwm sab los sau “Lihais Los Nifais Tau Ua Dab Tsi.” Nyeem zaj dab neeg txog lub Liyahaunas thiab rab hneev uas piam tas lawm (1 Nifais 16:9–31) los sis zaj dab neeg txog Nifais thaum nws ua ib lub nkoj (1 Nifais 17:7–16; 18:1–6). Sau tej yam los ntawm zaj dab neeg rau sab yog. Cia li xav txog qhov uas zaj dab neeg no qhia dab tsi rau koj txog kev tshoov siab.
Cia li nrhiav hauv koj phau ntawv ceev xwm txheej thiab nrhiav tej lub sij hawm thaum tus Ntsuj Plig tau coj koj mus los sis koj txais tau ib lub txiaj ntsim ntawm tus Ntsuj Plig. Cia li xav txog qhov uas tau muaj li no thaum twg, qhov twg, thiab vim li cas. Tus Tswv tau ua li cas qhia koj tias Nws txhais tes coj qhov ntawd? Ua rau koj xav li cas? Kev nco txog tej yam no yuav pab koj paub thaum tus Ntsuj Plig nyob.
Cia li kawm Amas 33:1–12 thiab Amas 34:17–31. Amas thiab Amulej teb tej lus nug twg? (Nyeem Amas 33:1–2.) Lawv tau ua li cas kom teb tej lus nug no? Nkawd tau qhia dab tsi?
Tus Tswv tau cog lus tias tus Ntsuj Plig yuav ua ntau yam tseem ceeb kom coj peb kev. Thaum koj nyeem tej nqe vaj lug kub no, cia li xav txog tej yam ntawm koj txoj hauj lwm uas yuav tsum muaj tus Ntsuj Plig coj koj kev ua. Tej lub ntsiab cai nyob hauv tej nqe vaj lug kub no yuav ua li cas pab koj txoj kev kawm ntawv thiab kev kawm nrog koj tus khub? thaum muaj koog chaw pawg sab laj, thaj chaw tej rooj sab laj, kev sib ntsib muab neeg ua kev cai raus dej, thiab lwm yam kev sib ntsib?
Sib tham txog tej lus thov Vajtswv uas neb hais thaum thov ua ke. Tus Vaj Ntsuj Plig Dawb Huv puas coj neb hais tej lus ntawd? Neb puas tau txais kev teb rau neb tej lus thov thaum neb thov ua ke? Thaum neb thov Vajtswv ua ke, neb puas:
Ntseeg tias Vajtswv yuav muab tej yam uas neb thov raws li kev ncaj ncees thiab raws li Nws lub siab nyiam?
Lees hais tias Vajtswv tau pab neb thiab ua Nws tsaug vim Nws teb neb tej lus thov?
Thov Vajtswv pab neeg siv lawv tej npe thiab xav txog tej yam uas lawv xav tau?
Ib leeg thov Vajtswv pab ib leeg thiab kom tus Ntsuj Plig coj neb kev?
To taub thaum twg Vajtswv tau teb neb tej lus thov?
Thov Vajtswv nrog kev muaj siab xav ua raws li tej kev tshoov siab uas neb yuav txais?
Cia li sib tham seb neb yuav ua li cas kom muaj tus Ntsuj Plig ntxiv.
Sib tham seb tib neeg hais li cas piav txog tus Vaj Ntsuj Plig Dawb Huv lub hwj huam. Sau ntawv nyob hauv neb phau ntawv ceev txog kev kawm txog tej lus uas cov neeg uas neb qhia tau hais txog tus Ntsuj Plig. Neb yuav ua li cas kom pab lwm tus paub thaum twg lawv hnov lub hwj huam dawb ceev no?
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Raws li tsim nyog ua, hais kom cov tub txib hais ib zaj dab neeg los sis lub sij hawm uas lawv hnov nyob hauv kev sib ntsib hais lus tim khawv, thaum lawv qhia, los sis lwm lub sij hawm. Tej zaj lus thiab tej yam uas lwm tus neeg qhia yeej pab tau nej ntseeg zuj zus thiab paub tias muaj tus Ntsuj Plig lub hwj huam ntau zaus thiab muab rau neeg coob.
Cia li thov kom cov tub txib hais tej zaj lus txog tus Vaj Ntsuj Plig Dawb Huv ntiag tug hauj lwm thiab lub hwj chim.
Sib tham txog qhov uas thaum nej qhia tias nej ris Vajtswv txiaj ces qhov ntawd pab nej pom tej yam me thiab tej yam tseem ceeb uas tus Tswv ua kom foom koob hmoov rau nej (saib Ethaws 3:5; Lus Qhuab Qhia thiab Kev Khi Lus 59:21). Sib tham txog tej yam nej ua tau kom qhia tias nej ris Vajtswv txiaj.
Xav seb puas xav nug ib tug mej zeej tshiab kom hais txog thaum nws txais kev tshoov siab los ntawm tus Ntsuj Plig thaum nws kawm txog lub Koom Txoos. Thov tus neeg ntawd hais txog tej yam uas nws xav tias tsim nyog qhia txog.
Tej zaum koj yuav xav thov cov tub txib hais txog tej lub sij hawm tsim nyog uas lawv hnov tus Ntsuj Plig nyob hauv lawv tsab ntawv uas sau rau koj txhua lub lim tiam.
Thaum ua xam phaj los sis sib tham nrog lawv, tej lub sij hawm cia li thov cov tub txib kom hais txog lawv tej zaj lus thov Vajtswv txhua sawv ntxov thiab tsaus ntuj. Yog tias xav tau, nrog lawv sib tham txog qhov uas lawv yuav ua li cas kom lawv tej lus thov Vajtswv muaj nqis zuj zus.
Nug cov tub txib seb lawv pab cov neeg uas lawv qhia kom hnov thiab paub tus Ntsuj Plig.