Nrhiav Kev Muaj Khetos tej Cwj Pwm

Thaum Nws pib ua Nws txoj hauj lwm qhuab qhia hauv lub ntiaj teb no, Yexus tau taug kev ntawm ntug Dej Kalilais thiab hu rau ob tug neeg nuv ntse, Petus thiab Adales. Nws hais tias, “Los nrog kuv mus, thiab kuv yuav qhia kom [nej] paub mus nrhiav neeg” (Mathais 4:19; kuj saib Malakaus 1:17).

Tus Tswv kuj tau hu koj los ua Nws txoj hauj lwm, thiab Nws kuj caw koj los nrog Nws mus. “Nej yuav tsum ua neeg zoo li cas?” Nws nug. “Kuv hais tseeb rau nej tias, zoo tib yam li kuv” (3 Nifais 27:27).

Tej tshooj nyob hauv Qhia Kuv txoj Moo Zoo qhia txog tej yam uas koj yuav tsum ua thaum koj ua ib tug tub txib, xws li kev kawm, kev qhia, thiab kev cuab hom phiaj. Tiam sis qhov tseem ceeb ib yam yog qhov uas koj yog leej twg thiab koj hloov los ua neeg zoo li cas. Tshooj no yuav qhia txog qhov no.

Cov vaj lug kub piav txog Khetos tej cwj pwm uas koj yuav tsum nrhiav thaum koj ua tub txib thiab tas koj lub neej. Khetos tej cwj pwm yeej yog tej yam uas qhia tias tus Cawm Seej coj li cas los sis ua li cas. Tshooj no piav txog ib txhia ntawm tej cwj pwm ntawd. Cia li kawm txog tej no thiab cov vaj lug kub uas qhia txog tej no. Nrhiav Khetos tej cwj pwm ntxiv thaum koj kawm lwm nqe vaj lug kub thiab.

Daim Duab

Sawv thiab Mus Kev, los ntawm Simon Dewey

Kev Ntseeg Yexus Khetos

Yog tias kev ntseeg yuav ua rau koj txais tau kev cawm seej, koj yuav tsum ntseeg Yexus Khetos tiag (saib Tes Hauj Lwm 4:10–12; Mauxiyas 3:17; Maulaunais 7:24–26). Thaum koj ntseeg Yexus Khetos, koj tso siab rau Nws vim Nws yog Vajtswv Tib Leeg Tub. Koj ntseeg tias thaum koj hloov siab lees txim, koj yuav txais kev zam txim rau koj tej kev txhaum los ntawm Nws txoj kev txi theej txhoj thiab tus Vaj Ntsuj Plig Dawb Huv yuav muab koj hloov los ua neeg dawb huv (saib 3 Nifais 27:16, 20).

Kev ntseeg tsis yog kev paub zoo tag nrho txog tej yam. Tiam sis, yeej yog qhov uas tus Ntsuj Plig qhia txog tej yam uas koj tsis pom tiam sis muaj tseeb. (Saib Amas 32:21.)

Koj siv koj txoj kev ntseeg thaum koj ua tej yam. Tej yam uas koj ua ntawd yog kev coj raws li tus Cawm Seej tej lus qhia thiab tus yam ntxwv. Tej yam xws li kev pab lwm tus thiab kev pab lawv xaiv coj raws li Yexus Khetos. Koj kuj siv koj txoj kev ntseeg los ntawm kev rau siab, kev hloov siab lees txim, thiab kev hlub.

Kev ntseeg yog txoj ntsiab cai ntawm kev muaj hwj chim. Thaum koj muab siab rau ntseeg Yexus Khetos, koj yuav tau koob hmoov txais Nws lub hwj chim raws li tej xwm txheej uas koj raug. Koj yuav txais tau tej txuj ci tseem ceeb raws li tus Tswv lub siab nyiam. (Saib Yakhauj 4:4–7; Maulaunais 7:33; 10:7.)

Koj txoj kev ntseeg Yexus Khetos yuav loj tuaj thaum koj paub Nws thiab Nws tej lus qhia zoo dua. Koj txoj kev ntseeg yuav loj tuaj thaum koj kawm cov vaj lug kub, thov Vajtswv, thiab ua raws li cov lus txib. Kev ua xyem xyav thiab kev txhaum tab kaum kev ntseeg.

Daim Duab

Txwj Laug Neil L. Andersen

“Kev ntseeg tsis yog ib txoj kev xav xwb; yog ib txoj kev txiav txim. Thaum peb thov Vajtswv, kawm vaj lug kub, mloog lus, thiab ua raws li peb tej kev khi lus, peb txhawb peb txoj kev ntseeg thiab ua kom peb txoj kev ntseeg muaj zog. Peb zaj lus tim khawv txog tus Cawm Seej thiab Nws txoj hauj lwm hauv hnub nyoog kawg no yog qhov uas peb siv kom txiav txim txog txhua yam. Ces, thaum peb raug tej xwm txheej hauv lub neej no, … peb muaj zog txaus taug txoj kev yog” (Neil L. Andersen, “It’s True, Isn’t It? Then What Else Matters?” Liyahaunas, Tsib Hlis Ntuj 2007, 74).

Daim Duab

Kev Cia Siab uas Sawv Rov Los, los ntawm Joseph Brickey

Kev Cia Siab

Kev cia siab tsis yog kev kheev lam tau muaj ib yam dab tsi. Tiam sis, yog kev tso siab uas kav ntev, muaj kev ntseeg Khetos ua lub hauv paus, tso siab hais tias Vajtswv yuav ua raws li Nws tau cog lus rau koj (saib Maulaunais 7:42). Yog kev xav tias yuav tau “tej yam zoo” dhau los ntawm Yexus Khetos (Henplais 9:11).

Koj lub hauv paus ntawm kev cia siab yog Yexus Khetos. Tus yaj saub Maumoos nug hais tias, “[Koj] yuav cia siab rau yam dab tsi?” Ces nws teb hais tias “[Koj] yuav tsum muaj kev cia siab los ntawm Khetos txoj kev theej txhoj thiab lub hwj chim ntawm nws txoj kev sawv rov los, cia siab tias yuav muab [koj] tsa sawv rau txoj sia nyob mus ib txhis thiab muaj li no los twb vim yog [koj] txoj kev ntseeg nws raws li txoj kev cog lus” (Maulaunais 7:41; saib nqe 40–43).

Thaum koj cia siab ntsoov Yexus Khetos, Nws cog lus rau koj tias txhua yam yuav ua hauj lwm ua ke kom zoo rau koj (saib Lus Qhuab Qhia thiab Kev Khi Lus 90:24). Kev cia siab no yuav pab koj nyiaj mus nrog kev ntseeg thaum koj raug tej kev sim siab. Kuj yuav pab koj kawm los ntawm tej kev sim siab thiab ua rau koj sab ntsuj plig muaj peev xwm nyiaj mus thiab muaj zog. Kev cia siab rau Yexus Khetos yog ib qhov uas txheem rau koj sab ntsuj plig (saib Ethaws 12:4).

Kev cia siab ua rau koj ntseeg tias Vajtswv yuav txhawb nqa tej yam ncaj ncees uas koj rau siab ua (saib Lus Qhuab Qhia thiab Kev Khi Lus 123:17).

Ib txoj kev kom kev cia siab loj tuaj yog kev hloov siab lees txim. Qhov uas yus hloov ua neeg huv thiab txais kev zam txim dhau los ntawm Yexus Khetos txoj kev theej txhoj ua rau yus rov qab muaj kev cia siab ntxiv (saib Amas 22:16).

Nifais ntuas hais tias, “Nej yuav tsum sib zog mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus” (2 Nifais 31:20). Thaum koj ua neej raws li txoj moo zoo, koj yuav haj yam “muaj kev cia siab rau Vajtswv heev zuj zus” (Loos 15:13).

Daim Duab

Thawj Tswj Hwm Dieter F. Uchtdorf

“Thaum peb raug kev nyuaj siab txhawj xeeb, peb yuav cia siab ntsoov hais tias txhua yam yuav ‘ua hauj lwm ua ke kom zoo rau [peb]’ thaum peb ua raws li Vajtswv cov yaj saub tej lus qhia. Kev cia siab rau Vajtswv, Nws txoj kev zoo, thiab Nws lub hwj chim ua rau peb ua siab loj thaum raug tej teeb meem nyaj heev thiab muab dag zog rau cov uas raug kev ntshai, kev ua xyem xyav, thiab kev poob siab” (Dieter F. Uchtdorf, “The Infinite Power of Hope,” Liahona, Kaum Ib Hlis Ntuj 2008, 23).

Daim Duab

Khetos thiab cov Me Nyuam, los ntawm Minerva Teichert

Kev Siab Hlub thiab Kev Hlub

Muaj ib tug neeg nug Yexus hais tias, “Vajtswv txoj kev cai nqe twg yog nqe uas tseem ceeb dua ntais huv tib si?” Nws teb hais tias, “Nej yuav tsum hlub tus Tswv nej tus Vajtswv kawg siab kawg ntsws, kawg plab kawg plawv. Nqe no thiaj yog nqe uas tseem ceeb dua ntais. Thiab nqe ob uas tseem ceeb hais li no hais tias: Hlub koj tej kwv tij zej zog ib yam li koj hlub koj lub cev” (Matthew 22:36–39).

Kev siab hlub yog “Khetos txoj kev hlub uas dawb paug” (Maulaunais 7:47). Yog Vajtswv txoj kev hlub uas kav ib txhis rau tag nrho Nws cov me nyuam.

Tus yaj saub Maumoos qhia tias “Cia li thov Leej Txiv kawg siab kawg ntsws, xwv kom nej yuav muaj txoj kev hlub no puv npo,” (Maulaunais 7:48). Thaum koj thov Vajtswv kom muaj lub siab hlub hauv koj lub siab puv npo, koj yuav paub txog Vajtswv txoj kev hlub. Koj txoj kev hlub tib neeg yuav loj zuj zus, thiab koj yuav xav ntsoov tias koj xav kom lawv zoo siab mus ib txhis li. Koj yuav saib lawv yog Vajtswv cov me nyuam uas muaj peev xwm hloov los ua neeg zoo li Nws, thiab koj yuav ua hauj lwm kom pab lawv.

Thaum koj thov Vajtswv kom muaj lub txiaj ntsim lub siab hlub, koj yuav tsis tshua xav txog tej yam tsis zoo xws li kev npau taws los sis kev khib siab. Koj yuav tsis tshua xav txiav txim rau lwm tus los sis cem lawv. Koj yuav xav sim to taub lawv thiab vim li cas lawv xav zoo li lawv xav. Koj yuav ua siab ntev thiab sim pab neeg thaum lawv raug teeb meem los sis poob siab. (Saib Maulaunais 7:45.)

Kev siab hlub, ib yam li kev ntseeg, ua rau yus ua tej yam. Koj ua rau koj txoj kev siab hlub muaj zog thaum koj pab lwm tus.

Kev siab hlub yeej hloov yus lub neej. Leej Txiv Saum Ntuj Ceeb Tsheej muab rau “tag nrho cov uas coj raws li nws Leej Tub, Yexus Khetos, tiag tiag; xwv kom [peb] yuav hloov los ua Vajtswv cov tub; xwv kom thaum nws yuav tshwm los peb yuav zoo li nws, … xwv kom Vajtswv yuav ua rau peb hloov ua neeg huv ib yam li nws twb huv” (Maulaunais 7:48).

Daim Duab

Exethaws (Niam Vaj Ntxwv Exethaws), los ntawm Minerva Teichert

Tsim Txiaj

Tej Nqe Kev Ntseeg hais “peb ntseeg tias yuav tsum … tsim txiaj” (1:13). Kev tsim txiaj yog tus txheej txheem xav thiab coj raws li tej kev cai dawb huv. Yog kev ua ncaj ncees rau Vajtswv thiab lwm tus. Ib feem ntawm kev tsim txiaj yog kev siv zog ua neeg dawb huv ntawm sab cev nqaij daim tawv thiab sab ntsuj plig.

Kev tsim txiaj yeej pib nyob hauv koj tej kev xav. Tus Tswv hais tias, “Cia kev tsim txiaj txhawb koj tej kev xav kom tsis tu ncua” (Lus Qhuab Qhia thiab Kev Khi Lus 121:45). Tsom ntsoov rau tej kev xav uas ncaj ncees thiab zoo. Tso tej kev xav tsis tsim nyog tseg tsis txhob xav ntsoov.

Koj lub siab yeej zoo li ib lub sam thiaj hauv qhov chaw ua yeeb yam. Yog tias koj cia tej kev xav uas tsis tsim nyog nyob hauv lub sam thiaj hauv koj lub siab, ntshe koj haj yam yuav ua txhaum. Yog tias koj xav txog tej yam tsim nyog hauv koj lub siab, ces nyaj koj yuav muab siab npuab tej yam tsim txiaj thiab tso tej yam phem tseg. Muaj tswv yim txog tej yam uas koj cia nkag hauv thiab nyob hauv lub sam thiaj ntawm koj lub siab.

Thaum koj siv zog ua neej raws li kev tsim txiaj, koj “txoj kev tso siab yuav muaj zog tuaj nyob ntawm Vajtswv xub ntiag; thiab … tus Vaj Ntsuj Plig Dawb Huv yuav ua koj tus khub tsis tu tsis tseg” (Lus Qhuab Qhia thiab Kev Khi Lus 121:45–46).

Kev coj ncaj ncees yeej los ntawm txoj lus txib thib ib kom hlub Vajtswv (saib Mathais 22:37). Vim koj hlub Vajtswv, koj ua ncaj rau Nws txhua lub sij hawm. Ib yam li Hilamas cov tub, koj “taug kev ncaj ncees rau nws” (Amas 53:21).

Thaum koj coj ncaj ncees, koj to taub tias muaj qhov ncaj thiab qhov txhaum thiab muaj qhov tseeb tiag tiag—yog Vajtswv cov lus tseeb. Koj siv koj txoj kev ywj siab xaiv raws li Vajtswv cov lus tseeb, thiab koj hloov siab lees txim sai sai thaum koj ua tsis yog. Qhov uas koj xaiv xav txog—thiab tej yam uas koj ua thaum koj ntseeg tias tsis muaj leej twg saib—yeej yog ib txoj kev ntsuas koj txoj kev coj ncaj.

Daim Duab

Daniyees Nyob hauv lub Qhov Tsov los ntawm Clark Kelley Price

Kev coj ncaj txhais tias koj tsis tso koj tej kev cai los sis coj li cas kom lwm tus qhuas los sis lees yuav koj. Koj ua qhov yog txawm yog lwm tus thuam koj txoj kev xav ua raws li Vajtswv hais (saib 1 Nifais 8:24–28). Koj ua ncaj ua ncees nyob hauv txhua qhov chaw, tsis hais thaum koj nyob online.

Thaum koj coj ncaj, koj ua raws li koj tej kev khi lus nrog Vajtswv thiab ua raws li tej yam ncaj ncees uas koj tau cog lus rau lwm tus thiab.

Kev coj ncaj yog kev ua siab ncaj rau Vajtswv, koj tus kheej, koj cov thawj coj, thiab lwm tus. Koj tsis dag, nyiag khoom, khib lav, los sis ntxias neeg. Thaum koj ua txhaum, koj lav ris rau qhov ntawd thiab hloov siab lees txim thiab tsis txhob hais tias koj tsis muaj txim los sis daws koj tus kheej.

Thaum koj ua neej coj ncaj, koj yuav nyob kaj siab lug thiab saib taus koj tus kheej. Tus Tswv thiab lwm tus yuav tso siab rau koj.

Daim Duab

Muab Kev Tsim Txiaj Ntxiv rau Nej txoj Kev Ntseeg, los ntawm Walter Rane

Kev Txawj Ntse

Tus Tswv ntuas hais tias, “Nrhiav kev kawm, twb yog los ntawm kev kawm ntawv thiab los ntawm kev ntseeg” (Lus Qhuab Qhia thiab Kev Khi Lus 88:118). Thaum koj ua tub txib thiab mus tas koj lub neej, cia li nrhiav kev txawj ntse, qhov tseem ceeb yog kev txawj ntse los ntawm sab ntsuj plig.

Kawm cov vaj lug kub txhua hnub, tsis hais cov yaj saub tej lus los yog. Thaum koj kawm thiab thov Vajtswv, nrhiav kev pab teb tej lus nug, kho tej teeb meem, thiab muaj tej cib fim. Nrhiav tej nqe vaj lug kub uas koj siv tau thaum koj qhia thiab teb tej lus nug txog txoj moo zoo.

Thaum koj rau siab kawm thiab thov Vajtswv, tus Vaj Ntsuj Plig Dawb Huv yuav qhib koj lub siab. Nws yuav qhia koj thiab pab koj to taub. Nws yuav pab koj ua raws li tej lus qhia nyob hauv cov vaj lug kub thiab cov yaj saub tej lus hauv koj lub neej. Ib yam Nifais, koj hais tau tias:

“Kuv zoo siab kawg rau cov vaj lug kub, thiab kuv lub siab xav ntsoov txog cov vaj lug kub. … Saib seb, kuv zoo siab kawg rau tej uas yog tus Tswv li; thiab kuv lub siab yeej xav ntsoov tsis tu ncua rau tej uas kuv tau pom thiab tau hnov” (2 Nifais 4:15–16).

Daim Duab

tshav ntuj ua rau pom tus neeg tus duab

Ua Siab Ntev

Kev ua siab ntev yog kev txawj tso siab rau Vajtswv thaum twg yuav tsum tos ntsoov, raug kev tawm tsam, los sis raug txom nyem. Los ntawm koj txoj kev ntseeg, koj tso siab rau lub sij hawm uas Vajtswv teem tseg tias yuav txais Nws cov koob hmoov uas Nws cog lus rau koj.

Thaum koj ua siab ntev, koj saib lub neej raws li lub zeem muag uas nyob mus ib txhis li. Koj tsis xav tias koj yuav txais cov koob hmoov los sis tej yam twg tam sim no. Yuav muaj raws li koj tej kev xav ncaj ncees “ib nqe lus ntxiv rau ib nqe lus, … muab me ntsis nim no thiab muab me ntsis lwm hnub” (2 Nifais 28:30). Muaj tej kev xav ncaj ncees uas tsis muaj txog thaum tom qab lub neej no.

Kev ua siab ntev tsis nyob twj ywm los sis lam tsis ua hauj lwm xwb. Yeej yog kev “zoo siab hlo ua txhua yam uas [koj] muaj hwj chim ua tau” thaum koj ua hauj lwm rau Vajtswv (Lus Qhuab Qhia thiab Kev Khi Lus 123:17). Koj cog, ywg dej rau, thiab tu lub noob, ces Vajtswv ua kom loj tuaj “tsis ntev” (Amas 32:42; kuj saib 1 Kauleethaus 3:6–8). Koj nrog Vajtswv koom tes ua hauj lwm, ntseeg tias thaum koj ua koj feem hauj lwm lawm, Nws yuav ua Nws txoj hauj lwm tiav raws li lub sij hawm Nws teem tseg thiab raws li lwm tus txoj kev ywj siab xaiv.

Kev ua siab ntev txhais tias thaum twg hloov tsis taus, ces koj ua siab loj, zoo siab, thiab muaj kev ntseeg lees qhov ntawd.

Ua siab ntev rau lwm tus, tsis hais koj cov khub thiab cov uas koj pab. Ua siab ntev rau koj tus kheej ib yam thiab. Siv zog kom ua zoo tshaj tiam sis nco ntsoov tias koj yuav kawm ib theem mus ib theem.

Ib yam li Khetos lwm tus cwj pwm, kev ua siab ntev yog ib tug txheej txheem uas yuav tsum kawm tas koj lub neej. Kev ua siab ntev yuav kho tau koj lub siab thiab cov uas nyob ib puag ncig koj.

Daim Duab

Thawj Tswj Hwm Dieter F. Uchtdorf

“Kev ua siab ntev yog txoj kev tos ntsoov thiab nyiaj kom dhau. Kev ua siab ntev txhais hais tias peb ua txhua yam peb ua tau—ua hauj lwm, cia siab, muaj kev ntseeg; rau siab nyiaj tej teeb meem, txawm yog peb tseem tsis tau tej yam uas peb lub siab xav tau. Kev ua siab ntev tsis yog kev nyiaj xwb; yog kev nyiaj kom dhau!” (Dieter F. Uchtdorf, “Continue in Patience,” Liahona, Tsib Hlis Ntuj 2010, 57).

Daim Duab

Ua Haum Vajtswv Siab (Yexus Thov Vajtswv Nrog Nws Niam), los ntawm Simon Dewey

Txo Hwj Chim

Kev txo hwj chim yog kev txaus siab ywj rau tus Tswv lub siab nyiam. Yog kev txaus siab qhuas Nws rau tej yam twg uas tau ua lawm. Yog kev txaus siab mloog lus (saib Lus Qhuab Qhia thiab Kev Khi Lus 136:32). Kev txo hwj chim yog kev ris Vajtswv txiaj rau Nws cov koob hmoov thiab kev lees hais tias koj xav tau Nws txoj kev pab. Nws pab cov uas txo hwj chim.

Kev txo hwj chim yog ib lub cim txog qhov uas yus sab ntsuj plig muaj zog, tsis yog muaj kev qaug zog. Kev txo hwj chim yog lub hauv paus tseem ceeb ntawm yus sab ntsuj plig kev muag zog (saib Ethaws 12:27).

Thaum koj txo hwj chim tso siab rau tus Tswv, koj paub tias Nws cov lus txib yuav pab koj tau tej yam zoo. Koj ntseeg tias koj ua tau txhua yam uas Nws hais kom koj ua yog tias koj cia siab rau Nws. Koj kuj txaus siab tso siab rau Nws cov tub qhe thiab ua raws li lawv cov lus ntuas. Kev txo hwj chim yuav pab koj mloog lus, khwv ua hauj lwm, thiab pab lwm tus.

Qhov fab ntxeev ntawm kev txo hwj chim yog kev muab hlob. Kev muab hlob txhais tias yus tso siab rau yus tus kheej tshaj yus tso siab rau Vajtswv. Kuj txhais hais tias yus saib tej yam ntawm lub ntiaj teb tseem ceeb dua tej yam ntawm Vajtswv. Kev muab hlob yog kev sib tw; cov uas muab hlob xav kom muaj ntxiv tshaj thiab xav tias lawv zoo dua lwm tus. Kev muab hlob yog ib qho uas dawm ko taw.

Daim Duab

tus thwj tim Povlauj qhia ib pawg neeg

Rau Siab

Kev rau siab yog kev siv zog tsis tu tsis tseg. Thaum ua cov tub txib txoj hauj lwm, kev rau siab yog ib txoj kev qhia tias koj hlub tus Tswv. Thaum koj rau siab, koj yuav muaj kev xyiv fab thiab txaus siab ua tus Tswv txoj hauj lwm (saib Amas 26:16).

Kev rau siab yog kev siv koj txoj kev ywj siab xaiv ua ntau yam zoo thiab tsis tos cov thawj coj qhia koj tias koj yuav tsum ua dab tsi (saib Lus Qhuab Qhia thiab Kev Khi Lus 58:27–29).

Ua zoo tsis tu tsis tseg tsis hais thaum nyuaj rau koj los sis koj nkees. Tiam sis koj to taub tias yuav tsum so kom koj thiaj li tsis “khiav nrawm dua li qhov [koj] muaj zog” (Mauxiyas 4:27).

Tsom ntsoov rau tus Tswv thiab Nws txoj hauj lwm kawg siab kawg ntsws. Tsis txhob ua tej yam uas ua rau koj tsis nco qab txog tej yam uas tseem ceeb rau koj ua. Siv sij hawm thiab siv zog ua tej yam uas yuav pab koj cheeb tsam thiab pab cov neeg uas koj qhia.

Daim Duab

Thawj Tswj Hwm Henry B. Eyring

“Nov yog tus Tswv lub Koom Txoos. Nws tau hu peb thiab tso siab rau peb txawm yog Nws paub tias peb muaj tej kev qaug zog. Nws paub peb yuav raug tej kev sim siab. Thaum peb rau siab ua hauj lwm thiab dhau los ntawm Nws txoj Kev Theej Txhoj, peb yuav xav tau tej yam uas Nws xav tau thiab ua tus neeg uas peb yuav tsum ua kom foom koob hmoov rau cov uas peb pab. Thaum peb ua hauj lwm pab Nws ntev txaus thiab rau siab ua, ces peb yuav hloov siab. Peb yuav hloov los ua neeg zoo li Nws ntxiv” (Henry B. Eyring, “Rau Siab Ua Txhua Yam,” Liahona, Tsib Hlis Ntuj 2010, 62–63).

Daim Duab

Ob Txhiab tus Tub Rog Hluas (Ob Txhiab tus Tub Rog Hluas), los ntawm Arnold Friberg

Mloog Lus

Koj txoj kev ua tub txib yeej yog los ntawm qhov uas koj tau nrog Vajtswv khi lus thaum koj ua kev cai raus dej thiab nyob hauv lub tuam tsev. Thaum koj tau txais ob txog kab ke ntawm kev cai raus dej thiab vaj txiaj ntsim, koj tau khi lus tias koj yuav ua raws li Nws cov lus txib.

Vaj Ntxwv Npeyamis hais tias: “Kuv thov kom nej xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig; thiab yog lawv rau siab ntseeg mus kom txog thaum kawg Vajtswv yuav txais lawv mus rau hauv ceeb tsheej, xwv kom lawv thiaj yuav nrog Vajtswv nyob hauv qhov chaw uas muaj kev zoo siab tsis txawj kawg” (Mauxiyas 2:41).

Kev ua raws li cov lus txib yog kev qhia Leej Txiv Saum Ntuj Ceeb Tsheej thiab Yexus Khetos tias koj hlub Nkawd (saib Yauhas 14:15). Yexus hais tias, “Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws” (Yauhas 15:10).

Cia li ua raws li tej kev cai nyob hauv Kev Cai Ua Tub Txib ntawm Yexus Khetos cov Thwj Tim. Ua raws li koj qhov chaw tshaj tawm txoj moo zoo tus thawj tswj hwm thiab nws tus poj niam tej lus ntuas thaum lawv qhia kom koj ua raws li kev ncaj ncees.

Daim Duab

Txwj Laug Dale G. Renlund

“Txoj kev mloog lus yog ib yam uas peb xaiv tau. Tus Cawm Seej tau qhia meej txog qhov no. Raws li hais nyob hauv Joseph Smith Kev Txhais Lukas 14:28, Yexus qhia hais tias, ‘Yog li ntawd, txiav kiag txim siab, hais tias nej yuav ua tej yam uas kuv yuav qhia nej, thiab txib kom nej ua.’ Yeej yooj yim li ntawd. … Thaum peb ua li ntawd, ces peb sab ntsuj plig txoj kev muaj zog yuav loj tuaj. Peb yuav tsis nkim tej yam uas Vajtswv muab rau peb thiab tsis txhob ua yuam kev hauv peb lub neej uas ua rau peb raug puas tsuaj” (Dale G. Renlund, “Constructing Spiritual Stability” [Brigham Young University kev sib ntsib hawm Vajtswv, Cuaj Hlis Ntuj 16, 2014], 2, speeches.byu.edu).

Daim Duab

Khetos thiab tus Neeg Nuv Ntse (Koj Hlub Kuv tshaj Lawv cov No Los), los ntawm J. Kirk Richards

Tus Txheej Txheej Hloov Los Ua Neeg Zoo Li Yexus Khetos Ntxiv

Tus txheej txheem no yuav pab koj kawm thiab txais tau tej cwj pwm uas piav txog hauv tshooj no thiab lwm tus cwj pwm uas nyob hauv cov vaj lug kub:

• Cia li xaiv tus cwj pwm uas koj xav tau.

• Sau ib zaj lus piav txog tus cwj pwm ntawd.

• Sau thiab kawm txog tej nqe vaj lug kub uas qhia txog tus cwj pwm ntawd los sis muaj neeg coj yam ntxwv txog tus cwj pwm ntawd.

• Sau ntawv txog koj tej kev tshoov siab thiab tej kev xav.

• Cuab hom phiaj thiab npaj kev kom muaj tus cwj pwm ntxiv.

• Thov Vajtswv kom pab koj kawm txog thiab txais tau tus cwj pwm ntawd.

• Tej lub sij hawm ntsuas seb koj ua zoo li cas.

Daim Duab

Txwj Laug Jeffrey R. Holland

“Tus Tswv foom koob hmoov rau cov uas xav ua zoo dua, cov uas lees hais tias lawv yuav tsum muaj cov lus txib thiab sim ua raws li cov lus txib ntawd, cov uas saib tej cwj pwm Khetos rau nqi thiab sim ua raws li tej ntawd. Yog tias nej ua yuam kev thaum nej ua li ntawd, txhua leej txhua tus yeej zoo ib yam; tus Cawm Seej nrog nraim nej nyob kom pab nej. … Tsis ntev nej yuav muaj kev vam meej uas nej xav tau” (Jeffrey R. Holland, “Tag Kis tus Tswv Yuav Ua tej Txuj Ci Tseem Ceeb rau Nej Pom,” Liyahaunas, Tsib Hlis Ntuj 2016, 126).

Lub hom phiaj ntawm yam ntxim ua no yog kom pab koj nrhiav cib fim rau koj sab ntsuj plig loj tuaj. Cia li nyeem txhua yam nyob nram qab no. Txiav txim siab seb kab lus ntawd puas hais tseeb txog koj, thiab xaiv kev teb uas tsim nyog. Sau tias koj tau teb li cas nyob hauv koj phau ntawv ceev txog kev kawm.

Tsis muaj leej twg uas teb tau “txhua lub sij hawm” rau tej yam no. Yuav tsum siv tas lub neej no kom yus sab ntsuj plig loj tuaj. Yog vim li ntawd qhov no muaj nqis heev—yog vim muaj ntau lub cib fim suav tsis txheeb kom loj hlob tuaj thiab txais cov koob hmoov uas los ntawm kev hloov ua zoo zuj zus.

Cia li txaus siab pib ntawm qhov uas koj nyob tam sim no. Cog lus rau koj tus kheej tias koj yuav ua hauj lwm ntawm sab ntsuj plig kom loj hlob tuaj. Nrhiav Vajtswv txoj kev pab. Thaum twg ua yuam kev, cia li tso siab rau Nws ntseeg hais tias Nws yuav pab koj. Thaum koj thov Vajtswv, thov kom Nws qhia koj tias yuav tsum tsom ntsoov rau tej cwj pwm twg thaum koj ua tub txib.